PNTL Entrega Evidensia Motorizada 32 No Karreta 2 Ba Ministeriu Públiku No Patrimonio Estadu Hodi Halo Lelaun

IMG_1387

 

Dili, Komandu Polísia Nasional Timor-Leste (PNTL) liu husi Diresaun Nasional Tránzitu Seguransa Rodoviáriu (DNTSR) segunda-feira (09/05) ne’e entrega hikas evidensia motorizada hamutuk 36 no karreta 2 ne’ebe PNTL prende iha aktividade auto stop no rai hela iha espasu Kaurtél Jerál Kaikoli ba Ministeriu Públiku (MP) hodi entrega tutan ba Diresaun Patrimonio Estadu-Ministeriu Finansas hodi halo Lelaun.

Segundu Komandante Jerál PNTL Komisariu Polísia Mateus Fernandes iha diskursu serimonia Asina Termo Entrega ne’ebe hala’o iha salaun ekontru Kuartél Jerál hateten wainhira koalia kona-ba asuntu entrega sasan sira (Motorizada-Karreta) ne’e sai preukupasaun bo’ot ba PNTL, tanba wainhira prende sei liu husi prosesu naruk tebes.

“Wainhira Polísia prende ona sasan (Motorizada-Karreta) sira ne’e, maka iha dezisaun lalais ba Polísia entaun ida ne’e ajuda tebes, tanba Polísia laiha fatin/espasu atu rai motor no kareta, sá tan sasan sira ne’ebe prende iha fronteira, hanesan sira kaptura mina barak iha munisipiu Covalima-Suai, Bobonaro no mós Oecusse, karik ita rai kleur ahi ruma mai han, problema bo’ot, tanba Polísia fatin laiha”, tenik Segundu Komandante Jerál PNTL ne’e.

IMG_1508

Komisariu Polísia ne’e afirma tan katak tanba ami sujere ba Procurador Gerál República (PGR) no Procurador Distrital Dili atu oinsa wainhira ita kaptura ona sasan (Motorizada-Karreta), rápidamente ita halo komunikasaun ba MP, atu nune’e MP bele hare’e dezisaun ruma, oinsa bele ajusta sasan sira ne’e, nune’e wainhira to’o ona tempu bele entrega ba Patrimonio Estadu-Ministeriu Finansas hodi halo Lelaun.

Iha fatin hanesan Adjunta PGR Remizia de Fátima iha ninia intervensaun hateten durante tempu naruk nia laran hahu’u husi tinan 2009 iha ne’ebe Polísia Tránzitu prende objetu hirak ne’e, ohin loron bele hetan dezisaun final hodi ita bele realiza termo entrega sasan sira ne’e.

“Ita konsege hetan solusaun husi dezisaun Tribunal nian ne’ebe maka iha no ohin ita mai hamutuk iha fatin ida ne’e atu halo entrega ba Patrimoniu Estadu hanesan instituisaun ne’ebe maka jere kona-ba bens sira ne’ebe Estadu nian, liu-liu objetu sira ne’ebe liga ba Krime”, tenik Adjunta PGR ne’e.

Media PNTL.          

Komisariu Polísia Mateus Fernandes Lidera Serimonia Isar Bandeira

IMG_1306

Dili, Komandu Polísia Nasional Timor-Leste (PNTL) segunda-feira (09/05) ne’e hala’o serimonia Isar Bandeira iha Kuartél Jerál ne’ebe lidera husi Segundu Komandante Jerál PNTL Komisariu Polísia Mateus Fernandes.

Iha ninia diskursu ba serimonia ne’e, Komisariu Polísia Mateus Fernandes aktualiza informasaun kona-ba situasaun seguransa iha rai laran ne’ebe lao diak tanba ita hotu nia esforsu, servisu maka’as no kooperasaun hodi bele garante situasaun seguransa lao diak.

