Uncategorized

Dili- Komando PNTL Munisípiu Dili hala’o enkontru ho Administrador Postu Administrativu, Lider Komunitariu no akompaña husi Polisia Komunitaria Nasional, Parseiru Fundasaun Ázia no Programa Polisiamentu Komunitária iha Timor Leste (TLCPP) hodi diskute kona-ba atu harii estrutura Konsellu Diretiva Distrital ne’ebe se posivel sei muda naran ba Konsellu Diretiva Munisipal (KDM), tamba naran Distritu muda ona ba Munisípiu.

Iha enkontru ne’e, Komandante PNTL Munisípiu Dili, Superintendente Xefe Pedro Belo hateten, harii Konsellu Diretiva Distrital (KDD) ne’e hanesan fo mahon ba Konsellu Polisiamentu Komunitaria (KPK) sira, karik sira hasoru problema ruma iha terreinu, KDD mak bele rezolve, tamba ne’e KDD importante tebes atu harii.

“Ohin ita tuur hamutuk ho ita nia lider komunitariu, administrador do posto no munisipiu sira atu oinsa harii KDD ho di’ak, tamba KDD mak sei rezolve ba problema ne’ebe KPK sira hasoru. Tuir lolos ita harii uluk KDD mak foin harii KPK maibe tamba iha Munisipiu Dili hasoru problema barak hanesan kestaun tempu, problema rai, problema ekonomia, problema edukasaun no seluk tan, tamba ne’e mak ita foin harii KDD, iha Munisipiu seluk harii hotu ona,” afirma Komandante PNTL Munisipiu Dili, Superintendente Xefe, Pedro Belo bainhira loke enkontru ne’e iha Salaun Komando PNTL Munisipiu Dili, loron Kuarta (12/08/2015).

Komandante Pedro Belo hatuitan, iha Munisipiu Dili, forma ona KPK iha suku 10 mak hanesan suku Comoro (Beto), Hera,Balibar, Duyun, Dare, Sabuli, Bairo-Pite, Biqueli, Atauro Villa, no Kampu Alor.

Iha fatin hanesan, Adjuntu Administrador Munisípiu Dili Jose F. X. Smith hateten, Administrador laiha dúvida atu harii KDM ne’e no apoiu sem pursentu (100%) ba Konsellu ida ne’e tamba seguransa importante ba ema hotu.

“Ami laiha dúvidas, ami apoiu 100% hodi harii Konsellu ne’e, bainhira harii ona KDD ka KDM ne’e lider komunitáriu sira nia papel importante tebes iha ida-idak nia suku, atu oinsa halo kooperasaun no apoiu ba Polisia komunitaria nia servisu iha kada suku, no husu ba estrutura ka ekipa ne’e tenke ativu no fokus, atu nune’e bele atinji planu ne’e iha ona,” informa Adjuntu Administrador Munisipiu Dili Jose Smith.

Kona-ba difikuldade ne’ebe Ofisial Polisia Suku sira infrenta iha terreinu, Smith hateten ida ne’e realidade ne’ebe akontese duni liu-liu iha area rural sira, tamba ne’e husu ba Komando PNTL Munisipiu Dili atu bele resolve ba kestaun ne’e, tamba bainhira iha ona planu ne’ebe di’ak maibe laiha ekipamentu ne’ebe fasilita, servisu mos sei la la’o no labele atinji ba mehi ne’ebe iha ona.

Entertantu partisipa iha enkontru harii KDD ne’e mak Ofisial Polisia Suku, Lider Komunitariu, Administrador do Posto sira, Xefe Aldeia, parseiru TLCPP no Fundasaun Ázia. Média PNTL.

