Uncategorized

Dili, Komandu Polísia Nasional Timor-Leste (PNTL) liu husi Unidade Espesial Polísia (UEP)  seksaun Explosive Ordnance Disposal (EOD) iha kuarta-feira (15/05)  ne’e hala’o enkontru ida ho ekipa husi Kompañia Encanta Leste ho Kompañia XainaHam kona-ba importasaun material explosivu ba konstrusaun portu iha Tibar.

Komandante UEP Superintendente Xefe Afonso dos Santos hafoin enkontru hateten sorumutu ne’ebe maka realiza entre Komandu Jerál ho ekipa kompañia rua ne’ebe maka kaer projetu konstrusaun portu Tibar ho parte PNTL ne’ebe maka kontrola teknikamente importasaun material explosivu nian.

“Kompañia rua ne’e maka kaer projetu portu Tibar agora PNTL teknikamente iha Unidade Espesial seksaun EOD maka atu kontrola teknikamente importasaun armazenamento no mós ba iha utilizasaun blastiku ne’ebe maka atu fera foho hirak ne’eba ba iha konstrusaun portu Tibar”, hateten Komandante UEP ne’e.

Superintendente Xefe Afonso hatutan katak kompañia iha ona kontratu no Komandante Jerál PNTL bele ona relata ba Ministru Interior Interinu atu nune’e iha futuru bele lao ona projetu ida ne’e.

Partisipa iha enkontru ne’e Komandante Jerál PNTL Komisariu Polísia Faustino da Costa, Komandante Operasaun, Komandante UEP, Komandante SIP, ekipa gabinete Asesoria Juridiku PNTL ne’ebe maka fó pareser liga ba termu Lei no Diploma Ministerial ne’ebe iha ba Komandu kona-ba involvimentu PNTL nian iha konstrusaun ne’e.

Media PNTL.  

Dili-Komandu Polisia Nasional Timor-Leste (PNTL) asina Memorandum of Understanding (MOU) ho Provedoria dos Direitus Humanus e Justiça (PDHJ) hodi fo formasaun konaba Direitus Humanus no Boa Governasaun ba membru PNTL.

Komandante Jeral PNTL Komisariu Faustino da Costa hateten MOU ne’e ho objetivu atu reforsa no halo kapasitasaun ba membru PNTL iha nivel nasional to’o postu administrativu nune’e iha futuru redus involvimentu no violasaun diretus humanus ne’ebe nota katak dala wain la responde saida maka hatur iha Konstituisaun da Republika artigu 147, Nia hato’o asuntu ne’e ba Jornalista sira iha edifisiu PDHJ Kaikoli Dili, Segunda (13/05).

Komisariu ne’e haktuirtan Komandu PNTL nafatin propoin katak formasaun no kontinuasaun formasaun ne’ebe sei halao laos deit iha nivel nasional maibe bele halao to’o kapital munisipiu atu nune’e membru hotu-hotu laos deit hetan formasaun baziku maibe mos formasaun kontinuasaun no refreshing training ba ofisial Polisia sira iha nivel teritoriu nasional.

“ MOU ne’ebe maka asina ne’e hodi fo formasaun no sensibilijasaun ba membru PNTL konaba Diretus Humanus, no iha tempu hanesan karik iha kazu no akontesementu ne’ebe sai prekupasaun publiku, PNTL (Departamentu Justisa) no PDHJ nia ema sei involve iha prosesu investigasaun,” dehan Komisariu Faustino.

Atu termina Komandante Jeral PNTL fo fiar no tau esperansa boot katak iha futuru ita sei bele redus saida maka sai prekupasaun povu liu-liu konaba atuasaun  no involvimentu PNTL nia ema sira iha atendementu publiku.

Iha okajiaun ne’e Provedora  PDHJ Jesuina Maria F.Gomes hateten Provedor ho inisiativa hakarak atu estabelese nota intendementu ho Komandante Jeral PNTL atu reforsa koperasaun institusional atu halo esforsu koletivu liu-liu liga ho prevensaun liu husi fornesimentu treinamentu no formasaun ba PNTL para hasae konyesmentu iha area Direitus Humanus bazika no rejimi uza forsa atu nune’e sira bele halao sira nia knaar diak liutan.

