News

DILI – Sekretariu Estadu Seguransa (SES), Francisco Guterres hala’o serimonia despedida ho instituisaun Polísia Nasionál Timor-Leste (PNTL) iha kuartel jerál Caicoli-Dili, kinta (05/02/2015). Serimonia despedida ne’e hala’o liu husi enkontru Konsellu Superior Polísia ne’ebe organiza husi Komandante Jerál PNTL, Komisáriu  Dr. Longuinhos Monteiro ho Segundu Komandante Jerál, Komisáriu  Afonso de Jesus. Hafoin serimonia despedida, SES Francisco ba jornalista hateten durante tinan 7 (hitu) nia laran, servisu hamutuk ho PNTL no apresia tebes ba PNTL nia servisu ne’ebe hetan progresu ne’ebe pozitivu tebes. “Ohin ha’u mai iha ne’e atu hato’o ha’u nia agradesimentu boot ba instituisaun PNTL liu-liu Komandante Jerál ho membru tomak, PNTL nia servisu hatudu rezultadu ne’ebe signifikadu tamba iha lideransa ne’ebe mak di’ak, tamba ne’e SES agradese barak ba Komandante Jerál, Komisáriu  Longuinhos Monteiro ho nia Adjuntu, Komisáriu  Afonso de Jesus.” Hatan kona-ba figura ne’ebe atu troka SES nia fatin, Francisco hatan, nia iha konfiansa no fiar ba  figura ida ne’ebe atu troka, nia iha koñesimentu ne’ebe di’ak iha área seguransa nian no optimista katak servisu sei lao diak liu tan ba oin. “Ha’u fiar katak ida ne’ebe troka ha’u, ha’u hatene katak nia ema ne’ebe hatene muito bem ba iha área seguransa nian, ha’u fiar katak nia sei lori instituisaun Seguransa ba oin no lao diak liu tan, ha’u kontente teb-tebes ba nia prezensa ne’ebe atu troka ha’u nia fatin, ha’u sei ajuda nafatin hodi fo apoiu malu,” afirma Francisco. Francisco Guterres konta tuir katak, iha tempu krize nia laran tinan 2006 no 2007, iha mundu tomak hatene katak Nasoens Unidas deit mak rezolve problema iha Timor-Leste, tamba relatoriu temi UNpol nia naran, maibe servisu iha terreinu PNTL mak hala’o, nia sente triste tamba servisu ema ida mak halo, relatoriu uza fali ema seluk nia naran. Entertantu Komandante Jerál PNTL, Komisáriu Longuinhos Monteiro hatetetn, lori komando Jerál nia naran hato’o mos agradesimentu ba SES nia kooperasaun servisu ne’ebe durante ne’e fo apoiu ba PNTL hodi hala’o servisu la’o ho diak to’o ohin loron. Iha serimonia despedida ne’e mos, PNTL ho SES troka plaka ba malu nomos intrega medalla ba membru PNTL na’in 3 ne’ebe servisu iha Gabinete Komandante Jerál mak hanesan Xefe Gabinete, Sarjentu Xefe Inocencio Freitas ho staff na’in 2 hanesan Sarjentu Joana Maria Mau no Ajente Xefe Francisco da Silva. Partisipa iha serimonia despedida ne’e mak hanesan Komandante Jerál ho Adjuntu, Sekertariu Estadu ho nia Xefe Gabinete, Komandante Unidade, Departamentu, Seksaun, Komandante no segundu komandante Distritu, membru Polísia no funsionariu sivil. Média PNTL    

Dili– Embaxadora Estadus Unidus Amerika (EUA) ba Timor Leste, Karen Stanton entrega motorizadas 15 ho modelu Kawasaki KLX 150, nomos ekipamentu seluk hanesan atu hadi’a motorizada nian kaixa 2, Endoscopes 3 no Telescopic 3, ekipamentu identifikasaun droga hamutuk kaixa 12 ba Komandu Jeral PNTL no intrega direita ba Komandante Unidade Patrullamentu Fronteira (UPF).