“Ita kontinua servisu maka’as no kontribui ba malu nafatin atu ita nia situasaun sai diak liu tan hanesan Prezidente Repúblika sempre hateten wainhira hau ho Komandante Jerál ba halo enkontru, katak Polísia hotu-hotu iha Timor laran tomak, sira desempeña diak no professional to’o estrutura tomak signifika Xefe Estadu fó votus konfiansa ba PNTL tomak iha Eleisaun rua ne’ebe liu ona”, tenik Komisariu Polísia ne’e.

IMG_1320

Segundu Komandante Jerál ne’e alerta ba membru hotu katak la kleur tan ita sei hasoru asuntu rua, maka hanesan serimonia tomada de posse ba Prezidente Repúblika Eleitu, ida fali Komemorasaun Loron Restaurasaun 20 Maio. Ita nia Komandante Komandu Operasaun hola parte mós iha Komisaun Organizadora ba eventu bo’ot rua refere, espera iha asuntu tomada de posse ba Prezidente Repúblika Eleitu sei iha serimonia barak ne’ebe maka PNTL sei hola parte mós.

Media PNTL.

Atu Halo Rekrutamentu Ba Membru PNTL Foun, VMI Rona Aprezentasaun Komandu PNTL

IMG_1137

Dili, Komandu Polísia Nasional Timor-Leste (PNTL) kinta-feira (05/05) ne’e hala’o aprezentasaun kona-ba efetivu membru PNTL nian ba Vise Ministru Interior (VMI) António Armindo relasiona ho planu governu nian atu halo rekrutamentu ba membru PNTL foun iha tinan 2023.

VMI António Armindo hafoin enkontru ba jornalista sira hateten objetivu husi sorumutu ohin ho Komandu PNTL ne’e atu rona Komandu nia aprezentasaun, nune’e hare iha tinan oin (2023) presiza halo rekrutamentu ou lae.

“Ida ne’e halo basea ba orientasaun Primeiru Ministru (PM) hanesan mós Ministru Interior (MI) Taur Matan Ruak ne’ebe maka haruka mai hau, komunika ho Komandu atu bele halo netik aprezentasaun dadus ruma atu nune’e hau rasik sei lori aprezenta ba PM no MI, atu nune’e hare’e tok posibilidade ka lae tinan oin (2023) atu halo rekrutamentu, tanba dezisaun tomak ne’e iha PM no MI nian tanba ne’e ami servisu hela, prepara hela dadus/dokumentu ida ne’e atu tempu badak bele lori ba gabinete PM no MI”, tenik VMI ne’e.

IMG_0142

Membru governu ne’e haktuir tan katak rekrutamentu ne’e basea ba, wainhira ita hahu’u ho PNTL nia Estatutu nian aprova ona, kuandu ema ida sai konta mós ho sira ne’ebe maka agora moras difisiensia mental no físiku, balun mate tan hanesan iha tinan kotuk membru ne’ebe maka mate hamutuk 32 no tinan ida ne’e deit 11 ona, ne’e númeru ne’ebe maka barak liu, rekrutamentu ne’e importante los.

“Tanba ne’e, ami hanoin tuir planu ita presiza halo rekrutamentu pelu menus ema hamutuk na’in 720 atu nune’e além-de troka sira ne’ebe maka atu reforma, sira ne’ebe vida to’o ona, sira ne’ebe maka moras difisiensia mental no físiku, atu nune’e bele priense fila fali númeru hirak ne’e, planu ne’e sei realiza iha tinan 2023”, haktuir António Armindo.

Tuir planu, dadus hirak ne’ebe maka Komandu PNTL aprezenta ba VMI no Orgânika PNTL nian, iha semana oin VMI sei lori ba PM hanesan mós MI nune’e bele halo ajustamentu ba Orsamentu tinan 2023 nian.

Hola parte iha enkontru ne’e VMI António Armindo, Komandante Jerál Komisariu Polísia Faustino da Costa, Segundu Komandante Jerál Komisariu Polísia Mateus Fernandes, Inspetúr Jerál, Komandante Komandu Operasaun, Administrasaun, Xefe Departamentu, Xefe Gabinete no Xefe Servisu iha Kuartél Jerál Kaikoli inklui parseiru TLPDP.

