Dili- Polisia Nasional Timor-Leste (PNTL) halo diskusaun konaba Prosedimentu ba Planu Asaun Polisiamentu Komunitaria Munisipal no Rejional(PAPKM/R) antes halo aprovasaun.
Komandante Jeral PNTL Komisariu Faustino da Costa hatete iha enkontru dahuluk oinsa Komandante munisipiu hot-hotu prepara planu munisipais ba atividade Polisiamentu Komunitariu ba asuntu prevensaun krime iha munisipiu, Nia hato’o asuntu ne’e ba Jornalista sira iha Salaun Tower Fatuhada Dili, Segunda (22/02).
“Ohin ita mai iha ne’e para formaliza regras nternal PNTL ita hanaran Norma Organizasaun no Prosedimentu (NOP) konaba prosedimentu planua asaun Polisiamentu Komunitaria munisipial no rejional hodi hahu identifika problema iha munisipiu ida-idak no tau iha prioridade hafoin Komandante munisipiu aprova no hato’o mai nasional,” Komisariu Faustino esplika.
Faze tuir mai Komandante Jeral hare ida ne’ebe mak sai prioridade nasional ba PNTL tomak hodi aprova hafoin distribui fila-fali ba komandante sira hodi inplementa aktividade refere; maneira seluk, parte balu ne’ebe relevante aprezenta ba governu no parseiru dezenvolvimentu oinsa sira deskuti hamutuk hodi tetu se mak bele apoiu ba area ne’e.
Iha mudansa sistema ne’ebe mak governu instala agora katak orsamentu bazeia ba programa tanba ne’e maka komandante ida-idak identifika programa ne’ebe mak sai prioridade nasional ba PNTL hafoin inplementa programa tuir aktividade ne’ebe iha.
Lideransa maximu instituisaun Seguransa ne’e haktuir Konsellu Seguransa Munisipal (KSM) instala ona iha munisipiu 12 inklui Rejiaun Administrativa Espesial Oe-Cusse Ambeno (RAEOA) no servisu durante nee lao hela iha munisipiu balu no munisipiu seluk agora dadaun aktividade balun atraza tanba iha mudansa ba pozisaun Prezidente Autoridade signifika presiza tempu atu kontinua aktividade enkontru iha munisipiu.
Programa ida ohin envolve deit Komandu husi munisipiu 10 no musipiu tolu mak la marka prejensa tanba lockdown iha munisipiu Bobonaro no Cova-Lima inklui RAEOA maibe dokumentus sira ne’ebe ohin produs ne’e ba mos munisipiu tolu ne’e.
Husi total suku iha teritoriu Timor-Leste hamutuk 452 ho apoiu husi parseru estabelese ona Konsellu Polisiamentu Komunitaria (KPK) iha suku 328 no restu sei identifika suku ne’ebe mak sei bele atu instala tan.
Iha okajiaun ne’e Komandante PNTL munisipiu Lautem Superintendente Antonio Rego Fernandes hateten iha munisipiu Lautem estabelese ona KPK iha suku 13 ne’ebe maka lao hela no ita hetan apoiu husi parseru TAF no espera iha fulan Marsu nia laran sei konklui iha suku.
Nia haktuirtan Komunidade sira apresia ho ejistensia KPK iha sira nia suku no sira mos agradese ba PNTL tanba it abele forma KPK iha sira nia suku no fo kbiit ba sira liga ba lei ho NOP ne’ebe maka ita iha atu antende rasik sira nia problema wainhira problema ne’e ho natureja semi publiku. Nomos kazu sivil hirak ne’ebe maka akontese iha sira nia suku nune’e sira halo prevensaun antes sai problema krime.
Entretantu Team Leader ba Programa Polisiamentu Komunitaria husi Fundasaun Asia Sr.Adelio hateten atividade ohin hare liu-liu ba munisipiu, TAF liu husi apoiu Governu Nova Zelandia fo apoiu ba komandu munisipiu hodi dezenvolve NOP konaba planeamentu hodi ajuda Komandu munisipiu sira hodi trasa sira nia planu tanba orsamentu ne’ebe maka ita fo apoiu bazeia ba planu ba atividade ne’ebe iha, kuaje orsamentu ne’ebe ita fo ba area formasaun no mos dezenvolvimentu ba iha politika interna. Media PNTL
