Uncategorized

Dili- Ekipa Jurídiku Polisia Nasional Timor Leste (PNTL) halo aprezentasaun Draft Lei Orgánika PNTL ba parseiru Dezenvolvimentu United Nation Development Program (UNDP) ho Timor Leste Police Development Program (TLPDP) iha salaun Konferensia Kuartel Jeral PNTL, Caicoli-Dili, Sesta (21/08/2015).

Objetivu husi aprezentasaun ida ne’e atu parseiru sira bele iha espetativa ba draft organograma PNTL nian atu sira bele hatene, kompriende hodi prepara planu estrategiku hodi apoiu PNTL iha futuru. Afirma Xefe Ekipa Jurídiku PNTL, Inspetór Virgilio D. Correia S.H; M.H. ba média PNTL iha hafoin halo aprezentasaun iha Kuartel Jerál PNTL.

Xefe Ekipa Jurídiku Virgilio esplika, sistema organograma ne’ebe eziste iha mundu iha rua deit mak organograma emprezáriu no organograma Instituisaun nian.

“Substánsia husi aprezentasaun ne’e mak esplika kona-ba sistema organograma ne’ebe eziste iha mundu. Normativamente organograma fahe ba kategoria rua hanesan organogarama emprezáriu sira nian no organograma ne’ebe Instituisaun nian. Organograma Instituisaun nian halo revizaun bainhira organograma ne’e rasik la responde ona situasaun real iha terreinu maibe iha preskirasaun ba tempu, la hanesan organograma emprezariu sira nian muda konforme valor merkadoria.”

Mestradu ba Jurídiku ne’e esplika liu tan katak, iha revizaun Decreto Lei Organica PNTL ne’e koalia liu kona-ba separasaun ba poderes hanensan Nível Estratéjiku (Komando Jerál PNTL), Nível Tátiku (Komando Dirasaun no Supervizaun) no Komando Tékniku Operasaional.

“Kategoria Nivel estratégiku mak Komandante Jeral, 2.º Komandante Jeral, orgaun Konsultativu, orgaun Inspesaun no orgaun Asesoria. Kategoria hanesan Nivel Tátiku mak Komando Operasaun, Komando Pesoal e Formasaun no Komando Administrasaun. Kategoria Nivel Tátiku Operasional mak Komando Regional Oecusse e Ambeno, Komando Unidades, Komando Municipais, Komando Estabelesimentu de Ensino, Komando Unidade de Apoio servisu do Komando Jeral no Xefe Gabinete Komando Jeral.

Komandante Jeral iha poder ba poder disiplina, poder dirasaun e supervizaun, poder disiplina no poder inspesaun, nune’e hodi hatudu katak Komandante Jeral mak Komando Kompletu, maske iha separasaun de poderes ba Komando tolu ne’ebe temi iha leten.

Entertantu Lei Organika foun refere, ekipa Juridiku sei halo kompeltu no aprezenta ba Komandante Jerál no sei iha diskusaun ne’ebe partisipa husi Komandante hotu inklui Komandante PNTL Munisípiu sira molok aprezenta ba Ministru Interior no ikus liu mak Konsellu Ministru atu halo aprovasaun.

Partisipa iha aprezentasaun refere mak Xefe UNDP iha PNTL ho nia ekipa tomak ne’ebe servisu iha Kuartel Jerál PNTL nomos Xefe TLPDP. Média PNTL.

Dili-Tuir planu ne’ebe iha katak kandidatu polisisa foun ka kadetes rekruta sira hamutuk nain 262 (atus rua neen-nulu resin rua) ne’ebe sei tuir formasaun ba segundu faze iha kursu da-hat nian, mak molok kadetes rekruta sira tuir formasaun sei teste fila fali médiku ba sira atu nune’e bele garante katak sira iha kandidatu hirak ne’e iha kondisaun saude ne’ebe dia’k.