Media PNTL.

Komandu PNTL Relata Situasaun Seguransa ba PR

IMGL4509

Dili, Komandu Polísia Nasional Timor-Leste (PNTL) liu husi Komandante Jerál Komisariu Polísia Faustino da Costa no Segundu Komandante Jerál Komisariu Polísia Mateus Fernandes kinta-feira (05/05) ne’e hala’o enkontru semanal ho Presidente Repúblika (PR) aktual Dr.Franscisco Guterres ‘Lu-Olo’ hodi relata situasaun seguransa iha teriotiru nasional durante ne’e lao diak.

Hafoin enkontru ba jornalista sira Komandante Jerál Komisariu Polísia Faustino da Costa hateten agenda sorumutu ho PR ba loron ohin iha pontu rua maka hanesan aktualiza situasaun seguransa iha nivel nasional lao diak hela, pontu segundu maka preparasaun PNTL ba serimonia 19 no 20 Maiu.

“Kona-ba preparasaun seguransa ba bainaka importante sira, parte interna PNTL ita halo preparasaun ita nia membru tantu mós prepara kondisaun transporte sira, desde ita ita lista konfirmadu ou lista final kona-ba VIP tantu VVIP, ita sei halo kolokasaun inklui mós iha ne’ebe sai hanesan akomodasaun ou fatin hela ba ita nia entidade sira ne’e”, tenik Komandante Jerál PNTL ne’e.

 Komisariu Polísia salienta tan atu asegura bainaka importante sira ne’e, presiza hare’e protokolu, bainaka ne’e Xefe Estadu ou Xefe Governu ka Membru Governu, tanba ne’e ita iha ona regras própriu kona-ba ida ne’e.

Xefe Estadu nafatin agradese no kongratula servisu Komandu PNTL nian durante ne’e, Xefe Estadu husu atu mantein nafatin halo servisu ho diak, liu-liu asegura seguransa iha loron 19 no 20 fulan Maiu tinan ne’e nian.

Kazu Sirkulasaun Osan Falsu

Iha biban ne’e, Autoridade másimu instituisaun seguransa ne’e informa katak iha kazu ida maka akontese iha loron rua liu ba, iha munisipu ida, iha grupu ka asosiasaun ida sira maka deskonfia, maibé hafoin ekipa PNTL halo verifikasaun tantu mós ita aprezenta ba Banku, maibé realidade laos nune’e, osan ne’e original katak laos falsu, iha duni kazu osan falsu, maibé ne’e akontese iha tinan balun liu ba, ninia prosesu lao hela.

“Aktualiza deit katak kazu ne’ebe mosu iha loron rua liu ba katak osan falsu ne’e lalos, maibé osan ne’e original”, tenik Komandante Jerál PNTL ne’e.

Media PNTL.

XEFE ESTADU HUSU PNTL ASEGURA DI’AK SEGURANSA SERIMÓNIA TOMADA POSSE PR

IMGL4509
Palásiu Prezidensiál Nicolau Lobato, Díli, 28 abril 2022
Prezidente Repúblika, Francisco Guterres Lú Olo, ohin, iha enkontru semanál ho Komandante Jerál Polísia Nasionál Timor-Leste (PNTL), Komisáriu Faustino da Costa no Segundu Komandante, Komisáriu Mateus Fernandes, husu atu PNTL asegura seguransa iha preparasaun no realizasaun serimónia tomada posse Prezidente Repúblika foun, iha 19 maiu no iha selebrasaun Loron Restaurasaun Independénsia 20 maiu.
Prezidente Repúblika mós “agradese ba servisu hirak ne’ebé polísia halo durante ne’e” no husu PNTL mantein nafatin servisu di’ak sira ne’e.
IMGL0700
Ba imprensa hafoin enkontru ho Xefe Estadu, Komisáriu Faustino da Costa esplika Komandu PNTL iha ona planu oinsá atu halo seguransa liu husi enkontru avaliasaun ne’ebé sei halo ho Komandu Munisipiu no Unidade sira PNTL, iha 2 maiu no tuir mai, iha 13 maiu, ho foku ba serimónia rua iha 19 no 20 maiu.
Komisáriu Faustino da Costa informa Komandu PNTL to’o oras ne’e sei hein hela husi Komisaun Organizadora lista konvidadu importante sira hanesan Xefe Estadu no Xefe Governu, ne’ebé sei marka prezensa iha serimonia rua refere, nune’e PNTL bele prepara ho antesedénsia nia membru no ekipamentus sira ne’ebé presiza hodi fó seguransa ho di’ak.
Ko’alia kona-ba situasaun seguransa iha rai-laran, Komisáriu Faustino da Costa hatete: “situasaun (seguransa) iha territóriu nasionál la’o di’ak”. MÍDIA PR

