Uncategorized

Dili, iha Kuartél  Jerál Kaikoli quarta-feira ne’e (13/04/2016) membru PNTL husi Servisu Investigasaun Kriminal Nasional (SIKN halo prevensaun ba karreta ha’at ne’ebe tula sasan mai husi Indonesia, balun la tuir lista ne’ebe mak iha.

Komandante SIKN Superintendente Ludgerio Lay ne’ebe komanda direktamente aktividade prevensaun ne’e hateten, parte SIKN simu informasaun husi membru Polisia sira ne’ebe maka servisu iha terrenu katak karreta ha’at (4) ne’e sasan balun la tama iha lista.

“Ita simu informasaun husi membru ne’ebe ita koloka iha terrenu katak sasan hirak iha karreta ne’e, balun iha lista no balun laiha lista, ho ida ne’e maka ita halo prevensaun, ita bolu sira mai iha ne’e para ita cek sasan hirak ne’e, ida pur ida tuir lista ne’ebe maka sira selu taxa”, Superintendente Ludgerio lay hateten iha aktividade prevensaun ne’ebe hala’o iha Kuartél Jerál Kaikoli.

Tuir Komandante SIKN ne’e katak, tanba kestaun rekursu membru PNTL husi SIKN nian menus, nune’e sei akompaña karreta hirak ne’e ba to’o iha nia fatin, hodi bele cek fila fali sasan hirak ne’e tuir lista ne’ebe maka iha. Tanba sasan hirak ne’ebe maka tula husi Indonesia ho karreta ha’at ne’e tama mai Timor Leste iha dokumentu kompletu no sira kumpri hodi selu taxa, maibé ho informasaun ne’ebe maka iha, parte SIKN presiza halo prevensaun ba karreta hirak ne’e.

“Agora karreta ha’at (4) ne’e dadaun, tanba ita nia rekursu ema atu hatun sasan ida pur ida laiha, ita nia Polisia sei akompaña sira ba to’o iha fatin sira nia hodi sobu (bongkar), no sei akompaña husi nain rasik, sira sei cek ida pur ida”, tenik Komandante SIKN.

Nia hatutan tan katak, karik iha aktividade cek sasan hira ne’e maka iha hotu lista ne’e legal no tuir duni lista ne’ebe maka nain selu taxa, entaun Polisia sei husik. Karik maka identifika sasan balun la tuir lista maibé iha karreta laran, entaun Polisia sei prende hodi halo relatoriu no sei haruka ba Minitériu Públiku atu halo prosesu tuir lei ne’ebe maka vigora.

Media PNTL.

Dili-Segundu Komandante Jeral Polisia Nasional Timor-Leste (PNTL) Komisariu Polisia Faustino da Costa husu ba membrus PNTL hotu atu asesu ba website PNTL tanba iha informasaun, lei no regra sira konaba servisu PNTL nian hakerek iha website ne’e.

Nia heteten wainhira membrus PNTL asesu ba situs PNTL nian rasik maka sei halo sira nia servisu sai diak liu tan, tanba iha situs laran hakerek kona-ba orientasaun, regulamentus, notisia polisia nian no saida maka Komando sempre koalia bainhira iha inkontru ruma ou iha abertura formasaun ruma ou iha loron no aktividade importante sira.

“Membrus PNTL ne’ebe maka asesu sira nia koñesementu no referensia barak liutan tanba ne’e ohin hau dehan ba sira katak alienede asesu media sosial sira mos tenke asesu ba media PNTL nian rasik atu nune’e bele enreceza (memperkaya) sira nia koñesementu kona-ba oinsa atu halo sira nia servisu,” afirma Komisariu Faustino.

Fatór balu sai difikuldade ba membrus PNTL sira liu-liu sira ne’ebe maka iha munisipiu difisil atu asesu internet, maibe se ema asesu ba media sosial signifika nia bele asesu ba website PNTL, importante ba membrus sira alinende asesu ba media sira seluk tenke asesu mos media PNTL liu husi manera ne’ebe maka simples hakerek www.pntl.tl .

Media PNTL.    