Nia haktuirtan formasaun iha tipu oi-oin hanesan Seminariu, Workshop no treinamentu ho durasaun loron 5 tanba ne’e PDHJ identifika Treinamentu loron lima (5) sei fo ba membru PNTL ho postu Ajente liu-liu sira ne’ebe halo atuasaun direta ba komunidade no ba postu Ofisiais PDHJ halo Seminariu no Workshop loron ida atu koalia liu konaba knaar hanesan Komandante.

Formasaun ne’e nudar asaun prevensaun hodi redus violasaun diretus humanus tanba dalabarak violasaun mosu tanba falta de konyesementu.  Durante ne’e PDHJ fo ona Formasaun ba membru PNTL maibe membru ne’ebe tuir seidauk barak, iha tinan tolu (3) ikus PDHJ fo formasaun ba membru PNTL Unidade Espesial Polisia ba Batelaun Ordem Publika (BOP) foin maka nain 272 husi membru PNTL kuaje 4000 ne’e persentajen ne’ebe kiik.

Iha okajiaun ne’e PDHJ mos asina MOU ho Centro Nacional Chega (CNC) atu utilija rekursu ne’ebe maka PDHJ iha hodi inplementa Rekomendasaun Chega.

Serimonia asinatura MOU ne’e marka prejensa husi Inspetor Jeral Superintendente Xefe Carlos Almeida Sousa Jeronimo, Xefe Departamentu Justisa Superintendente Orlando Gomes Xefe Gabineti Asesoria Juridika Inspetor Virgilio Correia, Diretor Centro Nasional Chega (CNC) Hugo Fernandes, Provedor Adjuntu Boa Governasaun Miguel de Carvalho, Provedora Adjunta Diretus Humanus Venicia Erlana Magno, Xefe Departamentus no Funsionariu PDHJ.

Media PNTL

Maliana, Komandu Polísia Nasional Timor-Leste (PNTL)  Munisipiu Bobonaro iha sexta-feira semana kotuk (28/09) hala’o serimonia tomada de posse ba estrutura  Konsellu Polisiamentu Komunitaria (KPK) husi postu administrativu Maliana, Cailaco no Balibo.

Komandante PNTL munisipiu Bobanaro Superintendente Xefe Armando Monteiro hafoin serimonia ba jornalista sira hateten Komandu PNTL munisipiu Bobonaro hala’o serimonia tomada de posse ida kona-ba KPK ita hahu’u reforma no re-estrutura fila fali hafoin mudansa eleisaun Konsellu Suku iha tinan 2016 liu ba.

“Ho formasaun ida ne’e Komandu PNTL munisipiu Bobonaro hetan apoiu husi ita nia parseiru Fundasaun Asia iha Timor-Leste ne’ebe hahu’u formasaun ida ne’e iha fulan Fevereiru tinan ida ne’e hahu’u husi postu administrativu Atabae, Balibo, Cailaco no ikus iha Maliana ho formasaun iha postu administrativu ha’at ne’e ita atinzi ona suku hamutuk 25 husi suku 50 iha munisipiu Bobonaro“, tenik Komandante PNTL munisipiu Bobanaro ne’e.

Superintendente Xefe Armando Monteiro salienta liu tan katak ho formasaun ida ne’e mós Komandu PNTL reforsa tan ninia parseira liu husi Konsellu Polisiamentu suku hamutuk ho Konsellu Suku iha suku 25 ne’ebe simu posse oinsa sira bele halo servisu hamutuk iha komunikasaun, kolaborasaun ba buka no identifika problema komunidade nian no hamutuk ho komunidade oinsa atu bele fó solusaun ba problema ne’ebe mak ita nia komunidade infrenta liu-liu ba kazu sivil sira ne’ebe mak durante ne’e ita nia komunidade diretamente hato’o mai iha eskuadra tantu mai iha Komandu PNTL.

“Tanba ne’e ho formasaun refere no serimonia tomada de posse ne’e bele dehan katak bele minimiza no reforsa tan servisu polísia nian iha munisipiu Bobonaro, hein katak ohin ita akompaña parseiru sei apoiu no tinan oin ita bele remata no kompleta suku 50 iha munisipiu Bobonaro.

