Dili-Komandu Polisia Nasional Timor-Leste (PNTL) fo tomada de posse ba Xefe Investigasaun Criminial, Xefe Departamentu Justisa no Xefe Departamentu Administrasaun e Planeamentu hodi okupa pojisaun ne’ebe mamuk atu halo servisu seguransa.
Komandante Jeral PNTL Komisariu Polisia Julio da Costa Hornay hateten Knaar ne’ebe maka Superintendente nain 3 simu ne’e laos servisu foun ba sira tanba durante tinan 16 kaer kargu Komandu lubuk ida hanesan iha Unidade, Departamentu no Servisu Operasionais, Nia hato’o asuntu ne’e iha nia deskursu ba serimonia tomada de posse iha Kuartel Jeral Kaikoli Dili (22/12).
Komandante Jeral haktuirtan katak Komandu tau fiar ba Superintendente nain 3 ne’e koloka imi atu bele servisu ho diak hodi dezenvolve departamentu Justisa, Servisu Investigasaun Kriminal no Departamentu Administrasaun no Planeamentu no ejiji ba Ofisiais sira atu fo kontribuisaun servisu no sakrifisiu.
Superior nain 3 ne’e maka simu tomada de posse maka Xefe Servisu Investigasaun Criminal Superintendente Jorge Nelson Amaro Monteiro troka Superintendente Ludgerio Picancio Madeira Lay, Xefe Departamentu Justisa Superintendente Orlando Gomes no Xefe Departamentu Administrasaun e Planeamentu Superintendente Ludgerio Picancio Madeira Lay antes ne’e Superintendente Asistente Jose da Costa (matebian) maka asumi kargu ne’e.
“ Hau husu atu servisu ho fuan, laran no neon hanesan Timor oan ho espiritu nasionalismu para atu servi povu no nasaun ho diak”.
Serimonia tomada de posse ne’e prezidi husi Komandante Jeral akompana husi Segundu Komandante Jeral no partisipa husi Ofisiais Superior PNTL. Media PNTL