Dili-Komando Polisia Nasional Timor-Leste (PNTL) la fó toleransia ba nia membrus husi Unidade tranzitu ne’ebe maka simu subornu husi motorista sira ne’ebe maka halo infrasaun kontra Kodigu Estrada no Kodigu Penal.

Asuntu ne’e hateten husi Segundu Komandante Jeral PNTL Komisariu Polisia Faustino da Costa hafoin halo abertura ba Sorumutu konaba Sistema Jestaun Insidente Segunda semana ne’e (11/04/2016). “Komando PNTL sei la fó toleransia ba nia membrus ne’ebe maka simu subornu (envelope ou osan sigaru) tanba hahalok ne’e konsidera krime no wainhira iha membrus balu maka komete maka sei hetan demisaun ou hasai husi Polisia”.

Komisariu Polisia ne’e afirma tan katak, membrus PNTL husi Unidade Tranzitu labele simu subornu no wainhira iha ema ruma maka obriga fó, maka membru PNTL iha obrigasaun atu hato’o katak regras wainhira kontra Kodigu Estrada no Kodigu Penal tenke ba selu iha banku maske ema ne’ebe komete infrasaun dehan laiha tempu, iha obrigasaun ba ema ne’ebe viola regra tenke ba selu iha banku, no wainhira maka la selu iha banku membru Unidade Tranzitu sei halo nota infrasaun.

“ Laiha toleransia ba tilan di tempat fó osan mai ida-idak simu ne’e labele akontese tanba ne’e ho formasaun kona-ba Sistema Jestaun Insidente Modulu Tranzitu no Modulu Patrulha orienta sira, nune’e ba oin Komando lakohi rona tan kazu hanesan ne’e akontese no wainhira akontese maka ema halo keixa ne’e konsidera subornu ne’e krime, konsekuensia pessoal ba membru ne’ebe maka la kumpri orientasaun Komando maka risku bele to’o demisaun ou hasai husi polisia, “ dehan Komisariu Faustino da Costa.

Asidente tráfiku kada fulan aumenta ba beibeik, tanba konsiensia ema ida-idak nian menus no dalaruma ema lori transporte motor ou kareta ho velosidade maka’as, maske Kodigu Estrada define ona katak iha sidade laran halai KM 45 no sai husi sidade velosidade máximu KM 60 maibe ema la kumpri nune’e kada tinan ema ne’ebe mate tanba asidente tráfiku a’as liu kompara ho ema ne’ebe maka mate tanba krime.

Media PNTL.

Dili- Iha primeru trimestre tinan ida ne’e (2016) hahu’u husi fulan Janeru to’o Abril, membru Polisia Nasional Timor-Leste (PNTL) prende ona karreta estadu hamutuk 10 resin ne’ebe maka lao iha fim da semana, hodi hala’o fali aktividade privadu.

Segundu Komandante Jerál PNTL Komisariu Polisia Faustino da Costa, iha Centru Formasaun Polisia Comoro Dili hafoin loke abertura ba workshop kona-ba Sistema Jestaun Insidente, Segunda-feira (11/04) ne’e hateten membru PNTL kontinua halo asaun cek-poin ba sirkulasaun karreta estadu iha loron feriadu. “Iha loron Sabadu no Domingu PNTL halo patrulamentu konjuntu hamutuk ho funsionariu patrimoniu estadu, hodi hare’e no detekta karreta estadu ne’ebe maka hala’o aktividade fora husi oras no loron servisu nian, iha área husi Palasiu do Governu, inklui iha loja no supermerkadu oin” relata Komisariu Faustino da Costa.

Komisariu ne’e akresenta tan katak, aktividade patrullamentu ne’ebe hala’o entre membru PNTL ho funsionariu husi Patrimoniu Estadu nian maka wainhira detekta ona karreta hirak ne’ebe maka viola regra, sei lori hikas ba iha Parte Patrimoniu Estadu atu bele hala prosesu investigasaun

“Hau hanoin fim de semana ida liu ba ne’e, ate horseik Domingo ita prende karreta estadu hamutuk 10 hodi entrega ba funsionariu husi patrimoniu estadu lori ba sira nia edifisiu,” dehan Komisariu Faustino.