 

Kazu Kobransa Ilegal No Ema Deskoñesidu Ameasa Komunidade Ho Kilat, Iha Ona Prosesu Investigasaun

IMG_0021

Dili, Komandu Polísia Nasional Timor-Leste (PNTL) liu husi Servisu Investigasaun Kriminal Nasional (SIKN) iha loron 04 fulan Maiu tinan ne’e kaptura sidadaun balun ne’ebe maka durante ne’e hala’o aktividade kobransa illegal ba komunidade sira, oras ne’e dadaun iha ona prosesu investigasaun.

Nune’e mós kazu seluk ne’ebe akontese iha loron 28 fulan Abril tinan ne’e, iha aldeia Turleu, Suku Ulumera, Postu administrativu Bazartete, Munisipiu Liquiça iha ne’ebe deskonfia ema balun lori kilat ameasa populasaun iha suku refere, kazu ne’e mós iha ona prosesu investigasaun.

Porta voz Komandu PNTL Superintendente Xefe Armando Monteiro kuarta-feira (04/05) ne’e liu husi konferensia imprensa hateten liga ba aktividade kobransa illegal ne’ebe maka ita nia komunidade barak maka sai vitima, hanesan ita hotu hatene katak iha tinan hirak liu ba Instituisaun PNTL tantu mós Komandu F-FDTL iha kooperasaun, koordenasaun diak oinsa atu bele prevene ba aktus kobransa illegal ida ne’e.

IMG_0858

“Tanba aktus ida ne’e dala-ruma lori kredibilidade, dignidade instituisaun rua ne’e nia naran tantu mós ita nia lideransa nasional nia naran hodi hetan lukru no benefisiu na sira nia aktividade ida ne’e; kazu ida ne’e agora dadaun sei kontinua submete ba prosesu investigasaun no husu ba públiku sé karik movimentu ida ne’e lao lori ita nia líder sira nia naran hodi husu kobransa ka apoiu ou suporta ruma karik, rona, fiar no ba imi nia autoridade lokal tantu mós autoridade seguransa no defeza ne’ebe besik hela iha ita nia bairu/ hela fatin hodi nune’e ita hotu hamutuk prevene aktividade ne’ebe maka oras ne’e lao hela iha ita nia rai laran”, esplika Porta voz Komandu PNTL ne’e.

Superintendente Xefe ne’e informa tan kazu ne’ebe maka mosu iha loron 28 fulan Abril tinan ne’e iha munisipiu Liquiça, Komandu PNTL munisipiu Liquiça liu husi Servisu Investigasaun Kriminal halo ona investigasaun no foti ona informasaun ba vitima hamutuk na’in hat, kazu ida ne’e kontinua submete ba iha proseu investigasaun, sei rekolla tan informasaun husi vitima sira seluk.

Media PNTL.

