Cova-Lima– Polisia Nasional Timor Leste (PNTL) halo sosializasaun Lei Nu.5/2017 rejimi juridiku pratika Artes Marsiais, Rituais, Armas Brancas no Rama Ambon ba Populasaun munisipiu Cova-lima hodi kompriende konteudu no lalaok inplementasaun hodi redus krime.
Administrador munisipiu Cova-Lima Afonso Nugera Nahak hateten sosializasaun Lei Nu. 5/2017 inportante tebes ba populasaun Cova-Lima atu hatene no hatutan informasun ne’e ba komunidade liu-liu joven sira, Nia hato’o asuntu ne’e iha abertura ba Sosializasaun iha salaun Administtrasaun munisipiu Cova-Lima, Segunda (21/08).
Nia haktuirtan katak inportante tebes atu hatene lalaok inplementasaun lei ne’e tanba lei maka regula no hakesi ita ema nia hahalok no movimentu nune’e bele lao tuir dalan loos hodi kontribui ba prosesu dezenvolvimentu no moris hakmatek.
Atu termina Lideransa maximu Cova-Lima ne’e husu ba Xefe suku sira atu servisu hamutuk ho Polisia Nasional Timor-Leste (PNTL) hodi halo sosializasaun lei ne’e ba komunidade sira iha suku no aldeia hotu tanba Xefe suku sira mesak deit labele tanba ne’e tenke servisu hamutuk ho parte hotu hodi kria harmonizasaun iha suku laran.
Iha okajiaun ne’e Komandante PNTL munisipiu Cova-Lima Superintendente Eugenio Pereira hateten Lei ne’e tama ona em vigor tanba ne’e iha faze diziminasaun ne’e sei to’o nivel suku nune’e joven sira bele hatene.
Nia haktuirtan sosializasaun ne’e sei aumenta koñesementu tanba ne’e husu ba partisipante sira atu kontinua habelar informasaun hirak ne’e ba oan no familia sira tanba inportante edukasaun hahu husi familia uma laran, nune’e husu ba inan aman sira atu iha korajen no responsabilidade ba oan sira nune’e sira labele monu ba lasu ne’ebe lori sira ba dalan ne’ebe maka prezudika sira nia futuru.
Entertantu Reprezentante UNDP Bernadino da Cosa Pereira hateten deziminasaun lei ne’e inportante tebes atu servisu hamutuk hodi garantia no mantein seguransa estabilidade iha munisipiu Cova-Lima.
Partisipa iha sosializasaun ne’e Autoridade munisipal, Xefe Suku, Amu Paroquia Suai, Madre, Komandante Eskuadra, Veteranus, joventude no konvidadu sira.
Entertantu programa sosializasaun ne’ebe maka halao husi Gabinete Asesoria Juridiku Komandu Jeral PNTL hamutuk ho Komandante PNTL munisipiu 12 no Komandante PNTL RAEO sei kobre munisipiu hotu hahu husi Cova-Lima, Ainaro, Manufahi no munisipiu Aileiu no sei kontinua ba munisipiu seluk.
Programa Sosializasaun ne’e hetan suporta finanseiru husi parseru Programa Nasoens Unidas ba Dezenvolvimentu (PNUD/UNDP). Media PNTL.