Karreta hirak ne’e prende bazeia ba dekretu lei no dekretu governu ne’ebe maka hateten karreta estadu la sirkula iha fim da semana no loron ferias, tanba ne’e wainhira kontra regras ida ne’e maka parte kompotente sei foti medidas hodi prende karreta hirak ne’e. Karreta hirak ne’ebe maka polisia no patrimoniu estadu prende maka husi Ministeriu Agrikultura no Peskas, sekretariu estadu balun nia gabinete, no ministeriu balun.

Media PNTL.

Dili- Atu fasilita servisu iha terrenu ho lais no fasil, Incident Management System (IMS) ou Sistema Jestaun Insidente, kapasita membru Polisia Nasional Timor-Leste (PNTL) Unidade Tranzitu Rodoviariu hodi hala’o sorumutu kona-ba servisu informasaun nian.

Segundu Komandante Jerál PNTL Komisariu Polisia Faustino da Costa ne’ebe ofisialmente halo abertura ba sorumutu ne’e, enkoraja ba partisipante sira atu bele aproveita oportunidade ne’e ho diak nune’e bele implementa iha servisu loron-loron nian hodi aktualiza informasaun ho lolos. “Liu husi sorumutu ne’ebe maka hala’o, bele fasilita membrus PNTL liu-liu Unidade Tranzitu Rodoviariu atu pasa informasaun ne’ebe lolos hodi akumula dadus kona-ba asidente ne’ebe maka akontese atu nune’e hetan dadus ne’ebe fiksu”,hateten Komisariu Polisia Faustino da Costa hafoin abertura, iha Centru Formasaun Polisia Comoro, Dili, Segunda-feira ne’e (11/04).

Nia informa tan katak, liu husi dadus ne’ebe maka rekolla no relata kona-ba rezultadu no observasaun asidente ne’ebe maka akontese nune’e sai hanesan referensia ba Komando atu oinsa hare’e kona-ba estratéjia no atividades saida maka presija hare’e no ho akontesimentu hirak ne’ebe maka iha.

Iha fatin hanesan Komandante Centru Formasaun Polisia (CFP) Superintendente Arquimino Ramos hateten Sorumutu ne’e nu’udár parte dezenvolvimentu rekursu umanus bazeia ba dezenvolvimentu informasaun teknolojia ohin loron nian nune’e formasaun kona-ba IMS importante atu fasilita servisu membrus PNTL loron-loron nian iha terrenu.

Nia akresenta tan katak sorumutu ne’e hala’o tanba CFP servisu hamutuk ho Timor-Leste Police Development Program (TLPDP) hodi fó formasaun ba membrus PNTL hotu atu bele atinji planu estratéjiku PNTL 2014-2018.

Sorumutu ho tema Sistema Jestaun Insidente Modulu Tranzitu no Modulu Patrulha ne’e alem de loke husi Segundu Komandante Jeral PNTL Komisariu Polisia Faustino da Costa no akompaña husi Komandante CFP Superintendente Arquimino Ramos partisipa mós Xefe Operasaun TLPDP Shane Baker no hetan partisipasaun husi membru PNTL husi Komando Munisipiu Manatuto, Baucau, Viqueque, Lautem, Liquica no Dili.

Tuir planu ne’ebe maka iha Sorumutu ne’e fahe ba klase rua, klase primeru hahu’u iha Segunda-feira (11 to’o 15 Abril) no klase segundu sei hahu’u iha loron 18 to’o 22 Abril tinan 2016.

Media PNTL.

Dili-Polisia Nasional Timor-Leste (PNTL) sei halo operasaun ba organizasaun artemarsiais tanba durante ne’e balun kontinua treinu subar.

Komandante Polisia Nasional Timor-Leste Komisariu Julio da Costa Hornay hatete, buka hela autor sira ne’ebe halo treinu subar-subar tanba ne’e inplementa rejolusaun governu nian.

“Ita sei halo operasaun ba organizasaun artemarsiais sira tanba durante ne’e balun kontinua treinu subar ihabairu laran ,” esplika Julio ba jornalista sira iha palasiu Prezidente Republika Aitarak Laran Dili, horsehik.

Julio informa sira ne’ebe kaer entrega ba iha Ministeriu Publiku (MP) para atu halo prosesu.

