News

Komandante Jeral PNTL Komisariu Jerál Polísia Henrique da Costa Halao Vizita Servisu Ba Iha Komandu PNTL Munisipiu Manatuto.

IMG_9137
Liu husi ninia diskursu ba Parada, Komandante Jeral PNTL hato’o Mensagem no apresiasun ba membru PNTL iha Komandu PNTL munisipiu Manatuto, ne’ebe halo durante tinan 2023, hodi fo seguransa liu-liu iha enventu espesial hanesan Eleisaun Parlamentar, Eleisaun Presidensial, Eleisaun Xefe Suku, Natal 2023 no Tinan Foun 2024 nian.
Komisariu Jerál Polísia afirma, durante eventu espesial hirak ne’e lao o diak tanba servisu no esforsu nebe maka hala’o husi membru sira hodi asegura ho diak , nune’e eventu hirak ne’e bele lao ho diak.
“Tanba imi nia esforsu maka ita hetan apresiasaun no parabens husi Presidente Republika ba servisu tomak ne’ebe hala’o durante tinan 2023″, afirma Komandante Jeral PNTL.
Autoridade másimu Instituisaun Seguransa ne’e nafatin husu ba membru atu hatudu Profesianalizmu iha atendimentu publiku nune’e komunidade sira bele sente hakmatek, hodi hala’o aktividade loron-loron nian.
Mantein nafatin, etika komunikasaum ne’ebe diak ba komunidade, etika komunikasaun entre membru PNTL iha Komandu munisipiu Manatuto. Fo servisu ne’ebe diak ba komunidade.
Tuir relatoriu ne’ebe iha, Komandu munisipiu Manatuto ladun registu Krime ne’ebe as, kontinua hala’o tuir Medida Prevensaun ba komunidade, joven, estudante no povu tomak.
“Hau hato’o Mensagem no orientasaun katak nafatin demostra disiplina nebe diak iha servisu fatin, hatudu nafatin loyalidade ba Komandu, hodi lori susesu ba PNTL no ba munisipiu Manatuto”, afirma Autoridade másimu Instituisaun Seguransa ne’e.
Vizita Servisu dahuluk iha Komandu PNTL munisipiu Manatuto ne’e, Komandante Jeral PNTL akompaňa husi Komandante Komandu Operasaun Nasional Superintendente Xefe Polísia José Soares, Diretur Justisa no Disiplina Superintendente Xefe Justino Menezes, XefeDepartamentu Logistika Nasional no Xefe Klinika PNTL.
Marka prezensa mos Prezindente AESPNTL Manuela de Araújo hamutuk ho estrutura no vizita ne’e simu direita husi Komandante Komandu PNTL munisipiu Manatuto Superintendente Polísia Umbelina Soares ho nia estrutura Komandu munisipiu inklui AESPNTL munisipiu Manatuto.
Media PNTL

 

January 21, 2024 in Uncategorized

Komandante Jerál halao Vizita Servisu iha Baucau

419578566_400457972493787_6845903441921026207_n

Baucau- Komandante Jerál halo vizita servisu iha Komandu munisípiu Baucau hodi hare direta membru sira nia serbisu no esforsu hodi mantein paz no seguransa ba povu Baucau.

Komandante Jerál PNTL Komisariu Jerál Polísia Henrique da Costa hateten vizita Komandu PNTL munisípiu Baucau ne’e ho objetivu atu observa direta membru sira nia servisu iha terrenu no fo apresiasaun ba sira nia kontribuisaun serbisu durante tinan 2023 nia laran halo esforsu makaas hodi garante paz no estabilidade espesialmente iha munisípiu Baucau, Nia hato’o asuntu ne’e iha Komandu munisípiu Baucau, Segunda (16/01).

Nia hatutan iha vizita ne’e halao mos enkontru ho estrutura Komandu munisipiu, Komandante Eskuadra no Xefe Seksaun sira atu nune’e ita nafatin fo orentasaun ba sira hodi husu sira serbisu makaas tan no hatudu sira nia disiplina ho profesionalismu iha atendementu lor-loron.

“Husu atu sira mos kria komunikasaun diak ho parseru sira iha munisipiu hanesan Prezidente Autoridade munisipal, Administrador Postu Administrativu sira nomos lider komunitariu sira iha ida-idak nia suku no aldeia atu serbisu hamutuk hodi buka prevene molok akontese problema ruma,” dehan Komandante Jeral.

Uza biban ida ne’e hodi apresia no kongratula esforsu tomak Komandu munisípiu Baucau hodi asegura seguransa iha periodu antes Natal no tinan foun nomos periodu selebrasaun loron Natal no tinan foun, ita akompanha situasaun seguransa iha teritoriu laran tomak espesil munisípiu Baucau buat hotu lao diak tanba esforsu no apoiu tomak husi membru PNTL munisípiu Baucau nomos apoiu husi parte sira hotu inklui komunidade sira.

Komandante Jeral argumenta Ita hatene katak numeru membru Polísia iha Baucau la sufsiente hodi garante paz no estabilidade maibe tanba ita hetan apoiu masimu husi parte sira hotu espesialmente ita nia komunidade tanba ne’e ita bot sira bele halao servisu ho diak.

“Husu atu Komandante munisipiu, Komandante Eskuadra no Xefe Seksaun sira atu nafatin mantein komunikasaun diak ho komunidade sira atu nune’e sira nafatin apoiu ita iha servisu lor-loron, ita nia susesu depende mos ba kontribuisaun husi parte hotu, wainhira sira la apoiu ita ho informasaun ka parte sira seluk maka ita sei la atinji ita nia objetivu hodi garante paz no estabilidade iha munisipiu Baucau,” Nia apela.

Estrutura Komandu munisípiu nafatin apoiu Lider Komunitaria sira espesialmente Prezidente Autoridade munisipiu ho nia estrutura, Administrador Postu Administrativu ho nia estrutura sira atu nune’e servisu hamutuk iha komunikasaun no koperasaun hodi halao ita nia servisu.