Motorizada no ekipamentu seluk hirak ne’e, simu direta husi Segundu Komandante Jeral PNTL, Komisáriu Afonso de Jesus no akompaña husi Komandante Unidade Patrullamentu Fronteira, Superintendente Asistente João Sancho Pires iha Kuartel Jeral PNTL Caicoli-Dili, loron Tersa (03/02/2015). “Apoiu ne’e nu’udar parte ida husi programa ne’ebe Estadus Unidus Amerika oferese ninia fundu ho valor $830,000 hodi apoiu ba United Nations on Drugs and Crime (UNODC) hodi kondús treinamentu no hasa’e kapasidade ba Unidade Patrullamentu Fronteira,” afirma Embaxadora EUA, Karen Stanton iha nia diskursu ba serimonia entrega fasilidade ne’e. Iha fatin hanesan, Segundu Komandante Jeral Komisariu Afonso de Jesus iha nia diskursu hateten, agradese ba apoiu ne’ebe Embaxada Estadus Unidus Amerika fo ba PNTL hanesan treinamentu, fasilidade no seluk tan. “Lori Komando Jerál nia naran hato’o agradese ba tulun sira ne’ebe Estadus Unidus Amerika fo ba PNTL hahu husi formasaun nomos ekipamentus, ita hotu hatene katak Instituisaun PNTL hanesan Instituisaun ne’ebe foun, no fulan Marsu mak kompleta ba tinan 15, tamba ne’e presija nafatin kapasitasaun husi parseiru sira atu hasa’e kualidade membru PNTL hodi servi povu no nasaun ida ne’e,” afirma Komisariu Afonso. Entertantu fasilidade seluk ne’ebe EUA apoiu ona ba UPF mak hanesan komputador 13, karreta 3 no iha tinan ne’e mak apoiu tan motorizadas 15 no ekipamentus seluk ne’ebe relevante ba servisu unidade nian, nomos apoiu ona treinamentu balun ba UPF liu husi UNODC hodi hasa’e sira nia koñesimentu kona ba oinsa bele hala’o sira nia funsaun iha liña fronteira. Ikus liu, Komisáriu Afonso husu ba komandante UPF ho nia membru sira atu kontrola no kuidadu ba fasilidade ne’ebe parseiru sira fo, no utiliza tuir nia funsaun ba instituisaun PNTL. Média PNTL.        

UATUCARBAU – Komandu PNTL Munisípiu Viqeuque liu husi kna’ar Polisiamentu Komunitária organiza tara bandu iha suku Ira bi’i Postu Administrativu Uatucarbau hodi hamenus konflitu, hamatak ambiente no respeitu malu ba komunidade sira maka hela iha baliza entre Postu Administrativu Uatucarbau, Baguia no Iliomar. Seremonia tara bandu hala’o iha Sesta, (30/1/2015) hodi ohi oho karau timor makerek ida. Tara bandu atu komunidade sira atu labele tesi ai iha mota laran no mota ninin husi metro 50, bandu labele kaer ikan sira iha mota Ira bere durante tinan lima, bandu labele husik animal arbiru hodi estraga ai han iha toós laran no bandu labele tesi ai iha tasi ibun husi Postu Administrativu Uatucarbau to’o baliza Postu Administrativu Uatulari, mota Caibilale. Serimonia tara bandu ne’e organiza husi programa Polisiamentu Komunitária, ne’ebe kompostu husi KPK (Konsellu Polísiamentu Komunitária) ne’ebe involve Xefe Suku, Ofisial Polísia Suku, Administrador Postu Uatucarbau, Komandante PNTL Squadra Postu Uatucarbau hamutuk ho lia nain sira. Komandante PNTL Munisipiu Vikeke, Superintende Justinho Menezes hatete, programa tara bandu ne’e inisiativa husi programa Polísiamentu Komunitária ne’ebe iha suku Ira bi’i forma ona KPK (Konsellu Polísiamentu Komunitária). Antes tara bandu problema sempre mosu maka hanesan problema rai, animal estraga ai horis, tá ai no sunu rai arbiru no hadau malu baliza. Problema hirak ne’e tamba laiha disiplina hodi respeitu ididak nia direitu ho ida ne’e maka KPK halo relatoriu ba KDD (Konsellu Diretiva Distrital) hodi foti kokluzaun katak, presiza duni tara bandu iha suku Ira bi’i. “Hau fiar ho tara bandu ita nia komunidade sei respeitu malu no kuidadu ita nia ai horis sira, nune’e mos dalan ida ne’e hamenus problema iha suku laran,”dehan Supt Justinho. Apoiu tara bandu mai husi Komandu PNTL Munispiu Vikeke ne’ebe halo proposta ba parseira TLCCP-Nova Zelandia nomos hetan apoiu husi Sekertaria Estadu Maiu Ambiente. Xefe Suku Ira bi’i Marcal dos Santos de Carvalho hatete, atividades tara bandu ne’e atu konserva nafatin natureza iha mota Ira bere no hamoris fila fali kultura Timor nian hodi respeitu malu. “Ami sira ne’ebe maka involve iha KPK ne’e mak organiza malu hodi realiza tara bandu ne’e,”dehan Xefe Suku… Tema tara bandu “hatutan no hametin tradisaun hodi rezolve problema atu garantia estabilidade no seguransa”. Lia Nain Xefe Suku Ira Bi’i Armindo da Silva dehan hodi fó atensaun maxímu ba komunidade sira tenke halo tuir saida mak bandu iha suku laran. Ba se se deit mak kontra bandu ne’e sei hetan multa tuir akordu ne’ebe disidi ona. “Tara bandu ne’e dezde imi nia avo bei ala sira halo tara bandu. Ho ida ne’e mak agora ita sei hare ai hun boot sira sei iha ne’e no bee iha mota sulin nafatin,”dehan Armindo. Média PNTL  

