Dili, Hodi komemora Festa Demokrasia Eleisaun Parlamentar tinan 2023, Komandu Polísia Nasional Timor-Leste (PNTL) sexta-feira (19/05) ne’e hala’o serimonia Formatura Jerál Deslokasaun Seguransa ba munisipiu 14.
Komandante Jerál PNTL Komisariu Jerál Polísia Henrique da Costa iha ninia diskursu ba serimonia ne’ebe hala’o iha Komandu Unidade Espesial (UEP) Bairo-Pite hateten ohin ita hamutuk iha fatin ida ne’e hodi prepara ita nia efetivu atu nune’e ba apoiu seguransa iha munisipiu sira. Hahu’u husi loron 19 fulan Abril to’o loron 19 fulan Maiu, ita fó ona ita nia esforsu tomak hodi garante kampaña ba eleisaun ninian lao ho susesu.
 IMG_4051
“Hanesan Komandante Jerál no Segundu Komandante Jerál hakarak hato’o parabéns ba esforsu tomak ne’ebe mak imi idak-idak fó, ba Komandante sira imi nia lideransa hodi maneja no organiza seguransa ba iha kampaña ne’e, PNTL hanesan forsa seguransa ida ho nia misaun atu defende legalidade demokratiku, garante seguransa ba sidadaun sira, bens no proteje direitu sidadaun sira nian tuir termu ne’ebe estabelese iha Konstituisaun RDTL artigu 147 no Lei sira seluk”, tenik Komandante Jerál PNTL ne’e.
Komisariu Jerál Polísia ne’e salienta tan katak ita mós iha Diretiva konjunta ho Nu.001-MD-MI/GM/IV/2023 ne’ebe maka asina husi Ministru Interior no Ministru Defesa iha loron 3 fulan Abril tinan 2023 ne’ebe fó forsa ba PNTL liu husi apoiu ne’ebe fó husi ita nia parseiru F-FDTL tanba hola parte mós apoiu ba servisu seguransa ninian. Nune’e mós iha ona Ordem Operasaun ba Eleisaun Parlamentar nian ho Nu.142/CO-PNTL/V/2023 hodi haforsa ita nia planu ita terenu tuir idak-idak kondisaun geografika no estratejia hodi bele asegura tuir planu no intensaun Komandu Jerál nian.
347103719_791778765886810_8929774055243505942_n
“Husi referensia ne’ebe temi iha leten, ita mos hetan akompañamentu husi Observador sira ne’ebe maka mai husi Nasional no Internasional ne’ebe hatudu katak mundu internasional akompaña hela ita nia prosesu hirak ne’e tanba ne’e husu atu imi hotu mantein disiplina, profesionalizmu ne’ebe ita kuda ona hodi gaña konfiansa mundu internasional iha prosesu demokratiku ida ne’e”, Komisariu Jerál Polísia ne’e.
Autoridade másimu intituisaun seguransa ne’e salienta tan katak hanesan Komandante Jerál hakark apela ba estrutura tomak iha Komandu Jerál to’o munisipiu, atu hatudu ita nia responsabilidade ida ne’ebe maka forte liu tan hodi servisu maka’as ho koordenasaun ita nia parseiru sira, karik nesesariu iha situasaun difisil no mai ita atu kontribui dala ida tan hodi hatudu saida maka ita halo ona iha eleisaun presidensial no situasaun ne’ebe hakmatek. Atu nune’e ita nia komunidade sira bele ezerse sira nia direitu ho seguru no hakmatek, laiha ameasa husi ema seluk iha eleisaun parlamentar ne;ebe maka sei akontese iha loron 21 fulan Maiu tinan 2023.
Membru hirak ne’ebe maka ohin halo deslokasaun hodi apoiu seguransa ba iha munisipiu kompostu husi Kuartél Jerál, UEP, Unidade Patrullamentu Fronteira (UPF), Unidade Polísia Marítima (UPM), Centro Formação Polícia (CFP), hodi fó tan apoiu ba iha Komandu Munisipiu hodi koloka iha Sentu Votasaun.
Partisipa iha serimonia ne’e Komandante Jerál, Komandante Komandu Operasaun, Komandante Komandu Administrasaun, Inspetur Jerál, Komandante Komandu PNTL Munisipiu 14, Xefe Departamentu, Xefe Servisu sira Komandu PNTL nian. Media PNTL.