Uncategorized

Ainaro- Komandu Polisia Nasional Timor-Leste (PNTL) inagura uma Ofisial Polisia Suku (OPS) munisipiu Ainaro postu administrativu Hatudo suku Leolima hodi fasilita servisu Polisia iha suku atu fo seguransa ba povu.

Reprejentante Komandante Jeral PNTL Superintendente Xefe Mateus Fernandes hateten governu Timor-Leste liu-liu PNTL sente orgulu iha fatin-fatin ita inagura uma OPS ba dala lima (5) ona, kontribuisaun ne’ebe maka parseru sira fo atu hari paz no estabilidade tanba seguransa metin maka dezenvolvimentu sei lao ho diak, Nia hato’o asuntu ne’e iha serimonia inagurasaun uma OPS suku Leolima Sexta (14/09).

Komandante Administrasaun ne’e haktuirtan katak Komandu PNTL munisipiu Ainaro tau uma OPS iha suku Leolima tanba ita hare partisipasaun autoridade lokal ho komunidade tomak aas tebes; Seguransa laos mai husi PNTL mesak deit maibe seguransa nia nain maka autoridade lokal no komunidade tanba komunidade maka forsa no iis ba PNTL nune’e povu maka avalia no fo observasaun ba buat ne’ebe loos no sala.

“ Husu ba OPS ne’ebe sei hela iha uma ne’e atu halo servisu no kuida uma ne’e moos nafatin, ita Polisia sai ezemplu iha ita nia asaun ne’e inportante, nudar timor oan ita bele kuidadu buat ida hodi alkansa ita nia objetivu”.

Ita nia kondisaun no kapasidade orsamentu la permite atu ita halo buat hotu dala ida tanba ne’e parseru husi governu Nova Zelandia ajuda ita halo uma OPS 14 iha munisipiu 13 inklui suku Leolima.

Entretantu Komandante PNTL munisipiu Ainaro Supeintendente Justino Menezes hateten Uma ne’e sei entrega ba OPS suku Leolima atu hela hodi halao nia knaar, uma OPS iha funsaun maka hela ho familia hodi bele halao servisu oras 24 hodi atende komunidade no sai hanesan servisu fatin nune’e komunidade sira iha suku ne’e bele hato’o keixa ba problema ruma konaba seguransa ne’ebe maka sira infrenta.

Nia haktuir Komandu munisipiu Ainaro orgullu ba apoiu tomak ne’ebe maka governu Nova Zelandia fo liu husi instituisaun PNTL tanba Seguransa inportante tebes ba povu no nasaun tanba ne’e presija kompleta fasilidade hirak ne’ebe maka sei falta nune’e bele garante katak ita nia Polisia halao servisu oras 24 iha suku.

Ami husu ba parseru sira atu apoia nafatin ba suku sira ne’ebe maka seidauk iha uma OPS, Komandu PNTL munisipiu Ainaro atu rekomenda ba Ministeriu administrasaun Estatal atu tau iha planu integradu dezenvolvimentu munisipiu pelumenus tinan ida halo netik uma OPS ida ka rua.

Iha okajiaun ne’e Adjunta Administrador munisipiu Ainaro Judith Mendonca hato’o Parabens ba PNTL tanba bele hahu no hari kedas husi suku no husu ba OPS sira seluk ne’ebe maka seidauk iha uma lalika laran taridu tanba buat hotu ita halo labele dala ida deit maibe pasu pur pasu.