                            Dili– Superintendente Xefe Hermenegildo da Cruz ne’ebe durante ne’e kaer pasta hanesan Komandante PNTL ba Munisipiu Bobonaro, sai nomeadu ba Diretor Nasional ba Polísia Sientífiku Investigasaun Kriminál (PSIK) ne’ebe sei simu Tomada de Posse iha loron 30 Janeiru tinan ne’e. Despaixu nomeiasaun ne’e halo direitamente husi Primeiru Ministru Kay Rala Xanana Gusmão hodi hato’o ba Komando Jeral PNTL hodi ezekuta. Liu husi Enkontru Konsellu Superior Komando Jeral PNTL ne’ebe partisipa husi Komandante 13 Munisipiu nomos Komandante Unidade no Departamentu iha Kuartel Jeral PNTL Caicoli DIli, loron Segunda (27/01/2015). Iha Enkontru Konsellu Superior ne’e, Superintendente Xefe Hermenegildo da Cruz ofisialmente entrega fali nia poder tomak nuudar Komandante Bobonaro ba Komando Jeral hodi nomeia fali Komandante foun ida hodi ba komanda fali iha Bobonaro. “Primeiru hau refere ba dekretu no.15/2014 kona ba lei organika policia investigasaun Kriminal, tuir nomeiasaun ne’ebe Sua excelensia PM mak halo, maibe ohin hau mai iha ne’e atu entrega fali hau nia poder ba komando jeral, hodi nune’e komando jeral bele nomeia fali komandante foun hodi ba komanda fli iha Bobonaro,” afirma Superintendente Xefe Hermenegildo da Cruz. Hermenegildo hatutan, nia agradese ba Estadu tamba bele hetan fiar husi Primeiru Ministru hodi kaer kna’ar ba PSIK nian atu nune’e bele garantia Independente no Soberania Estadu nian. “Ha’u agradese tamba hetan fiar husi Estadu, individualmente ha’u sente ho nomeiasaun ne’e todan teb-tebes, maibe ho prinsipiu tomak, ha’u fiar katak ho ha’u nia esforsu-an tomak, ho  komitmentu, hodi ajuda dezenvolve rai ida ne’e, defende povu no nasaun, hakarak Nasaun ida ne’ebe soberanu no independente, liu husi Instituisaun foun ida ne’e bele garantia ita nia independente, no soberania Estadu RDTL,” tenik da Cruz. PSIK hanesan Instituisaun Superior ba Investigasaun Kriminal, ne’ebe ho nia misaun mak atu apoiu administrasaun justisa, orgaun justisa, hodi bele haree ba dezafiu sosio- ekonomiku ne’ebe ita nia Nasaun hasoru, no misaun seluk mak atu haree liu ba krime ne’ebe organizadu, modernizadu no kompleksu liu, maibe krime simples sira seluk hanesan violnesia domestika, asaltu integridade fijika simples, ne’e PNTL mak sei halo investigasaun. Média PNTL.

