Dili- Ministeriu Saude halao programa vasinasaun COVID-19 ba membru Polisia Nasional Timor-Leste (PNTL) iha Kuartel Jeral ne’ebe maka halao knaar iha lina frente hodi nune’e bele aumenta imunidade no prevene propagasaun virus ne’e.
Komandante Jeral PNTL Komisariu Faustino da Costa hateten vasinasaun ne’e nudar parte ida husi programa ne’ebe governu liu husi Ministeriu Saude realija maka loron ida ohin ekipa vasina halao iha Kuartel Jeral, programa ne’e halao mos iha munisipiu no Unidade sira hahu kedas iha semana liu ba ne’ebe maka hola parte husi membru PNTL sira, Nia hato’o asuntu ne’e hafoin lansa programa vasinasaun COVID-19 doze I iha Kuartel Jeral PNTL Kaikoli Dili, Sexta (16/04).
Komisariu haktuir Komandu sempre dehan inportansia husi vasinasaun ne’e ba membru sira katak PNTL hanesan instituisaun estadu autoridade seguransa ne’ebe hola parte iha lina frente ba kombate propagasaun virus COVID-19 entaun ne’e oportunu tebes se ita bot sira akompana karik iha fatin sira halo atendementu ba vasina sira ne’e membru PNTL sira ho antusiasmu hola parte iha vasina ida ne’e.
“Komandu sempre dehan katak evita boatus hanesan rumoris, informasaun falsu (Hoax) ne’ebe dalaruma ema fahe hatutan ba mai tanba inportante ba ita ne’ebe hola parte iha frontline ne’ebe sempre halo atendementu iha nebe deit no iha risku tanba ne’e inportante duni atu hola parte iha vasina ida ne’e,” dehan Komisariu.
Segundu maka membru PNTL hotu tantu funsionariu sivil sira ne’ebe maka servisu iha instituisaun PNTL ne’e hola parte iha vasinasaun nune’e wainhira sira halao sira nia servisu labele lori ou transmite fali moras wainhira fila husi servisu fatin ba uma tanba PNTL halao seguransa iha fatin risku hanesan iha fronteira, Kuarantena, ijolamentu tanba ne’e ho imunijasaun ne’e bele proteje sira nia saude.
Lista membru PNTL ne’ebe enkamina ba Ministeriu Saude kuaje nain 4000 inklui funsionariu sivil PNTL nian.
Iha okajiaun ne’e Dr. Piter Brandão nudar mediku jeral esplika primeiru atu simu vasina ne’e mak ema sira ne’ebe servisu iha lina frente tanba ema sira ne’ebe ita hasoru ita lahatene, segundu komunidade sira liuliu ba ema sira ne’ebe husi tinan 60 ne’ebe iha moras no laiha moras, sira ne’ebe idade 18 too 59 sira mos iha direitu atu simu vasina nune’e mos sira ne’ebe iha moras no mos laiha moras.
Nia haktuirtan hafoin vasinasaun sei iha reasaun hanesan, isin manas, sente bedoko, ulun moras, mear, isin moras hanesan ema baku no balu sente laran sae wainhira mosu sinal hirak ne’e ita bele hemu aimoruk Paracetamol deit no ba sira ne’ebe mka laiha reaksaun la presiza hemu aimoruk.
Iha sorin seluk Komandante Jeral mos halao enkontru evaluasaun servisu ho Komandante Operasaun, Xefe Servisu no Xefe Departamentu sira hodi hare no halo avaliasaun ba servisu ne’ebe halao durante loron hirak ne’e iha Sentru Ijolamentu Vera-Cruz hodi hare hamutuk saida maka hanesan frakeja hodi hadia ba oin orientasaun saida maka Komandu fo ona ba Komandante sira hodi hadia frakeja hirak ne’e.
Inportante tebes maka PNTL hanesan instituisaun estadu ne’ebe halao servisu hodi servi estadu tuir komprimisiu polisia nian maka atu defende no inplementa lei no regras sira ne’ebe estadu no governu fo sai.
Ne’e maka topiku prinsipal ne’ebe hato’o iha evaluasaun ohin no problema, failansu no dejafiu kiik oan balu ne’ebe maka la konseger halo iha tempu operasaun ida ne’e maka bao in presija hadia, ajenda seluk husi kontinuasaun enkontru ne’e maka hare para oinsa atu kontinua asegura estadu emerjensia no serka sanitaria ne’ebe laos aplika deit iha munisipiu Dili maibe kontinua ba munisipiu Baucau, Viqueque, Cova-Lima, nomos hamnosu serka sanitaria foun ba munisipiu Ermera no Ainaru nune’e maka hato’o ba Komandante sira atu asegura buat hotu lao tuir regras no protokolu ne’ebe iha. Media PNTL