Relasiona ho ida ne’e, mak Segundu Komandante Jerál PNTL, Komisáriu Faustino da Costa realiza enkontru ho Xefe Klinika PNTL no Komandante Centru Formasaun ba Polisia iha Kuartel Jeral PNTL Caicoli-Dili hodi halo preparasaun ba teste médiku inklui mos formasaun segundu faze ba kadetes rekruta sira.

Hafoin hala’o enkontru, Segundu Komandante Jeral PNTL akompaña husi Xefe Klinika PNTL nomos Komandante Centru Formasaun ba Polisia hala’o kedas vizita ba Laboratóriu PNTL hodi garante katak Laboratóriu PNTL nian preparadu ona atu bele fo teste médiku ba kandidatu kadetes PNTL hamutuk na’in 262 ne’ebe sei hala’o hahú husi loron 14 Setembru 2015 to’o remata.

“ohin ami halo enkontru ho Segundu Komandante Jerál no Komadante Centru Formasaun Polisia nian atu halo preparasaun ba teste mediku kandidatu kadetes rekruta sira ne’ebe tuir planu sei hala’o iha loron 14 Setembru tinan ne’e, no ohin ami halo kedas check ba Laboratoriu no ita nia Laboratóriu preparadu ona atu bele halo teste.”

Informa Xefe Klinika PNTL, Inspetor Abilio de Araujo Goncalves ba média PNTL iha ninia kna’ar fatin Kuartel Jeral PNTL, Caicoli-Dili loron Tersa (18/08/2015). Média PNTL.

Dili– Atu fó asistensia primeiru sokoru ba estudante husi Universitariu sira ne’ebe hala’o atividade long mars husi Dili ba Munisipiu Aileu ne’ebe ho nia objetivu atu fo omenajen ba eroi sira iha loron istóriku refere nomos hodi partisipa iha komemorasaun Aniversáriu tinan 40 FALINTIL nian ne’ebe hala’o iha Aileu no Dili mak Komisaun Organizadora konvida mos médiku PNTL nian atu hala’o servisu ho CVTL nomos Ministeriu Saude.

Husi Klinika PNTL nian hamutuk nain 2 mak Doutora Inspetor Ass. Analita do Rosario Fátima no Enfermeiru Sarjentu Manuel da Costa hodi akompaña atividade long mars refere nune’e mos ba komemorasaun Aniversáriu tinan 40 FALINTIL husi loron 15-21 Agostu 2015.

“Relasiona ho atividade komemorasaun 20 de Agostu ne’e mak husi Komisaun Organizadora hato’o karta mai iha Komandante Jerál PNTL no Komando jerál hatun despaixu ba Saude PNTL hodi halo ordem de servico ba sira nain 2 hodi fo asistensia primeiru sokoru ba estudante sira nomos partisipante sira ne’ebe partisipa iha komemorasaun Aniversariu loron Falintil nian iha Aileu nomos iha Dili, sira akompaña estudante sira ne’ebe halo long mars iha loron 15 ba Aileu, no iha loron 17 akompaña fila fali estudante sira mai Dili, no agora dadaun sira sei iha terreinu to’o loron 21 Agostu,”

Informa Xefe Klinika PNTL, Inspetor Abilio de Araujo Goncalves ba média PNTL iha ninia kna’ar fatin Kuartel Jeral PNTL, Caicoli-Dili loron Tersa (18/08/2015).

Xefe Klinika PNTL Goncalves hatutan, liu husi partisipasaun mediku PNTL iha terreinu, bele hautudu mos ba publiku katak PNTL mos iha ona mediku rasik hodi fó asistensia saude ba membru PNTL tomak.

Entertantu tuir planu, Enfermeiru nain 1 sei akompaña tan atividade Tour de Timor ne’ebe organiza husi Ministeriu Turizmu iha loron 13-17 Setembru 2015, tuir ajenda ne’ebe mak iha katak atividade Tour de Timor ne’e sei hale’u territóriu Timor laran tomak. Média PNTL.

