Dili, Polisia Nasional Timor-Leste (PNTL) hamutuk ho Minsiteriu Saude (MS) no Organizasaun Mundiál Saúde (OMS) hala’o enkontru Advokasia Kona-Ba Vasina Covid-19 ba membru PNTL molok implementa programa Vasina ne’e rasik.
Komandante Jerál PNTL Komisariu Polísia Faustino da Costa hafoin abertura ba serimonia ne’ebe hala’o iha Centro Formação Polícia (CFP) tersa-feira (23/02) ne’e hateten PNTL hanesan intituisaun Estadu nian bainhira programa governu lao ba iha,munisípiu ne’ebe de’it, Polisia prontu atu asegura.
“Ami mak sei avansa uluk tamba PNTL ne’e instituisaun Estadu nian, programa ne’e governu nian laos voluntariu maibé ba hotu-hotu kuandu pedidu mai haruka 100 pessoas, prontu ezekuta 24 oras iha fronteira ho ekipa saude ”, hateten Komandante Jerál PNTL.
Komisariu Polísia akresenta tan katak prioridade uluk atu hetan Vasina COVID-19 nian maka hirak ne’ebe maka destakadu iha liña fronteira hanesan Unidade Patrullamentu Fronteira (UPF), Unidade Polísia Maritima (UPM) no Unidade Espesial Polísia (UEP).
Entretantu, Xefe Departamento Promosaun Saúde MS nian Misliza Vital hatete, Vasina Covid-19 ne’e importante duni atu bele asegura katak ita labele afeta husi moras a’at Covid-19 ne’e.
“PNTL nia tarjetu no ami nia tarjetu ba 200 pessoas, maibé ami sei avansa ho 100 pessoas, karik husi ekipa baseia ba nesisidade ita planea fila fali tuir nesesidade ne’ebé iha”, tenik Xefe Departamento ne’e.
Governu liu husi reniaun Konsellu Ministru antes ne’e aprova ona planu vasinasaun nasioanál kontra COVID-19 ne’ebé tuir rekomendasaun OMS, vasina diak liu ba Timor-leste maka AstraZeneca, tanba konsidera vasina ne’e segura, efikaz no iha kondisaun nesesáriu hanesan armazenamentu no refrijerasaun atu rai.
Media PNTL.