Dili, Embaxada Estadus Unidus Amérika (EUA) iha Timor Leste apoiu tan ekipamentu eletronika hanesan Komputador 17, mákina imprime 17, Kamera 17 no dokumentu eletronika balun ba Departamentu Justisa Polisia Nasional Timor Leste (PNTL) iha Kuartel Jerál PNTL, Caicoli-Dili, sesta (31/07/2015).
Iha serimonia intrega ekipamentu eletronika ne’e, Komandante Jerál PNTL, Komisariu Julio da Costa Hornay hateten, EUA nia prezensa iha Timor Leste apoiu maka’as ba prosesu dezenvolvimentu iha nasaun ida ne’e, liu-liu ba Instituisaun PNTL. Ho apoiu ekipamentu eletronika ne’e bele apoiu tan servisu Departamentu Justisa nian iha Nasional nomos iha MuinisÍpiu sira hotu.
“Embaxada Estadus Unidus nia prezensa iha Timor Leste fo nia kontribuisaun maka’as ba dezenvolvimentu Timor Leste, liu-liu PNTL desde PNTL ne’e harii to’o ohin loron, tamba ne’e lori komando jerál PNTL nia naran hakarak agradese ba EUA ne’ebe ohin apoiu tan ekipamentu eletronika ba Departamentu Justisa,” afirma Komisáriu Hornay.
Iha fatin hanesan, Adidu ba Aplikasaun Lei iha EUA nuudar reprezentante Embaixadora Estadus Unidus Iha Timor-Leste Jason Mohler hateten, ekipamentu sira ne’e sei entrega ba sesaun justisa iha kada Munisipiu sira, Unidade Espesial, Polisia Fronteira, Polisia Marítima no Sentru Formasaun Polisia nian. Komputadores sira ne’e sei aloka eskluzivamente ba kestaun disiplinariu sira no sei fornese nivel segredu ne’ebé aas ba kazu sira ne’ebé mak pendente hela.
Jason Mohler hatutan, Komputadores sira ne’e sei asegura troka informasaun ne’ebé konstante no efetivu entre orgaun sira ne’ebé mak responsabiliza ba étika no disiplinariu( Departamentu Justisa) no sub-unidade sira ( Sesaun Justisa) ne’ebé mak hala’o investigasaun disiplináriu iha nivel distritu.
Iha parte seluk, Xefe Departamentu Justisa PNTL, Superintendente Xefe Carlos Jerónimo hateten bazeia ba vizita ne’ebe hala’o ba iha Departamentu no Seksaun Justisa iha Nasional nomos iha Munisípiu sira, infrenta problema duni ba ekipamentus.
Komputador 17, printer 17, Makina fotografia 17, ho apoiu ekipamentu eletronika husi Embaxada Estadus Unidus Amérika ne’e sufisiente ona hodi fasilita servisu Departamentu no Seksaun Justisa PNTL nian iha Nasional nomos iha Munisípiu. Média PNTL.

Dili- Inspetor Xefe Carlos Moniz Maia nuudar Adjuntu Komandante husi Departamentu Justica PNTL reprezenta Instituisaun PNTL hodi ba hala’o Misaun ONU nian iha Nasaun Guinea Bissau durante tinan 1 (ida).

Iha despedida ne’e, Segundu Komandante Jerál PNTl, Komisariu Faustino da Costa hateten, PNTL orgullu tamba úniku iha membru ida de’it ne’ebe passa iha teste hodi ba hala’o misaun Paz no Estabilidade iha Guinea Bissau.

“kna’ar ida ne’e la’os fasil, kna’ar ida ne’e la’os simples, úniku PNTL iha ema nain ida deit hodi ba serví iha bandeira ONU nian durante tinan ida nia laran,” afirma Komisariu Faustino.

Ikus liu, segundu Komandante Jerál enkoraja ba Inspetor Xefe Carlos Maia hodi ba hala’o servisu ho di’ak, hamorin Instituisaun PNTL no Nasaun Timor Leste iha rai seluk.

“Ita boot sei la mesak, komando no kolega sira sei suporta ita boot hodi bele hala’o knaar ho di’ak iha Guine Bissau no ida ne’e hanesan responsavel ne’ebe PNTL no ONU fo fiar ba Ita boot. Tempu ona ita bele fahe fali saida mak ita aprende ba Nasaun seluk ne’ebe presija ita nia tulun,” afirma Kom. Faustino.

Iha fatin hanesan, Inspetor Xefe Carlos Moniz Maia agradese ba Nasaun Timor Leste liu-liu ba PNTL tamba liu husi Instituisau ne’e mak nia bele passa iha teste ne’ebe hala’o direta husi ONU.

“Agradese ba eroi hirak ne’ebe sakrifika sira nia-an hodi liberta rai ida ne’e, ikus mai ita bele forma Instituisaun Estadu hanesan Insituisaun PNTL, ha’u hola parte hanesan membru iha Instituisaun PNTL, tamba ho Insituisaun ne’e mak ema rekoñese, no ha’u mos involve ba teste ne’ebe ONU prepara, no ha’u passa ba teste ne’e hodi ba hala’o misaun iha Guine Bissau,” afirma Carlos Maia.

