Dili, saudozu ajente Polísia Nasional Timor Leste (PNTL) Fridolino de Oliveira Amaral hetan promosaun devisa ba Ajente Prinsipal husi Komandu PNTL. Matebian mate hafoin hetan insidente iha parte Surikmas, iha loron 01 fulan Janeiru 2017. Durante periodu tinan foun matebian halo seguransa iha Centro Formasaun Polísia (CFP) Comoro no hafoin ne fila ba uma hodi rezulta matebian hetan insidente.
Tuir despaxu númeru 01/CG-PNTL/I/2017 husi Komandu Jerál PNTL haktuir Promosaun ba Titúlo Postu hodi konsidera ajente Fridolino de Oliveira Amaral ninia servisu prestadu ba iha PNTL durante tinan 4 fulan 10 nu’udar membru iha CFP, nune’e promove nia husi devisa Ajente ba Ajente Prinsipal.
Komandante Centro Formasaun Polísia Superintensdente Arquimino Ramos ne’ebe representa Komandu Jerál PNTL iha serimonia funeral hateten Komandu PNTL no mós Komandu CFP sente triste tanba lakon ninia membru ajente nee’ebe maka durante ne’e didika nia an tomak ho disiplina no kriativu hodi kontribui ba iha CFP.
“Ba ezizensia ne’ebe familia iha kona-ba insidente ne’ebe akontese ba ajente Fridolino nia mate, iha investigasaun sei lao hela, rezultadu autopsia foin orseik maka konklui, ita hotu sei hein prosesu ida ne’e no autoridade judisial maka sei fó sai nia rezultadu ikus”, tenik Komandante CFP.
Superintensdente Arquimino Ramos hatutan tan katak PNTL iha obrigasaun atu ajuda Ministeriu Públiku, Prokurador sira ne’ebe maka tutela ba kazu ne’e, reprezenta Estadu Timor Leste hodi halo investigasaun klean para atu hatene lolos insidente ne’ebe maka rezulta ajente Fridolino nia mate hodi hein rezultadu ikus husi Tribunal.
Entretantu, João Amaral nu’udar aman hakiak husi matebian ne’e iha ninia liafuan representa familia hato’o preukupasaun ba iha Komandu PNTL atu oinsa bele hare’e futuru husi oan no fen ne’ebe matebian husik hela.
Fridolino de Oliveira Amaral moris iha Suai-Camnasa iha loron 28-11-1987 oan ikun husi maun alin lima, aman Jose Oliveira no inan Felismina Maria de Araújo. Matebian mate husik hela oan feto ida ho naran Michela no ferik oan ho naran Adelia Jacinta Menezes da Silva ne’ebe ho kondisaun etadu( isin rua). Matebian hahu’u ninia edukasaun formal Primaria iha Eskola Basiku Fatumeta husi tinan 1993-1998 no Pre Sekundaria no Sekundaria iha Eskola Santa Madalena de Canossa iha tinan 2003-2008. Iha tinan 2011 saudozu tuir teste polísia no pasa hodi tama iha PNTL. Iha 27 Fevereiro 2012 tama iha Centro Formasaun da Polísia nu’udar Ajente Rekruta. Iha iha loron 11 fulan Fevereiro 2013 saudozu hetan Juramento no Graduasaun hanesan membru PNTL no hetan devisa hanesan Ajente. Hafoin Graduasaun, saudozu hetan kolokasaun iha gabinete CFP, Janeiru 2014muda ba iha fatin Casa de Guarda no ikus mai iha tinan 2015 to nia mate hetan kolokasuan iha departamentu Rekursu Humanu CFP nian.
Media PNTL.