Abertura Treinamentu Humanitaria Mine Action Program Ba Membru EOD-UEP

IMGL0371

Dili, Komandu Polísia Nasional Timor-Leste (PNTL) liu husi Komandu Unidade Espesial Polísia (UEP) tersa-feira (03/05) ne’e hala’o serimonia abertura Treinamentu Humanitaria Mine Action Program ne’ebe maka oferese husi Forsa Marítima nasaun Estadu Unidus Amerika liu husi ninia embaixada iha Timor-Leste ba membru PNTL liu-liu UEP seksaun Explosive Ordnance Disposal (EOD). Objetivu husi treinamentu ida ne’e atu fó apoiu ba PNTL iha UEP hodi aumenta sira nia kapasidade no koñesimentu atu trata ba seguransa explosivu nian.

Komandante Jerál PNTL Komisariu Polísia Faustino da Costa iha ninia diskursu iha abertura ne’e hateten serimonia ohin nian nu’udar aktu ida husi esforsu hodi hadia kualidade atendimentu husi membru PNTL nian ne’ebe konsidera nu’udar area ida ba limpeza ninian, limpeza ne’ebe kontinuasaun husi sasan funu nian huhu’u kedas Segundu Guerra Mundial no durante tempu naruk nia laran wainhira Timor-Leste buka dalan atu sai nasaun ida ne’ebe Soberanu no Independente.

IMGL0297

“Ohin, liu husi tempu naruk hodi buka dalan ba solusaun no mós oinsa atu bele fó protesaun seguransa ne’ebe diak liu ba komunidade tomak iha Timor-Leste, ita realiza formasaun ida ne’e maske durante ida ne’e PNTL liu husi UEP servisu hamutuk ho Komandu Munisipiu no Unidade inklui entidade tomak hodi halo limpeza ba material abandonadu sira ne’ebe maka eziste no hahu’u kedas husi Segundu Guerra Mundial ninian”, tenik Komandante Jerál PNTL ne’e.

Komisariu Polísia ne’e apela ba membru hirak ne’ebe maka partisipa iha kursu ida ne’e atu aproveita didiak nune’e bele halo servisu diak liu tan iha futuru no hala’o kna’ar liu-liu nu’udar UEP ninian ne’ebe tenke hetan apoiu no suporta husi Komandu munisipiu sira atu bele kontinua sensibiliza ba ita nia komunidade kona-ba risku husi explosivu sira ne’ebe eziste, laos deit iha kapital maibé iha fatin seluk ne’ebe durante ne’e ita hahu’u no mós nafatin halo rekollamentu ba sasan funu nian.

Iha fatin hanesan, enkarregadu Negosiu Embaixador Estadus Unidus Amerika iha Timor-Leste Thomas E.Daley-Chargé d’Affaires a.i iha ninia diskursu sente haksolok tanba bele hamutuk ho PNTL ohin hodi loke programa Asaun Umanitaria Kontra Minus ba dahuluk liu iha Timor-Leste.

IMGL0442

“Hau hakarak hato’o agradesimentu ba governu Timor-Leste no PNTL ba ita bo’ot sira nia apoiu maka’as tebes ba programa ida ne’e no ba ita nia kooperasaun seguransa ne’ebe buras ba bebeik; formasaun ne’ebe hahu’u iha loron ida ne’e reprezenta komprimisiu importante ida iha ami nia apoiu ba PNTL nia esforsu sira hodi hadiak liu tan seguransa ba povu Timor-Leste”, hateten enkarregadu Negosiu Embaixador Estadus Unidus Amerika iha Timor-Leste ne’e.

Thomas E.Daley-Chargé d’Affaires a.i haktuir tan katak inisiativa ida ne’e sei eleva liu tan kapasidade no abilidade PNTL ninian, hametin ita nia parseria no loke oportunidade ekonómika foun sira ba povu Timor-Leste.

Entretantu Vise Ministru Interior (VMI) ne’ebe reprezenta Ministru Interior (MI) António Armindo agradese ba Embaixador Estadus Unidus Amerika iha Timor-Leste liu husi esforsu bele realiza formasaun ida ne’e no husu atu formasaun Humantarian Mine Action Program be;e kontinua nafatin iha futuru. Husu mós ba membru hirak ne’ebe mak hetan oportunidade hodi partisipa iha formasaun ida ne’e, atu hola parte didiak nune’e ba oin bele hala’o kna’ar diak liu tan ba kestaun seguransa explosivu nian.