Ita akompanha katak iha tempu badak nia laran sei iha tomada de posse ba Prezidente Autoridade munisipiu ho estrutura sira nune’e husu ba instituisaun seguransa, Komandante munisipiu ho estrutura sira atu apoiu servisu adminbistrativu sira. Ba estrutura tomak Komandu munisipiu nian Hau husu atu nune’e apoiu Komandu nian liu husi koperasaun no ita bot sira nia apoiu ba Ko mandante munisipiu, kumpri orientasaun no despaisu ne’ebe maka fo sai hodi mantein Kadeia du Komandu, hirarkia Komandu nian atu nune’e ita bele servisu tuir estrutura ne’ebe makai ha.

Ita bot sira nia serbisu iha terrenu laos remata ho ita bot sira maibe buat ne’ebe makai mi halo diak Ami iha nasional mos rona no buat ne’ebe maka ladiak mos iha nasional rona, tanba ne’e husu ba ita bot sira hotu hahu husi Ajente to’o Ofisial Sub Alternu no Ofisial Superior sira nafatin halo servisu tuir orentasaun Komandu nian.

Rotasaun serbisu no nomeasaun ba ita ne’e bai-bain normal, husi munisípiu Baucau bele ba servisu iha Viqueque, husi Baucau bele ba serbisu iha Suai nune’e mos husi Suai bele mai serbisu iha Baucau ne’e normal tenba ejijensia Komandu nian no husu bai ta atu nafatin kumpri orentasaun ne’ebe maka iha.

Husu nafatin ba Komandante munisipiu, Komandante Eskuadra no Xefe Seksaun sira atu labele baruk hodi fo hanoin nafatin ba membru sira konaba disiplina serbisu nian tantu iha disiplina iha oras tama no sai serbisu, disiplina iha performansia nune’e mos disiplina iha saida deit tanba disiplina maka is ba instituisaun Polisia nian no disiplina maka is iha ita nia Komandu .

Atu remata Hau hakarak agradese ba membru munisipiu Baucau hotu, agora hau mai hamrik ho kualidade hanesan Komandante Jeral maibe uluk tinan 10 ba kotuk hau halo serbisu hanesan Komandante munisipiu Baucau imi nia kontribuisaun no apoiu tomak mai hau mak suporta hau ohin bele asumi kargu hanesan Komandante Jeral.

Husu atu imi nafatin apoiu Komandante munisipiu Baucau Superintendente Xefe Polisia Antoninho Mauluta ho nia estrutura atu nune’e bele atinji susesu.

Bom susesu no Bom Traballu ba Ita hotu.

Partisipa iha enkontru ne’e, prezensa husi Komandante Komandu Administrasaun PNTL, Superintendente Xefe Polisia, Natersia Eufragia Martins, Komandante UPM Superintendente Xefe Polísia Eugenio Pereira ho Esposa, Komandante UEP Interino Superintendente Polísia, Damião Coreia ho Esposa, Komandante Komandu PNTL munisipiu Baucau Superintendente Xefe Antoninho Mauluta, Xefe Gabinete Kooperasaun no Relasaun Internasional Superintendente Assistente Polisia, Augusto Tilman da Costa inklui Amu Kapelaun PNTL Padre Abril Lopes. Media PNTL.

January 17, 2024 in Uncategorized

Komandante Jeral PNTL Relata Situasaun Seguransa ba Xefe Estadu

419576027_401060352433549_5479452830395717900_n
Dili- Iha Loron 16/01/2024, Komandante Jeral PNTL relata situasaun seguransa no ordem publika iha rai laran ba Prezidente Republika Dr. Jose Ramos Horta iha Palasiu Prezidensial Bairo-Pite.
Komandante Jeral PNTL, Komisariu Jeral Henrique da Costa hateten Komandu orienta ona Komandante sira hotu atu hasa’e aktividade vizibilidade Polísia ninian no mós halo aktividade vizita komunidade no eskola hodi sensibiliza Lei sira kona-ba Kódigu Prosesu Penal no serbisu Polisiamentu Komunitaria.
Nia hatutan iha okajiaun ne’e komandu relata situasaun kriminalidade durante tinan 2023, ne’ebe PNTL rejista númeru ass liu maka Ofensas Integridade Físika simples hamutuk rihun ida resin.
Kompara tinan 2022 ho 2023 númeru sa’e oituan maibé ho esforsu tomak ne’ebe maka PNTL halo bele asegura buat hotu iha tinan 2023.
Komandante Jeral PNTL ne’e afirma katak kauza husi krime sira ne’e husi buat barak. Ita hatene katak iha Timor ne’e dezempregu ne’e maka’as, entaun tanba ema laiha servisu, ida ne’e mós kontribui Iha parte sira seluk mós, ita hare’e konsiensia ema nian laiha, entaun dala-ruma hadau malu/disputa rai mós sai hanesan faktor ida ne’ebe maka kontribui mós ba iha krime sira ne’ebe maka akontese.
“Husu ba Komandante sira liu-liu serbisu investigasaun ninian atu hala’o prosesu ho rigor hodi nune’e autor ka suspeitu sira responsabilija aktu ne’ebe sira halo tuir Lei haruka”, dehan Komisariu Jerál.
Prezensa Komandu PNTL nian iha Palasiu Prezidente hodi komprimenta mos Xefe Estadu hafoin Natal no mós Tinan Foun.
Iha enkontru ne’e Prezidente Repúblika Dr. José Ramos Horta apresia serbisu membru Polísia Nasional Timor-Leste (PNTL)no hato’o parabens ba esforsu tomak ne’ebe maka PNTL halo hodi fó seguransa ba sidadaun hotu iha teritoriu nasional hodi komemora loron Natal 2023 no Tinan Foun 2024 ho diak.
“Prezidente hato’o Parabéns apresiasaun ba PNTL ba esforsu tomak ne’ebe maka membru sira halo, oferese durante Natal no Tinan Foun ninian, ita mós aprezenta ba Xefe Estadu kona-ba Krime ne’ebe maka akontese iha tinan 2023 ninian, pois ita hare’e ba tinan 2024 ninian medida saida maka parte seguransa ninian halo atu nune’e bele prevene krime iha tinan 2024 nian”, tenik Komandante Jerál PNTL ne’e. Media PNTL.