Iha fatin hanesan Presidente Autoridade Munisipiu Bobonaro Interinu Julio Carvalho Caeiro iha ninia intervensaun ba serimonia ne’e perante empulsadu sira husu atu bele hala’o servisu ho responsabilidade no bele hamutuk ho komunidade hodi buka no resolve problema sira ne’ebe mak durante ne’e komunidade sira hasoru.

Partisipa iha serimonia ne’e Segundu Komandante Jerál ne’ebe reprezenta Komandante Jerál, Presidente Autoridade Munisipiu Bobonaro Interinu, director Fundasaun Asia, membru KPK no komunidade sira husi munisipiu Bobonaro.  Media PNTL.

Dili, Membru Polísia Nasional Timor-Leste (PNTL) husi Unidade Espesial Polísia (UEP) hamutuk na’in 28 tersa-feira ne’e (02/10) ofisialmente simu xapa hodi prepara ann atu ba atende Misaun da Paz iha ONU.

Segundu Komandante Jerál PNTL Komisariu Polísia Faustino da Costa ne’ebe ofisialmente entrega xapa ba membru UEP sira hateten durante ne’e membru hirak ne’e partisipa hela formasaun no ohin hanesan pasu ida tan hodi koloka xapa ne’e no sira ne’e preparadu hodi koloka iha Misaun da Paz ONU nian.

“Primeiru hau nia parabéns ba ita bo’ot sira ne’ebe durante ne’e infrenta hela formasaun ida preparasaun ba Misaun da Paz ONU nian, segundu hau nia parabens mós tanba loron ohin ita bo’ot sira hetan ona meius ida ne’ebe indika katak ita bo’ot sira preparadu atu partisipa iha Misaun da Paz ONU ninian maka xapa ne’ebe tau ba ita bo’ot sira”, hateten Segundu Komandante Jerál PNTL ne’e.

Komisariu Polísia Faustino da Costa salienta liu tan katak membru sira ne’ebe simu xapa hirak ne’e, liu husi diskusaun balun iha tempu ne’ebe naruk ikus liu mak vizita Komandante Jerál nian iha Nova Yorke enkontru xefe polisia nian no resultadu husi vizita ida ne’e ami tenta oinsa atu realiza, implementa aktividade sira balun tuir diskusaun iha vizita Komandante Jerál nian.

“Hau pesoalmente desde tinan ida no rua ba kotuk, kapasidade atendimentu ita nia Unidade Espesial iha Misaun da Paz ONU nian, hau nem preukupa, hau nem iha dúvidas kona-ba kapasidade atendimentu no hala’o kna’ar iha Misaun Paz hau la preukupa ida ne’e”, hatutan na’in ulun daruak PNTL ne’e.

Segundu Komandante Jerál PNTL mós akresenta tan kestaun bo’ot ida ne’ebe maka institusaun kestiona maka meius apoiu, meius suporta oinsa membru hirak ne’e hala’o sira nia kna’ar ho responsabilidade. Além-de ne’e PNTL nafatin halo kooperasaun ho parseiru Timor-Leste Police Development Program (TLPDP) atu fó formasaun lian Portugués no Inglês ba membru sira ne’ebe maka atu partisipa iha Misaun da Paz tanba lingua rua ne’e sai hanesan lingua ofisial ONU nian.

“Kestaun mak ne’e meius apoiu, meius suporta oinsa mak sira hala’o sira nia kna’ar ida ne’e maka sai desafiu bo’ot ida hanesan kareta hira mak Unidade Espesial tenke lori husi Timor, ekipamentus seguransa nian hira maka tenke lori liu-liu hanesan EOD ninian no oinsa maka ita bele lori sasan hirak ne’e to’o iha Afrika ne’eba”, lamenta Komisariu Polísia ne’e.

Komisariu Faustino da Costa apela ba membru hirak ne’ebe maka sei partisipa iha MIsaun da Paz ONU nian ne’e atu bele komporta ann ho didiak tanba imi ba reprezenta familia, institusaun no nasaun Timor-Leste.