“Parlamentu Nasional (PN) diskumfia katak involve mos husi membru PNTL tenke temi nia naran ohin kedas hau loke prosesu, labele dehan deskunfia, ita deskunfia deit ne’e ema rihun haat bainhira maka ita identifika suspeitu se loos ne’ebe husu ba komunidade ou se de’it mak hatene informasaun si A ou si B husi kompañia ou distritu ne’ebe mai iha gabinete Komandante Jeral para loke prosesu,” tenik nia.

Nia realsa durante ne’e komunidade sira fo informasaun kona ba organizasaun artemarsiais menus liu ne’e duni husu komunidade sira hotu para atu asegura rai ida ne’e ho attitudes ou problema kiik ne’ebe akontese ba suspeitu sira bele informa ba PNTL para bolu nia atu investiga, karik nia sala eduka para labele halo beibeik, tanba povu hotu hakarak presiza páz no dame iha ambiente ne’ebe saúdavel.

Entertantu, nia dehan, agora daudaun Polisia Nasional Timor-Leste(PNTL) buka autor ne’ebe hana ema, tanba ne’e presiza tempu atu kaer ema refere.

Fonte: INDEPENDENTE, edisaun Sesta 08 Abril 2016

Prezidente Republika Taur Matan Ruak kontinua orienta Polisia Nasional Timor-Leste (PNTL) atu hametin seguransa iha rai laran

“Xefe estadu sempre fo orientasaun katak ita mantein seguransa ne’ebe diak forte ba ita nia povu no ita nia nasaun par abele hakmatek I opovu bele moris iha ambiente ida hakmaek nian,” Komisariu PNTL Julio da Costa Hornay haktuir ba jornalista sira iha Palasiu prezidensial hafoin enkontru ho xefe estadu iha bairo-pite, Kinta (07/04).

Durante enkontru ho xefe estadu, Komandante Jeral akompaña husi segundu Komandante Jeral PNTL, Komisariu Faustino da Costa hato’o situasaun seguransa rai laran ba xefe estadu.

Komandante Jeral hateten situasaun rai laran atu lao diak presija ema hotu nia kontribuisaun hodi nune’e bele garantia nafatin paz no estabilidade iha rai laran.

Iha parte seluk Komandante Jeral Polisia Nasional Timor-Leste (PNTL), Komisariu Julio Hornay hateten Polisia kontinua buka tuir kriminozu sira ne’ebe hana no sona malu iha Dili laran.

“ami buka hela informasaun, ami komesa detekta ona I ami sei buka namanas hela, ita hein tempu,” dehan nia.

Durante ne’e problema ne’ebe akontese iha capital Dili barak ona mak kona-ba hana malu no sona malu sai prekupasaun ba ema hotu.

Tanba ne’e PNTL hanesan instituisaun ne’ebe garante seguransa iha rai laran tenke halo esforsu makaae hodi nune’e bele asegura estabilidade iha rai laran.

“Suspeitu sira ne’e bele informa mai polisia para ita bolu nia mai investiga karik nia sala ita eduka para nia labele halo beibeik tanba ita hotu, povu tomak moris iha paz no dame iha ambiente ne’ebe saudavel,’ dehan nia.

Komandante Jeral husu ba populasaun tomak karik iha joven balun mak kria problema iha rai laran presiza informa ba PNTL hodi nune’e polisia bele foti mediodas ba ema sira ne’e.

Fonte: Timorpost, edisaun Sesta 08 ABRIL 2016

Dili, quarta feira ne’e (06/04/2016) Komandante husi munisipiu 13 ensera sira nia Kursu Ezekutivu nian kona-ba Sistema Jestaun Insidente ne’ebe hala’o iha Sentru Akademia Polisia Comoro durante loron tolu, hahu iha loron 04-06 fulan Abril tinan 2016.

Kursu ezekutivu ne’ebe hala’o husi parte IMS ba Komandante 13 munispiu ne’e, ho nia objetivu atu bele kapasita Komandante sira husi munisipiu nune’e bele orienta no halo kontrolu servisu ba mebru sira iha idak-idak nia munisipiu.