Serimonia inagurasaun uma OPS ne’e partisipa husi Embaxadora Nova Zelandia, Vice Ministru Administarasaun Estatal, Diretor Departamentu Polisia Komunitaria, Veteranus, Lider komunitaria,  Administrador Postu, Komunidade no komvidadus sira. Media PNTL

Dili- Provedoria dos Direitos Humanos e Justisa (PDHJ) halao seminariu nasional  ba Polisia Nasional Timor-Leste (PNTL) atu asegura no proteje direitu komunidade Lezbika, Gay, Biseksual no Transjeneru (LGBT)

Provedor PDHJ Dr. Silveiro Pinto hateten seminariu ne’e ho objetivu atu hasae koñesementu Polisia kona ba asuntu LGBT tanba iha sosiedade komunidade LGBT barak maka hetan diskriminasaun, violasaun fizika nune’e wainhira komunidade sira ne’e sai vitima ba kazu ruma no ba hato’o keixa Polisia bele halo papel ho diak hodi fo protesaun ba sira, Nia hato’o asuntu ne’e iha seminariu nasional ho tema Selebra Diversidade Inklui Ema Hotu iha Dezenvolvimentu ne’ebe maka halao iha salaun CNE Kolmera Dili Kuarta (12/09).

Nia haktuirtan tuir konstituisaun RDTL hanesan lei inan ne’ebe maka hatur iha estadu Direitu Demokratiku iha artigu 16 No. 1 hateten ema hotu hanesan iha lei nia oin nomos iha direitu no obrigasaun hanesan tanba ne’e labele halo diskriminasaun ba ema ida tanba nia rasa, kor, estadu sivil, sexu, orijen etniku, relijiaun no seluktan.

“Ema hotu-hotu moris livre no hanesan laiha ema ida hetan kastigu ka ignoransia tanba sira nia orentasaun sexual, identidade jeneru ka karakteristiku sexual,”Nia dehan.

Entertantu Segundu Komandante Jeral PNTL Komisariu Faustino da Costa hateten seminariu nasional ne’ebe organija husi PDHJ ne’e oportunu tebes atu sensibiliza informasaun ba ita nia komunidade liu-liu media atu publika nune’e ema hotu bele hatene tanba tradisionalmente ema hatene, maibe liu husi atividade formal hanesan ne’e ema bele hatene ejistensia grupu  LGBT  ne’ebe durante ne’e ejiste husi suku to’o nivel nasional maibe laiha programa ida atu hetan rekoñesemntu iha nivel nasional.

Komisariu ne’e haktuirtan Deklarasaun Universal Direitus Humanus no Konstituisaun RDTL hatur momos direitu no igualdade maibe presija rekonesementu a nivel nasional atu ema hotu presiza hatene tanba komunidade LGBT sira fo hela kontribuisaun ba sosiedade no nasaun ne’e.

“Polisia nia papel tuir lei organika PNTL  define atu asegura ema hotu- hotu la diskrimina rasa, kor, sexu relijiaun no seluktan ida ne’e sai dutrina ne’ebe maka PNTL kumri iha knaar lor-loron nian,” dehan Komisariu Faustino.

Iha okajiaun ne’e portavoz komunidade LGBT Bella Galhos hateten seminariu ne’e hanesan pasu pojitivu ne’ebe maka akontese iha rai laran no espera katak prosesu ne’e sei hetan fini diak tanba ida ne’e inportante; nudar sidadaun la presiza hare ba ema nia identidade sexual maibe hare ema hotu nudar timor oan ne’ebe iha oportunidade no rekursu ne’ebe tenke hanesan liu-liu koalia konaba foin sae ne’ebe maka sei sai lideransa iha nasaun ida ne’e.

Seminariu ne’e Partisipa husi Komandante munisipiu 12 no Komandante Rejiaun Oecusse, Komandante Unidade, Xefe departamentu, PSIC komunidade LGBT no konvidadu sira. Media PNTL

Dili- Komandante Jeral Polisia Nasional Timor-Leste (PNTL) halo enseramentu ba kursu dahuluk Misaun Internasional ba Ofisiais no Sarjentu Unidade Espesial Polisia (UEP) nain 29 ne’ebe maka kompleta kursu durante fulan rua (2).