DILI – Unidade Espesiál Polísia (UEP) Sub-Unidade Batallaun Ordn Públika (BOP) loke liras hodi hari’i Kompañia Delta BOP iha Postu Maliana, Munisipiu Bobonaro atu fó seguransa diak liutan ba iha futuru, Kompañia Delta BOP ne’e sei kobre munisipiu Bobonaro, Kova-lima no Oe-cusse. Instalasaun Kompañia Delta BOP realiza iha tersa, (20/1) iha Soso Maliana. Serimonia ne’e partisipa husi Segundu Komandante Jerál PNTL, Komisáriu Afonso de Jesus, Komandante Munisipiu PNTL Bobonaro Superintende Xefe Hermenegildo G. da Cruz, Administrador Munisipiu Bobonaro Domingos Martins, Administrador Postu Maliana Adelino Brito no Xefe suku husi suku 6 ne’ebe ejisti iha Postu Maliana. Liu husi palestra Segundu Komandante Jerál PNTL, Komisáriu Afonso de Jesus fó agradese ba Administrador Munisipiu ho Dirasaun Teras Propriedade ne’ebe fó fatin iha Soso ne’e hodi monta Kompañia Delta BOP, prezensa ne’e hola parte kontinuasaun dezenvolvimentu Instituisaun PNTL hodi servi povu no nasaun Timor-Leste. “Ita sira maka hala’o kna’ar polisia, maske formasaun ho espesiálidade la hanesan, unidade oin-oin maibe ita ne’e Polísia Nasionál Timor-Leste ne’ebe ho misaun ida deit hodi defende legalidade demokratiku iha nasaun ne’e,”dehan Komisáriu Afonso. Segundu Komandante Jerál PNTL husu ba unidade sira mak hala’o funsaun iha Munisipiu Bobonaro presiza iha koordenasaun diak ho Komandu PNTL Munisipiu Bobonaro, tuir área juridiku. Sub-Unidade BOP monta Kompañia Alfa iha Dili, Kompañia Bravo iha Baucau no Delta iha Bobonaro Komandante PNTL Munisipiu Bobonaro Superintende Xefe Hermenegildo G. da Cruz hatete, bazeia ba planu governu nian hodi hari’i munisipiu no programa dezenvolvimentu sei dezesentralizasaun, Komandu PNTL mos ajusta hodi kompleta BOP nia ejistensia hodi nun’e mak BOP monta Kompaña Delta iha Bobonaro. Kompaña BOP ida ne’e sei responde situasaun seguransa ne’ebe emerjénsia ba iha Minisipiu Bobonaro, Cova-lima nomos munisipiu Oe-cusse. Polisia hanesan ajensia ba mantein seguransa no promove pás, estabilidade ba moris hakmatek povu nian. “Ohin ita mai para atu realiza kompaña BOP Delta. Kompaña ida ne’e hamrik ho nia objetivu premeiru fó apoiu ba Komandu PNTL Munisipiu Bobonaro hodi asegura lei no orden hahu husi sidade Maliana to’o ba área rurais inklui postu administrativu 6 kompostu husi postu Bobonaro, Cailaco, Lolotoe, Balibo no Atabae nomos to’o ba área fronteiras, kompaña BOP nia prezensa hodi atende situasaun emerjénsia,”dehan Supt. Xefe Hermenegildo. Hari’i kompañia BOP iha ne’e tamba esforsu maximu husi Komandu Minisipiu Bobonaro no Administrasaun Minisipiu Bobonaro hodi husu Komandu PNTL nian, ne’ebe mak ohin realiza duni hari’i kompañia BOP iha Bobonaro ne’e. Administrador Minisipiu Bobonaro, Domingos Martins iha nia palestra hatete, “hau agradese tebes ba Komandu PNTL iha vontade no fó atensaun ba seguransa hodi ohin realiza prezensa Kompañia Delta BOP  iha Bobonaro atu bele servi ita nia komunidade.” Munisipiu Bobonaro iha suku 50, aldeia iha 193 ne’ebe baliza ho nasaun Indonézia. Munisipiu Bobonaro PNTL kompostu husi Komandu Munisipiu, UPF, Maritíma ho Migrasaun aldende ne’e mo ho prezensa F-FDTL ne’ebe monta ninia postu iha Tunubibi. Liu husi oportunidade ne’e Administrador Munisipiu husu ba entidade hotu-hotu no povu tomak iha Bobonaro atu fó apoiu kna’ar BOP nian hodi nune’e asegura diak liutan seguransa iha futuru ba oin. Kompaña BOP nia prezensa iha Munispiu Bobonaro hodi fó apoiu mos ba intereses nasionál estadu RDTL nian hodi tulun dezenvolvimentu mega projetu petroleo Suai Supllay Base. Média PNTL      

