Dili, Relasiona ho Insidente ida ne’ebe maka akontese iha Kuarentena Airportu Covalima ne’ebe maka hakanek médiku ida, Komandu Polísia Munisipiu Covalima detein ona suspeitu balun ne’ebe maka involve iha insidente refere.
Porta Voz Komandu PNTL Superintendente Xefe Arnaldo Araujo tersa-feira (20/04) ne’e esplika kronologia husi insidente ne’ebe maka mosu iha loron 17 fulan Abril tinan ne’e oras 15:00 iha ne’ebe ekipa husi Ministeriu Saúde munisipiu Covalima lori resultadu teste Swab ba maluk sira ne’ebe maka hala’o hela Kuarentena iha Airportu Covalima. Iha ne’eba deteta katak maluk ida maka hetan Pozitivu, maibé sidadaun balun iha Kuarentena laran ladun satisfaz ho rezultadu ne’ebe iha no komesa hatudu asaun asaltu ba ekipa Saúde. Tanba tuir sira tansa maka ema na’in ida deit maka hetan rezultadu Pozitivu maibé sira seluk rezultadu negativu.
“Ho ida ne’e maka maluk balun husi pasiente COVID-19 nian ida maka halo reasaun hasoru ekipa Saúde ida ne’e hodi hakanek médiku ida, hafoin ida ne’e PNTL munisipiu Covalima imediatamente halo kedas atuasaun ba iha insidente refere”, tenik Porta Voz Komandu PNTL ne’e.
Superintendente Xefe ne’e afirma tan katak oras ne’e dadaun PNTL munisipiu Covalima detein ona suspeitu na’in ida ne’ebe halo reasaun iha insidente ne’e hodi halo prosesu investigasaun tuir mai.
“Hakarak hato’o ba komunidade tomak, atu ita hotu kontinua respeita regras ne’ebe maka Ministeriu Saúde fó sai hanesan mantein distansia sosial, fase liman bebeik no uza mascara wainhira sai husi uma, kontinua mantein ita nia imunidade atu labele hetan kualkér moras; agora dadaun mós pesoal liña frente sira mós hahu’u ona simu Vasina Astrazaneca ba dose dahuluk nian atu prevene hetan moras COVID-19”, apela Xefe Gabinete Relasaun Públika PNTL ne’e.
Media PNTL.