Komandante Jeral PNTL Komisariu Julio da Costa Hornay hateten kursu ne’e nudar preparasaun ba misaun Organizasaun Nasões Unidas (ONU) tuir pedidu alta entidade iha Nova Yorke atu PNTL prepara aan karik iha posibilidade hetan konvite bele partisipa iha Forsa Manutensaun Paz, Nia hato’o asuntu ne’e ba jornalista sira iha Kuartel UEP Bairo-Pite Dili, Tersa (11/09)

Komisariu ne’e haktuir PNTL prepara membru UEP ekipa ida atu nune’e bainhira hetan konvite PNTL prontu no preparadu atu aranka.

Kursu Misaun Internasional ne’ebe maka halao durante fulan rua (Jullu-Setembru) ne’e foka liu ba preparasaun fiziku, armamentu, tiru, lori kareta, teknika no tatika ne’ebe maka instrutor sira hanorin tuir nesesidade misaun ONU nian.

Iha okajiaun ne’e Komandante UEP Superintendente Xefe Afonso dos Santos hateten espera katak Unidade Espesial preparadu, agora ita halo formasaun pasu pur pasu ne’e hanesan preparasaun ita prepara uluk rekursu nune’e ba futuru tinan rua ka tolu UEP iha sub agrupamentu ida preparadu  ba misaun internasional no bem formadu.

Nia hatutan formasaun ne’e realiza ho apoiu husi governu, Eis Prezidente Republika Jose Ramos Horta, parseru TLPDP no Guarda Nasional Republikana (GNR) ho partisipante nain 29 ne’ebe maka pasa ona iha turnu dahuluk no sei kontinua kursu lingua inglesh iha tinan 2019.

Iha serimonia enseramentu ne’e Komandante Jeral entrega sertifikadu  melhor klasifikasaun jeral  ba Inspetor Gonzalo A. Pinhero, melhor tiru ba nspector Agustinho da Costa no tau fita ba reprejentante segundu kursu Primeiru Sargento Cremilda Victor ne’ebe maka sei komesa kursu daruak ho membru nain 34 no tuir planu kursu datoluk sei halao ba ajente sira durante fulan tolu. Media PNTL

DILI- Komandante Jeral PNTL Interinu Komisariu Faustino da Costa husu ba Komandante Unidade no Xefe seksaun sira atu fo orientasaun klaru ba membru sira nune’e halo atuasaun tuir lei.

Komisariu Faustino da Costa hateten Komandantes Munisipiu, Unidade no Xefe seksaun tenke fó brifing  klaru ba membru sira antes fo orden serbisu atu nune’e atuasaun membru iha terrenu labele   prezudika no konfundi servisu polisia nian.Nia hato’o asuntu ne’e iha  serimonia Isar Bandeira semana dahuluk (3/09).

Iha sorin seluk  komandu husu inisiativaa Komandante ida-idak bainhira hetan ajudu ruma tenke hato’o ba Komandu Jeral, nune’e komandu bele hatene no halo akompanamentu.

Nia haktuir tan katak Timor-Leste agora dadauk iha situasaun Impase Politika, tanba ne’e husu ba membru PNTL nudar autoridade ajente seguransa halao knaar hanesan seguransa ho responsabilidade, independente ho hatudu mentalidade

Atividade ba semana kotuk hanesan komemorasaun  loron konsulta popular 30 de Agostu, iha instituisaun balu halo animasaun ho ativide kurida ba Paz no konsertu ba Paz. Alende ne’e loron 04/09 sei iha atividade kurida Tour de Timor, entretantu  Komandu Operasaun hamutuk ho komisaun Tour de Timor fo ona rute  ba atividade ne’e hodi taka dalan iha parte balun kapital Dili

Entretantu kona-ba kontinuasaun debate orsamentu Jeral estadu ne’ebe PNTL mós sei partisipa, komandu husu ba administrasaun PNTL atu prepara planu asaun 2019 atu nune’e iha submisaun orsamentubele kobre atividade nesesidade PNTL nian ba tinan 2019.

Media PNTL Melquiades do Nascimento

Dili- Polisia Nasional Timor-Leste (PNTL) liu husi Centru Formasaun Polisia (CFP) halo exoneração ba Inspector Cesaltina Soares ID #12294 ne’ebe maka halao knaar iha instituisaun PNTL durante tinan 16 nia laran.