 

January 16, 2024 in Uncategorized

Komandu PNTL Rezeita Informasaun Ne’ebe Espalla Iha Media Sosial Kona-ba Rekezitus Rekrtutamentu

_MG_8050
Dili, Komandu Polísia Nasional Timor-Leste (PNTL) rezeita informasaun ne’ebe públika iha Media Sosial hanesan Facebook kona-ba Rekezitus Rekrutamentu foun ba membru PNTL tinan 2024 nian.
Lia hirak ne’e hato’o husi Porta Voz Komandu PNTL Superintendente Polísia António da Luz liu husi konferensia imprensa tersa-feira (16/01) ne’e hateten informasaun sira ne’ebe maka espalla iha Facebook katak, PNTL hasai ona kriteria rekrutamentu, atu dehan deit katak informasaun ne’e Lalos/informasaun falsa, tanba ne’e husu ba públiku atu labele konsumu informasaun falsa sira ne’e.
“Tanba husi Komandu rasik seidauk hasai rekezitus ida ne’e, tuir informasaun ne’ebe maka hato’o husi Komandante Jerál PNTL no Ministru Interior kona-ba rekrutamentu, sim. Maibé komisaun husi Komandu Pesoal no Formasaun rasik seidauk estabelese Komisaun Rekrutamentu no mós rekezitus sira ne’e, tanba servisu sira ne’e sei iha faze preparasaun, nune’e informasaun sira ne’ebe espalla iha Facebook, ne’e Lalos”, informa Porta Voz Komandu PNTL ne’e.
Superintendente Polísia ne’e mós salienta tan katak kona-ba rekrutamentu nian sei iha Komisaun Rekrutamentu ne’ebe maka sei estabelese no sei fó sai anunsiu klaru wainhira Komisaun ne’e hetan ona aprovasaun husi Komandante Jerál PNTL.
“Husu ba joven sira atu bele halo preparasaun fíziku, labele envolve iha hahalok krime sira no mós prepara imi nia saúde, karik iha oportunidade aban-bainrua wainhira loke duni rekrutamentu, oportunidade ba alin sira atu bele kompete, maibé agora dadaun seidauk tanba husu ba maluk sira atu labele espalla informasaun ne’ebe maka la klaru”, hatutan Superintendente Polísia ne’e.
Departamentu Saúde PNTL Hamutuk Ho Médiku Espesialista Cubano Halo Tratamentu Ba Membru Sira
Komandu PNTL liu husi Departamentu Saúde servisu hamutuk ho Brigada Cubano no Médiku Espesialista sira, halo tratamentu saúde gratuitu ba membru PNTL sira.
Porta Voz Komandu PNTL Superintendente Polísia António da Luz hateten aktiviadade ne’e hala’o tanba Departamentu Saúde PNTL iha kooperasaun ne’ebe diak tebes ho Brigada Cubano sira ka Doutor Espesialista Cubano sira ne’ebe maka destaka iha Timor.
“Programa ne’e hala’o tanba Departamentu Saúde PNTL liu husi ninia Xefe Departamentu ne’ebe halo koordenasaun diak tebes, halo tratamentu ba membru PNTL inklui mós familia, programa ne’e laos halo deit iha Komandu Jerál maibé sira mós halo iha munisipiu sira atu bele ajuda ita nia membru sira ne’ebe moras hodi bele halo tratamentu ba sira nia saúde”, haktuir Superintendente Polísia ne’e.

 

January 16, 2024 in Uncategorized

Komandu PNTL Husu Igreja Apoiu Seguransa No Estabilidade

419516791_401043032435281_3032316576069243123_n
Baucau- Komandu Polisia Nasional Timor-Leste (PNTL) husu Igreja Katolika atu apoiu Polisia hodi garante seguransa no estabilidade iha rai laran hodi prevene krime.
Komandante Jeral PNTL Komisariu Jeral Polisia Henrique da Costa hateten PNTL husu ba parte Igreja atu nune’e liu husi Amu Paroku sira wainhira selebra misa uza minutu balu hodi hato’o ba Sarani sira oinsa hakribi no hadok aan husi violensia hodi nune’e prevene problema iha munisipiu, Nia hato’o asuntu ne’e iha vizita servisu ba komandu munisipiu Baucau, Segunda (15/01).
Nia hatutan ohin Ami vizita no komprimenta Amu Bispo Diocese Baucau, maske tinan foun liu tia ona maibe ita mai komprimenta Amu no husu atu nune’e Amu nafatin kontinua apoia Polisia hodi hato’o mensajen ba komunidade no Sarani sira hodi evita no hadok aan husi krime no hakribi violensia, ita mos husu ba Amu atu nafatin akompanha membru Polisia sira ho orasaun atu nune’e wainhira halo servisu kumpri ba lei no regras ne’ebe maka iha.
Iha okajiaun ne’e Amu Bispu Diocese Baucau Dom Leandro Maria Alves hateten Komandu PNTL komunika ho Hau kleur ona maibe tempu maka seidauk iha no ohin maka oportunidade ba sira hodi mai atu kumprimenta iha relasaun ho loron boot ne’ebe maka liu tia ona.
Nia hatutan ohin Ami fahe informasaun konaba situasaun jeral ne’ebe maka ita nia nasaun iha liu-liu koalia konaba seguransa nian, fahe informasaun no pasa informasaun ba malu fo hanoin mos konaba oinsa knar Polisia nian ne’ebe maka halao iha ita nia komunidade sira iha Diocese Baucau nomos husu konaba oinsa igreja nia hare konaba servisu Polisia ninian.
“Hau hare realidade ne’ebe maka iha ita tenke koalia buat ne’ebe maka los katak Polisia sira durante loron bo’ot ne’ebe liu halao sira nia knar ho diak fo seguransa, serbisu hamutuk no koperaho igreja nune’e selebrasaun ne’ebe halao durante Natal no tinan foun buat hotu lao diak, maske iha akontesementu kik oan ne’ebe maka akontese iha sosiedade nia let maibe Polisia sira halao sira knar hodi garante seguransa, nune’e iha fatin ne’ebe akontese problema Polisia to’o kedas hodi hakalma no fo seguransa no hakmatek ba povu,”dehan Dom Leandro.
Atu termina Nai ulun Uma Kreda Diocese Baucau ne’e Husu ba komunidade sira hotu liu-liu joven sira atu kopera ho parte seguransa tanba Polisia sira primeiru halao sira nia knar atu asegura moris hakmatek tanba ne’e sosiedade no ema ida-idak presija iha konsiensia hodi la kria konflitu, hamosu desintendementu no problema wainhira mosu problema ruma tenke buka atu rezolve ho diak, ho neon no laran hakmatek no labele uza fatuk, tuda malu ou asaun ne’ebe bele halakon ema nia vida ho nune’e ita rasik mak kria seguransa ba ita nia aan no hetan apoiu husi Polisia sira.
Iha vizita servisu ne’e Komandante Jeral akompanha husi Komandante UPM Superintendente Xefe Polísia Eugenio Pereira ho esposa, Komandante UEP Interino Superintendente Polísia Damião Coreia ho esposa, Komandante Komandu PNTL munisipiu Baucau Superintendente Xefe Antoninho Mauluta, Xefe Gabinete Kooperasaun no Relasaun Internasional Superintendente Assistente Augusto Tilman da Costa inklui Amu Kapelaun PNTL Padre Abril Lopes. Media PNTL

