Dili, Komandu Polísia Nasional Timor-Leste (PNTL) durante loron 10 (Loron 9 to’o loron 18 Fulan Abril 2021) rezista kazu Insidente hamutuk 27 ne’ebe kompostu husi kazu Asaltu malu 11, Violensia Domestika 13, Ema mate na’in 2 no hetan Granada 1. Rezista mós asidente kma’an hamutuk 10. Maske nune’e situasaun seguransa iha teritoriu nasional lao diak no hakmatek.
Porta Voz Komandu PNTL Superintendente Xefe Arnaldo Araujo segunda-feira (19/04) ne’e liu husi konferensia imprensa ne’ebe hala’o iha Kuartél Jerál Kaikoli hateten ema na’in rua ne’ebe mate kauza husi eletrisidade soke, ne’ebe akontese iha loron 12 fulan Abril tinan ne’e iha munisipiu Bobonaro, Postu Administrativu Balibo, suku Leo Lima, aldeia manten Dodok rezulta vitima ho naran Cipriano Coly Barreto ho idade 24 no Rui Carlito ho idade 26 tenke mate iha fatin, vitima rua refere hanesan tekniku iha kompañia Telkomsel.
“Hakarak informa mós tan katak iha loron kinta-feitra (15/04) oras 14:19 iha informasaun ida kona-ba ema lakon iha area Tasi-tolu besik loja Bandido Qualidade, Señor ida ho naran Rui António da Cruz fó hatene katak labarik ida ho naran Reincencha R. Cruz ho idade 15, eskola iha Ensino Secúndario Paulos Dili sai husi uma iha loron tersa-feira kalan to’o agora la fila mai uma”, informa Porta Voz Komandu PNTL ne’e.
Superintendente Xefe ne’e afirma tan katak iha loron sexta-feira (09/04) komunidade balun hetan Granada ida iha aldeia Belebatu, suku Ailili Manatuto, Granada ne’e ho modelu kabuar no ho kondisaun diak no polísia asegura kedas. Oras ne’e dadaun PNTL munisipiu Manatuto hein hela ekipa husi EOD hodi bele halo destruisaun.
Media PNTL.