Komandante Centru Formasaun Polisia Superintendente Arquimino Ramos hateten Exoneração ne’e halo bazeia ba pedidu rejignasaun husi Inspector ne’e rasik iha loron 2 fulan Agostu 2018 no hetan aprovasaun husi Komandante Jeral liu husi despacho No 203/CG-PNTL/VIII/2018 hodi halo exoneração, Nia hato’o asuntu ne’e ba jornaslista sira iha CFP Comoro Dili, Sesta (31/08).

Superintendente ne’e haktuirtan katak Inspector Cesaltina Soares sai tanba ninia hakarak rasik ho rajaun katak nia bele halao servisu diak liu iha liur nudar responsavel igreja Jeova nian, nia hakarak kontinua misaun hanesan bibiatan ba ninia sarani sira, tanba ne’e hahu ohin ba oin nia laos ona membru PNTL.

Tuir Komandante CFP Inspetor Cesaltina Soares ema ne’ebe servisu diak no kalma maibe ida ne’e maka nia desijaun, iha nasaun demokratiku ita simu ema hotu atu hili servisu ne’ebe maka nia hakarak.

PNTL seidauk iha estatutu rasik tanba ne’e sei aplika hela Estatutu Funsaun Publika nian nune’e rejignasaun ne’ebe maka kada individu halo Komandante Jeral nia kompetensia atu desidi lalaok husi prosesu ne’e.

Iha okajiaun ne’e  Inspetor Cesaltina Soares hateten rajaun rejignaan tanba nudar forsa seguransa hau laiha tempu atu halao knaar spiritual nian ho maximu tanba ne’e rejignaan atu halao misaun spiritual hodi haklaken biblia hodi hanorin ema hotu atu sai Jejus nia disiplu no haruka sira atu ba hanorin ema seluk hanesan Jejus hanorin.

“ Hau nia lia menon ba membru PNTL hotu atu halao servisu ho diak no respeitu diretus humanus nudar kriatura Maromak nian,” Nia dehan .

Inspetor Cesaltina Soares hahu halao knaar iha instituisaun PNTL iha fulan Agostu tinan 2002 iha Unidade Polisia Maritima, Komandu munisipiu Dili, Lojistika Komandu Jeral no kolokasaun ikus iha CFP. Durante ne’e assume knaar hanesan Komandante Postu UPM Sional, Atauru no Atabae, Xefe Seksaun Lojistika no ikus liu hanesan ajuntu Seksaun Fizika no Instructor iha CFP.

Serimonia Exoneração halao iha CFP ho formatura ne’ebe diriji husi Komandante Centru Formasaun Polisia ho prejensa husi Inspetor, Sarjentu, Ajente no Funsionariu Sivil CFP nian no kompleta ho despedida no foto hamutuk. Media PNTL

Dili- Polisia Nasional Timor-Leste (PNTL) sei asegura seguransa ba eventu Tour de Timor ne’ebe maka sei realiza iha loron 4-8 fulan Setembru tinan 2018.

Komandante Operasaun Interinu Superintendente Xefe Mateus Fernandes hateten enkontru ohin atu halo preparasaun ba munisipiu hirak ne’ebe maka sai rute ba TDT tinan ne’e nune’e sira bele asegura seguransa ho diak, Nia hato’o asuntu ne’e ba media PNTL hafoin enkontru ho komisaun organizadora TDT iha Kuartel Jeral PNTL Kaikoli Dili, Tersa (28/08).

Nia haktuirtan katak  Polisia sei halo cek point, taka dalan no akompaña siklista (rider) sira bele liu ho diak liu-liu ba kompania sira ne’ebe halo projetu iha dalan husu para atu fo espasu bainhira eventu ne’e lao tanba ne’e husu hot-hotu nia kontribuisaun hodi fasilita no fo susesu ba eventu inteernasional ne’e.