 

January 16, 2024 in Uncategorized

v

417913761_398086979397553_8388619339602974229_n
Dili, Instituisaun Polísia Nasional Timor-Leste (PNTL) durante tinan 23 lakon ninia membru hamutuk 126 ne’ebe maka mate tanba moras stroke, asidente no balun mate tanba moras komplikadu.
Komandante Jerál PNTL Komisariu Jerál Polísia Henrique da Costa ba jornalista sira hafoin partisipa iha serimonia tomada de posse ba ofisias Superior na’in 12 kinta-feira (11/01) ne’e hateten númeru ne’ebe fó sai tuir dadus no relatoriu ne’ebe maka Komandu Pesoal no Fomrasaun rekolla durante ne’e.
“Membru hamutuk 126 mak mate durante ne’e katak ema ne’e laos tur-tur maka mate deit maibé kontribui husi moras sira ne’ebe maka sira iha kleur ona, balun stroke, balun dala-ruma envolve iha asidente ruma, balun moras komplikadu maibé tanba la hetan tratamentu, barak mós moras kurasaun ninian entaun sira ne’e hotu maka halo lakon vida”, informa Komandante Jerál PNTL ne’e.
Komisariu Jerál Polísia salienta tan katak iha PNTL liu husi Lei Orgânika foun, ita instala ona Departamentu Saúde ne’ebe maka kompostu husi ita nia membru médiku sira, halo ona tratamentu ba to’o ona iha munisipiu no unidade sira. Mezmu que la másimu maibé sira hahu’u ona halo buat balun, sira mós halo komunikasaun ho doutor espesialista sira atu nune’e bele halo check-up ka halo tratamentu ba sira.
“Komandu mós sei hare’e, sira ne’ebe maka moras ba halo tratamentu, Komandu sei fó apoiu orsamentu ruma, mínimu tebes maibé ita espera katak ho orsamentu ne’ebe maka iha ne’e bele utiliza ba ajuda sosa aimoruk tan ka sosa hahan ruma ne’ebe maka diak atu nune’e bele ajuda rekopera sira nia saúde, agora dadaun ita iha membru ne’ebe maka moras permanente mós iha hela, balun stroke no la tama servisu”, hatutan Komisariu Jerál Polísia ne’e.
Autoridade másimu instituisaun Seguransa ne’e subliña tan katak membru Polísia agora dadaun ne’e hamutuk 4028 maibé ida ne’ebe efetivu lolos hodi hala’o hela servisu ne’e, ita hasai tiha sira moras permanente ne’e, sira ne’ebe hala’o hela estudu/formasaun iha rai liur ruma ou balun halo hela eskoltu ba alta entidade sira, entaun ita nia membru ne’ebe iha halo servisu ne’e mínimu tebes.
PNTL Sei Halo Rekrutamentu Iha Tinan 2024
“Tanba ne’e ita husu atu iha rekrutamentu ba tinan 2024 nian, agora dadaun Komisaun ida ita hahu’u atu instala hodi nune’e hare’e kona-ba ida ne’e, Komandu sei halo komunikasaun ho Ministeriu Interior atu nune’e hodi hetan orientasaun ruma, atu ita bele implementa halo rekrutamentu ninian”, tenik Autoridade másimu instituisaun Seguransa ne’e.
Hatan kona-ba planu rekrutamentu ba membru PNTL foun ne’ebe tuir planu sei realiza iha fulan Marsu no Abril tuir deklarasaun Ministru Interior nian, Komandante Jerál PNTL ne’e esplika: “Tanba ne’e ami prepara kondisaun, ami mós tenke prepara ninia regra rekrutamentu ne’e hanusa, kuríkulum ne’e mós ita hadia ona, parte ida ne’e maka Komandu prepara hodi servisu hamutuk ho parte Ministeriu Interior hodi halo rekrutamentu”.
Tuir orsamentu ne’ebe Komandu koloka, vaga ita loke vaga hamutuk 200 maibé ita hare’e wainhira Ministru Interior hetan fali osan ruma, ita bele halo liu ida ne’e.
Media PNTL.

 