Dili– Konvoiu akompaña mate isin Prezidente Konsellu Revolusionariu Maubere (KRM) ho nia elementu nain 3 ne’ebe lori husi Dili ba Postu Administrativu Laga Munisipiu Baucau iha loron Domingu 18 Agostu foin lalais ne’e, iha joven balun ne’ebe konsege tuda karreta Polisia Militar nian 2 no Edifisiu Eskuadra Polisia Nasional Timor Leste iha Postu Administrativu Laga.

Iha akontesimentu tuda ne’e konsege rezulta vidru karreta nian rahun no janela Edifisiu Eskuadra PNTL Laga mos rahun, maibe la rezulta ema kanek.

Ho akontesimentu ne’e mak Komando PNTL Munisipiu Baucau, liu-liu iha Eskuadra Laga konsege identifika ona suspeitu ne’ebe diskonfia iha problema tuda karreta no edifisiu PNTL refere.

“Kona ba tuda malu ne’e bain-bain joven sira mak nakar hakarak halo problema, maibe suspeitu identifika ona husi familia matebian rasik mak aprezenta mai iha komando PNTL eskuadra Laga, polisia bolu ona sira hodi sira bele responsabiliza ba hahalok ne’ebe sira halo, tuir informasaun katak polisia identifika ona suspeitu 3 ka 4, maibe sei iha prosesu investigasaun nia laran mak bele hatene klean liu tan,” afirma Komandante Jerál PNTL, Komisariu Julio da Costa Hornay ba jornalista sira iha ninia kna-ar fatin Kuartel Jeral PNTL, Caicoli-Dili loron Tersa (18/08/2015).

Entertantu iha momentu akontesimentu ne’e, PNTL ho F-FDTL mak konsege hakalma kedas situasaun, no agora dadaun situasaun la’o normal no kontroladu iha Postu Administrativu Laga, Munisipiu Baucau nomos iha territóriu Timor laran tomak. Média PNTL.

Dili- GovernuXina sei apoiu nafatin Instituisaun Polisia Nasional Timor Leste (PNTL) hodi fo kapasitasaun ba membru PNTL iha área Marítima, Fronteira no uniade seluk tan.

Informa Komandante Jerál PNTL, Komisáriu Julio da Costa Hornay ba Jornalista sira hafoin simu vizita kortezia ne’ebe hala’o husi Embaxador foun Xina iha Timor Leste Liu Hongyang ho nia kometiva iha Kuartel Jerál PNTL, Caicoli-Dili loro sesta (14/08/2015.

“Ha’u hanesan Komandante Jerál, aproveita ho vizita ne’e hakarak hato’o agradese ba Govenru Xina ne’ebe durante ne’e fo apoiu ba PNTL hodi autoriza ami ba partisipa iha formasaun kona-ba servisu polisial nian iha Nasaun Xina, iha futuru mai sira mos hakarak fo apoiu nafatin saida mak PNTL presija relasiona ba formasaun nian,” afirma Komandante Jerál Hornay.

Entertantu formasaun ne’ebe durante ne’e membru PNTL tuir ona iha Nasaun Xina mak husi Unidade Polisia Marítima, Unidade Patrullamentu Fronteira nomos seluk tan.

Eis Komandante Centru Formasaun Polisia ne’e hatutan, vizita kortezia ne’ebe Embaxador foun Xina iha Timor Leste Liu Hongyang hala’o mai Komando Jerál PNTL atu hatene mos kona-ba situasaun em jerál iha rai laran.

“Embaxador foun Xina nian mai halo vizita kortezia PNTL, primeiru só mai informa deit hanesan embaxador foun, segundu informa mos kona-ba ninia komunidade Xineza ne’ebe agora dadaun hala’o ninia atividade iha Timor Leste no Embaxador mos agradese ba polisia tamba bainhira nia komunidade Xineza ne’ebe hela iha Timor Leste hasoru problema ruma, polisia mak sempre halo atuasaun, no terseiru mak atu hatene kona-ba situasaun em jerál iha ita nia rain,” tenik Komisariu Hornay. Média PNTL.