“ Polisia konsidera Tour de Timor inportante no garante eventu internasional ne’ebe maka realiza kada tinan ne’e sei lao ho susesu,” Komandante Mateus dehan.

Tour de Timor nudar eventu internasional ne’ebe maka inportante tebes ba Timor-Leste hodi sosializa progresu dezenvolvimentu, promove fatin turismu ne’ebe timor iha, kultura, ambiente   no rikusoin hirak ne’ebe maka iha nune’e atleta sira ne’ebe maka mai partisipa bele apresia no hatene progresu Timor-Leste nian.

Entertantu portavoz no komisaun organizadora TDT Johnny Gutteres hateten Komisaun organizadora infrenta limitasaun barak iha tinan ida ne’e relasiona ho situasaun politika no finansas maibe prontu atu suporta PNTL hodi atinji susesu ba eventu ida ne’e.

Nia hatutan komisaun organizadora sei fasilita komunikasaun, komvustivel no nesesidade seluk ne’ebe maka PNTL presiza  hodi akompaña no fo seguransa ba Tour de Timor.

Tuir dadus ne’ebe iha Tour de Timor tinan 2018 sei partisipa husi rider nasional nain 61, Australia nain 41, Republika Ceko nain 1, Alemaña nain 2 no Inglatera nain 3

Rute sei hahu iha loron 4  start husi Dili Palasio do Governu ba Aileu, Aileu ba Ainaro, Ainaro ba Ermera, Ermera ba Liquica no finish iha Dili. Media PNTL

Dili- Mini laboratoriu Forensik ba Servisu Investigasaun Criminal Nasional (SICN) sei fasilita ezaminasaun  balistiku, ezaminasaun finger printing, ezaminasaun toxicologia (racun), ezaminasaun dokumentus no ezaminasaun seluk ne’ebe presija apoiu laboratoriu hodi buka evidensia.

Komisariu Faustino da Costa hateten laboratoriu ne’e sei fasilita Forensiac sira atu halao sira nia knaar nudar meius inportante ba investigasaun kriminal atu halao sira nia servisu ho livre, seguru no iha fatin ne’ebe propriu tanba rejultadu ezaminasaun forensic maka sai referensia servisu Polisia nian liu-liu area investigasaun atu aprejenta kazu ho evidensia no eksikuensia, Nia hato’o asuntu ne’e iha serimonia inagurasaun mini laboratoriu Forensic iha Kuartel jeral PNTL Kaikoli Dili, Sexta (17/08).

Komisariu ne’e haktuirtan katak iha prosesu investigasaun se kompleta ona evidensia no eksikuensia maibe sei presijatan dadus dijital maka tenke liu husi laboratoriu.

Kestiona konaba rekursu humanus komisariu Faustino hateten SICN iha pessoal lubuk ida ne’ebe maka halao servisu iha area ida ne’e maske seidauk sufsiente, tanba ne’e maka komandu planea atu aumenta rekursu humanus no fo treinamentu ba sira atu halao servisu.

Iha Okajiaun ne’e Xefe Servisu Investigasaun Kriminal Nasional Superintendente Jorge Monteiro hateten mini laboratoriu ida ne’e estabelese hodi fasilita servisu Polisia nian atu halo ezaminasaun ne’ebe maka bele halao iha rai laran hanesan ezemplu ezaminasaun balistiku, ezaminasaun finger printing, ezaminasaun toxicologia (racun), ezaminasaun dokumentus no ezaminasaun seluk ne’ebe presija apoiu laboratoriu.

Superintendente Monteiro akresentatan katak ita sempre haruka sampel ba rai liur atu halo teste laboratoriu ne’ebe gasta osan barak no tempu ne’ebe naruk maibe seidauk iha serteja ba rejultadu tanba ne‘e maka ita halo esforsu no posibilidade hotu-hotu  atu halo ezaminasaun iha timor tuir ita nia ekipamentu no rekursu humanu ne’ebe maka iha.