Media PNTL.

Dili- Komandu Polisia Nasional Timor-Leste (PNTL) halo enkontru planu asaun annual tinan 2018-2019 hodi define programa prioridade ne’ebe atu halao.

Komandante Jeral PNTL Komisariu Julio da Costa Hornay hateten hare husi envelope fiskal no programa prioridade ne’ebe koloka iha tinan 2019 maka ami konvida Komandante sira hodi tur hamutuk no koalia konaba programa prioridade planu annual tinan 2018-2019, Nia hato’o asuntu ne’e ba Jornalista sira iha Kuartel Jeral PNTL Kaikoli Dili, Segunda (01/10).

Komisariu Hornay haktuirtan  ita prepara ita nia planu depois planu balu ne’ebe maka orsamentu fiskal seidauk atinji Komandu sei deskuti iha komite revizaun orsamentu ho rajaun ne’ebe maka forte hodi hetan aprovasaun ba inplementasaun tinan 2019 nian.

Total orsamentu ne’ebe maka PNTL propoin hamutuk $26 miloens ne’ebe maka fahe ba item Salariu e vensimentu kuaje $ 15 miloens, vens de servisu kuaje $10 miloens  ne’ebe maka Komandu sei koloka no nia menus sei aprejenta iha Komite revijaun orsamnetu atu hetan aprovasaun.

“ Prioridade ne’ebe maka define hanesan hadia bem estar PNTL nian, hadia infrastrutura, hadia ekipamentu no transporte hodi suporta membru PNTL nia servisu operasaun ka administrasaun iha terrenu,” Nia dehan.

Enkontru planu asaun annual tinan 2018-2019 ne’e halao durante loron rua (01 to’o 02 ) ho partisipasaun husi Komandante munisipiu 13, Komandante Unidade Espesial Polisia (UEP), Komandante Unidade Polisia Maritima (UPM) Komandante Unidade Patrulamentu Fronteira (UPF), Komandante Centru Formasaun Polisia, Komandu Jeral no parseru sira. Media PNTL

Dili, Ministru Interior Interinu Filomeno Paixão iha primeira semana fulan Outubru tinan ne’e (01/10) dirige serimonia isar bandeira iha Komandu Polísia Nasional Timor-Leste (PNTL).

Aktual Ministru Defesa ne’e iha nia intervensaun hateten hafoin aprovasaun orsamentu 2018 ita sai husi impase iha ne’ebe fó impaktu ba ita hotu durante tinan ida resin, hau imagina sakrifisiu ne’ebe husi PNTL tomak sente tanba impase ida ne’e.

“Tanba ne’e maka hau iha ne’e hakarak presta hau nia admirasaun tanba laiha ema maka hato’o keixa no laiha ema mak lamenta no servisu lao nafatin, hau mos hato’o hau nia parabens ba membru sira iha fronteira ba sira nia prestasaun, tantu membru PNTL no F-FDTL komporta diak tebes durante impase maibé laiha regra sem resepsaun”, hateten Ministru Filomeno Paixão iha Kuartél Jeral PNTL Kaikoli.

Governante ne’e dehan tan katak mosu mós kestaun indisiplinares mas laos regra jerál, iha ne’e ba oin ita tama iha era foun, era ida ne’ebe dura liu, era ne’ebe seria liu iha desenvolvimentu institusaun rua ne’e (PNTL no F-FDTL) liu-liu ba PNTL.

“Primeiru lugar hare’e liu mak Konstitusaun, hare’e Konseitu Estratégiku Defesa no Seguransa hodi hadia Lei sira ne’e hotu mai to’o regulamentu, hodi ita nia servisu ba oin lao ho diak, tanba ema barak lamenta dehan ita PNTL hahalok ladiak dalaruma ita mós la sala, problema depois hau mai assume nu’udar Ministru Interior hau hare’e didiak, hau rona Komandante sira afinal nia iha fukun bo’ot liu, mak Regulamentu Disiplina Polisial mak lalos, ita tenke hadia”, afirma eis Brigadeiru Jenerál F-FDTL ne’e.