Iha parte seluk, Carlos sente triste tamba ida period úniku nia mesak mak desloka ba Guinea Bissau.

“Ha’u nia sentimentu kontente tamba testu ONU ne’e rigorozu tebes maibe ha’u mos bele passa, tuir mai ha’u sente triste oituan tamba Timor ho Guinea ho distánsia dook, no pesoal úniku mesak deit, bainhira ita desloka ba ema nia rain sempre hasoru dezafiu oi-oin, se ita mesak deit ita atu konsulta ho sé,” akresenta Carlos.

Entertantu iha loron ne’e kedas, hafoin Komando hala’o despede, Inspetor Xefe Carlos Maia desloka kedas ba Aeroportu Internasional Nicolau Lobato hodi aranka ba Guinea Bissau. Média PNTL.

Dili- Segundu Komandante Jerál Polisia Nasional Timor Leste (PNTL), Komisáriu Faustino da Costa informa katak situasaun seguransa em jerál la’o kontroladu.
“ami halo alerta I desde iha loron 06 semana kotuk, agora dadaun situasaun em jerál tantu iha Nasional no teritóriu tomak la’o normal no kontroladu, tamba aumenta tan polisia nia movimentu patrullamentu iha Estrada Publiku, sira sei mantein hela hodi fó seguransa,” afirma Komisariu Faustino da Costa ba jornalista sira, hafoin halo lansamentu ba situs PNTL nian iha Salaun Enkontru Kuartel Jeral PNTL, Caicoli-Dili, loron Segunda, 10/08/2015.
Entertantu movimentu transporte ba parte Leste la’o normal, no pasa revista mak kontinua la’o ba pasajeiru, kondutores, motorista sira ne’ebe halo viajen ba parte Leste nomos mai kapital Dili.
Kona-ba Prezidente Konsellu Revolusionáriu Maubere Mauk Moruk mate duni ka lae, Komisariu hatan iha informasaun ne’ebe konfirmadu maibe atu hatene kle’an liu, ne’e Konsellu Ministru Extra Ordináriu mak bele ko’alia kona-ba asuntu ne’e.
Entertantu membru EOC na’in 2 ne’ebe kanek, agora dadaun sei halo tratamentu iha Hospital Nasional Guido Valadares Dili. Média PNTL.

Dili- Instituisaun Polisia Nasional Timor Leste (PNTL) lansa fali situs (website) foun ho naran “www.pntl.tl”, hodi fornese informasaun ba públiku kona-ba atividade PNTL nian ne’ebe hala’o iha Nasional nomos iha Munisípiu sira.
Situs foun ne’e lansa direta husi Segundu Komandante Jerál PNTL, Komisáriu Faustino da Costa no Xefe UNDP iha PNTL Stephen Moore iha Salaun Enkontru Kuartel Jerál PNTL, Caicoli-Dili, loron Segunda (10/08/2015).

Iha lansamentu ba situs foun PNTL ne’e, Segundu Komandante Jerál PNTL, Komisariu Faustino da Costa hateten, Informasaun Teknolojia importante tebes ba PNTL, tamba tuir planu estratejiku PNTL nomos Estadu nian katak, iha tinan 2030 mai, PNTL bele ona uza ekipamentu modernu, tamba ne’e hahu ohin membru ida-idak tenke buka atu aprende.

“Servisu no atividade ne’ebe ba ema hotu hala’o ohin loron, Informasaun no Teknolojia importante tebes. IT importante maibe karik ita labuka atu hatene no atu uza mak ita sei atraza, no ita sei la atinji saida mak ita atu halo. Planu estratéjiku PNTL no Governu nian katak iha tinan 2030, PNTL nu’udar polisia ida ne’ebe modernu, polisia ida ne’ebe sei uja ekipamentus modernu, se ita la aprende agora, se ita la antisipa agora, mak ita sei la atinji ita nia objetivu ne’ebe iha ona,” afirma Komisariu Faustino.

