Uncategorized

Dili-Governu entrega ona relatoriu ba Prezidente Repúblika (PR), Taur Matan Ruak kona-ba rezultadu Empeñamentu Operasun Konjunta (EOK).

Liu husi enkontru Konsellu Superior Defeza no Seguransa, Primeru Ministru (PM) Rui Maria de Araujo entrega kedas relatoriu operasaun nian ba estadu.

Ohin hatama ona, depois enkontru Primeiru Ministru hatama kedas relatoriu,”Ministru Interior Longinhos Monteiro informa ba jornalista sira iha palasiu Prezidensial, Segunda (31/08/15).

Iha aprezentasaun relatoriu ne’e aprezenta husi ministru interior, Longinhos Monteiro, Ministru Defeza Cirilo Cristovão inklui mos Xefe Estadu Maior, Jeneral FALINTIL Forsa Defeza Timor-Leste (F-FDTL) Maijor Jeneral Lere Anan Timor no Komandante Jerál PNTL Julio Hornai.

Operasaun HANITA ezekuta husi F-FDTL no Polisia iha fulan tolu liu ba, husi mandadu kapturasaun ba Prezidente Konsellu Revolusaun Maubere (KRM), matebian Paulino Gama “Mauk Moruk” ho nia grupu.

Hafoin matebian, Mauk Moruk mate iha loron 8 Agostu, EOK hahu hamenus efetivu iha terrenu to’o loron 21 fulan Agostu mak halo enseramentu ba operasaun HANITA.

“Xefe Estadu Maior Forsa Armada no Komando Jerál PNTL aprezenta relatoriu ho volume bo’ot ida kona-ba situasaun operasaun HANITA to’o dia 21 de Agostu ne’ebe Ministeriu Interior no Ministeriu Defeza hodi halo enseramentu ba operasaun HANITA” dehan Ministru Interior ne’e.

Iha loron 9 fulan Setembru, governu sei hatuun tarefas ba operasaun HANITA nian.

Maske Nune’e parte PNTL kontinua halo persegisaun hodi buka tuir membru matebian Mauk Moruk nain rua (Sunardi no Lemorai) ne’ebe maka sei halai subar.

Enkontru konsellu defeza no seguransa ne’e partisipa husi Primeiru Ministru Rui Maria de Araujo, Ministeriu relevante no membru komisaun B Parlamentu Nasional. (Fontes Notísia: Timor Post Edisaun Tersa 01 Setembru 2015).

Dili– Komando Polisia Nasional Timor Leste Munisipiu Dili sei Realiza Forsa Rezerva Cup ka jogu amigavel hodi hametin amizade entre liña ministerial, liña Instituisaun Governu no Universidade iha Kapital Dili hodi manan konfiansa entre servidor hot-hotu atu servi povu ho di’ak liutan.

Liu husi enkontru ne’ebe maka realija ohin, Tersa loron 1 fulan Setembru tinan 2015 Komando PNTL Munisipiu Dili halo planu hamutuk ho reprejentante husi kada Ministeriu no Universidade sira atu realiza jogu amizade Voleybol no Footsal ba feto no mane.

Adjuntu Komandante PNTL Munisipiu Dili, Superintendente Assistente Euclides Belo nu’udar Koordenador ba Komisaun Organizadora hateten Jogu amizade Forsa Rezerva Cup nia objetivu hodi komemora loron 20 de Agostu Aniversariu FALINTIL ba dala-40, komemora tinan 16 loron Konsulta Popular, transformasaun mentalidade servi ho professional, hatudu sentidu produtivu, kreatividade nu’udar servidor estadu tuir liña orientasaun formal nomos komemora loron São Miguel Arcanjo nu’udar Mahein Komando PNTL Munisípiu Dili, iha loron 29 fulan Setembru.