January 12, 2024 in Uncategorized

Komandu PNTL Fó Posse Ba Ofisias Superior Hamutuk 12

_MG_8300
Dili, Komandu Polísia Nasional Timor-Leste (PNTL) liu husi Komandante Jerál Komisariu Jerál Polísia Henrique da Costa no Segundu Komandante Jerál Komisariu Polísia Pedro Belo, kinta-feira (11/01) ne’e fó posse ba Ofisias Superior hamutuk 12 hodi Komanda Komandu Munisipiu, Unidade no Xefe Gabinete.
Ofisias Superior no Inspetores hamutuk 12 ne’e simu posse ba kargu hanesan: Komandante Komandu PNTL munisipiu Bobonaro, Komandante Komandu PNTL munisipiu Baucau, Komandante Unidade Apoiu Servisu (UAS), Komandante Komandu PNTL munisipiu Ermera, Komandante Komandu PNTL munisipiu Liquiça, Komandante Komandu PNTL munisipiu Viqueque, Komandante Komandu PNTL munisipiu Manatuto, Komandante Komandu PNTL munisipiu Lautem, Komandante Komandu PNTL munisipiu Manufahi, Komandante Komandu PNTL munisipiu Ainaro, Xefe Gabinete Kooperasaun no Relasaun Internasional no Xefe Gabinete Planeamentu Estrátejiku no Dezenvolvimentu.
Hafoin serimonia tomada de posse ne’ebe hala’o iha Salaun Enkontru Kuartél Jerál, Komandante Jerál Komisariu Jerál Polísia Henrique da Costa ba jornalista sira hateten ohin ita realiza tomada de posse ba Komandante Komandu munisipiu sira, Komandante Unidade Apoiu servisu Kuartél Jerál ninian no Xefe Gabinete rua hanesan Kooperasaun no Relasaun Internasional no Gabinete Planeamentu Estrátejiku no Dezenvolvimentu.
“Ita halo nomeasaun no rotasaun ba iha sira, buat ida ne’ebe maka normal no sira ne’e balun servisu ona iha fatin balun kleur ona, balun mós foin ba maibé tanba deit hanesan ita presiza iha fali Komandante foun ba iha fatin balun, tanba ne’e maka ita halo tomada de posse ba sira hodi nune’e hala’o servisu, balun tanba ezizensia servisu nian entaun iha fulan hirak ba kotuk, sira ba hala’o tiha ona servisu maibé ita seidauk fó posse ba sira tanba ne’e maka ohin ita halo tomada de posse ba sira”, informa Komandante Jerál PNTL ne’e.
Komisariu Jerál Polísia ne’e afirma tan katak ita hatene ita nia kondisaun real iha PNTL ninian, primeiru ita iha difikuldade lubuk ida tantu rekursu umanu nian, material sira hodi apoiu ita nia servisu hanesan transporte, radio komunikasaun no mós sasan sira seluk, maibé ita nafatin husu ba sira atu nune’e difikuldade sira ne’e laos buat foun. Hahu’u husi Polísia ne’e hari’i, ita infrenta ona difikuldade sira hanesan ne’e, husu ba sira atu jere kondisaun ne’ebe sira iha ne’e atu bele hala’o servisu.
“Wainhira Komandu hetan apoiu ruma ka sosa sasan sira hanesan radio komunikasaun no kareta ne’ebe ita iha ne’e, kuandu prosesu administrativa iha Komandu Jerál remata ona, ita sei distribui ba sira atu nune’e sira bele hala’o servisu, tanba iha orsamentu 2023 ninian ne’e ita sosa tantu transorte hanesan kareta no radio komunikasaun ne’e tama ona maibé ita sei halo hela verifikasaun, hafoin prosesu administrativa nian remata ita sei fahe ba Komandu munisipiu sira atu nune’e bele hala’o servisu”, hatutan Komisariu Jerál Polísia ne’e.
Entretantu, emposadu Superintendente Xefe Agostinho Gomes da Silva ne’ebe hetan fiar hodi assume kargu nu’udar Komandante Komandu PNTL munisipiu Bobonaro, hafoin serimonia ba jornalista sira hateten ho fiar ne’ebe maka Komandu fó, sei la promote buat ida tanba promesa ne’e buat todan ida, nune’e husik servisu lai ba hafoin resultadu bele hatudu.
“Sé hau koalia uluk agora dala-ruma difisil atu realiza tanba promesa ne’e buat ida todan maibé hau iha prinsipiu hateten deit katak servisu lai ba maka hare’e ninia resultadu mas hanesan kompratiota Timor-Leste no patriota PNTL hau sei servisu maka’as, Komanda membru PNTL iha Komandu munisipiu Bobonaro hodi estabelese Paz, Estabilidade no Seguransa iha munisipiu ne’e ho diak atu nune’e povu tenke moris hakmatek no governu iha munisipiu Bobonaro hala’o aktividade ho diak no emprezariu sira kontinua aktividade ekonomia ho diak”, afirma emposadu ne’e.
Despasu Komandante Jerál:
Númeru Despasu Emposadu/a Kargu
Nu.525/CG-PNTL/XII/2023 Superintendente Xefe Polísia Agostinho Gomes da Silva Komandante Komandu PNTL Munisipiu Bobonaro
Nu.385/CG-PNTL/VIII/2023 Superintendente Xefe Polísia Antoninho Mauluta Komandante Komandu PNTL Munisipiu Baucau
Nu.526/CG-PNTL/XII/2023 Superintendente Xefe Polísia António Maria de Sá Komandante Unidade Apoiu Servisu (UAS)
Nu.370/CG-PNTL/VIII/2023 Superintendente Polísia Ludgerio P. Madeira Lay Komandante Interinu Komandu PNTL Munisipiu Ermera
Nu. 03/CG-PNTL/I/2024 Superintendente Polísia Paulino do Carmo Komandante Komandu PNTL Munisipiu Liquiça
Nu. 04/CG-PNTL/I/2024 Superintendente Polísia António Rego Fernandes Komandante Komandu PNTL Munisipiu Viqueque
Nu. 05/CG-PNTL/I/2024 Superintendente Polísia Umbelina Soares Komandante Komandu PNTL Munisipiu Manatuto
Nu. 06/CG-PNTL/I/2024 Superintendente Polísia João da Costa Komandante Komandu PNTL Munisipiu Lautem
Nu. 07/CG-PNTL/I/2024 Superintendente Assistente Polísia Augusto Tilman da Costa Xefe Gabinete Kooperasaun no Relasaun Internasional
Nu. 08/CG-PNTL/I/2024 Superintendente Assistente Polísia Carlito da Silva Adorio Xefe Gabinete Planeamentu Estrátejiku no Dezenvolvimentu
Nu. 09/CG-PNTL/I/2024 Superintendente Assistente Polísia Domingos Grigorio Soares Komandante Komandu PNTL Munisipiu Manufahi
Nu. 10/CG-PNTL/I/2024 Superintendente Assistente Polísia Luis da Silva Komandante Komandu PNTL Munisipiu AInaro
Hola parte iha serimonia ne’e, Komandante Komandu Supervizaun, Komandante Munisipiu Dili, Komandante Unidade (UPM,UEP,UPF), Xefe Gabinete, Xefe Servisu sira Komandu PNTL, Amu Kapelaun PNTL, membru no konvidadu sira seluk. Media PNTL.