Dili– Relasiona ba naran kadetes rekruta sira ne’ebe fo sai husi komisaun rekrutamentu Polisia Nasional Timor Leste ba faze segundu nian katak iha rekrutadu hamutuk 233 mak naran la iha lista publikasaun ne’e, ho ida ne’e katedes rekrutadu sira hala’o protesta no halo konferensia imprensa hasoru Komisaun rekrutamentu PNTL, no Ministru Interior.

Ho kestaun ne’e, Segundu Komandante Jerál PNTL, Komisáriu Faustino da Costa hateten Komando PNTL sei hato’o proposta ba parte Governu hodi bele preve orsamentu ba kadetes rekrutadu sira hamutuk na’in 233 (atus rua tolunulu resin tolu) ne’ebe nia naran seidauk publika sai.

“Prosesu rekrutamentu ne’e ita halo iha tinan 2 ba kotuk, vaga lolos ne’e 520 pessoas, husi vaga ida ne’e halo konkursu aplikantes mais de 13.000 (Treze mil) mak sira aplika ba prosesu ida ne’e, no ikus liu ita konsege hetan ba ema ne’ebe pasa mak hamutuk 755. Tuir kapasidade ne’ebe iha, na’in 520 ne’e ami fahe ba faze 2. Faze I hala’o dadauk no hein halo sira nia graduasaun, sira hamutuk 260 maibe nain 2 elimina no faze segundu hamutuk 262 nune’e kompleta vaga ne’ebe fo sai iha Jornal da Repúblika hamutuk 520 pessoas. Ho nune’e rezervadu hamutuk 233 pessoas ne’ebe agora dadauk ami halo fali proposta ba Governu atu preve mos orsamentu ba sira iha faze formasaun tuir mai,” afirma Komisariu Faustino iha nia kna’ar fatin Kuartel Jerál PNTL, Caicoli-Dili, loron Kinta (13/04/2015).

Kona-ba preokupasaun ne’ebe hato’o husi kadetes rekruta rezervadu katak, komisaun halo failansu hodi hili balun ne’ebe valor kiik liu no balun ne’e ho valor boot la liu, Komisáriu Faustino esplika katak ida ne’e iha rekrutamentu termina katak kada rekrutamentu minimu iha 15% ba feto, iha rekrutamentu ne’e maioria mane, tamba ne’e mane bele valor boot, no feto valor ki’ik, maibe haree mos ba igualdade jéneru, feto ne’ebe valor kiik nia iha oportunidade boot hodi liu, no ida ne’e mak Komisaun halo la’os tuur naran hili de’it.

Hatan kona-ba posibilidade lista rezervadu sira atu tama polisia iha tinan oin, Segundu Komandante Jerál Faustino hatutan, ida ne’e depende ba proposta ne’ebe Komando sei hato’o ba Governu atu bele preve ba orsamentu.

Tamba ne’e Komisáriu Faustino husu ba kadetes rekruta ne’ebe naran iha lista rezervadu katak, mantein sira nia-an hanesan kandidatu ba polisia, labele halo krime, tamba karik loron ida Instituisaun hakarak notifika sira para mai atu partisipa iha formasaun baziku, sira mai sei chek fali parte 2 mak hanesan krime no saude, tamba ne’e kuidadu saude no labele komete iha krime.

Entertantu, ba kadetes rekrutadu sira ne’ebe agora dadaun naran publika ona atu tuir formasaun iha segundu faze, tenke ba aprezenta-an iha Sentru Formasaun ba Polisia Comoro-Dili husi loron 21 Agostu to’o loron 24 Setembru 2015 hodi halo teste médiku molok hahú prosesu formasaun. Média PNTL.

Dili– Polisia Nasional Timor Leste sei fó seguransa másimu ba Serimonia Komemorasaun Aniversáriu tinan 40 FALINTIL ne’ebe sei selebra iha Munisipiu Dili no Aileu.

