Uncategorized

Komando Jeral Polisia Nasional Timor-Leste (PNTL) Prontu Simu kritikas husi Sosiedade Sivil atu nune’e bele Dezemvolve instituisaun Seguransa ne’e sai diak liutan iha futuru.

Komandante Jeral PNTL Komisariu Julio da Costa Hornay hateten ita ema la perfeitu sempre iha failansu tantu konsiente no la konsiente sempre akontese maibe ita labele fo avalia ba ita nia aan ema seluk maka bele hadia ita no fo hanoin ba ita katak ida ne’e sala no ida ne’e diak tanba ne’e maka sosiedade sivil iha, Nia hato’o kestaun ne’e wainhira partisipa Retiru Avaliasaun servisu PNTL loron rua Sexta (11/12) iha Centru Formasaun Polisia Comoro, Dili.

Nia informatan katak Kritikasa barak maibe PNTL hamrik metin nafatin hodi servi povu no nasaun atu nune’e seguransa metin no dezenvolvimentu bele lao tanba ne’e husu ba komandante sira hotu atu labele alergi kritikas tanba kritikas ne’e normal ho objetivu atu hadia tanba nudar ema la perfeitu sempre halo sala barak maibe halo diak mos barak maske dalabarak ema sempre kritika ida sala ne’e .

Iha okajiaun ne’e komandante Jeral agradese ba Fundasaun Mahein ne’ebe maka halao aprezentasaun konaba “Prespetiva Sosiedade Sivil Ba Inplementasaun Politika Dezenvolvimentu Vizivilidade Involvimentu no Profesionalismu (VIP) iha instituisaun PNTL hodi aprezenta suksesu no obtaklu ne’ebe maka PNTL hasoru iha servisu lor-loron nian nomos aprezenta imajen no video konaba atuasaun ne’ebe maka uza forsa no la tuir regras nune’e bele fo hanoin fila-fali ba PNTL katak failansu ida rua sei akontese iha terrenu no presija atu hadia.

“ Kritikus hirak ne’e konstrutivu teb-tebes no ami prontu atu simu no ita hamutuk oinsa atu hadia nune’e sai diak liutan. Maske PNTL iha ona tinan 15 maibe sempre iha problema tanba ne’e liu husi retiru ida ne’e hanesan reflesaun ida ba membru PNTL konaba servisu no atuasaun ne’ebe maka halao karik la tuir regras no lei presiza hadia failansu ne’e iha ne’ebe no suksesu ne’e iha ne’ebe nune’e bele kontinua hadia,” dehan komisariu Hornay.

Fundasaun Mahein nia servisu diak no inportante ba PNTL tanba sira ativu kritika, fo ideia no fo hanoin ba PNTL .

Retiru ho tema “Ho fe esperansa no Karidade ita bele inmplementa Diak liutan Vizivilide Involvimentu no Profesionalismu Servisu Hodi hametin Konfiansa husi Komunidade halao durante loron tolu (10-12 Dezembru 2015) iha Centru Formasaun Polisia no partisipa husi komandante munisipiu 13, director departamentu, Komandante Unidade, Komandante Distritais no ofisiais superior sira ne’ebe maka partisipa ativu iha diskusaun ne’e hodi fo ideaias, kritikas no perguntas. Media PNTL

Dili– Polisia Nasional Timor Leste (PNTL) hala’o retiru hodi halo avaliasaun ba servisu PNTL nian durante tinan 2015, liu husi retiru ne’e bele hadi’a di’ak liu tan kualidade servisu hodi garante seguransa ba povu.

Iha abertura ba retiru ne’e, Komandante Administrasaun PNTL, Superintendente Xefe Mateus Fernandes hateten retiru avaliasaun servisu ne’ebe maka halao importante tebes atu fo motivasaun ba PNTL hodi haree fila-fali saida maka la’o ona durante tinan 2015, erru no problema saida mak sei hasoru, buat sira ne’e hotu sai hanesan prosesu ida atu nune’e prepara ofisial superior sira bele sai servidor ida diak ba instituisaun no povu Timor-Leste.