Komandante Munisipiu Baucau, Superintendente Justino Meneze ne’ebe reprezenta partisipantes sira hateten, kursu ne’e iha ninia progresu diak tebes maske hala’o deit iha loron tolu nia laran. “Primeiru, reprezenta kolega sira ne’ebe partisipa iha sorumutu ne’e, hakarak agradese ba Komando Jerál aumesmo tempo ita nia parseiru dezenvolvimentu TLPDP nia tulun ba programa ne’e bele realiza hodi kapasita ba ami Komandante sira, atu oinsa bele hatene kontrolu diak liu aktividade sira ne’ebe importansia servisu polísia ninian”.

Tuir Superintendente Justino Menezes, ho sorumutu ne’e parte partisipantes sira durante loron tolu ne’e hetan progresu positive tebes, tanba sorumutu ne’e koalia kona-ba kontrolu liu-liu servisu investigasaun, servsiu patrullamentu, servisu tránzitu ninia no iha tempo hanesan bele hare regulamentu disiplina liu husi metodu ne’ebe maka hetan durante sorumutu nian, karik iha membru sira ne’ebe hetan medidas Indisiplinar.

“Ita bele hare maske ami iha kada idak-idak nia munisipiu, ami bele hare munispiu seluk to’o mai iha Nasional realidade progresu ita nia membru, seksaun no departamentu sira nia servisu, liu-liu kazu kriminalidade, asidente tráfiku ita bele hare nia totalidade ne’e hira”, relata Komandante Munisipiu Baucau.

Tuir partisipante sira ne’ebe partisipa iha aktividade ne’e, relata ho sorumutu kona-ba Sistema Jestaun Insidente progresu seluk ne’ebe maka sira hetan maka sira bele hatene aktividade membru PNTL iha kada munisipiu ne’ebe maka la hala’o sira nia servisu maske la relata iha kada relatoriu ne’ebe maka aprezenta ba iha kada Komandante Munisipiu.

Partisipantes sira mós hato’o rekomendasaun relasiona ho sorumutu kona-ba Sistema Jestaun Insidente ne’e, “Atu formasaun ida ne’e bele espesífiku liu iha munisipiu, iha sup-seksaun ida ne’ebe mak nomea ka forma husi Komando Munisipiu, sira propriu ba kursu ida para sira mós bele hatene liu ba iha area ida ne’e nune’e sira bele servisu iha oras 24 nia laran” hateten Komandante Munisipiu Baucau.

Entretantu iha fatin hanesan, Segundu Komandante Jerál PNTL Komisariu Polísia Faustino da Costa iha niani diskursu ba enseramentu ne’e agradese ba Komandante husi Munisipiu sira ne’ebe maka durante lorn tolu partisipa iha sorumutu ne’e hodi nune’e wanhira fila ba idak-idak ninia munisipiu bele fahe fali koesimentu sira ne’e ba iha membru iha terenu.

Tanba tuir Komisariu Polísia Faustino da Costa katak, Planu Estratéjiku PNTL nian ba tinan 2014-2018 koalia mós kona-ba area Administrasaun nune’e ho sorumutu ida ne’e bele implementa no exekuta Planu Estratéjiku 2011-2030 ne’ebe hakerek to’o iha tinan 2030 Polísia Nasional Timor Leste iha ona koñesimentu ida ne’ebe diak no uja ekipamentus ne’ebe adekuadu no modernu.

Seromonia enseramentu ne’e, marka mós prezensa husi Parseiru Dezenvolvimentu TLPDP, Komandante Interinu Centro Formação Polísia (CFP) no partisipantes ne’ebe mai husi Komandante Munisipiu 13. Rohan husi serimonia ne’e, maka hasai foto hamutuk entre partisipantes sorumutu ho Segundo Komandante Jerál akompaña husi Komandante CFP.

Media PNTL.

Dili, segunda-feira (04/04/2016) Komandante Jerál PNTL Komisariu Polisia Julio da Costa Hornay ho segundu Komandante Jerál Komisariu Polisia Faustino da Costa entrega direktamente motorizada hamutuk atus lima sianulu resin lima (259) ba Ofisial Polisia Suku (OPS).