Segundu Komandante Jerál Faustino hatutan, oinsa situs PNTL ne’e la’o diak hodi fornese informasaun atuál no interesante ba públku, mak Komandante ida-idak tenke kontribui informasaun ba Gabinete Relasaun Públika PNTL atu bele tau iha situs refere.
Komando Jerál agradese ba parseiru UNDP no asesora Relasaun Publika ne’ebe organiza hodi lansa fali ba situs foun ne’e, nomos treina ona membru PNTL atu bele atualiza ba informasaun nomos dadus sira ne’ebe aktual ba publiku”.

“Ikus liu orienta ba PNTL tomak liu-liu komandante sira atu fornese informasaun kona-ba atividade saida deit mak ita boot sira halao, tantu iha Nasional nomos iha Munisípiu ba Relasaun Públika atu tau iha situs ida ne’e, atu nune’e ita bele konvense ba publiku katak informasaun ne’ebe iha situs ne’e informasaun atuál, importante no interesante.” Apela Komisáriu Faustino.

Iha fatin hanesan, Xefe UNDP iha PNTL Stephen Moore hateten, parabens ba Relasaun Publika ne’ebe servisu maka’as hodi kria situs foun ida ne’e, no situs ne’e nuudar dalan di’ak ida atu bele promove Vizibilidade, Involvimentu no Profesionalizmu.

“Website ida ne’e nuudar dalan diak ida hodi promove VIP, no hanesan janela PNTL nian hodi fornese informasaun ne’ebe loos no atual ba publiku, atu nune’e publiku bele hatene atividade saida mak PNTL hala’o, situs PNTL ne’e hanesan orgullu ida ba PNTL tamba PNTL mos bele ona hodi uja Informasaun Teknolojia ne’e,” afirma Stephen Moore.

Partisipa iha serimonia lansamentu situs ne’e mak Komandante Unidade, Departamentu, Seksaun, parseiru UNDP, TLPDP, JICA, Polisia Nova Zelandia. Média PNTL.

Dili- Ministeriu Komersiu Industria no ambiente (MCIA) liu husi Diresaun Meiu Ambiente halo dezimisaun Lei Ambiental ba Polisia Nasional Timor leste (PNTL) hodi oinsa bele implementa lei ne’e atu proteje ambiente no biodiversidade iha ita nia rai doben ida ne’e.
Semináriu Lei Ambiental ne’e loke ofisial husi Vice Ministru MCIA, Constancio Pinto ne’ebe ho nia objetivu atu fahe informasaun ba malu kona-ba oinsa implementa Lei Ambiental hanesan Lei no. 5/2011 Licenciamento Ambiental, no lei no.6/2012 kona-ba Lei Baze Ambiental hodi proteje Meiu Ambiente no Biodiversidade Timor Leste nian.
“Ha’u hanoin lei iha ona, agora oinsa PNTL atu implementa. Liu husi seminariu ne’e oinsa polisia sira bele iha koñesimentu no referensia atu bele fahe informasaun ba komunidade, tamba polisia mak sei hamutuk ho Xefe Suku sira hodi implementa lei sira ne’e,” afirma Segundu Komandante Jerál PNTL, Komisáriu Faustino da Costa iha Semináriu Lei Ambiental ba PNTL ne’ebe hala’o iha Centru Formasaun ba Polisia, Comoro-Dili, loron Kinta (30/07/2015).
Komisariu Faustino hatutan, PNTL mos koloka ona ofisial polisia suku iha kada suku sira iha Timor laran maske seidauk kobre hotu, maibe liu husi seminariu ne’e sei bele hatutan ba polisia komunitariu sira atu nune;e sira mos bele dezimina informasaun ne’e ba Xefe Suku no komunidade sira iha kada suku, atu nune’e sir abele kompriende didiak kona-ba lei ambiental refere hodi proteje ambiente.
Entertantu, Vice Ministru MCIA, Constancio Pinto hateten problema ambiente nuudar mos problema boot Timor Leste nian tamba komunidade seidauk komprinede diak kona-ba oinsa proteje meiu ambiente no biodiversidade.
“Iha prosesu dezenvolvimentu, ita hasoru difikuldade no dezafiu boot ba Timor Leste, ida mak problema ambiental, ema sunu rai arbiru, husik animal arbiru, la asegura ambiente ida moos no saudavel, ida ne’e mak dezafiu,” afirma Vice MCIA Constancio.
Atu halo protesaun ba ambiente, la’os MCIA deit maibe ema hotu ne’ebe hela iha rai ida ne’e iha obrigasaun atu kontribui hodi proteje ambiental, no atu impementa lei ambiental ne’e, polisia mos iha dever importante, tamba bainhira atu halo atuasaun ba problema ruma ne’ebe akontese iha baze liga ho problema ambiental nian, polisia mak halo atuasaun uluk, tamba ne’e presija fahe informasaun kona ba lei refere ba polisia sira atu nune’e bainhira implementa, polisia iha ona koñesimentu kona-ba ida ne’e. Afirma Constancio.
Entertantu seminariu ne’e hala’o tamba iha kooperasaun entre MCIA liu husi Diresaun Ambiental ho PNTL no partisipa iha semnariu ne’e mak membru PNTL husi Komando Jeral no Komando PNTL Munisipiu Dili, parte husi Diresaun Nasional Ambiental husi MCIA nomos lider komunitariu husi Munisipiu Dili. Média PNTL.