“Intensaun husi reflesaun ne’e atu bele iha diskusaun, sujestaun no rekomendasaun hodi bele hamosu espiritu foun, prespetiva foun no konsistensia foun hodi haree fila-fali iha tinan 2016 problema sira ne’e bele rezolve no servisu hamutuk ho integradu no koletivu nune’e bele atinji mehi instituisaun PNTL nian ho susesu,” haktuir Sup. Xefe Mateus Fernandes iha abertura retiru iha Centru Formasaun ba Polisia Comoro, Dili, loron Kinta (10/12/2015).

Komandante Administrasaun ne’e hatutan, durante iha servisu lor-loron nian PNTL sempre hasoru dezafiu no problema oi-oin ne’ebe sai hanesan kolega ida hodi motiva no dudu ita, dezafiu no problema hirak ne’e nuudar prosesu ida halo ita sai maduru liu tan hodi lidera Departamentu, Unidade no Distritu ho diak no kredibel tuir prespetiva povu nian.

Retiru ne’e ho tema “Ho Fé Esperansa no Karidade Ita Bele Implementa Diak liu tan Vizibilidade Involvimentu no Profesionalismu Servisu Hodi hametin Konfiansa husi Komunidade”.

Molok hala’o retiru ne’e, hahu uluk misa iha Kapela PNTL ne’ebe dirije husi Amo Kapelaun PNTL, Pe. Nelinho Soares, no retiru ne’e sei hala’o durante loron tolu (10-12 Dezembru 2015) iha Centru Formasaun ba Polisia ne’ebe sei taka ho misa.

Retiru ne’e hetan partisipasaun husi Komandante Operasaun Nasional, Komandante Munisipiu 12 no Rejiaun Espesial Oe-Cusse, Komandante husi kada Unidade, Departamentu, Seksaun, no Ofisiais Superior sira. Média PNTL.

Dili– Ema deskoñesidu tuda no estraga komunidade nia kioske iha área Pantai Kelapa. Polisia Nasional Timor Leste (PNTL) sei hala’o hela investigasaun hodi buka tuir suspeitu.

Komandante Jerál PNTL, Komisariu Julio da Costa Hornay dehan, kazu ne’e akontese iha semana kotuk, iha ema deskoñesidu tuda no estraga komunidade nia kioske. Kazu ne’e sei iha hela investigasaun nia laran.

“Ita simu informasaun ne’e kioske ida maibe ita nia Servisu Investigasaun Kriminal sei buka informasaun. Karik sei iha tan depois investigasaun mak hatene,” dehan Julio ba jornalista sira iha Kuartel Jeral PNTL Caicoli, Kuarta (09/12).

Nia hatutan, informasaun ne’e katak grupu artemarsiais mak halo problema hodi estraga kioske sira ne’e, maibe atu detallu liu depois rezultadu investigasaun mak foin hatene loos.

“Ita nia polisia sira sei buka hela suspeitu. Tamba ita seidauk kaptura ema ruma iha akontesimentu ne’e,” dehan Julio.

Nia hatutan, problema ba Polisia mak falta de kooperasaun husi komunidade sira hodi bele fo hatene paradeiru ema ne’ebe mak halo problema, tamba ne’e mak polisia la kaptura suspeitu sira ne’e.

“Ita sempre tun ba fatin akontesimentu ita nia inan aman sira nunka fo hatene ema ne’ebe mak halo problema. Sira sempre dehan lahatene ema bairu seluk mak mai halo problema,” dehan Julio.

Antes ne’e mos Xefe Estadu Maior Jeneral F-FDTL, Major Jeneral Lere Anan Timur dehan, oras ne’e mosu tuda malu barak ona iha Dili laran, liu-liu iha área Pantai Kelapa besik Ministru Defeza nia uma oin.