Komisariu Polisia Julio da Costa Hornay ne’ebe entrega direktamente xave no motor inklui dokumentus motorizada hateten, viatura hirak ne’ebe sosa ho orsamentu governu nian husu atu Ofisiais sira ne’ebe simu motorizada atu bele utiliza tuir nesesidade servisu ninia iha terrenu.

“Ohin ita nia Ministru Interior hato’o mai hau, atu hato’o ba imi katak viatura ka transporte motorizada sira ne’ebe maka governu fó mai ita, utiliza tuir nesesidade servisu ne’ebe maka ita bo’ot sira iha no ho komprimisiu ne’ebe orsida ita bo’ot sira sei halo, husu atu bele utiliza motorizada hirak ne’e ba servisu tuir idak-idak nia nesesidade,” hateten Komandante Jerál Julio da Costa Hornay iha ninia diskursu ba membru OPS sira.

Komandante Jerál PNTL ne’e mós afirma katak planu sosa motorizada hirak ne’e tanba hetan konkordansia entre governu ho Komando nian kona-ba nesesidade servisu OPS nian iha baze.

Komisariu Polisia ne’e mós hato’o ba membru OPS sira katak, “Politika ida ne’ebe maka governu konkorda ho ideas Komando Jerál nian, hau husu para atu bele asegura ho didiak, implementa halo didiak, labele viola fali”.

Komisariu Julio da Costa Hornay hateten, razaun Komando nian hodi halo planu sosa motorizada ba OPS tanba wainhira hala’o visita ba distritu 13 hafoin simu mandatu, problema ne’ebe maka administrador distritu, xefe suku, apresenta ba iha Komandante Jerál maka apoio transporte.

“Ho razaun hirak ne’e maka Komando debate no desidi atu koloka orsamentu ba nesesidade ida ne’e, ita imoplementa, tanba Polisia Komunitariu sai prioridade ida iha area tolu ne’ebe maka governu ezije ba Instituisaun PNTL, primeiru Polisia Komunitariu, segundu fronteiras, terseiru Marítima inlkui mós tranzitu rodoviáriu”, afirma Komandante Jerál PNTL.

Total viaturas ne’ebe maka fahe iha serimonia ne’e hamutuk: 259 motorizada, karreta 4, karreta ambulansia 1, karreta emergensia 1 no karreta hilux 2. Tuir planu husi Komando Jerál nia katak iha futuru sei fahe tan radio komunikasaun no laptop hodi bele kompleta servisu iha terrenu.

Serimonia distribuisaun motorizada ba OPS ne’e antes fahe, hetan mós bensaun husi amo Kapelaun PNTL, amo Nelinho Américo.

Media PNTL.  

Dili- Iha selebrasaun Festa Paskoa tinan 2016 ne’e iha asidente trafiku lima maka akontese iha kapital Dili nian la inklui Munisípiu sira.

“Hau la mensiona konaba Munisípiu sira maibe iha kapital Dili asidente lima maka akontese no nain tolu maka grave,” dehan segundu Komandante PNTL, Komisariu Faustino da Costa ba Jornalista iha Sentru Treinamentu polísia Komoro, Segunda (28/3).

Nia hatutan entre kazu lima ne’e nain tolu maka todan balun ain tohar no liman tohar, no lori halai ba halo tratamentu iha Hospital Nasional Guido Valadares (HNGV), asidenti sira ne’e motorizada deit.

Iha fatin hanesan liu husi deskursu Komandante Jeral PNTL Komisariu Julio da Costa Hornay dehan, asidente rodoviáriu iha tinan 2015 total ema nain 89 maka mate, kanek todan nain 437, no kanek kamaan 1.399.

“Tuir dadus ne’ebe maka ita iha total asidente 1.664 husi asidente ne’e mate nain 89 iha tinan 2015. Ne’e kauza hόsi hahalok ema nian, ” dehan Julio liu husi nia deskursu ba aniversariu PNTL dala 16.

Nia hatutan, atu reduz numeru asidenti ne’e tinan 2016 Komando PNTL sei hasae volume operasaun cek point, ba sirkulasaun viaturas públiku, privadu no governu ne’ebe maka utiliza veikúlus la tuir lei kodigu Estrada nian, tantu iha kapital no munisipíu.

Fonte Timor Post edisaun Kinta 31 Marsu 2016.