Atu opera ekipamentus hirak ne’e iha tinan 2001 instituisaun PNTL haruka ona pessoal nain 13 ba estuda iha Filipina durante tinan 5-6 hodi halo servisu iha laboratoriu, hare ba rekursu humanus, ekipamentu no fatin naton atu halo ezaminasaun laboratoriu.

Mini laboratoriu ne’e konstrui ho apoiu finanseru no tekniku husi parseru Timor-Leste Police Development Program (TLPDP). Laboratiru ne’e iha ekipamentu ne’ebe maka PNTL simu husi doador sira hanesan governu Australia,  Korea, Cina no governu Estadus unidus America.

Serimonia inagurasaun ne’e kompleta ho despedida ho Komandante TLPDP nudar parseru ne’ebe maka durante ne’e servisu no apoiu dezenvolvimentu instituisaun PNTL. Media PNTL

Dili- Polisia Nasional Timor-Leste (PNTL) lansa Estratejia Jeneru ba periodu tinan 2018-2022 hodi dezenvolve partisipasaun Polisia feto iha instituisaun PNTL.

Reprezentante Komandante Jeral PNTL Superintendente Xefe Carlos Jeronimo hateten estratejia ida ne’e sai matadalan hodi fo prioridade konaba hakbiit servisu  feto PNTL tuir planu estratejiku PNTL nian, Nia hato’o asuntu ne’e ba Jornalista sira iha komferensia emprensa hafoin lansamentu livru Estratejia Jeneru PNTL iha Kuartel Jeral PNTL Kaikoli Dili, Kinta (16/08).

Nia hatutan estrajeia ida ne’e lori aspirasaun tomak Polisia feto sira hotu nian tan ne’e hein katak ida ne’e sai duni matadalan ba feto sira hodi bele lao korela ho planu estratejiku PNTL nian tanba laiha estratejia ida lao mesak tenke lao tuir nia dalan tuir planu ne’ebe bele orienta ba.

“Hau alertatan dala ida estratejia ne’e sei inplementa faze por faze tuir prioridade no kapasidade orsamentu,” dehan Komandante Jeronimo.

Entretantu Diretora jeral Servisu Korporativu ministeriu Interior Guilhermina Ribeiro hateten estratejia maka sai mestre atu atinji tarjetu ne’ebe maka iha tuir programa VIII governu nian, estratejia Ministeriu Interior no estratejia oinsa atu promove igualdade jeneru iha PNTL no atu hadia situasaun seguransa feto hodi responde ba situasaun ne’ebe maka relasiona ho Planu Estratejiku ba rejolusaun konflitu konselu seguransa 1325.

Iha okajiaun ne’e Prezidente Grupu Mulher Parlamentar Timor-Leste (GMPTL) Deputada Lídia Norberta Martins sujere atu nune’e ekipa ne’ebe halo validasaun ba planu estratejiku ne’e hare estratejia ida atu aumenta promosaun feto liu-liu iha nivel desijaun nian tanba ami sente inportante atu aumenta promosaun feto diak liutan no hasae sira nia lideransa iha instituisaun PNTL.

Nia haktuir sujestaun tuir mai maka oinsa hasae investimentu ba kapasitasaun no formasaun hodi prepara feto maluk sira no reforsa liutan sira nia potensia ne’ebe iha no evalua rejultadu kapasitasaun hirak ne’ebe fo tia ona.

Xefe UN Women Sunita Caminha hateten Ami kontinua servisu hamutuk ho gabinete grupu traballu jeneru no gabinete jeneru PNTL hodi suporta sira atinji metas no tarjetu husi estrajia jeneru PNTL.

Nia hatutan ba futuru UN Women Iha prosesu orsamentu UN Women servisu hamutuk ho Ministeriu Interior, PNTL  Sekretariu Estadu Igualdade no  Inkluzaun hodi ajuda unidade planeamentu sira hodi bele enkaixa orsmanetu ne’ebe presija hodi halo alokasaun adekuadu hodi atinji estratejia ida ne’e.

