349179581_902268017508663_7882134632066889311_n
Dili, Komandu Polísia Nasional Timor-Leste (PNTL) liu husi Departamentu Investigasaun Kriminal (DIK) finaliza ona prosesu investigasaun ba kazu sidadaun Indonezia ho inisial V.A.G. tinan 62 ne’ebe iha loron 21 fulan Maiu tinan 2023 tenta atu partisipa iha Eleisaun Parlamentar iha munisipiu Likisa, oras ne’e dadaun sidadaun refere iha ona Prizaun Preventiva.
Liu husi konferensia imprensa kuarta-feira (24/05) ne’e Xefe DIK PNTL Superintendente Xefe Jorge Monteiro akompaña husi Xefe Relasaun Públika PNTL Superintendente Xefe Arnaldo Araújo, relata prosesu ikus ba kazu sidadaun Indoneziu refere katak Komandu PNTL munisipiu Likisa konsege halo prosesu indentifikasaun hafoin ida ne’e sira (Komandu PNTL munisipiu Likisa) komunika mai Servisu DIK PNTL nian, hodi orienta ekipa Servisu Polísia Femenina ninian hodi bele atende kazu ida ne’e.
“Hafoin ita nia ekipa to’o iha munisipiu Likisa, sira konsege transporte sidadaun Indonezia ne’ebe maka tenta atu vota iha Eleisaun Parlamentar iha munisipiu Likisa, ita lori mai iha Investigasaun Kriminal, ita komunika ho Ministeriu Públiku (MP) ho Prokurador Titular de Prosesu, ita halo nia prosesu iha âmbitu Prosesu Fraglante Délitu”, informa Xefe DIK PNTL ne’e.
Superintendente Xefe ne’e afirma tan katak hafoin halo Prosesu Fraglante Délitu, klaru ita halo prosesu indentifikasaun hafoin ita halo detensaun ba pesoal refere iha oras 72 nia laran no remata ida ne’e, ita kontinua hodi aprezenta ba iha Tribunal Distrital Dili hodi tuir prosedimentu Primeiru Interogatoriu ne’ebe hala’o iha loron 23 fulan Maiu tinan 2023 no kontinua iha dadersan.
“Husi rezultadu Primeiru Interogatoriu ne’e, ita nia Tribunal Distrital Dili deside hodi ita nia sidadaun refere ne’e nia tama iha Prizaun Preventiva, hafoin dezisaun ida ne’e ita nia ekipa PNTL ne’ebe kompostu husi Polísia Femenina sira ezekuta dezisaun Tribunal ne’e hodi ita nia sidadaun refere ba iha Prizaun Bekora hodi kumpri nia Prizaun Preventiva”, tenik Superintendente Xefe ne’e.
Xefe DIK PNTL ne’e salienta tan katak sidadaun refere nasionalidade husi nasaun Indonesia, maibe nia naturalidade iha Timor, signifika katak nia moris no bo’ot iha Timor maibé nia hili sai hanesan sidadaun Indonezia. Sidadaun refere laos maka primeira véz halo tentativa atu partisipa iha eleisaun parlamentar iha tinan 2023 ninian, maibé husi prosesu identifikasaun sira ne’ebe maka parte PNTL halo katak iha tinan 2018 sidadaun refere mós tama mai Timor hodi partisipa iha eleisaun prezidensial.
Iha tinan 2022, sidadaun refere konsege mai fila fali, nafatin partisipa iha eleisaun prezidensial. Iha tinan tuir mai 2023, sidadaun refere tama nafatin mai atu partisipa iha eleisaun parlamentar, maibé ita nia Polísia sira konsege identifika.
Sidadaun Estrangeiru Nain Rua Tenta Atu Partisipa Iha Eleisaun Parlamentar Iha Munisipiu Bobonaro Relasiona ho sidadaun estrangeiru na’in rua husi nasaun viziñu ne’ebe maka hola parte iha Eleisaun Parlamentar Iha Munisipiu Bobonaro, PNTL liu husi Servisu Investigasaun Kriminal iha nível munisipiu inisia no asegura ona nia prosesu.
“Prosesu inisiu ne’e lao ona nune’e mós prosesu identifikasaun asegura ona no nia prosesu ita finaliza ona iha parte investigasaun Polísia ninian hodi entrega no rezista ona ba iha Ministeriu Públiku (MP) regiaun Bobonaro nian ho nia númeru NUC/0003/2023/Bobonaro”, esplika Xefe DIK PNTL Superintendente Xefe Jorge Monteiro.
Superintendente Xefe ne’e afirma tan katak nafatin iha munisipiu Bobonaro, iha fiskais husi partidu politiku balun ne’ebe maka tenta atu vota dala rua, PNTL munisipiu Bobonaro konsege halo identifikasaun no konsege halo prosesu investigasaun inisiu, kazu aktual oras ne’e dadaun entrega ona ba iha MP ho númeru NUC/0004/2023/Bobonaro. Media PNTL.