Dili, Komandu Polísia Nasional Timor-Leste (PNTL) hamutuk ho Asosiasaun Esposa/Esposo Polísia Nasional Timor-Leste (AESPNTL) servisu hamutuk ho parseria Fundasaun Alola liu husi Programa HALIKU (Hau Hili Atu Kura) no Ministeriu Saúde liu husi Departamentu Moras La Hadaet (Non CDC), tersa-feira (24/10) ne’e hala’o workshop ho tema “Kankru Susun No Kankru Serviku, no Komemorasaun Pink October” ba esposa PNTL no Polísia Femenina sira atu partilla koñesimentu ba prevensaun no tratamentu ba Kankru Susun no Kankru Serviku.
Prezidente AESPNTL Manuela de Araújo iha ninia intervensaun ba serimonia ne’ebe hala’o iha Auditorium CFP hateten lori Asosiasaun nia naran agradese tebes ba Komandu PNTL no Ministeriu Saúde liu-liu Departamentu Non CDC nian bele realiza ona workshop ida ne’e hodi bele fahe informasaun kona-ba moras Kankru Susun no Kankru Serviku ba esposa no mós femenina PNTL sira.
“AESPNTL hari’I ho misaun no vizaun ida katak asosiasaun ne’e iha hodi bele fó apoiu ba servisu parseiru hanesan kaben husi membru PNTL ida nian liu husi akrtividade barak hanesan sosial iha ne’ebe ami hala’o asaun karidade ba iha membru PNTL sira ne’ebe presiza ami nia tulun, iha mós programa desportu, ekonomia no saúde nian maka ohin loron ami bele realiza ona eventu ida ne’e”, tenik Prezidente AESPNTL ne’e.
Manuela de Araújo iha biban ne’e husu mós apoiu husi Ministeriu Interior atu bele prevê netik orsamentu no transporte ruma hodi bele apoiu aktividade hotu ne’ebe maka asosiasaun ne’e atu hala’o tanba durante ne’e asosiasaun laiha fundu hodi hala’o aktividade inklui sei utiliza deit transporte PNTL nian hodi bele apoiu aktividade AESPNTL nian.
Iha fatin hanesan, Komandante Jerál PNTL Komisariu Jerál Polísia Henrique da Costa ba jornalista sira hateten ohin realiza workshop kona-ba Kankru Susun nian ne’ebe organiza husi AESPNTL servisu hamutuk ho Ministeriu Saúde no mós Fundasaun Alola.
“Ita mós iha hanoin ida katak hafoin realiza workshop ne’e iha Nasional, ita mós sei ba halo aktividade hanesan iha munisipiu sira, nafatin halo koordenasaun no komunikaaun ho parte Ministeriu Saúde atu nune’e halo mós aktividade hanesan iha munisipiu, intensaun ida atu nune’e habelar informasaun ba feto sira no mós liu husi aktividade screening ka cek-up hodi bele detekta moras ruma ligadu ba kankru susun ninian atu nune’e bele hetan tratamentu sedu”, informa Komandante Jerál PNTL ne’e.
Komisariu Jerál Polísia ne’e salienta kona-ba apoiu Komandu PNTL nian ba iha AESPNTL katak serteja apoiu moral iha, maibé kona-ba fasilidade nian, ita hare’e saida maka ita iha ne’e, ita uja hamutuk hanesan transporte, wainhira sira halo aktividade ruma iha munisipiu, Komandu bele fó apoiu. Tanba AESPNTL nia prezensa liu husi sira nia aktividade, importante parte ida promove mós servisu PNTL nian.
Entretantu, Diretora Exekutiva Fundasaun Alola Maria Guterres iha ninia intervensaun hateten agradese ba parte hotu ne’ebe marka prezensa iha kolokiu badak ba iha kankru susun ninian, ita koalia kankru susun tanba Pink October ou Outubru Kor-de-Rosa ne’ebe koñesidu iha mundu tomak ba iha fulan mundial Konsensializasaun ba moras kankru susun.
