Dili, Komandu Polísia Nasional Timor-Leste (PNTL) liu husi Komandu Operasaun Nasional realiza enkontru ida kona-ba Avaliasaun Seguransa Ba Eleisaun Antesipada 2018 ne’ebe partisipa husi Komandu PNTL Munisipiu hotu inklui Komandante Unidade sira.
Komandante Jerál PNTL Komisariu Polísia Julio da Costa Hornay ne’ebe halo abertura iha enkontru ne’e hateten enkontru refere hanesan planu ida ne’ebe prepara husi Komandu Operasaun hodi konvida Komandu munisipiu sira hotu inklui Komandante Unidade sira hodi halo avaliasaun ba servisu ne’ebe Komandante sira halo iha terenu ba seguransa Eleisaun Antesipada liu ba.
“Iha avaliasaun ida ne’e, kada Komandante sira hato’o informasaun, vantajen no desvantajen, susesu, difikuldade saida maka sira hasoru iha terenu durante seguransa ba eleisaun ida ne’e, nune’e Komandante Operasaun bele halo resumu ida aprezenta ba Komandu atu nune’e próximu aktividade ba seguransa nian ita bele konsidera, hadia, hato’o no hatama ba iha programa ba prosesu desenvolvimentu iha futuru mai, iha oitavu governu mai”, tenik Komandante Jerál PNTL ne’e.
Komisariu Polísia Julio da Costa Hornay subliña liu tan katak iha enkontru ne’e kada Komandante sira sei hato’o saida deit maka sai difikuldade ne’ebe sira hasoru iha sira nia munisipiu durante tempu kampaña no eleisaun liu ba, atu nune’e Komandu Operasaun bele halo resumu hodi koloka ba iha planu annual ba desenvolvimentu instituisaun ninian.
“Kona-ba orsamentu, sétimu governu Konstitusional fó apoiu liu-liu kustu operasaun ba membrus PNTL tomak ho Komandu FALINTIL Forsa Defeza Timor-Leste (F-FDTL) tomak ne’ebe hala’o kna’ar seguransa ba eleisaun antesipada, ida ne’e motiva tebes membrus PNTL no F-FDTL liu-liu Komandu rua ne’e hodi hala’o sira nia misaun, ita espera katak governu hanoin nafatin difikuldade sira ne’ebe maka Forsa Defesa no Seguransa infrenta ne’e, hodi konsidera sai preoridade ba oitavu governu Konstitusional nune’e bele desenvolve institusaun rua ne’e sai diak liu tan atu nune’e sira bele hala’o sira nia misaun ne’e ho efetivu no efisiente ba povu doben Timor-Leste ida ne’e”, esplika na’in ulun PNTL ne’e.
Iha fatin hanesan, Komandante Operasaun Superintendente Xefe Henrique da Costa iha ninia aprezentasaun ba enkontru ne’e koalia katak iha tinan 2017 ita liu tiha ona eventu importante rua maka hanesan Elesiaun Presidensial no Eleisaun Parlamentar, eventu bo’ot rua ne’e maske foti energia barak husi ita bo’ot sira hotu maibé konsege hakat liu ho susesu hodi lori Prezidente Repúblika ba iha Aitarak Laran, Deputadu sira hakat ba Uma Fukun Parlamentu Nasional no mós hahoris Sétimu Governu Konstitusional.
“Parlamentu Nasional no Sétimu Governu Konstitusional la konsege hala’o sira mandatu to’o tinan lima (5) no ikus mai tenke hakat ba Eleisaun Antesipada (EA) no EA refere hanesan buat foun ida iha Timor-Leste maibé asuntu seguransa ita hala’o ho maneira espesial oituan, espesial tanba ita nia estratéjia maka aktividade prevensaun barak liu do que ita hala’o servisu represaun ninian maibé la signifika katak ita la halo aktividade represaun polísia ninian”, hateten Komandante Operasaun ne’e.
Superintendente Xefe Henrique da Costa koalia tan katak esforsu maka’as ne’ebe maka Komandante munusipiu sira halo iha eleisaun antesipada parlamentar ninian, eleisaun prezidensial no mós eleisaun 2017 nian, esforsu tomak ne’ene ita bo’ot sira fó ninia resultadu maka agora dadaun hare’e katak povu bele tuir kampaña, partisipa iha votasaun livre no ema hotu moris iha seguru nia laran.
Partisipa iha enkontru ne’e Komandante Jerál PNTL, parseiru desenvolvimentu TLPDP (Timor Leste Police Development Program), Komandante PNTL munisipiu 13, Komandante Unidade inklui Komandante Servisu Informasaun Polísia no Servisu Investigasaun Kriminal.
Media PNTL.