“Ami seguransa prontidaun atu asegura seguransa ba serimonia loron importante ida ne’e, no povu mos prontidaun atu partisipa ho avontade no partisipa ho laran hodi rona istória ne’e, atu nune’e aban bain rua ita bele hatutan fila fali ba ita nia oan sira hodi hatene kona-ba ita nia loron istóriku ne’e,” afirma Komandante Jerál PNTL, Komisáriu Julio da Costa Hornay ba jornalista sira iha ninia kna’ar fatin Kuartel Jerál PNTL, Caicoli-Dili loron Kinta (13/08/2015).

Kona-ba rumoris ne’ebe hateten, sei iha ema balun ne’ebe hakarak atu provoka situasaun iha komemorasaun loron refere, Komandante Jerál PNTL Hornay hateten, loron 20 Agostu ne’e atu selebra loron istoriku ne’ebe mak hariii nasaun ne’e, tamba ne’e Timor Oan hotu tenke orgullu hodi partisipa ho kontente la’os ho problema.

“Loron 20 de Agostu ne’e ita atu selebra loron istoriku ne’ebe mak hariii nasaun ne’e, ne’ebe ita hanesan Timor oan ita orgullu ho loron importante ida ne’e partisipa ho kontente, laos partisipa ho problema, ita selebera loron ne’e para atu fo hanoin fila fali ba jerasaun foun sira bele hatene loron istoriku ne’e, atu nune’e aban bain rua ita hatutan ba ita nia oan no bei-oan sira, atu sira nia espiritu nasionalizmu forte atu kaer metin rai ida ne’e,” tenik Hornay.

Entertantu tuir ajenda komisaun organizadora komemorasaun 20 de Agostu katak, serimonia refere sei realiza iha loron kinta feira (20 Agostu) iha Tasi-Tolu Munisípiu Dili ho atividade oin-oin, nomos iha Munisípiu Aileu. Média PNTL.

Dili– Tuir ejijensia ne’ebe hato’o husi eis deputadu Cornelio Gama “L7” nuudar Maun husi Matebian Paulino Gama “Mauk Moruk” katak Operasaun Konjunta ne’ebe hala’o husi Polisia Nasional Timor Leste no Falintil Forsa Defeza Timor Leste hamate ka oho nia alin Mauk Moruk, ho nune’e familia ejiji ba Estadu atu fó kategoria saida ba Mauk Moruk, katak mate hanesan ema veteranu ida ka oinsa.

Kona-ba kestaun ne’e Komando Empeñamentu Operasaun Konjunta (EOC) laiha kompeténsia atu fó kategoria ba Mauk Moruk tamba EOC kumpri deit rezolusaun ka ordem husi Parlamentu Nasional, ne’ebe Diretiva husi Governu no hetan promulga husi Prezidente Repúblika.

“Ba ami laiha kompetensia atu koalia kona-ba ida ne’e, husu ba Governu kategoria saida mak fo ba Mauk moruk, ba ami laiha kompetensia atu responde, so pollitiku sira, hanesan mos operasaun politiku sira haruka mak ami retira, ami iha ne’e para kumpri deit, iha mundu ne’ebe deit militar so iha poder atu empeña bazeia ba ordem, tamba ne’e ita nuudar Timor oan ita tenke iha sentidu de Estadu, Estadu iha mundu primeiru mak Maromak segundu mak Estadu, liu ida ne’e laiha ona, tamba ne’e mak ita labele halimar ho Estadu,” afirma Xefe Estadu Maior F-FDTL, Major Jeneral Lere Anan Timur ba jornalista sira liu husi konferensia imprensa ne’ebe hala’o iha Kuartel Jerál F-FDTL Fatuhada-Dili, loron Kuarta (12/08/2015), ne’ebe akompaña mos husi Komandante Jerál PNTL Komisáriu Julio da Costa Hornay.