Jogu amizade ne’e sei partisipa husi Kuartel Jerál PNTL, Ministeriu Interior, Diresaun Estatístika, Ministériu Solidariedade Sosial (MSS), Seguransa Sivil, Batalaun Ordem Públiku (BOP COPA), Munisipiu Dili, Bombeiros, Suku Kaikoli, TLPDP, TLCPP, Jestaun Merkadu, no Universidade Dili (UNDIL).

Entertantu Josefina Maria Liza Monteiro estudante UNDIL ne’ebe partisipa iha enkontru ne’e hateten nia sente kontente ho programa ne’ebe maka organiza husi Komando PNTL Munisípiu Dili tamba liu husi eventu ne’e bele hametin no kria unidade jogador sira nomos instituisaun governu.

Josefina haktuir katak UNDIL sei prepara ekipa feto no mane ba jogu voleyball no footsal.

Jogu amizade ne’e sei realiza iha loron 7 fulan Setembru no sei remata iha loron 29 Setembru 2015 iha Salaun BOP Caicoli-Dili, ba manan na’in sira sei hetan prémiu hanesan taxa (piala) ba manan na’in I, II no III lugar. Ba finanseiru no ekipamentus suporta rasik husi Komando PNTL Munisipiu Dili. Média PNTL.

Dili– Liu husi apoiu dezenvolvimentu kapasitasaun rekursu umanu ba membru Polisia Nasional Timor Leste (PNTL) husi Programa Dezenvolvimentu Nasoens Unidas (UNDP) hatudu duni progresu maka’as iha tinan 2 (rua) nia laran (2013-2015).

Área hirak ne’ebe durante ne’e UNDP fó apoiu dezenvolvimentu kapasitasaun mak hanesan implementasaun no koordenasaun planu estratejiku, Informasaun Teknolojia, Rekursu Umanu, Aprovizionamentu, Jestaun Viaturas no Relasaun Públika, entre área hirak ne’e maioria mak hatudu duni nia progresu maka’as.

“Ekipa Projetu UNDP nian mai hodi fó suporta ba PNTL ho espesialidade ne’ebe sira iha. Ha’u sente área sira ne’ebe UNDP suporta, área ne’ebe importante tebes ba PNTL, no mudansa hatudu dadauk ona liu husi kualidade servisu membru PNTL nian, ne’e hatudu katak espesialista sira hakarak tulun duni PNTL hodi oferese sira nia matenek ba membru PNTL sira.”

Afirma Komandante Jerál PNTL Komisáriu Julio da Costa Hornay iha enkontru konsellu ba projetu UNDP-PNTL nian iha Salaun Konferensia Kuartel Jerál PNTL Caicoli-Dili, loron 28 Agostu 2015.

Iha oportunidade ne’e, Komisáriu Hornay hodi PNTL nia naran agradese no apresiasaun ba parseiru PNTL tomak liu-liu UNDP, tamba ho sira nia apoiu mak ohin loron UNDP ho nia ekipa mai servisu hamutuk ho PNTL desde tinan 2013 to’o ohin loron, no husu ba UNDP atu kontinua fo suporta nafatin PNTL tamba PNTL mak asegura seguransa interna atu nune’e Timor Leste hakmatek iha paz nia laran, tamba ne’e PNTL presija servisu ho kualidade hodi responde ba nesesidade povu Timor Leste tomak.

Komisáriu Julio hatutan, iha área balun mak sei la’o neneik hela maibe sei buka dalan oinsa atu bele koopera ba malu di’ak liu tan hodi lori PNTL ba oin, no fiar katak bele.

Iha fatin hanesan, Jestór ba projetu UNDP-PNTL Gil Naldo Rei hateten, durante UNDP nia apoiu ba área hirak ne’ebe UNDP fó suporta, sira hatudu progresu makaas liu, maibe sei iha mos dezafiu balun ne’ebe presija atu hadi’a diak liu tan liu-liu iha liña kooperasaun.