“Ami fila mak foin haree sira. Tamba sira kalan sempre tuda malu hela deit,” dehan Lere iha Baucau Sabadu (05/12).

Akontesimentu tuda malu entre joven mak harahun mos komunidade sira nia kioske ne’e akontese iha Sesta (04/12). Fonte: Timor Post Edisaun Kinta (10/12/2015).

Dili– Komandu Polisia Nasional Timor Leste (PNTL) alerta másimu iha área fronteira rai maran no tasi hodi antisipa ba informasaun ne’ebe mak mosu katak ISIS komesa tama ona iha Indonezia, hodi labele tama mai Timor-Leste.

Komandante Jerál PNTL, Komisariu Julio da Costa Hornay dehan, antisipasaun ba informasaun ne’e PNTL halo ona, atu asegura nasaun ne’e husi grupu ISIS nian, ne’ebe mak tuir informasaun tama ona iha nasaun viziñu.

“Antisipasaun ita halo hela hodi hala’o vizilánsia iha fatin-fatin entrada, terrestre nian Batugade, Suai, Oe-Cusse no iha fatin ne’ebe make ma estranjeiru sira tama sai portu, aeroportu ita koloka intelijensia sira iha ne’eba,” dehan Julio ba jornalista sira iha Kuartel Jeral PNTL, Caicoli, Kuarta (09/12).

Nia hatutan, instituisaun mos husu nafatin apoiu husi komunidad, emprezariu no ema hotu ne’ebe mak moris iha nasaun ida ne’e fo informasaun karik diskonfia ema foun ruma iha sira nia bairo nune’e Polisia bele lalais ba atua.

“Ita bele buka hatene ema estranjeiru ne’e ninia nasionalidade husi ne’ebe nia mai atu halo saida, turista ka emprezariu. Ne’e para ita bele halo prevensaun ita organiza ona ida ne’e,” Julio esplika.

Nia esplika liu tan, ISIS ne’e tama ga la tama presija halo antisipasaun tamba informasaun, husi nasaun viziñu hanesan ne’e, Timor Leste hanesan nasaun soberanu ida PNTL tenke alerta para informasaun ne’e labele akontese iha nasaun ida ne’e nia laran. Fonte: Timor Post Edisaun Kinta 10 Dezembru 2015.

Dili– Ofisiais Superior na’in 7 (hitu) Polisia Nasional Timor Leste (PNTL) halo aprezentasaun kona-ba rezultadu estudu komparativu kona-ba polisia komunitaria ne’ebe sira hala’o iha Japaun no Indonesia ba Komando jeral PNTL iha Salaun konferensia Kuartel Jeral PNTL, Caicoli-Dili, loron Kinta (03/12/2015).

Ofisiais superior na’in 7 ne’e ba Japaun no Indonesia durante semana rua hahú husi loron 10 to’o 25 Setembru 2015, ne’ebe tuir ajenda iha Japaun husi 10-20 Setembru, no iha Indonesia husi loron 20-25 Setembru ne’ebe hetan apoiu husi Governu Japaun liu husi JICA iha Timor Leste.

Xefe Departamentu Polisia Komunitaria Nasional Superintendente Assistente Boavida Ribeiro hateten, objetivu husi Estudu Komparativu ne’e, atu ofisiais superior sir abele aumenta tan sira nia esperiensia iha area estratejia no operasaun polisia komunitaria nian.

Ofisiais Superior ne’ebe mak ba hala’o estudu komparativu iha Japaun no Indonesia mak hanesan Superintendente Xefe Armando Monteiro atual Komandante PNTL Munisipiu Bobonaro, Superintendente Marcos Sequeira atual Komandante PNTL Munisipiu Lautem, Superintendente Jorge N.A. Monteiro atual Komandante PNTL Munisipiu Manufahi, Superintendente Damião Pereira atual Komandante PNTL Munisipiu Aileu, Superintendente Assistente Euclides Belo atual Adjunto Komandante PNTL Munisipiu Dili, Superintendente Assistente Eduardo Campos atual Adjunto Komandante PNTL Munisipiu Liquica, no SUperintendente Assistente João Sancho Pires atual Komandante Unidade Patrullamentu Fronteira (UPF).