 

January 11, 2024 in Uncategorized

Komandu PNTL Halo Rotasaun Servisu

415484955_394482386424679_3635225988779127572_n
Bobonaro- Komandu Polisia Nasional Timor-Leste (PNTL) hala’o rotasaun servisu ba Komandante munisipiu Bobonaro husi Komandante sesante Superintendente Xefe Polisia Antonio De Sa ba Komandante foun Superintendente Xefe Polisia Agustinho Gomes hodi lidera Komandu PNTL Munisipiu Bobonaro atu asegura seguransa no estabilidade.
Komandante Sesante Superintendente Xefe Polisia Antonio De Sa hato’o agradese ba Komandante Jeral ba fiar ne’ebe maka fo ba nia hodi asumi knaar Komandu munisipiu Bobonaro durante periodu fulan haat nia laran, nia hato’o asuntu ne’e iha serimonia entrega servisu ba komandante foun iha Komandu PNTL munisipiu Bobonaro, kinta (04/01).
Nia hatutan durante fulan hat nia laran iha aktividade lubuk ida hanesan asegura seguransa ba eventu nasional no internasional hanesan Eleisaun Lider Komunitaria, Festival Fronteira 2023 no seluk tan ne’ebe tanba grasa Maromak nian no koperasaun mutua husi autoridade hotu-hotu eventu hirak ne’e la’o ho diak no susesu sem perturbasaun ba ordem publika.
Maske nune’e iha insidente balu ne’ebe maka akontese hanesan konfrontus entre suku Lourba no Karabau ne’ebe maka halo timor laran tomak hakfodak no preokupa maibe ho grasa no tulun Maromak no Matebian sira ita konsege rezolve ho Nahe Biti boot. Nune’e mos kazu Ninja iha suku Saburai postu Administrativu Maliana ne’ebe akontese iha mandatu ikus hau nian ne’ebe maka akontese no halo surpreja ema hotu -hotu no refleta fali mai munisipiu Bobonaro identiku ho problema maibe la to’o semana ida ita konsege halo aprensaun no kaptura suspeitu sira hodi submete ba prosesu justisa.
Atu termina Komandante De Sa hato’o agrasementu ba Prezidente Autoridade munisipiu ho estrutura tomak, Administrador Postu nain nen, Autoridade Lokal, Prezidente Konsellu Veteranus munisipiu Bobonaro, Amo Bispu Diocese Maliana ho estrutura tomak ba apoiu servisu no koperasaun durante nia mandatu hodi lidera Komandu munisipiu Bobonaro, no husu deskulpa karik iha naksalak ruma ne’ebe maka halo hodi ofende ema ruma, no rekomenda ba autoridade hotu-hotu atu kontinua servisu nafatin ho Komandante munisipiu foun hodi kria estabilidade no fo apoiu ba programa dezenvolvimentu no fo susesu ba munisipiu Bobonaro.
Iha okajiaun ne’e atual Komandante PNTL munisipiu Bobonaro Superintendente Xefe Polisia Agustinho Gomes hateten hau simu nomeasaun hanesan Komandante Komandu munisipiu Bobonaro iha loron 29/12/2023, Hau agradese ba Komandante sesante ne’ebe maka komanda no lidera ona durante ne’e hodi garantia estabilidade no seguransa iha munisipiu Bobonaro no sei transfere fali ba Komandu Jeral hodi asumi kargu hanesan Komandante Unidade Apoiu Servisu (UAS).
Iha oportunidade ne’e Superintendente Xefe Polisia Agustinho Gomes hateten nu’udar Komandante foun hau mai ho komprimisiu hat maka hanesan Komandu munisipiu Bobonaro tenke iha Disiplina Pessoal no aplika Disiplina Pessoal, Disiplina Kuartel, Disiplina Administrasaun no Disiplina Operasional; komitmentu hat ne’e aumenta tan ho profesionalismu ida ne’e importante ba membru sira.
Nia hatutan Hau esforsu tomak hakarak hadia duni disiplina PNTL maske la’os fasil maibe hau fiar katak ho esforsu no komitmentu, neon mos no laran mos hadia forsa ne’e sai disiplina tanba ho disiplina maka halo ema sai professional.
Hau nia komitmentu atu Komanda membru ne’ebe maka iha profesionalismu, Disiplina, Lealdade no Komitmentu ba Komandu.
“Disiplina importante, orgullu sai membru PNTL, Orgullu sai Bobonaro oan, orgulu sai timor oan tenke prontu servi estadu no povu ho neon ho laran no Espiritu orgullu kontinua mantein unidade, Espiritu de korpu no kumpri hirarkia,” dehan Gomes.
Komandante ne’e apela ba autoridade munisipiu, lider komunitariu no joven sira atu iha responsabilidade moral hodi mantein paz no estabilidade iha munisipiu Bobonaro. PNTL ho apoiu F-FDTL prontu atu responde no atua kualker situasaun saida deit maka mosu ho responsabilidade no sei la duvidas hasoru se-se deit ho prinsipiu katak estadu ida nunka hakruk ba grupu ou individual, krime organizadu no seluktan.
Husu ema hotu atu kumpri lei, PNTL sei la duvidas hodi aplika forsa ne’ebe maka proporsional, legal no nesesaria hodi estabelese paz no estabilidade iha munisipiu ida ne’e.
Entretantu Komandante Jeral PNTL Komisariu Jeral Polisia Henrique da Costa hateten Rotasaun, Nomeasaun no trasferensia ba ofisial Superior, Ofisial Inspetor, Sarjentu no Ajente nu’udar responsabilidade Komandante Jeral ninian hodi koloka tuir ejijensia no nesesidade servisu iha instituisaun PNTL.
Susesu Polisia nian la’os depende deit ba komandante munisipiu no membru sira ne’ebe maka hamrik iha ne’e maibe depende ba apoiu husi lider komunitaria sira hotu nomos kamada hotu iha munisipiu ne’e.
“Husu ba membru sira hotu husi Komandu munisipiu Bobonaro, UEP nian, UPF, husu atu nune’e nafatin suporta Komandante munisipiu foun, susesu Komandante nian la ses husi ita bot sira nia apoiu,”. dehan Komandante Jeral.
Iha biban ida ne’e Hau hakarak apresia ba suporta no apoiu husi Autoridade munisipiu Bobonaro ne’ebe maka apoiu teb-tebes ba servisu komandante munisipiu sesante durante ninia mandatu. Hau husu atu kontinua fo konfiansa, apoiu no suporta ne’ebe maka durante ne’e ba Komandante foun ne’ebe maka asumi kargu Komandante PNTL munisipiu Bobonaro.
Serimonia ne’e partisipa husi Komandante Jeral Komisariu Jeral Polisia Henrique da Costa, Diretur Diresaun Justisa e Disiplina Superintendente Xefe Polisia Justino Menezes, Inspetur Jeral Superintendente Xefe Polisia Jorge Monteiro, Komandante UEP Superintendente Damião Correia, komandante UPF Superintendente polisia Euclides Belo no Komandante UPM Superintendente Polisia Eugenio Pereira, Autoridade, Lokal, Autoridade munisipiu, Veteranus sira membru PNTL Komandu munisipiu Bobonaro no konvidadu sira.
Media PNTL

