News

Dili, Komandu Polísia Nasional Timor-Leste (PNTL) munisipiu Dili kaptura ona suspeitu ba kazu Asaltu neébe maka akontese iha Bekusi Kraik iha loron 11 fulan Jullu tinan neé no kazu Ofensa Integridade Fisika Simples (OIFS) no Arma Branka neébe akontese iha loron 11 fulan Jullu iha area Bidau Santa-Ana, oras neé dadaun iha ona prosesu investigasaun.

Porta Voz Komandu PNTL Superintendente Xefe Armando Monteiro liu husi Konferensia Imprensa kinta-feira (14/07) neé hateten husi akontesimentu neé Komandu PNTL munisipiu Dili hola ona medida Polisial no suspeitu submete ona ba prosesu investigasaun.

“Enkuantu kazu seluk mós neébe akontese iha munisipiu Viqueque hanesan kazu Asaltu no OIFS neébe maka rezulta ita nia sidadaun na’in rua sai vitima no atuasaun PNTL kaptura ona suspeitu hamutuk naín neen no agora dadaun sei submete hela prosesu investigasaun iha Komandu PNTL minisipiu Viqueque eskuadra Uatulari no tuir agenda aban (15/07) sei submete ba prosesu Primeiru Interogatoriu iha Tribunal Distrital Baucau”, esplika Porta Voz Komandu PNTL neé.

Superintendente Xefe neé esplika kronologia kazu ne’ebe akontese iha Uatulari tanba mosu dezentendimentu (Miss-Komunikasaun) iha serimonia kultural ida hafoin la kontrolu ann tanba domina ho Alkolíku to’o ikus hamosu konflitu no rezulta ema na’in rua sai vitima. Ho operasaun polisial kontinua lao, apoiu husi Unidade Espesial Polisia (UEP) kompañia ne’ebe destakadu iha ne’eba hamutuk ho ekipa Task Force normaliza situasaun no agora dadaun komunidade fila fali normal hodi hala’o sira nia aktividade.

“Situasaun seluk ita nia vizilansia kontrolu movimentu ema no sasan iha fronteira husi Unidade Patrullamentu Fronteira (UPF) mós impede, prevene no kaptura ita nia sidadaun Timor oan tantu mós sidadaun nasaun viziñu ne’ebe maka halo aktividade kontra bandu no deskaminha iha area operasional kompañia Alfa-Maliana nian ne’ebe maka impede sasan kontra-bandu no deskaminha hanesan Mina, sasan kultural nian ne’ebe ho kuantidade bo’ot tantu mós ita nia rikeza Aikameli ne’ebe maka tenta atu lori hakat liu fronteira ba nasaun viziñu iha area jurídiku Komandu PNTL munisipiu Bobonaro ninian”, hatutan Superintendente Xefe neé.

Xefe Gabinete Relasaun Públika PNTL ne’e informa liu tan katak iha parte area operasional Kompañia Bravo Suai ninian halo operasaun kontrolu ema no sasan hodi kaptura ita nia sidadaun na’in rua ne’ebe tenta atu halo aktividade iha area Besuk Tilomar nian. Enkuantu iha area operasional kompañia Charlie parte Naimeco Panta Makasar ninian halo kapturasaun no impedimentu ba iha aktividade kontra bandu no deskaminha hodi kaptura mós sidadaun na’in rua ho insial RA no AT. Kazu hirak ne’e, parte UPF aprezenta ona ba Komandu PNTL munisipiu idak-idak hanesan Bobonaro, Covalima no RAEOA; evidensia hirak ne’ebe prende oras ne’e dadaun iha ona Ministeriu Públiku (MP) nia liman.

Media PNTL.

Dili, 08 jullu 2022 (SRP) – Hafoin dezenvolve kazu krime tuda rahun karreta hodi naok sasán iha kapitál Dili, Polísia Nasionál Timor-Leste (PNTL), liuhosi Servisu Informasaun Polísia (SIP), kaptura tán suspeitu ho naran inisiál JDJ, tinan 18, hosi Suku Poetete, Munisípiu Ermera, ne’ebé envolve krime jerál ba kazu baku rahun karreta kor silver ho xapa matríkula 29-291 iha loja planet printing Audian iha loron 26 fulan juñu 2022.

Suspeitu JDJ, SIP halo vizilánsia durante oras 6 nia laran no kaptura iha oras tuku 9 kalan loron kinta, 7 jullu 2022, wainhira pasa tempu hamutuk ho nia doben ho naran inisiál EdS iha area jardin “Largo de Lecidere”, iha Bidau-Lecidere.

Suspeitu JDJ deklara, nia hamutuk ho suspeitu LVM ne’ebé maka kaptura ona iha horisehik maka tuda rahun karreta inklui naok sasán hanesan Laptop 1 iha area Audian, motor 1 iha area Delta Comoro no-mós naok telemovel ida iha area Audian ho marka Samsung A11, maibé telefone refere suspeitu JDJ ho nia doben EDS fan tiha ona ba ema iha merkadu Taibesi, no motor ne’ebe mak naok iha Delta Comoro agora dadaun sei iha hela autor prinsipál ne’ebé antes ne’e sira ba naok hamutuk.