“Durante UNDP nia apoiu ba área hirak ne’ebe UNDP fó suporta, sira hatudu progresu maka’as liu, ita la espera katak PNTL bele atinji ida ne’e iha tinan 2 de’it, maibe dezafiu balun mos iha, katak presija halo di’ak liu tan, tamba ne’e ohin ami hato’o ba komandante Jeral, tamba desijaun hotu iha Komandante Jerál nia liman, no ami mos hanesan Timor oan hakarak hadi’a dezenvolvimentu PNTL ba oin, tamba ne’e tenke hetan kolaborasaun ne’ebe di’ak no ha’u hakarak hatete katak dezafiu sira ne’e la’os sai obstákulu atu la’o ba oin,” tenik Naldo Rei. Média PNTL.

Dili– Polísia Nasional Timor Leste liu husi Servisu Investigasaun Kriminal (SIK) hahú halo prosesu investigasaun ba pistola 2 ne’ebe mak Grupu Konsellu Revolusionariu Maubere (KRM) uza nomos Kartaun identidade PNTL nian ne’ebe hetan husi Grupu KRM refere.

Pistola 2 ne’e ida entrega husi Domingos Gama “Cowboy” no ida seluk ne’ebe Mauk Moruk kaer durante nia sei moris.

“Ami tenke halo duni prosesu investigasaun ba pistola 2 (rua) ne’ebe ida entrega husi Domigos Gama no ida seluk ita foti fila fali bainhira Mauk Moruk mate, tamba pistola 2 ne’e sai hanesan evidénsia ba ita, aleinde pistola 2 ne’e, ita mos sei halo investigasaun ba ID-CARD polisia nian ida ne’ebe mak ita hetan hamutuk iha momentu Mauk Moruk mate,” afirma Komandante Jerál PNTL, Komisáriu Julio da Costa Hornay ba Jornalista sira iha Kuartel Jerál PNTL, Caicoli-Dili, loron sesta (28/08/2015).

Komisáriu Julio hatutan, liu husi prosesu investigasaun mak bele identifika loloos tamba sa mak kartaun identidade (ID CARD) PNTL nian bele hamutuk iha Grupu KRM, tamba ne’e parte investigasaun nian tenke investiga kle’an atu nune’e bele hetan ninia rezultadu.

Iha parte seluk, Komandante PNTL Munisipiu Baucau, Superintendente Justino Menezes informa, pistol 2 inklui atributu seluk hanesan Granada, Dima, Rama no Katana ne’ebe polisia rekolla agora dadaun sei rai hela iha seksaun Investigasaun nian, tamba ida ne’e mak sai hanesan evidénsia hodi prosesu ba oin.

“Atributu ne’ebe polisia rekolla bainhira Mauk Moruk mate mak agora dadaun sei rai iha seksaun investigasaun nian, sira mak rai hodi sai hanesan evidensia hodi prosesu ba oin, sasan sira ne’e mak pistola 2, katana, dima, granada, rama no seluk tan,” esplika Komandante Menezes. Média PNTL.

Dili– Hafoin Empeñamentu Operasaun Konjunta (EOC) retira husi operasaun iha loron 18 fulan Agostu foin lalais ne’e, to’o agora membru Konsellu Revolusionáriu Maubere (KRM) hamutuk na’in 6 mak seidauk entrega-an no kontinua subar.

Ho nune’e Komando PNTL Munisípiu Baucau husu ba elementu Mauk Moruk (MM) hamutuk na’in 6 (neen) ne’ebe kompostu husi Lemorai, José Sunardy no na’in 4 seluk atu bele entrega-an ba Komando Polisia Baucau.

“Sira ne’ebe seidauk kaptura agora hela sira na’in 6 de’it ona, sira mak Lemorai, José Sunardy ho na’in 4 seluk tan, sira na’in 6 ne’e husi Postu Administrativu Baguia na’in 2 no husi Postu Administrativu Laga na’in 4,” afirma Komandante PNTL Munisípiu Baucau, Superintendente Justino Menezes ba Jornalista sira iha Salaun Konferénsia Kuartel Jerál PNTL, Caicoli-Dili loron Kinta (27/08/2015) hafoin enkontru ba programa Polisiamentu Komunitaria nian.