 

January 10, 2024 in Uncategorized

DIK Asegura Sidadaun Na’in Neen, Tamba Iha Indikasaun Sai Vítima Ba Tráfiku Umanu

_MG_8050
Dili, Komandu Polísia Nasional Timor-Leste (PNTL) liu husi Departamentu Investigasaun Kriminal (DIK) segunda-feira (08/01) ne’e iha Airportu Internasional Nicolau Lobato, asegura sidadaun Timor oan na’in neen tanba iha indikasaun forte bele sai vítima ba tráfiku umanu.
Xefe DIK Superintendente Polísia João Belo dos Reis liu husi konferensia imprensa tersa-feira (09/01) ne’e esplika hafoin Servisu Migrasaun (SM) detekta sidadaun na’in neen ne’e ninia dokumentu liu-liu tiketi atu fila nian laiha no sira nia Visa atu tama ba nasaun Cambodia laiha, nune’e Servisu Migrasaun entrega ita nia maluk na’in neen mai iha DIK hodi halo prosesu identifikasaun kona-ba sira atu ba ne’ebe no sé maka fasilita sira.
“Husi identifikasaun ne’ebe maka ami halo katak sira ne’e konsidera ba vítima tráfiku umanu tanba ema rekruta sira liu husi online, kompañia naran Multi Game, na’in ne’e ema Brazil maibé wainhira sira halo Video Call ho nia, ema ne’e rasik nunka sé/hatudu oin ba sira”, esplika Xefe DIK ne’e.
Superintendente Polísia ne’e haktuir tan katak tuir informasaun ne’ebe sidadaun na’in neen ne’e fó katak sira ba atu servisu iha Casino. Husi esperiensia ne’ebe maka ita iha ba maluk sira ne’ebe maka servisu ba iha vitima tráfiku umanu iha Malaysia, nia modus Operanding hanesan. Modus operanding ne’ebe maka rekruta liu husi online no dokumentu sira kompañia maka fasilita, to’o ikus ita nia maluk sira maka sai vitima.
“Tanba ne’e, PNTL tenke asegura, protégé ita nia sidadaun sira labele vitima nafatin ba tráfiku umanu hodi nune’e ita halo identifikasaun no karik posivel involvimentu ita nia maluk Timor oan balun maka fasilita ka lori sira, ita sei bolu hotu hodi halo identifikasaun ba sira, kazu ida ne’e ita sei rezistu ba iha Ministeriu Públiku (MP)”, hatutan Superintendente Polísia ne’e.
Ofisias Superior PNTL ne’e akresenta tan tuir identifikasaun ne’ebe maka hetan sidadaun hirak ne’e atu ba nasaun Cambodia hodi ba servisu iha Casino, maibé rekrutamentu ne’ebe halo la liu dokumentu prosesu legais. Primeiru, maka ita nia governu liu husi SEFOPE la hatene, kompañia ne’e rasik la regista iha Timor no ema ne’ebe halo rekrutamentu ba sira mós laos iha Timor. Nune’e ita konsidera suspeitu maka’as ba iha tráfiku umanu.
“Rede tráfikante, kazu Malaysia nian prosesu lao hela ona, balun tama ona prizaun preventiva, balun prosesu lao hela no ba ida ne’e ita sei buka nafatin, hirak ne’ebe maka envolve tantu Timor oan ka estrangeiru, karik posivel ita bele servisu hamutuk ho Interpol bele kaptura mós sira”, tenik Ofisias Superior PNTL ne’e.
Dadun ne’e, sidadaun na’in neen parte DIK entrega ona ba familia no tuir ema sira ne’ebe sidadaun na’in neen ne’e temi, ita sei buka tuir. Tuir identifikasaun ne’ebe ita halo, sira la fó osan, tikete no dokumentu viagem ninian, kompañia maka oferese, iha diferente ho sira ne’ebe maka ba Malaysia.
Liga ba kazu sira ne’ebe mosu barak iha Media Sosial kona-ba bosok ema hodi hetan premiu no uza emblema instituisaun PNTL nian, ba ida ne’e Xefe DIK apela: “Uza oportunidade hau hakarak públika ba komunidade Timor-Leste laran tomak, joven sira, inan-aman sira hotu, kazu krime ida ne’e ita bolu Krime Scheming, bosok ema hodi halo koleksaun illegal, kobra ema, husu ba sidadaun hotu atu labele fiar ida ne’e, laiha autorizasaun husi instituisaun PNTL atu uza emblema hodi habosok ema, tanba ne’e karik maluk ruma hetan ou ema ruma kontaktu lori logo PNTL nian iha Media Sosial, husu atu lalika fiar. PNTL iha Media/Porta Voz rasik, saida deit maka PNTL atu lansa, sempre lansa husi meius komunikasaun ne’ebe PNTL iha”.Media PNTL.