Treinamentu refere sei partisipa husi membru UEP seksaun EOD hamutuk na’in neen ho durasaun tempu loron 15.

Media PNTL.                         

MI Sei Hari Torre Lima ba PNTL

IMG_0093

Dili- Ministeriu Interior planea sei hari Torre Lima (5) ba Polisia Nasional Timor-Leste (PNTL) hodi responde problema komunikasun ne’ebe maka instituisaun ne’e infrenta.

Vice Ministru Interior Antonio Armindo hateten orsamentu preve iha tinan 2022 atu hari torre radio komunikasaun PNTL nian iha Atauro, Oecusse ne’ebe maka sira komesa hare dadauk ona tanba ita hare problema komunikasaun ligadu ho torre tanba durante ne’e PNTL nia repiter tara tuir torre Timor Telekom nian, nune’e ita hanoin diak liu ita iha rasik tanba Ministeriu Interior iha diresaun Protesaun Sivil, Imigrasaun no PNTL nune’e ministeriu hanoin diak liu ita iha torre rasik, ida ne’e maka PNTL fo sai ona tenderijasun ba kompania sira, nia hato’o asuntu ne’e ba Jornalista sira iha Timor-Plaza Dili segunda (0205).

Nia haktuirtan ministeriu preve orsamentu atu hari torre lima (5) nune’e molok tinan 2023 komunikasaun bele lao diak. Alende torre ne’e ita mos iha radio komunikasaun ne’ebe ita preve no nia prosesu tenderijasaun iha hela Komisaun Nasional Aprovizionamentu (CNA-sigla portuges) ita espera prosesu ne’e lais para ita halo instalasaun nune’e ita uza ona iha Kampaña Parlamentar 2023.

“Tenderijasaun ba torre fo sai husi PNTL tanba montante orsamentu menus husi $200 mil Komandu maka halo kontratu no prosesu aprovizionamentu tomak kuandu liu husi $200 mil maka ministeriu tuir delegasaun kompetensia,” dehan nia.

IMG_0093

Vice MI ne’e akresenta Torre balu uza hela TT nian ezemplu hanesan iha Lospalos no fatin seluktan ne’ebe iha hela foin dadauk semana kotuk Hau ho kareta ba Viqueque radio ne’ebe maka koalia iha Dili ne’e ita bele akapta iha Baucau liu ba Venilale ne’ebe Hau hanoin sei bele ajuda los kuandu ita nia torre sira ne’e monta hotu depois ita halo instalasaun muda ita nia repiter husi Timor Telekom ba fali Ministeriu Interior nune’e radio komunikasaun bele lao diak, ita espera prosesu sira ne’e lais no buat hotu bele lao diak.

Entretantu Komandante Jeral PNTL Komisariu Polisia Faustino da Costa hateten problema komunikasaun ne’ebe Komandu tenta solusiona buat balu ezemplu hanesan komunikasaun nia abut husi problema maka ita bele hola radio bar-barak tau ba kareta fo ba hotu kedas mos ita iha problema konaba torre mos situasaun ida tanba ne’e maka iha tinan ida ne’e ita aloka orsamentu para konstrui torre 5 hodi bele rejolve problema ida ne’e; Kestaun rekursu humanus Komandu tenta oinsa atu bele iha kolokasaun membru ne’ebe sufsiente Komandu hato’o ona no tempu badak mos Ami sei halo diskusaun ida ne’e ho Vise Ministru Interior.

Responde konaba problema menus rekursu humanus iha PNTL Vice Ministru Interior Antonio Armindo hateten kestaun konaba rekursu PNTL ne’ebe maka limitadu ne’e rajaun tanba ida ne’e maka semana hirak liuba ita hetan orientasaun verbal husi Primeiru Ministru hanesan mos Ministru Interior Taur Matan Ruak hodi husu Komandu aprejenta dadus bazeia ba numeru  Ofisiais, Sarjentu no Ajente hira, sira ne’ebe maka moras difisiensia mental no difisiensia fiziku sira ne’e hira para ita hare numeru hira maka ita presija atu halo rekrutamentu no hira maka presija rekrutamentu kompletu iha tinan tolu, hat, lima oin mai.