Tuir Reprezentante ofisiais superior PNTL ne’ebe ba hala’o estudu komparativu iha Japaun no Indoensia, Superintendente Xefe Armando Monteiro hateten, liu husi estudu komparativu ne’e sir abele halo komparasaun entre PNTL ho polisia Japaun no Indonesia hodi oinsa atu dezenvolve diak liu tan PNTL iha futuru liu-liu iha área estratejia no operasaun polisia komunitaria nian.

Entertantu, rekomendasaun ne’ebe mak ofisiais superior sira hato’o ba komando jeral atu haree mak hanesan presija kria deskrisaun ba sentru komunikasaun no sentru operasaun, moderniza sistema atendimentu komunidade no responde situasaun emerjensia, presija kria kondisaun hodi fo atendimentu ba komunidade, presija apoiu subsidiu ba familia ba implementasaun programa polisia komunitaria, kria uniformizasaun formatu ba atividade polisia komunitaria, presija apoiu ekipamentu seguransa pesoal no mobiliariu ba membru polisia komunitaria, no kontinua kapasita rekursu umanu avansadu no espesial.

Aliende ne’e, iha mos Ofisial Polisia Suku (OPS) hamutuk nain 30 (tolunulu) feto nain 2 no mane nain 28 ne’ebe reprezenta husi Munisipiu 13 hala’o mos estudu komparativu iha Indonesia (Denpasar Bali no Makasar Sulawesi) kona-ba sistema servisu OPS nian.

OPS na’in 30 ne’e ba Indonesia durante semana ida, husi loron 22-28 Novembru 2015.

Entertantu, Komandante Jeral PNTL Komisariu Julio da Costa Hornay agradese ba apoiu ne’ebe mak Governu Japaun liu husi JICA iha Timor Leste fo ba PNTL liu-liu iha area polisia komunitaria atu oinsa bele dezenvolve liu tan servisu polisia komunitaria nian iha Timor Leste.

“Agradese mos ba ofisiais superior no OPS sira ne’ebe mak ba halo estudu komparativu iha Japaun no Indonesia, iha ona rekomendasaun barak ne’ebe mak ohin hato’o, tamba ne’e husu ba Xefe Departamentu Polisia Komunitaria Nasional atu bele tuur hamutuk ho ofisiais superior sira atu bele haree PNTL presija adopta sistema ida ne’ebe mak diak,” afirma Komisariu Hornay.

Iha aprezentasaun rezultadu estudu komparativu ne’e, Komandante Jeral fahe mos sertifikadu ba ofisiais superior no OPS sira ne’ebe mak ba tuir estudu komparativu iha Japaun no Indonesia.

Partisipante ne’ebe partisipa iha aprezentasaun rezultadu estudu komparativu ne’e mak ofisiais superior komando jeral, reprezentante Embaxador Japaun iha Timor Leste, ekipa JICA no membru Polisia Komunitaria. Média PNTL.

Díli– Polisia Nasional Timor Leste (PNTL) no Falintil Forsa Defeza Timor Leste (F-FDTL) hala’o limpeza jeral kapita Dili hodi objetivu atu sidade bele mos no saudavel.

Xefe Estadu Maior F-FDTL, Maijor General Lere Anan Timur hateten, inisiativa husi limpeza ne’e mai husi Komandante Jeral PNTL Komisariu Julio Hornay atu PNTL ho F-FDTL halao servisu hamutuk hodi halo limpeza iha sidade Dili, nune’e mos bele hanorin komunidade sira atu bele halo limpeza la’os governu tenke selu mak limpeza.

