Dili, Ministru Defesa no Seguransa foun sei desenvolve servisu Instituisaun Polísia Nasional Timor-Leste (PNTL) nian iha futuru.
Ministeriu Interior sesante Kuarta ne’e (20/09) hamutuk ho Komandu PNTL no diresaun ho funsionariu tomak ne’ebe maka tutela iha instituisaun ne’e hala’o serimonia despedida ho ministru interior sesante no serimonia resepsaun ba ministru Defesa no Seguransa foun.
Agostinho Sequeira ‘Somotxo’ hanesan Ministru Defesa no Seguransa foun iha VII Governu Konstituisional sei tau prioridade servisu Instituisaun PNTL katak polísia maka garante efesiensia Lei no Ordem Públika, asegura vida sidadaun nian ho funsionamentu ne’ebe diak ba iha instituisaun estadu nian.
“Efetivu polísia ka kontijente PNTL nian maka hau sei hala’o iha ne’e tanba programa barak liu atu desenvolve PNTL ho hala’o servisu sira iha diresaun barak hanesan seguransa sivil, bombeiros, orgaun no diresaun sira ne’ebe maka daet ba iha ministeriu Defesa no Seguransa” hateten Ministru Defesa no Seguransa ba jornalista sira hafoin serimonia despedida.
Agostinho Sequeira ‘Somotxo’ subliña liu tan iha tempu besik sei fó sai programa saida maka sei hala’o durante mandatu tinan lima oin mai, tanba pasta nu’udar Ministru Defesa no Seguransa maka atu desenvolve intituisaun rua (PNTL no F-FDTL) ne’e ho programa ne’ebe maka elaboradu ona.
“Difikuldade ida ne’ebe maka intituisaun rua ne’e hetan durante tinan hirak ba kotuk ne’e, hau mai atu hare’e no hatun difikuldade hirak ne’e laos atu hasa’e tanba ida ne’e maka hau dehan modernizasaun katak profesionalizmu hanesan servisu diak iha sétor hotu-hotu, ida ne’e hotu laos fasil maibé ita tenke lao, dever no obrigasaun hau nian ho instituisaun ida ne’e nian liu-liu ba PNTL”, dehan ‘Somotxo’.
Hatan kona-ba todan ka lae kaer pasta hanesan Ministru ba instituisaun rua, Agostinho Sequeira dehan,”Ba hau todan duni, maibé pôr enkuantu situasaun polítika ne’ebe maka frazil hanesan agora dadaun ne’e hau brani assume tanba laos foin difisil ba hau durante tinan barak hau hasoru ona dezafiu lubuk”.
Serimonia ne’e marka presansa husi Komandante Jerál PNTL ho estrutura tomak Komandu nian, funsionariu hotu iha ministeriu interior no fahe mós sertifikadu agradesimentu ba diresaun ministeriu nian ne’ebe durante ne’e hala’o servisu hamutuk ho gabinete ministru interior sesante, entrega louvor ba servisu asesoria ministeriu nia no entrega rekordasaun instituisional ba ministru sesante Dr.Longuinhos Monteiro.
Media PNTL.