Major Jeneral Lere Anan Timur hatutan, Estadu liu husi EOC tenta buka meius oi-oin atu Mauk Moruk entrega-an deit ba EOC hodi ba hatan iha Tribunal ba aktu krime ne’ebe Mauk ho nia grupu sira halo hasoru forsa no seguransa estadu nian, maibe Mauk Moruk rasik mak lakohi koopera no halo reasaun nafatin hasoru membru KOK iha terreinu hodi rezulta membru KOK balun hetan kanek.

“Hafoin Mauk Moruk mate ema komesa koalia barak-barak katak Ha’u (Major Lere.red) Prezidente Taur, ho eis PM Xanana mak oho, ha’u dehan ba ita boot sira katak ami mos lakohi Mauk Moruk mate, ami tenta halo esforsu tomak hodi Mauk mai intrega-an deit, maibe nia rasik mak lakohi koopera ho ami, no halo reasaun nafatin bainhira ami nia membru KOK hasoru nia, no ikus mai liu husi kontaktu tiru malu ne’e nia mate, ida ne’e konsekuénsia no ita tenke simu realidade,” afirma Major Lere.

Iha konferénsia imprensa ne’ebe Komando EOC hala’o, fo sai mos kronolojia akontesimentu molok Mauk Moruk ho nia elemntu nain 3 mate hafoin halo kontaktu tiru malu iha loron 5 no 8 fulan Agostu 2015. Média PNTL.

Lori KOK nia naran ami relata kronolojia ne’ebe atake husi Mauk Moruk ho nia elementu sira hasoru membru KOK iha dia 5/08/15 iha Aldeia Osso-Wake Suku Fatulia Postu Adminitrativu Venilale Munisipiu Baucau. No atake husi grupu hanesan iha loron 8 Agostu 2015 iha Aldeia Uatulibu Suku Uatu Haco Postu Administrativu Venilale Munisipiu Baucau.

Iha loron 5 Agostu dader, komunidade sira informa mai postu polisia venilale katak hetan Mauk Moruk ho nia elementu nain 4 la’o tama mai komunidade nia to’os hodi buka hahan.

Tamba komunidade sira tauk ho situasaun operasaun, mak sira kumpri sira nia obrigasaun nuudar sidadaun hodi informa ba operasaun konjunta. Hafoin ne’e komando postu tatiku destaka kedas grupu 2 ba área refere hodi monitoriza no akompaña ba situasaun Mauk Moruk ho nia elementu sira.

1 grupu enkamiña ba Diresaun foun Mundu Perdidu, 2 grupu lidera husi 2 sarjentu Gauterus no Ajente Polisia Nelson Amaral enkamiña ba área Osso-Wake.

Maisoumenus Iha oras 12.00 meiudia, 2 sjt Gauterus no Ajt. Nelson nomos ho komunidade lokal balun okupa foho Osso-wake hodi halo observasaun. Iha momentu ne’eba grupu ida ne’e hasoru malu kedas ho Mauk Moruk ho nia elementu na’in 4 (hat) iha foho lolon.

2 sjt. Gauterus nuudar mos veteranu ida fo atensaun kedas ba Mauk Moruk hodi para no labele reajen hodi tuur koalia. Momentu ne’eba Mauk Moruk lori lian “Makasae” hodi tolok sarjentu ne’e no tiru hasoru kedas sjt. Gauterus no Ajt. Nelson, aleinde nia tiru, Mauk nia elementu molok atu halai sira konsege soe “Marotok” ida ho intensaun hodi hadau membru nain 2 nia kilat, maibe lakonsege kona membru KOK, no sira nain 2 membru KOK monu ba rai tamba hetan tiru husi Mauk Moruk, mak sira responde tiru hodi halo sira nia auto defeza.

Rezultadu husi kontaktu tiru ne’e rezulta Mauk Moruk kanek no konsege halai sai, no nia membru ida naran Domingos Soares mate iha fatin ka iha konfrontasaun ida ne’e.