Komandante Justino hatutan, foin lalais ne’e, elementu MM nian hamutuk na’in 16 (sanulu resin neen) entrega-an ona ba Komando PNTL Munisipiu Baucau, na’in 16 ne’e kompostu husi nain 10 husi Kribas Manatuto no nain 6 husi Postu Administrativu Laga nian.

“Sira na’in 6 ne’ebe seidauk entrega-an ida ne’e responsavel komando PNTL Munisipiu Baucau nian. Ami mak sei uza maneira oinsa para lori sira mai lalais, liu husi dalan aproximasaun ho nia familia sira, dialogu aberta, sosializasaun liu husi Xefe Aldeia, Xefe Suku sira atu nune’e sira bele entrega-an laiha hodi kro’at hasoru sira,” tenik Menezes.

Hatan kona-ba diskonfia elementu nain 2 ne’ebe seidauk entrega-an hanesan Lemorai ho José Sunardy halai ho kanek, Komandante Baucau hateten sira ne’ebe seidauk entrega-an fiar katak sira ne’e diak hela, nune’e mos diskonfia lori armas, komandante dehan sira lalori armas, karik iha sira halo rasik, bolu rakitan.

Komando PNTL Munisipiu Baucau hala’o nafatin diálogu liu husi Ofisial Polisia Suku (OPS) sira ho komunidade no autoridade lokal sira atu nune’e bele konvense ba familia sira atu nune’e sira bele entrega-an.

Ikus liu Komandante Justino husu ba komunidade tomak liu-liu Munisípiu Baucau katak Komando PNTL Munisípiu Baucau hakarak fo korajen nafatin, liu-liu ba familia sira atu kontribui hodi sira bele entrega-an, karik lakohi kontribui mak konsekuénsia realidade ita haree ona, katak mai ho kanek no mate, ne’e ita triste. Atu labele akontese tan husu ba familia sira atu labele subar, familia sira ne’ebe subar, konsidera sira komete krime. Média PNTL.

Dili– Situasaun seguransa atual em jerál liu-liu iha Munisípiu Baucau la’o normal hafoin Empeñamentu Operasaun Konjunta (EOC) retira husi operasaun nomos prosesu funebre ba matebian Prezidente Konsellu Revolusionáriu Maubere (KRM) ho nia elementu na’in 3 iha Postu Administrativu Laga Munisipiu Baucau.

“Komando PNTL Munisipiu Baucau hakarak informa katak situasaun atual iha Baucau hafoin operasaun konjunta retira agora dadaun lao normal, laiha problema, depois de lori mate isin Mauk Moruk ho nia elementu nain 3 ba Laga iha loron 16 situasaun lao di’ak to’o agora,” afirma Komandante PNTL Munisípiu Baucau, Superintendente Justino Menezes ba Jornalista sira iha Salaun Konferensia Kuartel Jeral PNTL, Caicoli-Dili loron Kinta (27/08/2015) hafoin enkontru ba programa Polisiamentu Komunitaria nian.

Iha parte seluk, Komando PNTL mos identifika ona Termo de Residência (TIR) ba suspeitu na’in 5 (lima) ne’ebe diskonfia involve iha kazu tuda karreta 4 (hat) no edifisiu Eskuadra PNTL Postu Administrativu Laga Munisipiu Baucau bainhira lori mate isin Mauk Moruk ho nia elementu nain 3 (tolu).

“Kona-ba kazu tuda karreta 4 ne’ebe kompostu husi Polisia Militar 3 (tolu) no eskuadra Polisia Laga nian 1 (ida), inklui mos Edifisiu Eskuadra Laga nomos Edifisiu Postu Administrativu Laga, hafoin ne’e konsege identifika ona na’in 5 aplika ona TIR, no agora dadaun Juiz sira sei feriadu no bainhira tama fali bele prosesa ona sira.” Afirma Superintendente Justino.