Ministru Filomeno Paixão esplika liu tan katak kuando koalia kona-ba disiplina labele remata iha Tribunal, remata iha Komisariu no másimu liu ramata iha Ministru Interior la ba tan, kestaun disiplinares hotu iha uma laran laos lori fali ba Tribunal, ida ne’e maka ita nia sala durante ne’e no ida ne’e tenke hadia imediatamente.

“Kuando lori fali kestaun Disiplinares ba iha Tribunal, ne’e hanesan ita halimar tanba ne’e hau bolu atensaun ba imi, ba oin kuidadu ho disiplina, kuando abuza to’o iha Komandante no Ministru dehan duni sai, laiha tan Tribunal”, alerta governante ne’e.

Media PNTL.         

Ainaro- Komandu Polisia Nasional Timor-Leste (PNTL) inagura uma Ofisial Polisia Suku (OPS) munisipiu Ainaro postu administrativu Hatudo suku Leolima hodi fasilita servisu Polisia iha suku atu fo seguransa ba povu.

Reprejentante Komandante Jeral PNTL Superintendente Xefe Mateus Fernandes hateten governu Timor-Leste liu-liu PNTL sente orgulu iha fatin-fatin ita inagura uma OPS ba dala lima (5) ona, kontribuisaun ne’ebe maka parseru sira fo atu hari paz no estabilidade tanba seguransa metin maka dezenvolvimentu sei lao ho diak, Nia hato’o asuntu ne’e iha serimonia inagurasaun uma OPS suku Leolima Sexta (14/09).

Komandante Administrasaun ne’e haktuirtan katak Komandu PNTL munisipiu Ainaro tau uma OPS iha suku Leolima tanba ita hare partisipasaun autoridade lokal ho komunidade tomak aas tebes; Seguransa laos mai husi PNTL mesak deit maibe seguransa nia nain maka autoridade lokal no komunidade tanba komunidade maka forsa no iis ba PNTL nune’e povu maka avalia no fo observasaun ba buat ne’ebe loos no sala.

“ Husu ba OPS ne’ebe sei hela iha uma ne’e atu halo servisu no kuida uma ne’e moos nafatin, ita Polisia sai ezemplu iha ita nia asaun ne’e inportante, nudar timor oan ita bele kuidadu buat ida hodi alkansa ita nia objetivu”.

Ita nia kondisaun no kapasidade orsamentu la permite atu ita halo buat hotu dala ida tanba ne’e parseru husi governu Nova Zelandia ajuda ita halo uma OPS 14 iha munisipiu 13 inklui suku Leolima.

Entretantu Komandante PNTL munisipiu Ainaro Supeintendente Justino Menezes hateten Uma ne’e sei entrega ba OPS suku Leolima atu hela hodi halao nia knaar, uma OPS iha funsaun maka hela ho familia hodi bele halao servisu oras 24 hodi atende komunidade no sai hanesan servisu fatin nune’e komunidade sira iha suku ne’e bele hato’o keixa ba problema ruma konaba seguransa ne’ebe maka sira infrenta.

Nia haktuir Komandu munisipiu Ainaro orgullu ba apoiu tomak ne’ebe maka governu Nova Zelandia fo liu husi instituisaun PNTL tanba Seguransa inportante tebes ba povu no nasaun tanba ne’e presija kompleta fasilidade hirak ne’ebe maka sei falta nune’e bele garante katak ita nia Polisia halao servisu oras 24 iha suku.

Ami husu ba parseru sira atu apoia nafatin ba suku sira ne’ebe maka seidauk iha uma OPS, Komandu PNTL munisipiu Ainaro atu rekomenda ba Ministeriu administrasaun Estatal atu tau iha planu integradu dezenvolvimentu munisipiu pelumenus tinan ida halo netik uma OPS ida ka rua.

Iha okajiaun ne’e Adjunta Administrador munisipiu Ainaro Judith Mendonca hato’o Parabens ba PNTL tanba bele hahu no hari kedas husi suku no husu ba OPS sira seluk ne’ebe maka seidauk iha uma lalika laran taridu tanba buat hotu ita halo labele dala ida deit maibe pasu pur pasu.