Hafoin rona deklarasaun hosi suspeitu JDJ ho nia doben, SIP intensifika vizilánsia hodi buka tuir tan autor prinsipál ba kazu refere no identifika ona suspeitu seluk tán ne’ebé nakait ho kazu naok motor ne’ebé akontese iha tinan kotuk.

Oras ne’e daudaun suspeitu JDJ SIP entrega ona ba SIKN (Servisu Investigasaun Kriminál Nasionál), hodi kontinua halo investigasaun, enkuantu EDS, ekipa lori fila ona ba nia uma. Media Serviços Relações Públicas

Dili, 07 jullu 2022 (SRP) – Polisia Nasional Timor-Leste (PNTL), liu hosi Servisu Informasaun Polisia (SIP), detein suspeitu ho naran inisial LVM, tinan 25 hosi Munisipiu Ermera, hela iha Aldeia 01 Suku Caicoli, Postu Administrativu Vera-Cruz, Munisipiu Dili ne’ebe envolve krime jeral ba kazu baku rahun kareta no foti sasan iha Kapital Dili.

Suspeitu LVM, PNTL kaptura iha Bairo dos Grilhos no iha fatin akontesementu suspeitu deklara nia mak baku rahun no foti duni laptop ida iha areadores Cristo Rei, baku rahun kareta Dilicious no foti laptop no telfone ida iha area Sporting kruzamentu BNU tun ba Porto Dili inklui telefone ida, enkuantu iha area Audian no Culuhun baku rahun kareta maibe la konsege foti sasan.

Hafoin halo kapturasaun, SIP diretamente entrega kedas ba SIK (Servisu Investigasaun Kriminal) Nasional, hodi halo prosesu investigasaun no entrega ona ba Komandu Munisipiu Dili hodi halo detensaun durante 72h, antes submete ba tribunal hodi tuir porsesu julgamentu.

Antes ne’e suspeitu LVM tama ona prizaun iha tinan 2017 no sai iha tinan 2021 tanba komete kazu naok iha Audian.

Operasaun ida ne’e realiza tanba halo ona koordenasaun ho autoridade judisiaria kompetente no oras ne’e daudaun Komandu PNTL hatun ona diretiva ba Komandante SIP hodi intensifika buka tuir autor sira seluk ne’ebe envolve ho kazu hanesan. Media Serviços Relações Públicas

Dili-Polisia Nasional Timor-Leste (PNTL konklui Planu Asaun Anual (PAA) tinan 2023 neébe maka halo diskusaun durante loron tolu (04-06) nia laran hodi submete planu atividade no programa ba governu.

Xefe Departamentu Administrasaun no Planeamentu (DAP) Superintendente Polisia Calisto Gonzaga hateten diskusaun ba Planu Asaun Anual neé sempre halo kada tinan iha tinan klaran  no ba tinan ida neé ita halao iha fulan Jullu tanba foin lalais ita hetan instrusaun husi governu da VIII katak sei hatama ita nia planu ba tinan ida neé aban (07/07) no tuir kalendariu Ministeriu Finansas nian ita sei hetan tetu orsamental iha loron 15/07 ba leten, Nia hatoó asuntu neé ba Jornalista sira iha Sentru Formasaun Polisia Komoro Dili, kuarta (06/07).

Nia haktuirtan hafoin finaliza sei tama submisaun kuandu ita simu ona tetu fiskal ida neé. Iha diskusaun neé komponente 10 kompletu ho rejiaun hirak neébe maka ita fahe tia ona nia ema hotu iha neé toó loron ohin sira mantein toó ita ensera.

Liu husi diskusaun neé ita defini prioridade rua maka hanesan planu regular neébe maka ita submete hodi traballa makina instituisaun PNTL nian, no ida seluk maka urjente liu ba tinan 2023 Eleisaun Parlamentar no Eleisaun Suku ida neé maka Ami diskuti hela no Komandante Komandu Operasaun aprejenta ninia planu atu asegura no garante eleisaun rua neé, ho nesesidade barak neébe maka dalaruma ami aponta ho programa anual dalaruma la toó nuneé ami sei husu orsamentu adisional.

Iha okajiaun neé Komandante Jeral PNTL Komisariu Polisia Faustino da Costa hateten durante loron tolu nia laran Komandante sira halo esforsu makaas no ohin loron ikus ita finalija ita nia planu asaun husi ida neé maka ita sei hetan orsamentu bazeia ba ita nia programa,liu-liu prioridade ba tinan oin neébe kualker atividade kampaña no Eleisaun sei lao diak nuneé saida maka Komandante munisipiu no unidade sira nesesita ba tinan oin ita koloka agora iha ita nia PAA 2023.

“Programa prioridade ba tinan oin maka Atividade Polisiamentu Komunitaria, Redusaun Asidente Viasaun, Kontrola Movimentu Vituras Husi Estranjeiru neébe maka tama sai fronteira no hametin seguransa iha fronteira,” dehan Komisariu Faustino.