“Instituisaun rua ne’e sai hanesan familia ida deit, tamba ne’e mak ita halo opersaun iha ne’ebe deit sempre hamutuk, ohin ita hamutuk iha ne’e halo limpeza, limpeza la’os iha area ita nia deit maibe ba komunidade tomak, tamba ne’e agora imi sai ba hodi limpeza no hanorin mos ita nia komunidade no juventude sira atu sira bele halo limpeza, tamba ema malae mai hanorin ita sala, atu halo limpeza iha ita nia uma oin deit tenke selu $3, ne’e labele,” afirma Major General Lere iha formatura Kuartel Jeral F-FDTL Fatuhada Dili, loron Sesta (04/12/2015).

Iha parte seluk, Komandante Jerál PNTL Komisariu Julio da Costa Hornay hateten, PNTL-F-FDTL halao limpeza hamutuk atu nune’e sidade Dili bele mos no saudavel, nune’e mos kria amizade no harii unidadade entre instituisaun 2 PNTl-F-FDTL.

Área ne’ebe PNTL ho F-FDTL halo limpeza mak hanesan iha Bindau Sta.Ana, Aitarak laran, Kampu Alor.

Entertantu tuir observasaun media PNTL katak, PNTL ho F-FDTL hala’o limpeza iha area ne’ebe determinadu, no komunidade sira mos ajuda hodi halo limpeza. Média PNTL.

Oe-Cusse- Komando Seguransa Konjunta ne’ebe kompostu husi Polisia Nasional Timor Leste (PNTL) no Falintil Forsa Defeza Timor Leste (F-FDTL) agradese ba komunidade Oe-Cusse tomak nomos ba partisipante sira hotu ne’ebe mak ba partisipa iha serimonia komemorasaun tinan 500 Portuges tama Timor Leste no Loron Proklamasaun Independensia ba dala-40 iha Oe-Cusse tamba situasaun hakmatek laiha problema mak mosu.

Komandante Komando Seguransa Konjunta F-FDTL, Capitão Tenente Adão Pinto hateten, forsa segurasna konjunta fo agradese boot ba partisipasaun maximu husi komunidde rejiaun Oe-Cusse tamba sira sente katak serimonia ne’e sira nian, ho nune’e komunidade fo sira nia kontribuisaun hodi asegura seguransa.

“Forsa segurasna konjunta fo agradese boot ba partisipasaun máximu husi komunidde rejiaun Oe-Cusse tamba sira sente katak serimonia ne’e sira nian, nuudar sidadaun sira fo kontribuisaun makaas ba prosesu tomak atu selebra eventu nasional rua ne’e nuudar parte pozitivu ne’ebe maka Oe-Cusse iha,” tenik Capitão Tenente Adão Pinto.

Iha fatin hanesan, Komandante Komando Seguransa Konjunta PNTL, Superintendente Arnaldo de Castro Araujo agradese ba F-FDTL nomos ba PNTL husi Nasional ne’ebe fo apoiu ba PNTL hodi bele asegura seguransa ba eventu nasional ne’e ho di’ak.

“Agradese tebes ba forsa seguransa konjunta sira nia apoiu ba PNTL rejiun Oe-Cusse tamba la ho sira nia apoiu susar atu alkansa objetivu ba iha eventu nasional rua ne’e,” afirma Komandante Arnaldo.

Komandante Komando PNTL Oe-Cusse ne’e sente orgullu no kontente tamba eventu importante rua ne’e la’o ho di’ak no susesu.

“Nuudar uma nain sente orgulu teb-tebes tamba eventu rua ne’e la’o ho diak ho apoiu seguransa husi F-FDTL hodi asegura seguansa iha rejiaun Oe-Cusse, esforsu ne’ebe maka forsa seguransa sira halao agradese tebes ba sira nia sakrifisiu no esforsu hotu hodi mantein seguransa iha eventu ne’e”. Média PNTL.