Serimonia inagurasaun uma OPS ne’e partisipa husi Embaxadora Nova Zelandia, Vice Ministru Administarasaun Estatal, Diretor Departamentu Polisia Komunitaria, Veteranus, Lider komunitaria,  Administrador Postu, Komunidade no komvidadus sira. Media PNTL

Dili- Provedoria dos Direitos Humanos e Justisa (PDHJ) halao seminariu nasional  ba Polisia Nasional Timor-Leste (PNTL) atu asegura no proteje direitu komunidade Lezbika, Gay, Biseksual no Transjeneru (LGBT)

Provedor PDHJ Dr. Silveiro Pinto hateten seminariu ne’e ho objetivu atu hasae koñesementu Polisia kona ba asuntu LGBT tanba iha sosiedade komunidade LGBT barak maka hetan diskriminasaun, violasaun fizika nune’e wainhira komunidade sira ne’e sai vitima ba kazu ruma no ba hato’o keixa Polisia bele halo papel ho diak hodi fo protesaun ba sira, Nia hato’o asuntu ne’e iha seminariu nasional ho tema Selebra Diversidade Inklui Ema Hotu iha Dezenvolvimentu ne’ebe maka halao iha salaun CNE Kolmera Dili Kuarta (12/09).

Nia haktuirtan tuir konstituisaun RDTL hanesan lei inan ne’ebe maka hatur iha estadu Direitu Demokratiku iha artigu 16 No. 1 hateten ema hotu hanesan iha lei nia oin nomos iha direitu no obrigasaun hanesan tanba ne’e labele halo diskriminasaun ba ema ida tanba nia rasa, kor, estadu sivil, sexu, orijen etniku, relijiaun no seluktan.

“Ema hotu-hotu moris livre no hanesan laiha ema ida hetan kastigu ka ignoransia tanba sira nia orentasaun sexual, identidade jeneru ka karakteristiku sexual,”Nia dehan.

Entertantu Segundu Komandante Jeral PNTL Komisariu Faustino da Costa hateten seminariu nasional ne’ebe organija husi PDHJ ne’e oportunu tebes atu sensibiliza informasaun ba ita nia komunidade liu-liu media atu publika nune’e ema hotu bele hatene tanba tradisionalmente ema hatene, maibe liu husi atividade formal hanesan ne’e ema bele hatene ejistensia grupu  LGBT  ne’ebe durante ne’e ejiste husi suku to’o nivel nasional maibe laiha programa ida atu hetan rekoñesemntu iha nivel nasional.

Komisariu ne’e haktuirtan Deklarasaun Universal Direitus Humanus no Konstituisaun RDTL hatur momos direitu no igualdade maibe presija rekonesementu a nivel nasional atu ema hotu presiza hatene tanba komunidade LGBT sira fo hela kontribuisaun ba sosiedade no nasaun ne’e.

“Polisia nia papel tuir lei organika PNTL  define atu asegura ema hotu- hotu la diskrimina rasa, kor, sexu relijiaun no seluktan ida ne’e sai dutrina ne’ebe maka PNTL kumri iha knaar lor-loron nian,” dehan Komisariu Faustino.

Iha okajiaun ne’e portavoz komunidade LGBT Bella Galhos hateten seminariu ne’e hanesan pasu pojitivu ne’ebe maka akontese iha rai laran no espera katak prosesu ne’e sei hetan fini diak tanba ida ne’e inportante; nudar sidadaun la presiza hare ba ema nia identidade sexual maibe hare ema hotu nudar timor oan ne’ebe iha oportunidade no rekursu ne’ebe tenke hanesan liu-liu koalia konaba foin sae ne’ebe maka sei sai lideransa iha nasaun ida ne’e.

Seminariu ne’e Partisipa husi Komandante munisipiu 12 no Komandante Rejiaun Oecusse, Komandante Unidade, Xefe departamentu, PSIC komunidade LGBT no konvidadu sira. Media PNTL

Dili- Komandante Jeral Polisia Nasional Timor-Leste (PNTL) halo enseramentu ba kursu dahuluk Misaun Internasional ba Ofisiais no Sarjentu Unidade Espesial Polisia (UEP) nain 29 ne’ebe maka kompleta kursu durante fulan rua (2).