Dili– Polísia Nasional Timor Leste liu husi Departamentu Tranzitu no Seguransa Rodoviária hamutuk ho Diresaun Nasional Transporte Terrestre (DNTT) lansa Livru Nota Auto Infrasaun foun hodi hahú aplika iha terreinu bainhira hetan infratór sira halo infrasaun iha Estrada Públiku.

Diferénsia husi Livru Nota Auto Infrasaun foun ne’e mak, prosesu pagamentu ba multa lahanesan uluk, karik hetan kondutor ka motorista sira halo infrasaun tránzitu mak polisia tranzitu sei fó nota auto infrasaun no infratór sira sei ba selu direta iha Banku, la’os selu iha LLAJR.

Molok implementa nota auto infrasaun foun ne’e, Polisia Tránzitu Nasional hala’o workshop durante loron 2 (rua) hodi esplika konteudu husi Livru nota auto infrasaun ne’e ba Xefe Seksaun Tranzitu PNTL husi Nasional no Munisipiu 13 iha Salaun Seksaun Komunikasaun Kuartel Jeral PNTL Caicoli-Dili, loron Segunda (27/07/2015).

“Objetivu husi workshop ne’e mak atu fo koñesimentu ba Xefe Seksaun Tránzitu sira husi Nasional no Munisipiu 13 atu bele kompriende didiak livru nota auto infrasaun ne’e molok implementa iha terreinu, liu-liu ba prosesu pagamentu ka selu multa, infrator rasik ba direta,” afirma Komandante Tránzitu no Seguransa Rodoviária Interinu Valente Soares.

Iha parte seluk, Diretor Nasional DNTT, Natalino do Rosario hateten, “ami halo enkontru ho Vice Ministru Obras Publika no Transporte Terrestre, DNTT rasik ho Diresaun Jeral Ministeriu Finansas nian katak ba infrasaun selu direta ba iha banku ne’e diak liu.”

Iha fatin hanesan, Reprezentante Komandante Jeral PNTL, Superintendente Xefe Carlos Jeronimo hateten “hakarak husu ba membru polisia Tranzitu sira ne’ebe servisu iha estrda publiku tenke hala’o kna’ar ho professional, labele haree hapara kondutor no motorist sira tamba la gosta nia, maibe hapara nia bainhira halo sala ka halo infrasaun duni.”

Partisipa iha workshop ne’e Xefe seksaun Tranzitu husi Nasional no Munisipiu 13, parte DNTT nomos Komandante Opersaun Nasional Interinu. Média PNTL.

Dili– Sekretariu Estadu Fortalesimentu Institusional (SEFI) ho Instituisaun Polisia Nasional Timor Leste (PNTL) hala’o Diagnóstika Nasional ba Fortalesimentu Institusional liu-liu ba Instituisaun PNTL ne’ebe hala’o durante loron tolu (20-22 Jullu 2015) iha Edifisiu Comissão Nacional de Eleição (CNE) Caicoli-DIli.

Diagnóstika Nasional ne’e ho nia objetivu atu identifika problema ne’ebe mak PNTL hasoru no oinsa buka nia solusaun hodi rezolve ba tempu badak nomos ba tempu naruk.

