Dili, Membru hamutuk 17 husi Unidade Espesial Polísia husi Seksaun Anti Terorista (SAT) Polísia Nasional Timor-Leste (PNTL) Kinta ne’e (21/09) termina sira nia Kursu Kontra Terorismu ne’ebe hala’o ona durante tinan ida.
Ministru Defesa no Seguransa Agostinho Sequeira ‘Somotxo’ iha ninia intervensaun ba serimonia hateten kursu kontra terorista ne’e laos fasil maibé ho orgullu instituisaun PNTL liu-liu Unidade Espesial Polísia bele ultrapasa kursu ne’e ho diak.
“Iha âmbitu seguransa interna, Estadu iha prioridade atu garante ordem seguransa ho trânkuilidade públika, sentido ida ne’e merese ho atribuisaun mosaun iha ne’ebe ho manuntesaun no halo re-estabelesimentu ordem públika no seguransa nian”, tenik Ministru Defesa no Seguransa.
Agostinho Sequeira ‘Somotxo’ salienta liu tan katak forma ona membru rihun ida resin ne’ebe kompostu husi ajente no atus ida resin husi postu sarjentu no sira seluk no agora liu husi Kursu Kontra Terorismu hanesan formasaun elementu ne’ebe integra iha Seksaun Anti Terorista husi Kompañia Operasaun Espesiais, Undade Espesial Polísia.
“Komandu Guarda Nacional Repúblicana (GNR), ita nia sentidu agradesimentu ba apoio husi agora no sempre, foin informa mai hau katak Kursu Kontra Terorismu ne’e laos fasil iha ne’ebe kompostu husi parte rua ne’ebe difisil maibé iha deit instruidus na’in 17 maka termina Kursu ne’e”, informa Somotxo.
Iha fatin hanesan, eis Ministru Interior Dr.Longuinhos Monteiro ne’ebe fó mós ninia intervensaun ba serimonia enseramentu ne’e hateten nia parte sente orgullu laos hanesan eis Ministru maibé hanesan Komandante Jerál iha tinan 2009 ne’ebe rekruta sub unidade tolu hodi transforma ba Unidade Espesial Polísia.
“Ita hotu hatene katak Unidade Espesial Polísia sai seriadade ida atu reserva Komandante Jerál ninian, para atu iha momentu espesial, momentu ida ne’ebe estadu konfronta ho violensia sira ne’ebe bo’ot ho armadu, estadu konta ho Polísia Nasional Timor-Leste nia prevensaun”, hateten eis Ministru Interior.
Dr.Longuinhos Monteiro hatutan Polísia hanesan organizasaun seguransa estadu nian, iha obrigasun no dever atu desenvolve nia unidade sira, atu responde kualker situasaun ne’ebe estadu ida ne’e konfronta no infrenta.
Membru hamutuk 17 ne’e kompostu husi postu ajente no sarjentu ne’ebe maka partisipa ona formasaun teoria iha Portugal no treinamentu SAT hanesan formasaun ba segunda etapa. Hafoin treinamentu, membru hirak ne’e halo mós simulasaun ba atentadu kontra terorista iha Aeroporto Internasional Nicolau Lobato iha Dili no simulasaun ba atake Cargueiro iha tasi laran. Instructor ba treinamentu ne’e mai husi GNR hamutuk na’in 5 no instructor PNTL hamutuk na’in 5 ne’ebe maka remata ona sira nia formasaun kona-ba SAT nian iha Portugal.
Partisipa iha serimonia enseramentu ne’e Ministru Defesa no Seguransa, eis Ministru Interior, Komandante Jerál PNTL Komisariu Polísia Julio da Costa Hornay, Komandante UEP Superintendente Xefe Afonso de Jesus, Komandante Centro Formação Polícia Superintendente Arquimino Ramos, Komandante Unidade Polísia Marítima Superintendente Lino Saldanha, Instructores husi GNR, familia graduadu no konvidadu sira.
Media PNTL.