Komandante Jeral PNTL Komisariu Julio da Costa Hornay hateten kursu ne’e nudar preparasaun ba misaun Organizasaun Nasões Unidas (ONU) tuir pedidu alta entidade iha Nova Yorke atu PNTL prepara aan karik iha posibilidade hetan konvite bele partisipa iha Forsa Manutensaun Paz, Nia hato’o asuntu ne’e ba jornalista sira iha Kuartel UEP Bairo-Pite Dili, Tersa (11/09)

Komisariu ne’e haktuir PNTL prepara membru UEP ekipa ida atu nune’e bainhira hetan konvite PNTL prontu no preparadu atu aranka.

Kursu Misaun Internasional ne’ebe maka halao durante fulan rua (Jullu-Setembru) ne’e foka liu ba preparasaun fiziku, armamentu, tiru, lori kareta, teknika no tatika ne’ebe maka instrutor sira hanorin tuir nesesidade misaun ONU nian.

Iha okajiaun ne’e Komandante UEP Superintendente Xefe Afonso dos Santos hateten espera katak Unidade Espesial preparadu, agora ita halo formasaun pasu pur pasu ne’e hanesan preparasaun ita prepara uluk rekursu nune’e ba futuru tinan rua ka tolu UEP iha sub agrupamentu ida preparadu  ba misaun internasional no bem formadu.

Nia hatutan formasaun ne’e realiza ho apoiu husi governu, Eis Prezidente Republika Jose Ramos Horta, parseru TLPDP no Guarda Nasional Republikana (GNR) ho partisipante nain 29 ne’ebe maka pasa ona iha turnu dahuluk no sei kontinua kursu lingua inglesh iha tinan 2019.

Iha serimonia enseramentu ne’e Komandante Jeral entrega sertifikadu  melhor klasifikasaun jeral  ba Inspetor Gonzalo A. Pinhero, melhor tiru ba nspector Agustinho da Costa no tau fita ba reprejentante segundu kursu Primeiru Sargento Cremilda Victor ne’ebe maka sei komesa kursu daruak ho membru nain 34 no tuir planu kursu datoluk sei halao ba ajente sira durante fulan tolu. Media PNTL

DILI- Komandante Jeral PNTL Interinu Komisariu Faustino da Costa husu ba Komandante Unidade no Xefe seksaun sira atu fo orientasaun klaru ba membru sira nune’e halo atuasaun tuir lei.

Komisariu Faustino da Costa hateten Komandantes Munisipiu, Unidade no Xefe seksaun tenke fó brifing  klaru ba membru sira antes fo orden serbisu atu nune’e atuasaun membru iha terrenu labele   prezudika no konfundi servisu polisia nian.Nia hato’o asuntu ne’e iha  serimonia Isar Bandeira semana dahuluk (3/09).

Iha sorin seluk  komandu husu inisiativaa Komandante ida-idak bainhira hetan ajudu ruma tenke hato’o ba Komandu Jeral, nune’e komandu bele hatene no halo akompanamentu.

Nia haktuir tan katak Timor-Leste agora dadauk iha situasaun Impase Politika, tanba ne’e husu ba membru PNTL nudar autoridade ajente seguransa halao knaar hanesan seguransa ho responsabilidade, independente ho hatudu mentalidade

Atividade ba semana kotuk hanesan komemorasaun  loron konsulta popular 30 de Agostu, iha instituisaun balu halo animasaun ho ativide kurida ba Paz no konsertu ba Paz. Alende ne’e loron 04/09 sei iha atividade kurida Tour de Timor, entretantu  Komandu Operasaun hamutuk ho komisaun Tour de Timor fo ona rute  ba atividade ne’e hodi taka dalan iha parte balun kapital Dili

Entretantu kona-ba kontinuasaun debate orsamentu Jeral estadu ne’ebe PNTL mós sei partisipa, komandu husu ba administrasaun PNTL atu prepara planu asaun 2019 atu nune’e iha submisaun orsamentubele kobre atividade nesesidade PNTL nian ba tinan 2019.

Media PNTL Melquiades do Nascimento