Komandante PNTL Baucau husu mos ba autoridade sira hotu atu bele kontribui ho komando PNTL Munisipiu Baucau atu bele asegura seguransa liu-liu iha Baucau. Média PNTL.

Dili– Kadetes rekrutadu ba faze segundu hamutuk 262 (atus rua neen nulu resin rua) sei tuir ezame médiku iha loron 14 fulan Setembru tinan ne’e iha Klínika PNTL Caicoli-Dili.

Ezame médiku ne’e ho nia objetivu atu bele hatene kondisaun saude kadetes rekrutadu sira molok hahú tuir formasaun iha fulan Outubru tinan ne’e.

“Prosesu tuir mai mak sei halo ezame médiku ba kadetes foun sira, tamba sira deskansa kleur tamba ne’e ita presija check-up fali ba sira nia saude molok sira hahu tuir formasaun baziku, ezame ne’e sei hahú iha loron 14 Setembru no kada loron ema na’in 30 (tolunulu),” afirma Komandante Centru Formasaun ba Polisia (CFP) Interinu, Superintendente Assistente Emilio dos santos ba Média PNTL iha Akademia Polisia Comoro, loron Kuarta (26/08/2015).

Komandante CFP Interinu Emilio hatutan, iha ezame médiku ne’e mak identifika kadetes sira balun iha moras mak sei elimina no bolu fali kadetes rezervadu sira ne’ebe naran seidauk publika sai, tamba ne’e husu ba kadetes sira atu kumpri regulamentu ne’ebe iha ona tamba ida ne’e mak prosesu molok sai membru polisia.

Sup. Ass. Emilio hatutan, tuir kalendáriu provizóriu katak kadetes rekrutadu hamutuk 262 ne’e hafoin ezame médiku, sei hahú tuir formasaun báziku iha loron 28 Outubru tinan ne’e, maibe ida ne’e sei oráriu provizóriu seidauk fiksu.

Entertantu iha parte seluk, Komandante CFP ne’e mos informa katak, ba kadetes sira ne’ebe agora dadaun tuir hela formasaun iha Akademia Polisia ba faze primeiru nian, tuir oráriu sei halao estájiu iha fulan Setembru no sei halo graduasaun iha fulan Outubru tinan ida ne’e. Média PNTL.

Dili- Polísia Nasional Timor Leste (PNTL) liu husi Departamentu Polisia Komunitária Nasional realiza enkontru ho Parseiru Dezenvolvimentu Fundasaun Ázia no Timor Leste Community Police Program (TLCPP) hodi ko’alia kona-ba programa Polisiamentu Komunitaria nian.
Programa Polisiamentu Komunitaria ne’e hanaran “HAKOHAK” (Hametin Kooperasaun Hamutuk entre Polisia ho Komunidade) ne’ebe inisia husi Fundasaun Ázia no koopera ho PNTL hodi implementa ona iha Munisipiu hotu hodi asegura seguransa iha kada Muisipiu to’o iha suku.

Iha enkontru ne’e, Komandante Jerál PNTL Komisáriu Julio da Costa Hornay agradese ba Fundasaun Ázia liu husi Programa HAKOHAK no TLCPP ne’ebe durante ne’e apoiu ona servisu polisia Komunitaria nian hanesan Ofisial Polisia Suku (OPS), Konsellu Polisiamentu Komunitariu (KPK) no Konsellu Diretiva Distrital (KDD).

“Agradese ba TLCPP no HAKOHAK ne’ebe fo apoiu ba atividade polisia komunitaria nian, ne’ebe ita hetan rezultadu pozitivu teb-tebes tamba autoridade lokal no komunidade sira, membru Governu nomos Parlamentu Nasional sira sente kontente ho prezensa OPS sira iha kada suku, tamba ne’e husu ba komandante sira Munisipiu to’o iha Eskuadra hotu atu fo apoiu nafatin ba programa ida ne’e atu nune’e ita bele alkansa ita nia objetivu,” afirma Komisáriu Julio Hornay iha Salaun Konferensia Kuartel Jeral PNTL, Caicoli-DIli, loron Kinta (27/08/2015).