Nia haktuitan Komandu PNTL halo ona aprejentasaun dala uluk mai Hau hanesan Vice Ministru Interior maibe hau hein hela aprejentasaun da-ruak, ita orienta hela sira tanba dadus balu seidauk kompletu entaun ita haruka ba para sira kompleta hafoin halo aprejentasaun daruak hodi hetan aprovasaun hafoin ita haruka aprejentasaun ne’e ba Primeiru Ministru hodi foti desijaun atu kontinua avansa ho rekrutamentu ka lae.

Hau fiar Primeiru Ministru hanesan Ministru Interior sei foti desijaun ida ne’ebe pojitivu tebes atu nune’e ajuda apoiu membru seguransa sira ne’ebe limitadu no sai prekupasaun Komandu nian, Nia hakotu. Media PNTL

Komandu PNTL Halo Avaliasaun Servisu Operasaun Eleisaun Prezidensial Da-ruak

IMG_0509

Dili-Komandu Polisia Nasional Timor-Leste (PNTL) halo avaliasaun servisu operasional festa demokrasia Eleisaun Prezidensial tinan 2022-2027 Da-ruak hodi evalua susesu no dezafiu ne’ebe maka iha no hadia diak liutan iha future.

Komandante Jeral PNTL Komisariu Polisia Faustino da Costa hateten enkontru ida ohin hodi bolu fila-fali Komandante munisipiu, Unidade, Xefe Departamentu no Gabinete sira hodi aprejenta progresu ba festa demokrasia nian iha munisipiu hotu tanba ita hatene katak ho rekursu ne’ebe PNTL iha ohin loron maka atividade hotu festa demokrasia ita involve membru hotu iha Komandu Jeral tanba ne’e maka sira mai hotu hodi hato’o dejafiu saida maka sira hasoru hahu husi kampaña to’o eleisaun, Nia hato’o asuntu ne’e ba Jornalista sira iha Salaun Maubara room Timor-Plaza Dili, segunda (02/05).

Nia haktuirtan iha enkontru avaliasaun ne’e identifika dezafiu balu maka hanesan dezafiu rekursu humanus, transporte no komunikasaun ne’ebe maka Komandu tenta para solusiona buat balu.

Komandu rejista para ba oin oinsa hadia buat balu ne’ebe maka presija hadia no buat balu ne’ebe karik Komandu tenke aprejenta ba governu no segundu Komandu orienta era foun normalidade de servisu rutina PNTL nian tanba durante ne’e ita prekupa, antisipa no foku liu ba kampaña no Eleisaun Prezidensial maka prosesu ne’e hotu ona ita hein deit halo selebrasaun.

IMG_0616

Orientasaun Komandu nian maka Komandante sira alende nafatin hare oinsa asegura festa serimonia restaurasaun Independensia 20 de maiu, segundu sira tama halao servisu rutina Polisia nian maka: halo vizivilidade hahu husi munisipiu mai nasional, atividade Polisia Komunitariu nian, atividade Seguransa Rodoviariu ba aktu prevensaun, kriasaun enkontru, rejolusaun komflitu, reativa no normalija fila-fali enkontru OPS ho KPK, no Konsellu Seguransa Municipal no Rejional.

Alende ne’e husu ba Komandante sira atu buka tuir motive husi kazu suisidiu(hatalik aan) ne’ebe sae makaas kada semana entaun Komandante sira tenke buka tuir abut ka hun husi problema ne’e nia kauza ne’e saida para aprejenta depois karik iha reuniaun konsellu seguransa iha munisipiu ka unidade sira ita konsege buka nia abut hodi hare solusaun.

