Covalima, 18 jullu 2022 (SRP) – Polísia Nasionál Timor-Leste (PNTL) liu husi Servisu Sekreta Komandu UPF no kompañia UPF Bravo-Suai, halo aprensaun ba atributu Grupu Arte Marsiais (GAM) ne’ebe hatama liuhosi dalan ilegál iha fronteira Suai nian.
Komandante UPF, Superintendente Polísia Euclides Belo, hateten atributu sira ne’e hatama ilegál hosi komunidade sira iha liña fronteira.
“Ohin ami-nia membru Servisu Sekreta UPF halo vizilánsia no operasaun ne’ebé lidera husi Komandante kompañia Bravo, Inspetór Asistente Polísia, Olivio Alves, prende atributu deskoñesidu Grupu Arte Marsiais husi Persaudaraan Setia Hati Terate (PSHT), tuir dalan ilegál area Mota Masin, Aldeia Wetaba, Suku Beiseuk, Postu-Administrativu Tilomar, Munisípiu Bobonaro ne’ebé besik kedas fronteira Indonézia”, dehan, Euclides Belo ba SRP via telefone, segunda ne’e.
Nia dehan, wainhira membru Servisu Sekreta identifika atividade ilegál ne’e halo kedas koordenasaun ho ekipa apoiu atu ba halo kapturasaun, maibé wainhira suspeitu sira rona kareta lian dezvia kedas lokál no halai soe hela evidénsia iha karón rua nia laran.
“Membru sira sobu karon rua ne’e hetan objetu ho klasifikasaun mak hanesan, farda treinu PSHT kalsa no faru pares 19, pasta ki’ik hakerek PSHT 1922 hamutuk 100, kopu hakerek PSHT kaixa 7 maibé kaixa rua mak rahun besik kedas karon rua nia sorin, no wainhira ekipa apoiu lao ain tama iha ai-laran suspeitu sira halai lori mós evidénsia seluk tán iha pasta ne’ebé sira tara no ita-nia membru sira la konsege duni tuir tanba iha ona area zona bebas”, relata.
Iha okajiuan ne’e Euclides Belo, mós husu ba sidadaun hotu ne’ebé hakarak atu halo negosiu bele liuhosi dalan legál tanba agora daudaun Guvernu dekreta ona katak ita-nia fronteira loke livre ona ba ema hotu.