Sorumutu validasaun planu Estratejia Jeneru PNTL no lansamentu Livru Estratejia Jeneru period 2018-2022 ne’e partisipa husi Komandante TLPDP, Parseru JICA, pontu fokal PNTL husi munisipiu, Fundasaun Azia, Sekretariu Estadu Igualdade no Inkluzaun grupu trabalu jeneru no komvidadu sira. Media PNTL

Dili- Ministru Interior Interinu Filomeno Paixão halo enkontru dahuluk ho Komandu Jeral PNTL hodi deskuti  konaba seguransa nasional integradu, atuasaun integradu, komplementaridade, subsidiaridade no rasionalizasaun de bens.

Ministru Interior Interinu Filomeno Paixão hateten halao enkontru ba Komandu Jeral PNTL hodi hasoru malu ho Komandante Jeral no Segundu Komandante Jeral hamutuk ho Ofisiais Superior sira ne’e nudar vizita dahuluk hafoin simu posse nudar ministru Defeza no ministru Interior Interinu, Nia hato’o asuntu ne’e iha enkontru ho Komandante Jeral PNTL,Segundu Komandante Jeral no Oficiais Superior sira iha Kuartel Jeral PNTL Kaikoli Dili Tersa (14/08).

Nia hatutan Forsa rua F-FDTL no PNTL nudar forsa irmaun tanba ne’e tenke hare malu diak hodi kompleta malu iha aspetu seguransa interna no externa. Husu ba Ofisiais PNTL atu hare lei seguransa nasional hodi sai referensia ba planu servisu Polisia Nasional Timor-Leste tanba iha lei ne’e  koalia konaba seguransa nasional integradu, atuasaun integradu, komplementaridade, subsidiaridade no rasionalizasaun de bens.

“Atu dezenvolve forsa rua ne’e tenke iha kapasitasaun maibe labele paralela no duplika tenke halo rasionalizasaun ita labele mehi atu sosa meius ne’ebe la tuir ita nia kapasidade husu atu komandante sira iha konsiensia no kaer ba konseitu ida ne’e hodi dezenvolve PNTL,” Nia dehan..

Relasiona kazu tiru kilat iha Maliana ministru husu atu Komandante sira tenke iha asaun ba nia membru sira   hodi evita problema tanba akontesementu iha Maliana halo komunidade no ema internasional sira tauk no prekupa konaba seguransa.

Ministru Defeza no Ministru Interior Interinu ne’e afirma planu ne’ebe aprezenta husi Komandante Jeral PNTL ne’e diak I nia mai laos atu muda planu ne’ebe maka iha ona maibe atu ajuda hodi aserta forsa rua ne’e. Media PNTL

Dili- Situasaun seguransa no ordem publika iha Timor-Leste kontroladu no seguru nune’e povu kontrinua halao nia knaar ho seguru.

Komandante Jeral PNTL Komisariu Julio da Costa Hornay hateten enjeral situasaun seguransa rai laran lao hakmatek no kontroladu, laiha problema boot ne’ebe maka presija toma atensaun imediata ka halo atuasaun, Nia hato’o asuntu ne’e ba jornalista sira iha knaar fatin Kaikoli Dili, Segunda (13/08).

Komisariu ne’e haktuirtan katak maske iha kazu balun ne’ebe maka akontese hanesan kazu violensia domestika, joven sira hemu tua lanu depois tuda malu no baku malu, maibe Polisia marka prezensa hodi atende problema hirak ne’e.

Kazu balu Polisia konsege lori ba prosesu, kazu balu wainhira Polisia to’o fatin akontesementu suspetu sira halai lakon, no kazu balu informasaun iha terrenu la temi suspetu sira nia naran entaun polisia sei buka informasaun hodi kaptura suspetu sira maibe presiza mandadu kapturasaun husi Pinisteriu Publiku nune’e Polisia ezekuta. Media PNTL