IMG_0074

Orentasaun enkontru ida ohin hare ba situasaun hirak ne’e no ikus maka preparasaun ba segurasan iha serimonia sira ne’ebe maka sei halao iha loron 19 no 20 fulan ne’e, tanba selebrasaun ne’e alende iha nivel nasional sei halao mos iha munisipiu entaun ida ne’e ami rezerva ba enkontru balu ne’ebe sei halao iha semana oin mai.

Enkontru Avaliasaun servisu ne’e ho prejensa husi Segundu Komandante Jeral Komisariu Polisia Mateus Fernandes, Parseru TLPDP no partisipa husi Inspetur Jeral, Komandante Komandu Operasaun, Komandante munisipiu 14, Komandante Unidade, Xefe Departamentu, Xefe Servisu no Xefe Gabinete sira iha Kuartel Jeral. Programa ne’e organija husi Komandu Operasaun ho apoiu finanseru husi parseru TLPDP. Media PNTL

Departamentu Tranzitu Seguransa Rodoviariu fo Palestra ba Funsionariu Publiku

IMGL9934

Dili-Departamentu Tranzitu Seguransa Rodoviaria Nasional (DTCRN) fo palestra konaba regras no sinais tranzitu ba funsionariu publiku atu bele iha konyesementu oinsa halo movimentu no utilija estrada publiku.

Xefe Departamentu Formasaun Dezenvolvimentu Kareira Funsaun Publika Florinda de Jesus hateten Ami hanoin inportante konvida PNTL departamentu Tranzitu hodi habelar mai habelar informasaun ba funsionariu foun nain 132 tanba funsionariu foun sira merese atu rona no hatene informasaun konaba tranzitu nian ne’ebe maka ligadu ho ema nia vida tanba ita ema moris lor-loron sempre halao no hasoru movimentu ho transporte iha kapital Dili no fatin hotu, Nia hato’o asuntu ne’e ba Media PNTL iha Salaun INAP Comoro Dili, kinta (28/04).

Nia hatutan wainhira partisipante ida rona no hatene informasaun hirak ne’e maka nia sei hatutan ba sira nia familia no komunidade tanba funsionariu hirak ne’e halao servisu atendmentu publiku iha Ministeriu Saude, Ministeriu Interior no Ministeriu Defeza.

IMGL9944

 Tuir planu palestra faze daruak sei halao iha fulan Juñu ba funsionariu hamutuk nain 133 ne’ebe maka tuir Kursu Indusaun Jeral Obrigatoriu ba funsionariu Publiku.

Iha okajiaun ne’e Sarjentu Xefe Linu Martins hateten Ami hetan konvite husi Diretur Komisaun Funsaun Publika (CFP, sigla portuges) konvida Ami mai fo sensibilizasaun konaba regras no prosedimentu ba funsionariu nain 132 ne’ebe tuir kursu indusaun iha Institutu Nasional Administrasaun Publika (INAP).

“Objetivu husi palestra ne’e atu haklean funsionariu sira nia konyesementu konaba Regras no Prosedimentu Tranzitu nian, atu bele hatene regras no prosedimentu oinsa utilija estrada publiku no halo movimentu husi fatin ida ba fatin seluk ho livre tanba ne’e presija iha konyesementu diak hodi uza estrada publiku nune’e bele hadok aan no prevene asidente ne’ebe ita la espera.

Nia hatutan Funsionariu sira antuasismu teb-tebes hodi partisipa iha palestra ne’e tanba sira sente katak informasaun hirak ne’e barak maka sira seidauk hatene nune’e sira sente kontente no sira husu sebele karik sensibilijasaun hanesan ne’e fo ba funsionariu hotu-hotu.

IMGL9984

Materia hirak ne’ebe maka fo iha palestra ne’e kompostu husi Sinalizasaun Tranzitu, Lei ne’ebe regula iha Kodigu Estrada hodi inplementa iha estrada publiku.

Palestra loron sorin ne’e partisipa husi funsionariu foun nain 132 husi Ministeriu Saude, Ministeriu Interior no Ministeriu defeza ne’e maka servisu iha Dili no munisipiu hotu. Media PNTL