IMG_0790

Dili, Komandu Polísia Nasional Timor-Leste (PNTL) kuarta-feira (21/04) ne’e inagura postu polísia nian ida iha area Suku Bairo-Pite ne’ebe maka ninia konstrusaun hala’o husi Kompañia Timor Holding.

Komandante Komandu Administrasaun Superintendente Xefe José Soares ne’ebe maka reprezenta Komandu Jerál PNTL iha serimonia inagurasaun ne’e hateten lori Komandu nia naran hakarak manifesta boa vontade ba Kompañia Timor Holding ne’ebe maka ho voluntáriu, iha vontade diak apoiu PNTL hodi rehabilita Postu ida ne’e.

“Maske ita nia situasaun Timor ho orsamentu ne’ebe lao, maske difisil maibé kompañia hatudu nafatin vontade diak, voluntáriu no hanesan Timor oan ba PNTL; esforsu no aproximasaun ne’ebe maka Komandu Jerál halo ho kompañia iha momentu ne’eba no parte kompañia rasik prontu atu apoiu PNTL”, tenik Komandante Komandu Administrasaun PNTL ne’e.

IMG_0767

Superintendente Xefe akresenta tan katak apoiu ida ne’e laos apoiu dahuluk no dala ikus hanesan Instituisaun Estadu ida, dala balun ho orsamentu ne’ebe la kobra hotu, hanesan Timor oan ita parseiru nafatin oinsa maka ita atu servisu hamutuk hodi garante estabilidade iha kapital Dili, ida ne’e parte ida ita bo’ot sira nia kontribuisaun ba PNTL no Estadu Timor-Leste.

“Agradese mós ba Xefe Aldeia ne’ebe maka ho prontidaun mantein nafatin fatin ida ne’e hodi atribui ba PNTL atu nune’e ita bele utiliza fatin ida ne’e ho diak hodi garante estabilidade, kontrola sirkulasaun transporte iha suku ida ne’e, hakarak hato’o ba Komandu PNTL munisipiu Dili katak fatin ida ne’e pertensia ba patrimoniu PNTL ninian, ita bo’ot sira maka sei utiliza, kuida ida ne’e ho kondisaun diak nafatin, iha vizibilidade diak ba ita nia membru no komunidade sira iha fatin ida ne’e”, hakotu Superintendente Xefe ne’e.

Entretantu reprezentante Diretór Kompañia Timor Holding Joel Ribeiro hateten parte kompañia pronto nafatin iha tempu saida deit atu fó apoiu ba sé deit desde ho momentu ida ne’e fó benefisiu ba komunidade.

“Hari’I kedas desde tinan lima liu ba husi Kompañia Timor Holding sempre fó apoiu to’o iha munisipiu sira, maibé ami maka lakoi atu tau apoiu hirak ne’ebe ami halo atu públiku hatene hanesan fó sai iha Televizaun tanba bainhira ita halo buat ida la presiza ema atu hatene, importante ba ami parte kompañia maka oinsa atu ita bele suporta malu”, hateten reprezentante Kompañia Timor Holding ne’e.

Hola parte iha serimonia inagurasaun ne’e maka Komandante Komandu Administrasaun Superintendente Xefe José Soares, Segundu Komandante PNTL munisipiu Dili, Xefe Aldeia ne’ebe reprezenta Xefe Suku hanesan mós Autoridade Lokal. Hafoin parte kompañia entrega postu polísia ne’e ba Komandu PNTL, Komandante Komandu Administrasaun entrega hikas ba parte Komandu PNTL munisipiu Dili atu bele uitliza.

Media PNTL.