Asuntu ne’ebe mak ko’alia iha Diagnostika Nasional ne’e mak kona-ba Politika, vizaun, estratejia, lideransa, estrutura Governasaun no Kuadru Institusional, Jestaun Rekursu Humanu, Jestaun rekursu seluk kona-ba planeamentu, orsamentu, kontrola ba ezekusaun, Kultura organizasaun no komunikasaun interna, Rezultadu prestasaun servisu, Jestaun relasaun no komunikasaun eksterna.

Entertantu tuir Jerente Prinsipál SEFI Francisco da Costa “Borlaco” hateten, PNTL iha ona planu estratéjiku 2014-2018, atu implementa planu ida ne’e labele la’o mesak, tenke halo koordenasaun ho Ministériu seluk atu nune’e bele la’o dia’k no susesu.

“Ha’u hanoin PNTL iha planu ona, agora oinsa mak planu ne’e bele la’o ho di’ak. Ida mak komandante hotu-hotu tenke hatene sira nia planu no programa ne’ebe sira planeia ona tuir planu estratejiku, no planu ida ne’e sira labele la’o mesak, sira tenke la’o ho instituisaun sira seluk hanesan Ministeriu Estatal, Finansas, Ministeriu Publiku no seluk tan, nomos ho Ajensia Internasional sira ne’ebe hakarak apoiu ba PNTL, sira nia apoiu ne’e tenke enkuadra-an ba planu ne’ebe iha tiha ona, katak planu tenke integradu, orsametu tenke kompleta malu, tenke halo kontrolu hamutuk,” afirma Francisco Borlaco.

Francisco Borlaco hatutan, iha parte seluk PNTL mos hatudu ona progressu boot iha ninia servisu maske ema balun labele halo, maibe PNTL bele hala’o mesak ezemplu krize ne’ebe mak akontese iha tinan 2006, PNTL bele rezolve, seguransa internal ne’ebe ONU husik hela sira bele responsavel mesak.

Diagnóstika Nasional ba Fortalesimentu Institusional ne’ebe ho Lema/Motto mak vizaun ida, planu ida no asaun ida ho nia signifika katak Insituisaun hotu-hotu iha ninia vizaun ida deit, planu ne’ebe iha tenke integradu, tenke la’o hamutuk ho Ministeriu no Instituisaun sira seluk, asaun ida deit katak, ema ida hala’o nia asaun ida maibe ninia objetivu no kontekstu ida de’it.

Nomos ho Tema “moris diak nasaun ne’e responsabilidade ita hotu nian, tamba ne’e ita preokupa hodi serví ho di’ak ba dezenvolvimentu”

Ikus liu Jerente Prinsipal SEFI, Francisco Borlaco afirma katak PNTL bele la’o nafatin tuir planu estratéjiku ne’ebe mak iha, tuir vizaun Vizibilidade Involvimentu no Profesionalizmu.

“Ha’u hanoin PNTL sira kontinua la’o nafatin tuir sira nia Planu Estratéjiku VIP, reforma dezenvolvimentu Institusional, Ordem Públika no Polisia Komunitaria, ha’u hanoin sira kontinua planu 2 ne’e ho diak, hala’o koordenasuan di’ak no importante liu mak hametin sira nia lejislasaun, kompriende lei no regra, aumenta tan formasaun, disiplina tenke di’ak, administrasaun tenke metin, iha prinsipiu VIP. Karik sira hala’o ho diak, ha’u hanoin tinan 2018 ba oin, sira bele atinji sira nia mehi ne’ebe iha ona,” Esperansa Borlaco.

Entertantu partisipa iha Diagnóstika ne’e mak Komando Jerál PNTL, Komandante Unidade, Departamentu, Seksaun iha Nasional, nomos Komandante husi Munisípiu 13 inklui ekipa SEFI. Enkontru ne’e organiza husi SEFI no no hetan apoiu husi UNDP. Média PNTL.

Dili– Treinador Grupu Drum Band ka Moradór husi Polísia Nasional Timor Leste (PNTL), Sarjento Xefe Helder Francisco fó treinamentu Moradór ba Juventude husi Parókia Balide-Dili hamutuk na’in 30 (tolu-nulu) iha Kuartel Jerál PNTL, Caicoli-Dili, loron Kuarta (15/07/2015).