Rairobo- Kadetes foun PNTL hamutuk 260 ne’ebe kompostu husi mane 221 no feto 39, maibe feto na’in 1 sai hela 259 sabadu (17/01/2015) desloka ba Rairobo-Atabae, Munisipiu Bobonaro atu kontinua formasaun báziku durante fulan 2 ne’ebe hahú husi 16 Janeiru to’o 12 Marsu 2015.

Hafoin tuir formasaun báziku durante fulan 2, kadetes foun sira sei mai fali iha Akademia Polísia Comoro durante fulan 10 hodi tuir eskola ba teoria nomos prátika, hodi simu graduasaun hafoin tinan ida.

Informa Corpo do Aluno ba Formasaun kadetes foun PNTL iha tinan 2015, Inspetór Xefe Ambrosio Francisco Gomes ba Média PNTL iha Rairobo sabadu (17/01/2015).

“Ohin sabadu Ajentes foun sira hamutuk 259 sira desloka mai Rairobo hodi kontinua sira nia formasaun báziku durante fulan 2 iha ne’e atu nune’e sira bele koñese didiak servisu polisia nian, molok sira sai polisia ida,” afirma Ambrosio.

Iha formasaun báziku ne’e, Instrutór ka Formadór polísia Timor Oan na’in 47 (hatnulu resin hitu) no akompaña ho Guarda Nacional Republicana (GNR) hamutuk na’in 9 (sia) mak sei fo formasaun ba Kadetes foun PNTL sira durante tinan ida iha Rairobo no iha Akademia Polisia-Dili.

Matéria ne’ebe kadetes foun sira atu aprende durante formasaun mak hanesan matéria sidadania Polisia, topografia, tatika operasaun, edukasaun fizika, no armas.

“Ami presija fo formasaun ba sira tamba sira maioria mai husi sosiedade ne’ebe sivil, atu sai polisia ida no hatene servisu polisia nian, tenke liu husi formasaun atu nune’e bele iha koñesimentu ne’ebe di’ak, hafoin kursu báziku, sei iha fali tan kursu espesialidade ba sira,” esplika Corpo do Aluno Ambrosio.

Durante formasaun mak iha kadetes foun balun ne’ebe la aguenta, no sira hato’o deklarasaun hodi rejigna-an mak ami bele hasai sira, maibe husu ba sira atu tenta nafatin hodi tuir to’o remata. Média PNTL