 

January 10, 2024 in Uncategorized

Tinan 2024, Tempu ba PNTL Atu Hadia no Halo Mudansa

_MG_8008
Dili-Tinan 2024 nudar tempu ba membru Polisia Nasional Timor-Leste (PNTL) atu hadia nia aan hahu husi individu ida-idak atu nune’e bele halo mudansa no lori atendementu besik liu ba povu ho diak liu.
Komandante Jeral PNTL Komisariu Jeral Polisia Henrique da Costa hateten iha tinan 2024 Komandu ejiji no husu nafatin ba ita hotu atu nune’e hadia ita nia disiplina iha buat hotu, disiplina iha serbisu, disiplina iha komunikasaun, disiplina iha respetu hirarkia kadeia de Komandu, disiplina iha utilija uniforme, disiplina iha utilija patrimoniu estadu, disiplina oinsa komunika ba malu ho respetu no diak, nia hato’o asuntu ne’e iha formatura primeira semana fulan Janeiru tinan 2024 iha Kuartel Jeral Kaikoli Dili, Segunda (08/01).
Nia hatutan tinan 2024 tempu atu hadia hahu husi buat kik oan iha ita nia atividade lor-loron nian ho apoiu husi meius ne’ebe maka ita iha fo nia rezultadu diak maka ema dehan Polisia hala’o ninia servisu ho professional.
Halo servisu hakbesik liu ba komunidade halo ita nia komunikasaun ne’ebe maka diak ho sira, komunikasaun diak ho parseru sira, halo komunikasaun diak entre ita, susesu ita nian la depende ba ita maibe depende ba komunidade sira tanba sira maka sai hanesan objetu ne’ebe simu ita nia atendementu nune’e wainhira sira sente satisfas, entaun ita nia susesu iha neba maibe wainhira sira sente la hakamtek no nafatin ejiji hela atendementu Polisia nian entaun ita sei nafatin servisu maka’as atu nune’e bele hadia tanba ne’e hau husu hadia ita nia komunikasaun ho ita nia komunidade, estrutura no parseru sira.
_MG_7975
Komisariu Jeral ne’e fo hanoin ba Komandante, Ofisial Superior sira, Ofisial Subalternu, Sarjentu no Ajente sira katak rotasaun, mudansa, transferensia, nomeasaun iha PNTL hanesan buat bai-bain depende ba ejijensia no nesesidade instituisaun nian. Iha tempu badak sei iha rotasaun nomos nomeasaun ba Ofisial Superior balu tanba ne’e husu atu ejekuta no kumpri ho responsabilidade. Alende ne’e sei halo rotasaun no nomeasaun ba Ofisial Inspetur sira balu tanba ne’e husu ba ita hotu kumpri no halo servisu ho responsabilidade nune’e mos ba Sarjentu no Ajente sira.
Hau hanesan Komandante Jeral ho Segundu Komandante Jeral no Ofisial Superior tomak hakarak hato’o agradese no obrigadu barak ba komportamentu no servisu apoiu tomak ne’ebe maka ita bot sira kontribui ba PNTL hodi hala’o servisu ho diak durante tinan 2023 espesialmente asegura eventu hirak ne’ebe maka hala’o iha Timor-Leste durante ne’e liu-liu selebrasaun Natal no Tinan foun, ita akompanha maske iha asidente no insidente balu maibe ita responde ho lais no diak hodi minimija ema lakon vida iha tempu Natal no tinan foun nian, Hau fiar katak ida ne’e mos kontribuisaun husi ita nia familia tanba sempre fo hanoin ba oan sira no vizinu sira nune’e mos sempre fo hanoin bai ta nia komunidade sira dala ida tan agradese ba serbisu diak ida ne’e.
Ita hare katak iha tinan 2023 PNTL tenta esforsu maka’as atu dezenvolve hodi lori progresu ba instituisaun PNTL hodi halo atendementu ba ita nia povu no asegura ita nia rain ho diak maibe ita infrenta difikuldade iha ita nia serbisu maske nune’e ita bot sira la foti ida ne’e hanesan kestaun ka obstaklu ida hodi impede ita bot sira nia serbisu.
PNTL tenta esforsu maka’as atu dezenvolve hodi lori progresu ba instituisaun PNTL hodi halo atendementu ba ita nia povu no asegura ita nia rain ho diak maibe ita infrenta difikuldade iha ita nia serbisu maske nune’e ita bot sira la foti ida ne’e hanesan kestaun ka obstaklu ida hodi impede ita bot sira nia serbisu. Maske ita nota katak iha membru nain ida ka rua maka iha tempu alerta nian sira la marka prejensa, dalaruma obstaklu ita ida-idak nian lahanesan no dalaruma mos dejafiu ema ida-idak nian lahanesan mais husu nafatin konsidera imi nia Komandante ka Instruidor direta sira no informa ba sira atu sira bele hatene.
Iha biban ne’e Komandante Jeral mos husu ba membru PNTL hotu atu tau atensaun bai ta ida-idak nia saude tanba durante tinan hirak nia laran PNTL lakon nia membru barak tanba ne’e husu ba ita ida-idak atu tau atensaun ba ita nia saude, wainhira moras ba halo tratamentu ou cek up iha ospital, ita nia Departamentu saude mos iha atu nune’e kontinua ba Ospital Nasional labele hein moras todan mak ba, diak liu kada fulan nen(6) ou tinan ida ba halo kontrola rutina no wainhira hetan moras ruma halo kedas tratamentu (prevensaun).
Antes remata Lideransa Masimu instituisaun seguransa ne’e Agradese ba Funsionariu Sivil sira nia kontribusaun servisu no apoiu ba instituisaun PNTL durante ne’e no nafatin tanba ita boot sira integra iha PNTL nune’e Komandu nafatin ejiji imi nia serbisu diak hodi fo kontribusaun susesu ba Polisia ida ne’e no ba instituisaun PNTL tantu funsionariu Sivil permanente no kontratadu husu atu nune’e hadia disiplina.
Hau ho Segundu Komandante Jeral no estrutura tomak hato’o Boas Festas no Boas entradas 2024 ba ita hotu. Media PNTL

 

January 9, 2024 in Uncategorized