Entertantu iha enkontru ne’e, Komandante Munisipiu sira mos maioria agradese ba parseiru Fundasaun Azia liu husi Programa HAKOHAK nomos TLCPP ne’ebe fo apoiu kapasitasaun, fasilidade no finanseira ba estabelese KPK no KDD iha Munisipiu no suku sira hodi fo apoiu ba servisu OPS sira, no programa ne’e la’o di’ak tebes tamba bele ajuda lider komunitariu sira atu bele prevene konflitu iha komunidade.

Iha fatin hanesan, Sarah Dewhurst nuudar Koordenadora Programa HAKOHAK husi Fundasaun Ázia hateten, Fundasaun Azia iha programa naran HAKOHAK ne’ebe atu hametin kooperasaun iha parte seguransa entre polisia ho komunidade, programa ida ne’e nia atividade boot mak atu estabelese KPK iha nivel suku no KDD iha nivel Munisipiu. To’o agora loke ona KPK iha suku 10 iha kada munsipiu ezeptu Munisipiu 2 mak seidauk, nune’e mos programa ne’e hanesan programa pilotu ida no kontinuasaun sei kompleta husi PNTL rasik.

Entertantu suku iha territoriu tomak hamutuk 442 ne’ebe OPS koloka ona ba suku 410 no suku ne’ebe mak seidauk iha OPS, tuir planu sei kompleta hotu iha tinan ida ne’e, nomos KPK iha Munisipiu Ainaro mak hanesan pilotu hodi kobre hotu KPK iha kada suku, entertantu iha Munisipiu seluk KPK seidauk estabelese iha suku hotu, no sei iha prosesu atu kompleta. Nune’e mos KDD hari’i ona iha Munisipiu 11 ezeptu Lautem ho Zona Autoridade Espesial Oecusse Ambeno.

Iha enkontru ne’e parseiru TLCPP no HAKOHAK husi Fundasaun Azia mos aprezenta relatoriu trimestral husi fulan Abril-Juñu 2015 ne’ekona-ba progresu implementasaun, atividade ne’ebe sei la’o dadaun, nomos planu ba oin.

Partisipa iha enkontru ne’e mak hanesan Primeiru Sekretaria Embaxador Nova Zelandia iha Timor Leste, Komandante TLCPP ho nia ekipa, Segundu Komandante Jerál PNTL, Komandante Operasaun Nasional Interinu, Xefe Departamentu Polisia Komunitaria Nasional, Komandante PNTL Munisipiu 12 ho Zona Autoridade Espesial Oe-cusse Ambeno. Média PNTL.

Dili– Instituisaun Polisia Nasional Timor Leste (PNTL) ho Ministeriu Interior realiza ekontru regulár ida ho Parseiru Dezenvolvimentu sira atu nune’e bele asegura harmonizasaun programa ka projetu husi parseiru dezenvolvimentu sira nian ne’ebe tenke alinea ho Planu Estratejiku PNTL nian ba tinan 5 (lima) 2014-2018 ne’ebe iha área prioridade 5 mak hanesan Lejislasaun, Formasaun, Administrasaun, Disiplina no Operasaun.

“Liu husi kolaborasaun Ministeriu Interior, ita estabele reuniaun regular ho mekanizmu koordenasaun politika ba dezenvolvimentu atu nune’e ita bele harmoniza parseiru dezenvolvimentu sira nian iha PNTL atu nune’e labele dupla imi nia atividade iha área ne’ebe hanesan maibe tenke alinea ho planu estrateijiku PNTL 2014-2018. Ne’e katak kualker atividades ka programa dezenvolvimentu husi parseiru sira ba PNTL nian tenke tama iha prioridade ne’ebe hakerek ona iha planu estrateijku PNTL mak hanesan Lejislasaun, Formasaun, Administrasaun, Disiplina no Operasaun, hodi nune’e ami bele monitoriza progresu no dezafiu ba implementsaun planu estratejiku,” afirma Komandante Jerál PNTL Komisáriu Julio da Costa Hornay iha ninia diskursu abertura ba enkontru ho parseiru sira iha Salaun Konferensia Centru Formasaun ba Polisia, loron Kuarta (26/08/2015).