Sjt. Xefe Helder ne’ebe agora dadaun servisu iha Departamentu Polísia Komunitária Nasionál simu orientasaun husi Komando Jerál PNTL hodi fahe ninia esperiénsia kona-ba moradór nian ba ba juventude sira husi Parókia Balide ne’ebe ho nia objetivu atu halo preparasaun ba simu Cruz Joven no Illas Na’in Feto Peregrina ne’ebe hala’o vizita ba kada Parókia iha Kapitál Dili.

“Ohin ami fó treinamentu ba Juventude nomos estudante husi Parokia Balide nian hamutuk na’in 30 hodi prepara sira sai hanesan Moradór Juventude atu simu Cruz Joven no Illas Na’in Feto Peregrina iha sira nia Parokia, no la’o ida ne’e de’it maibe ami hala’o hanesan mos ba juventude sira iha Munisipiu balun,” afirma Treinadór Helder.

Aleinde fo treinamentu ba Juventude iha Kapital DIli, sira mos halao ona iha Munisipiu balun mak hanesan iha Oecusse, Aileu, no Manufahi.

Iha Oeccuse oinsa prepara Juventude no PNTL sira iha Munisipiu refere atu partisipa iha serimonia 500 anos Katólika tama iha Timor Leste, ne’ebe tuir planu sei realiza iha Lifau Oecusse tinan ne’e.

Ekipamentus ne’ebe Moradoór sira uza hodi halo prátika ne’e hetan suporta husi PNTL rasik. Média PNTL.

Dili- Dala barak públiku kestiona bebeik ba servisu Empeñamentu Operasaun Conjunto (EOC), kompostu husi Polisia Nasional Timor Leste (PNTL) no Falintil Forsa Defeza Timor Leste (F-FDTL) ne’ebe kumpri rezolusaun husi Parlamentu Nasional hodi ba buka tuir Mauk Moruk ho nia membru sira ne’ebe halo ona krime hasoru seguransa Estadu nian.

Operasaun Konjunta ne’e hala’o abertura iha Kampu Aviasaun Lanud Munisipiu Baucau iha loron 21 fulan Marsu 2015, ne’ebe operasaun ne’e hanaran “HANITA” katak liu husi dalan hamaus ka halo aproximasaun de’it ho Mauk Moruk ho nia elementu sira atu koopera ba Justisa, labele uza forsa hasoru sira.

Iha faze dahuluk durante fulan ida nia laran, EOC kumpri ordem liu husi Rezolusaun ne’e hodi halo aproximasaun ho komunidade sira, no konsege membru husi grupu Mauk Moruk nian barak mak intrega-an ba EOC no hakarak atu koopera ba Justisa, maibe Mauk Moruk rasik ho nia elementu imporante balun seidauk intrega-an hodi koopera ba Justisa, no sira kontinua subar-an.

Operasaun “HANITA” ne’e tuir lolos hala’o deit fulan ida, maibe tamba Mauk Moruk ho nia elementu importante balun seidauk intrega-an, tamba ne’e EOC kontinua ba faze daruak hodi kontinua buka tuir Mauk Moruk liu husi dalan aproximasaun atu Mauk Moruk rasik mak intrega-an ba hodi responsavel ba asaun ne’ebe sira halo hasoru Instituisaun Seguransa Estadu nian.

Operasaun hala’o besik fulan tolu nia laran EOC seidauk konsege nafatin hetan Mauk Moruk nuudar alvu importante ba operasaun ne’e, tamba komunidade lakohi fó informasaun ba EOC hodi bele kaptura Mauk Moruk.

Tamba ne’e Komandante Jerál PNTL, Komisáriu Júlio da Costa Hornay  husu nafatin ba komunidade hotu atu fó informasaun ba parte polisia atu nune’e bele kaptura Mauk Moruk.

“EOC seidauk kaptura Mauk Moruk tamba ema hotu lakohi fó informasaun ba ami oinsa mak ami bele kaptura Sr. Mauk Moruk, ita nuudar Timor oan hotu ne’ebe hakarak moris iha paz no estabilidade nia laran, ita hotu iha dever atu kontribui hodi hato’o informasaun ba EOC atu nune’e bele kaptura lalais, karik la fó informasaun mak KOK sei esforsu an nafatin,” afirma Komandante Jerál PNTL, Komisáriu Júlio Hornay ba Jornalista sira iha Kuartel Jerál PNTL, Caicoli-Dili, loron Kuarta (15/07/2015). Média PNTL.