“Fundasaun Alola liu husi programa HALIKU (Hau Hili Atu Kura) iha misaun ida maka atu hadia estatutu saúde feto no labarik iha Timor-Leste no objetivu husi programa ne’e rasik maka atu hasa’e konsiensia grupu alvu sira nian kona-ba moras kankru susun no kankru serviku inklui deteksaun sedu no tratamentu ba ema kbi’it laek sira hodi bele transporte ba iha HNGV ou fasilidade saúde ne’ebe maka existe”, hateten Diretora Exekutiva Fundasaun Alola ne’e.
Maria Guterres subliña katak atu atinzi misaun no objetivu sira ne’e hotu, Fundasaun Alola la servisu mesak, Fundasaun Alola liu husi nia programa HALIKU (Hau Hili Atu Kura) servisu hamutuk ho Komisaun Nasional Kankru Susun. Programa ne’e hala’o atu koko hasa’e konsiensia atu ema hotu bele iha koñesimentu hodi nune’e ita bele servisu hamutuk hodi bele prevene no liu-liu atu reduz númeru mortalidade kankru feto iha Timor-Leste.
Iha sorin seluk, Vise Ministru ba Fortalesimentu Institusional Saúde José dos Reis Magno iha ninia intervensaun hateten governu liu husi Ministeriu Saúde lansa ona mákina screening ba moras kankru susun no kankru serviku iha munisipiu hat parte leste nian no tuir planu sei monta mós fasilidade hanesan iha sentru saúde Formosa Dili no sentru saúde Comoro, inklui iha futuru sei estabelese mós fasilidade hanesan to’o munisipiu.
“Ohin ita koalia espesifiku liu kona-ba kankru susun no kankru serviku, hanesan informasaun ba ita hotu katak iha tempu badak sei iha vasina laos ba kankru susun maibé ba kankru serviku, tanba durante ne’e iha lamentasaun barak tratamentu kankru serviku ne’e rasik, nune’e matenek na’in sira halo estudu no ikus mai iha ona resultadu”, informa membru governu ne’e.
Nune’e mós Vise Ministru Interior Franscisco Guterres ba jornalista sira hateten nia parte agradese ba inisiativa AESPNTL nian hodi hala’o workshop ne’e tanba bele ajuda hamosu ema nia konsiensia kona-ba moras kontazioju sira hanesan kankru susun no mós kankru serviku.
“Ida ne’e esforsu diak tebes, kuantu mais aktividade ne’e mai husi esposa PNTL sira, tanba ne’e hare’e ba Asosiasaun nia esforsu ho limitasaun fasilidade ne’ebe sira iha, governu liu husi Ministeriu Interior sei hare’e hodi bele fó apoiu tanba ho sira nia prezensa ne’e bele motiva membru PNTL hala’o servisu diak liu”, tenik Vise Ministru Interior ne’e.
Membru governu ne’e afirma tan katak prezensa AESPNTL nian mós bele ajuda PNTL iha parte seluk hanesan saúde hodi halo tratamentu ba membru sira ne’ebe moras, asaun karidade hodi tulun ita nia komunidade sira ne’ebe bi’it laek.
Lalaok Workshop ne’e fahe ba sesaun rua hanesan sesaun aprezentasaun no sesaun screening ka examinasaun ba esposa no femenina sira ne’ebe presiza. Screening ne’e hala’o husi médiku sira HNGV, Departamentu Moras La Hadaet (Non CDC). Marka prezensa iha aktividade ne’e Ministru Interior, Vise Ministru ba Fortalesimentu Institusional Saúde, Diretora Exekutiva Fundasaun Alola ho nia ekipa, Médiku HNGV, AESPNTL ho nia estrutura, Femenina PNTL husi Kuartél Jerál, UPM, UEP no UPF.
Media PNTL.