Komisáriu Hornay mos agradese ba parseiru sira hotu ne’ebe durante ne’e fo apoiu ba PNTL liu-liu iha área formasaun, polisia komunitaria no seluk tan, no involvimentu doador sira importante ba Instituisaun PNTL atu sai professional liu tan hodi asegura seguransa interna liu husi Vzibilidade Involvimentu no Profesionalizmu (VIP).

“Nuudar Komandante Jerál orgullu tebes tamba ida ne’e hanesan reuniaun ba dahuluk ho parseiru dezenvolvimentu sira hotu, ha’u fiar katak ita sei servisu hamutuk diak liu tan liu husi liña koordenasaun ne’ebe diak ba oin, nune’e bele tuir duni politika dezenvolvimentu Ministériu Interior nomos planu estratejiku PNTL nian,” afirma Hornay.

Iha fatin hanesan, Ministru Interior Longinhos Monteiro hateten enkontru ne’e ho nia objetivu atu diskute ba área saida mak parseiru dezenvolvimentu sira prefere atu fo apoiu, parseiru sira labele hala’o programa ka projetu ho PNTL hases husi planu estratejiku PNTL ba tinan 5 nian.

“PNTL nia atividade hotu-hotu tuir planu asaun anual ba tinan 5 nian, agora sira halo diskute kona-ba programa atividade dezenvolvimentu ninian ne’ebe liga ho parseria ho stake holder internasional sira, para depois sira hatene katak programa saida mak sira prefere atu ajuda, saida mak la’o no saida mak seidauk, nune’e mos tenke alinea ba iha planu asaun anual ne’ebe iha ona, ohin sira diskute ba tinan 2016-2018, area 5 mak sai hanesan prioridade tuir mos planu Governu nian,” afirma eis Komandante Jerál PNTL Longuinhos.

Entertantu enkontru ne’e organiza husi UNDP ho PNTL ne’ebe hetan partisipasaun husi Komandante Unidade, Departamentu no Seksaun sira, Reprezentante husi Ministeriu Financas, UNDP, JICA, The Asia Foundation, TLPDP, TLCPP, Polisia Nova Zelandia, no parseiru sira seluk, Embaxadores iha Timor Leste, no konvidadu seluk tan. Média PNTL.

Dili- Komandante Jerál Polisia Nasional Timor Leste (PNTL), Komisáriu Júlio da Costa Hornay partisipa serimonia Aniversáriu Kompañia Operador Telekomunikasaun “Telemor” ba tinan 3 (tolu) ne’ebe hala’o iha Hotel Novo Turismo Sesta (21/08/2015).

Iha nia diskursu, Komisáriu Julio Hornay hateten, Telemor bele lao ho susesu, banhira seguransa metin, hodi bele fo seguransa ba atividade Telemor nian.

“Telemor bele lao ho susesu bainhira fo seguransa ba ita bo’ot sira nia servisu iha kapital to’o iha baze, ho tinan 3 aniversariu ba Telemor nian, komunidade Timor tomak ha’u lahatene nia pursentu hira, mais ha’u la’o 13 Munisipiu, Eskuadra 65, no Postu 29, ha’u la’o hale’u mais telemor funsiona nia signal ne’e sem pursentu,” afirma Hornay.

Komisáriu Hornay hatutan, ho prezensa telemor nian iha Timor Leste bele fo apoiu masimu mos ba servisu seguransa PNTL nian, no iha futuru bele iha kooperasaun servisu di’ak liu tan. Media PNTL.