Dili, Komandu Polísia Nasional Timor-Leste (PNTL) liu husi Komandante Jerál Komisariu Polísia Faustino da Costa no Segundu Komandante Jerál Komisariu Polísia Mateus Fernandes iha kinta-feira (01/07) ne’e nomeia aktual Segundu Komandante PNTL munisipiu Dili Superintendente Euclides Belo hodi assume fali kargu hanesan Komandante Unidade Patrullamentu Fronteira (UPF). Nomeasaun ne’e halo basea ba Despasu Gabinete Komandante Jerál Nu. 235-A/CG-PNTL/VII/2021.
Komisariu Polísia Faustino da Costa hafoin serimonia tomada de pose ba media deklara aktual Komandante UPF, iha Dili sai hanesan adjuntu ba tinan barak nia laran ona hahu’u husi tinan 2017 mai to’o ohin loron, hanesan mós Komandante UPF sesante ne’ebe ita muda ba hodi sai fali hanesan adjuntu Komandante PNTL munisipiu Dili, kaer pasta nu’udar Komandante UPF hahu’u husi tinan 2012 to’o ohin loron.
“Hanesan ohin hau dehan katak Komandu nian mak ne’e Kaderiza sira, ita ba iha fatin foun, ambiente foun, kultura foun ita aprende buat foun, entaun oinsa atu desenvolve ida ne’e atu sira bele iha esperiensia ne’ebe diak liu maka ita halo mudansa ida ne’e”, tenik Komisariu Polísia ne’e.
Komandante Jerál PNTL ne’e informa tan katak mudansa ida ne’e mós parte ida husi Komandu ninia ezijensia durante ne’e katak presija halo mudansa, tanba labele husik ema ida iha fatin ida durante tempu naruk nia laran. Dala ida tan kuandu ita kompleta ona ba Komandante sira, tempu tuir mai maka ita halo ba Komadante Eskuadra, Estasaun, Kompañia no Komandante Sub Unidade sira. Além de ita halo mós ba membru sira, ita presija kaderiza sira.
“Depois ita hare fali tempu karik governu autoriza ita halo rekrutamentu, sira ne’ebe foun ita hare fila fali koloka subtitui, ita kaderiza, ida tuan ita muda ba area ida ne’ebe, ida foun ita tau fali ba”, hatutan Komandante Jerál PNTL ne’e.
Iha fatin hanesan, emposadu Superintendente Euclides Belo hateten tomada de pose ne’ebe ohin simu laos premiu ida ne‘ebe maka Komandu fó, maibé ne’e hanesan responsabilidade ne’ebe maka Komandu fó.
“Hau sei lori responsabilidade ne’e hodi bele garante situasaun seguransa iha liña fronteira, servisu hamutuk ho autoridade lokal liu-liu Komandu munisipiu tolu, nune’e mós autoridade religiozu no autoridade komunitaria ne’ebe maka iha ne’eba (fronteira), parseiru husi nasaun viziñu maka TNI no POLRI”, haktuir eis Segundu Komandante PNTL munisipiu Dili ne’e.
Aktual Komandante UPF ne’e seidauk bele fó sai Misaun no Vizaun saida maka sei halo durante mandatu tanba aban maka foin ba Fronteira-Batugade hodi halo transferensia dokumentu operasional balun, hafoin ida ne’e maka foin bele ajusta tuir mehi saida maka iha, mehi ne’e sei hatutan mehi sira ne’ebe Komandu iha ona no misaun ne’ebe Komandu sesante hala’o ona, hau sei hatutan.
Iha serimonia ne’e, Komandu PNTL liu husi Gabinete Komandante Jerál hasai Ordem ida Nomea Definitivamente Komandante hirak ne’ebe maka durante ne’e assume pasta nu’udar Komandante Interinu hanesan Komandante Centro Formação Polícia (CFP) Superintendente Xefe Arquimino Ramos, Komandante PNTL munisipiu Bobonaro Superintendente António Mauluta no Komandante PNTL munisipiu Ermera Superintendente Ludgerio Lay.
Hola parte iha serimonia ne’ebe hala’o iha salaun enkontru Kuartél Jerál maka Komandante Jerál Komisariu Polísia Faustino da Costa no Segundu Komandante Jerál Komisariu Polísia Mateus Fernandes, Inspetór Jerál, Komandante Komandu Operasaun, Administrasaun, Xefe Departamentu no Servisu sira iha Kuartél Jerál nian.
Media PNTL.