Dili– Ministru Interior (MI) Longuinhos Monteiro fo ona orientasaun ba Komandante Jeral Polisia Nasional Timor-Leste (PNTL), Komisariu Julio da Costa Hornay hodi bele foti medidas forte ba membru Korpu Seguransa Pessoal (CSP) ho naran inisial JV ne’ebe maka ta’a katuas Mario Soares (64).

Ministru Longuinhos Monteiro dehan, problema ne’e Komandante Jeral hato’o ona ba nia, tanba ne’e maka nia fo ona orientasaun ba komando hodi bele foti medidas forte ba membru ne’ebe maka halo agresaun fiziku ba komunidade.

“Ida ne’e kestaun Komandu iha jestaun disiplinar. Politika klaru ita sobrevivensia atividades ne’ebe maka komandu halao Komandante Jeral mos informa ona mai ha’u kona-ba situasaun ida ne’e. Ha’u fo orientasdaun tenke foti medidas forte karik kazu ne’e justifika klaru ninia intervensaun ne’e lori individu, privadu ka lori kompaña nia naran ne’e tenke halo investigasau,”dehan eis komandante jeral ne’e ba jornalista iha Parlamentu Nasional, kuarta (02/12).

Nia hatutan, fiar katak komando halao hela investigasaun profunda kona-ba kazu refere.

Iha fatin hanesan, Deputadu husi bankada Frenti Revolusionariu Timor-Leste Independente (FRETILIN), Eladio Faculto dehan, bainhira haree maka situasaun normal hela maka ba ta’a deit ema ne’e labele, ne’e krime tenke halo investigasaun para hatene lolos kazu ne’e nia kauza saida.

“Ita labele nonok ba aktu ne’e. Ita tenke halo investigasaun profunda ba kazu ne’e hodi bele hatene loloos kauza kazu ne’e nian,” dehan Faculto.

Parte seluk Komandante Jeral PNTL Komisariu Julio da Costa Hornay informa, kazu membru PNTL husi CSP baku katuas Mario Soares ne’e prosesu investigasaun la’o hela.

“Sira mai iha ne’e ha’u hatun ona despaixu hodi loke prosesu. Ita sei haree husi vitima, sasin no suspeitu to’o tiha ne’eba maka ita haree nia konkluzaun lolos,” dehan Julio iha Kuarte Jeral PNTL Kuarta (02/12).

Nia hatutan buat hotu labele foti medidas de’it maibe tenke haree tuir prosedimentu legal nian foin bele kondena ema ne’e sala ka loos, hein rezultadu investigasaun maka bele kastigu nia. Fonte: Timor Post, Edisaun Kinta 03 Dezembru 2015.

Oe-Cusse– Durante serimonia komemorasaun tinan 500 interasaun entre sivilizasaun 2 Portugal ho Timor Leste, no Loron Proklamasaun Independensia ba dala-40 ne’ebe komemora iha Oe-Cusse, serimonia la’o ho diak tamba laiha problema ida ne’ebe mak akontese.

Komandante Komando Seguransa Konjunta F-FDTL, Capitão Tenente Adão Pinto hateten durante loron hirak nia laran antes de serimonia no depois de serimonia laiha problema ida maka akontese katak buat hotu lao diak no komemorasaun proklamasaun Independensia 28 Novembru no tinan 500 evanjelizasaun lao ho susesu.

“Durante preparasaun seguransa hahu loron 19 to’o 28 fulan Novembru, serimonia lao ho diak no parte seguransa la hetan obstaklu ruma ne’ebe maka fo ameasa ba eventu boot rua ne’ebe maka halao iha loron 27 no 28, ne’e avaliasaun komandu konjuntu nian,” afirma Capitão Tenente Adão Pinto.