DILI – Centru Formasaun Polisia (CFP) Polísia Nasional Timor Leste halo abertura ba terseiru Kursu ba Ajentes rekruta foun hamutuk 260 ne’ebe kompostu husi mane 221 no feto 39 ba faze dahuluk, enkuantu faze segundu ba Ajentes rekruta seluk sei tama fali iha tinan 2016. Durasaun formasaun ba ajentes rekruta sira durante tinan 1 (ida) ne’ebe kompostu husi fulan 2 iha Rairobo-Atabae-Bobonaro, fulan 8 iha Academia Polisia Dili, no fulan 2 ba hala’o estajiu, hafoin mak Graduasaun hodi sai Ajente Polisia iha Instituisaun PNTL. “Ohin ita loke tan kursu ba formasaun ajentes ba dala 35 ho total klase 81, numeru ida ne’e konta hahu husi loke sentru formasaun, maibe konta husi GNR koopera ho CFP mak ba dala 3,” afirma Komandante CFP, Superintendente Xefe Julio Hornai iha nia diskursu ba abertura 3⁰  Kursu ba Ajentes rekruta foun iha Akadémia Polísia Comoro-Dili, Sesta (16/01/2015). Prosesu Formasaun Báziku iha Rairobo iha 3⁰  Kursu ne’e, Formador husi PNTL rasik mak sei fo, no fo asisténsia husi GNR na’in 9. Komandante CFP akresenta, prosesu rekrutamentu ba Ajentes foun PNTL iha tinan 2014 la’o ho transparansia no rigorozu, bainhira ema balun iha dúvida kona-ba prosesu ne’e, komisaun prontu atu esplika. “Prosesu rekrutamentu ne’e la’o ho justu, onestu, no transparansia tamba PNTL servisu hamutuk ho Ministeriu Edukasaun, Ministeriu Saude, Guarda Nacional Republicana (GNR), nomos akompaña husi membru Parlamentu Nasional Komisaun B, Komisaun Apoiu Tékniku PNTL, Diretor Jeral Sekretariu Estadu Seguransa, Inspetor Jeral PNTL, mos husi karik publiku balun ne’ebe sente ladun satisfas ho prosesu rekrutamentu ne’e, komisaun prontu atu esplika.” Akresenta Julio Hornai. Entretantu iha fatin hanesan, Sekretariu Estadu Seguransa Francisco Guterres iha nia diskursu hateten, rekrutamentu ba Ajentes foun ne’e liu husi faze normal no rigorozu atu bele hetan kadetes ne’ebe di’ak hodi reforsa PNTL. Francisco hatutan, iha PNTL laiha demokrasia maibe kumpri regras, kumpri ordem, tenke disiplina hodi prontu atu servi ba rai ida ne’e. “Imi mak iha duni vokasaun atu sai polisia, tamba entre númeru 12.419, to’o ikus ita boot sira mak passa iha selesaun ne’ebe rigorozu ne’e, ha’u hato’o parabens ba imi, no fiar an hodi tuir formasaun ho di’ak hodi sai duni polisia, hafoin tuir formasaun durante tinan ida,” apela Francisco Guterres iha serimonia abertura ba kursu ne’e. Kriteriu rekrutamentu ne’e mak hanesan selesaun dokumentus, prova kultura, prova psikoteste, prova biometria, sukat altura, haree tattoo, entrevista, no teste médiku. Média PNTL

DILI – Komandu Jerál (KJ) PNTL sei kontinua bolu membru PNTL balun ne’ebe involve-an iha Grupu Arte Marsiais (GAM), ne’ebe seidauk halo juramentu iha Palacio Governu iha loron Tersa (13/01/2015), ne’ebe organiza direta husi Primeiru Ministru hanesan mos Ministru Defeza no Seguransa, Xanana Gusmão hodi halo juramentu ba bandeira RDTL katak ba oin sei la involve tan ona iha GAM. “Ita hatene katak membru PNTL ne’ebe invole iha Grupu Arte Marsiais ne’e hamutuk na’in 174, na’in 100 resin mak halo ona Juramentu iha Palacio do Governu no balun seidauk, tamba ne’e Komando sei tenta nafatin atu bolu sira ne’ebe seidauk hodi ba halo juramentu,” informa Segundu Komandante Jeral PNTL, Komisáriu Afonso de Jesus ba jornalista sira iha kuartel jeral PNTL Caicoli-Dili, kuarta (14/01/2015). Komisariu Afonso hatutan, hafoin halo juramentu mak membru hirak ne’e sei involve nafatin iha Grupu refere, no Komando hetan evidénsia ne’ebe forte mak sei la tolera tan, no tenke halo demisaun ba membru refere. “Imi jornalista mak nuudar ami nia matan no tilun, karik ita boot sira haree ho matan, no iha evidensia ne’ebe forte bele hatudu mai Komando Jeral, hodi ami bele prosesa, ami sei la tolera tan, no laos membru PNTL ho F-FDTL deit maibe, sidadaun hotu-hotu ne’ebe involve iha Grupu ne’e, ita nia Primeiru Ministru sei bolu sira atu ba halo juramentu,” akresenta Segundu Komandante Jeral. Aleinde ne’e, Komisariu Afonso mos informa katak situasaun iha territóriu laran liu-liu iha Munisipiu Baucau la’o kontroladu, no husu ba sidadaun hotu atu apoiu PNTL hodi kria paz no estabilidade ba ita nia Nasaun. Média PNTL.                