Liu tiha 30 minutu, grupu apoiu husi KOK to’o kedas fatin akontesimentu hodi evakua membru KOK nain 2 ne’ebe kanek todan ba Aldeia Osso-wake, no halo kedas serku ba área akontesimentu.

Iha loron 8 fulan Agostu iha oras 15.00 PM membru KOK simu informasaun husi komunidade katak Mauk Moruk ho nia elementu na’in 3 (tolu) halo movimentu iha foho lolon, membru ne’ebe halo serku iha área refere halo kedas observasaun no hetan duni Mauk Moruk ho nia membru sira. Kapitaun grupu tátiku informa kedas ba komando Operasaun.

Komando Koronel Falur Rate Laek kontaktu kedas ba Sra. Angela Freitas para konvense husi telefone hodi Mauk Moruk bele intrega an, maibe nia rezultadu negativu.

Forsa iha terreinu tenta halo esforsu tomak hodi husu Mauk Moruk atu para no intrega-an, maibe infelizmente Mauk Moruk hateten katak, “nia sei la intrega-an” no la kleur deit Mauk Moruk responde kedas ho tiru, bainhira rona tiru husi Mauk Moruk halo forsa ne’ebe halo serku ne’e kontra kedas ho tiru, no rezulta Mauk Moruk ho nia elementu na’in 2 (rua) mate kedas iha fatin, no nia membru ida naran Sergio Boy hetan kanek no EOC konsege kaer moris. (Fontes Komando EOC liu husi Konferensia Imprensa ne’ebe hala’o iha Kuartél Jerál F-FDTL, Fatuhada-Dili, loron Kuarta (12/08/2015).

Dili- Polisia Nasional Timor Leste sem pursentu (100%) prontu atu fo seguransa ba prosesu funebre Prezidente Konsellu Revolusionariu Maubere (KRM) Paulino Gama “Mauk Moruk”, hahú husi Dili ba to’o iha Postu Administrativu Laga, Munisípiu Baucau.

Lia hirak ne’e hato’o husi Komandante Jerál PNTL Komisáriu Júlio da Costa Hornay ba jornalista sira iha Kuartél Jerál F-FDTL Fatuhada-Dili, iha konferénsia imprensa Komando Empeñamentu Operasaun (EOC), loron Kuarta (12/08/2015).

“PNTL prontu sem pursentu hodi fó seguransa ba prosesu funebre mate isin Mauk Moruk,” tenik Komisáriu Júlio Hornay.

Iha parte seluk, Komandante PNTL Munisípiu Dili Superintendente Xefe Pedro Belo hateten, situasaun seguransa liu-liu iha Munisipiu Dili la’o hakmatek bainhira Prezidente KRM Mauk Moruk mate, komunidade sira tuur hakmatek no hala’o nia atividade hanesan bai-bain tamba ida ne’e kontribuisaun husi komunidade sira.

“Ha’u hakarak hato’o parabens no agradese ba lider komunitariu sira, polisia komunitariu sira nomos ba komunidade tomak iha Munisipiu Dili, ne’ebe durante ne’e fó apoiu maka’as ba polísia mak ohin loron Mauk Moruk mate iha ne’eba, ita hotu moris iha situasaun ne’ebe hakmatek no hala’o ita nia atividade ho di’ak, karik ita boot sira mak la apoiu, oinsa? Susar atu kontrola bainhira mosu situasaun ne’ebe ladiak, maibe ho ita boot sira nia apoiu informasaun mak situasaun seguransa la’o di’ak.”

Tamba ne’e husu ba komunidade tomak atu apoiu nafatin no koopera ho polisia komunitaria sira atu nune’e bele asegura paz no seguransa iha ita nia Nasaun liu-liu iha Munisípiu Dili.

Afirma Komandante Pedro Belo bainhira loke abertura ba enkontru harii KDD Munisípiu Dili nian iha salaun Komando PNTL Munisípiu Dili, loron Kuarta (12/08/2015). Média PNTL.