Iha fatin hanesan, Komandante Komando Seguransa Konjunta PNTL, Superintendente Arnaldo de Castro Araujo asegura seguransa ba serimonia boot 2 ne’e involve mos F-FDTL tamba forsa 2 ne’ebe mak ejisti iha Timor Leste sempre fo apoiu ba malu, nomos hetan Diretiva husi Komandante Jeral PNTL no Xefe Estado Maior F-FDTL atu orienta forsa 2 ne’e bele asegura seguransa ba eventu ne’e.

“Eventu nasional rua ne’e involve forsa ne’ebe maka ejisti iha dever atu aegura seguransa ba eventu inportante rua ne’e, ami simu Diretiva ida ne’ebe maka asinadu husi Komandante Jeral F-FDTL no Komandante Jeral PNTL fo mai ami nain rua atu lidera ekipa forsa seguransa konjunta hodi diriji no organiza forsa sira atu asegura seguransa ba eventu ida ne’e,” afirma Komandante PNTL Oe-Cusse ne’e.

Entertantu difikuldade ne’ebe mak sira hasoru mak apoiu lojistika maibe ida ne’e la sai obstaklu atu jere funsaun hanesan forsa seguransa atu bele jere eventu ne’ebe maka estadu organiza no selebra iha rejiaun Oe-Cusse.

Komandante Arnaldo hatutan, konaba eskoltu ba bainaka internasional no membrus governu sira normalmente lao hanesan bai-bain responsabilija husi Corpo Seguransa Polisia (CSP) no Tranzitu. Média PNTL.

Dili– Polisia Nasional Timor-Leste (PNTL) difisil kaptura autor krime sira ne’ebe maka sempre hamosu konflitu iha bairo no suku laran tamba laiha kooperasaun informasaun husi komunidade.

Komandante Jeral PNTL Komisariu Julio da Costa Hornay hateten joven ne’ebe baku malu no halo barullu iha bairo-bairo polisia la kaer tanba falta kooperasaun informasaun husi komunidade tamba ne’e bainhira komunidade la fo apoiu maximu ba polisia maka problema sempre akontese no joven sira ne’ebe maka problematikador sente kontente tamba ema tauk la halo keixa no sira kontinua livre.

“Bainhira mosu problema polisia sempre to’o maibe komunidade la fo informasaun, polisia labele kaptura autor sira, dala ruma polisia to’o ema la koopera no polisia hetan xamada barak husi Tasi Tolu ou becora no fatin seluk ne’ebe mosu konflitu katak ema ataka malu, atu oho malu polisia halo esforsu hotu to’o iha fatin akontesimentu maibe laiha ema ida maka koñese no fo informasaun kona-ba autor sira nia involvimentu, ne’e maka kestaun ita nian ne’ebe maka sai preokupasaun boot no dala ruma ita dehan malandru maibe balu viola oituan maibe situasaun maka hanesan ne’e,” afirma Komandante Jerál ba jornalista sira Segunda (30/11) iha nia kna’ar fatin Caicoli-Dili.

Komisariu Hornay hatutan, polisia iha servisu barak hodi atende problema iha fatin-fatin tanba ne’e bainhira polisia to’o iha fatin akontesimentu, ema ne’ebe haree fo informasaun ba polisia atu nune’e bele investiga.

Komandante Julio tenik tan, atu asegura seguransa iha kapital Dili no territoriu tomak polisia kontinua halao patrullamentu diária maibe falta kooperasaun informasaun husi komunidade, dala ruma akontese problema balun polisia to’o uza forsa oituan baku no ida ne’e sai kestaun ba publiku maibe kuandu polisia to’o ho mamar no didiak maibe la fo informasaun, normalmente liafuan ne’ebe sai husi komunidade sira maka ne’e joven sira husi suku no bairo seluk maka mai iha ne’e ami la koñese, se ita la koñese ita labele haruka polisia hein uma ida-ida. Média PNTL.