DILI – Membru PNTL no F-FDTL ne’ebe involve iha arte marsiais halo juramentu iha Palacio Governu nia oin hodi hakribi no la mete atividades arte marsiaias ba iha futuru. Serimónia juramentu ne’e hala’o liu husi parade militar, diriji direitamente husi Primeiru Ministru Kay Rala Xanana Gusmão hanesan mos Ministru Defeza no Seguransa, Tersa, (13/1/2014). Membru PNTL no F-FDTL ho total 288 maka halo juramentu husi eis membru PSHT hamutuk 145, eis membru IKS hamutuk 88 no eis membru KORK hamutuk 55. Juramentu iha bandeira RDTL no bandeira institiusaun rua nian oin, hanesan juramentu ba povu no nasaun hodi ba oin eis membrus arte marsiais hirak ne’e ba oin sei la mete tan no sei kumpri lolos deit lei no hakruk ba estadu no konstituisaun. Antes atu halo juramentu PM Xanana bolu eis membrus arte marsiais husi PNTL ho F-FDTL sira ididak nia naran, balu naran iha maibe la marka prezensa no balun marka prezensa maibe naran laiha. Juramentu ne’e esforsu husi estadu liliu husi governu hanesan dalan diak no presiza duni, maibe mos presiza hametin regulamentu internal PNTL no F-FDTL. PM Xanana dehan, ba oin maka membru sira ne’ebe mak halo juramentu tiha sei nafatin hala’o atividades arte marsiais sei hasai husi forsa no polísia. Ministru Defeza no Seguransa dehan, lalika lori organizasaun arte marsiais mai boot liu fali intereses instituisaun estadu. Estadu la obriga sese deit atu tama PNTL no F-FDTL, maibe hanesan bainhira ema ida hakarak sai membru PNTL no F-FDTL tamba hakarak defende povu no ninia moris, laos tama PNTL no F-FDTL hodi buka deit osan maibe iha dever boot ba estadu no povu ida ne’e. Tuir lolos tama iha grupo arte marsiais ne’e buat diak tebes maibe sala utiliza, maun alin komesa la rona malu, oan la tauk ona aman-inan no at liu ba halo juramentu iha Kupang, Indonézia iha bandeira merah putih depois fila mai halo violénsia iha Timor-Leste, estadu sei la permite ho ida ne’e. “Hau rona membru PNTL balun fasilita ita nia joven sira hodi hakat ba Kupang hodi halo juramentu ba bandeira merah putih nomos membru F-FDTL balun dehan ba joven sira katak lalika tauk ho sese deit ami backing iha kotuk. Ida ne’e hau la gosta ho ida ne’e maka ohin loron mai halo juramentu ne’e. ba oin sei laiha tan arte marsiais iha PNTL no F-FDTL nia laran,”dehan PM Xanana. Serimónia ne’e asiste mos husi Xefe Estadu Maior F-FDTL, Major Jeneral Lere Anan Timur, Komandante Jerál PNTL, Komisáriu Dr. Longuinhos Monteiro, membru governu tomak, membru deputadus nomos lakloke ba públiku. Juramentu hanesan sei halo mos ba membru governu sira nomos ba funsionairu públiku liu husi munisípiu ididak. Mídia PNTL

DILI –  Udan boot iha loron 31 fulan Dezembru 2014 liuba rezulta bee sae iha Kuartel Jerál PNTL. Dia 1 de Janeiru 2015 ema hotu festeza hodi simu tinan foun ho familia maibe Primeiru Ministru ne’ebe mos hanesan Ministru Defeza no Seguransa tun ba hare kondisaun kuartel jeral PNTL ne’ebe bee sa’e, hodi hamutuk ho membrus PNTL sira hamos bee dalan ne’ebe maka nakonu ho duut no tahu. Mídia PNTL