PNTL tenke servisu makaas hodi redus asidente trafiku neébe kada fulan rejulta ema barak mate, kordena no kontrola movimentu viaturas husi estranjeiru neébe tama sai fronteira nuneé bele aumentu taxa no hametin seguransa iha area fronteira neébe metin kompleta ho manera saida oinsa atu asegura katak fronteira tenke seguru, atividade ilisitu (ilegal) tenke redus tanba governu legalija ona arte marsiais hodi halo nia atividade hotu-hotu iha ita nia rai signifika pasa ilegal fronteira tenke menus.

Iha biban neé lideransa maximu instituisaun seguransa neé aviza ba Komandu UPF, Komandu munisipiu rua (Bobonaro, Covalima) no RAEOA atu identifika atividade saida maka atu halo hodi asegura atu labele iha atividade ilegal tanba situasaun ekonomia inpaktu husi funu entre nasaun Rusia no Ukrania afeta teb-tebes ba ita no halo folin sasan nesesidade baziku sae, iha momentu sasan folin sae maka atividade negosiu ilegal iha fronteira bele buras tanba neé maka ita asegura no sai hanesan foku ka alvu no tarjetu ida atu redus, Nuneé mos munisipiu espesial Atauro tanba Kisar mos besik hela nuneé Ikan, Minarai no nesesidade sira seluk mos bele mai husi tasi sorin.

Diskusaun PAA 2023 neé halo abertura iha Kuartel Jeral PNTL no kontinua diskusaun durante loron rua iha CFP ho partisipa husi Komandante munisipiu 14 no RAEOA, Komandante Unidade Xefe Gabinete, Xefe Departamentu no pontu fokal sira. Media PNTL

Dili- Polisia Nasional Timor-Leste (PNTL)-Departamentu Tranzitu Seguransa Rodoviariu Nasional (DTSRN) halao reuniaun periodika ho Komandante Komandu Operasaun no Xefe Tranzitu munisipiu, RAEOA no postu integradu rua(2) hodi transmite informasaun husi Komandante Jeral ba servisu tranzitu hodi hadia performansia no profesionalismu.

Xefe (DTSRN) Superitendente Assistente Polisia Albino Mauzino hateten Reuniaun ohin periodika hamutuk ho hau hanesan Xefe DTSRN foun tuir intensaun Komandante Jeral nian atu halo mudansa, transformativu no modernativu iha instituisaun PNTL iha servisu lor-loron nian hodi servi komunidade ho professional, Nia hato’o asuntu ne’e liu husi reuniaun iha Kuartel Jeral PNTL Kaikoli Dili, sexta (01/07).

Nia hatutan Orientasaun ida neé nudar motivasaun ida hodi tau iha ita nia kakutak no hanoin tomak hodi dezenvolve DTSRN hanesan espelu ida para ema hotu bele hare no orienta ita hodi   halo servisu.

Espetativa povu nian atu moris ho hakmatek no seguru nomos hetan atendmentu ne’ebe maka diak husi ninia Polisia ne’ebe professional.

Iha abertura reuniaun neé Komandante Komandu Operasaun Superintendente Xefe Pedro Belo hateten reuniaun ida neé inportante tebes hodi nuneé bele transmite nafatin informasaun neébe maka dalaruma iha mudansa iha terrenu iha programa ruma neébe maka sai husi Komandante Jeral entaun ita tenke nafatin iha kontaktu.

Nia hatutan iha ajenda enkontru konaba performansia no disiplina iha terrenu tanba Tranzitu maka sai ezemplu, modelu no matadalan ba PNTL hotu-hotu tanba lor-loron komunidade hare Polisia Tranzitu iha estrada publiku nune’e ema hare husi ain to’o fuk tanba ne’e maka  Imi tenke kuidadu no hare performansia no etika komunikasaun tanba komunidade kestiona konaba ita nia etika komunikasaun wainhira ita koalia ba ita nia komunidade motorista sira tanba dalaruma ita hakilar deit, tolok no tebe ema nia kareta ne’e labele maibe tenke koalia mamar no aplika deit infrasaun tuir Lei Tranzitu no bainhira koalia maka komunidade la rona lei hakerek klaru katak Desobidensia.

“Servisu didiak hodi PNTL nia naran morin bai ha komunidade no sosedade nia le’et,” dehan Komandante Operasaun.

Husu ba membru sira atu nafatin koopera ho imi nia Komandante foun no wainhira imi hasoru problema konsulta ho Hau tanba Departamentu Tranzitu Seguransa Rodoviariu  iha Komandu Operasaun nia okos tanba ne’e maka kualker saida deit maka lao tenke iha konsultasaun para it a  bele lao diak liu tanba ne’e maka iha programa ida ne’ebe maka ami halo kada semana rua Departamentu hotu ne’ebe iha Komandu Operasaun nia okos sei iha reuniaun avaliasaun no aprejentasaun atividade ne’ebe maka halo tia ona no planu atividade ba semana rua tuir mai atu halao hodi identifika nia problema no buka dalan atu rezolve nune’e ita sai tranzitu ida ne’ebe maka professional.

Reuniaun loron tomak ne’e hetan partisipasun maximu husi Xefe tranzitu munisipiu 13, RAEOA no membru sira. Media PNTL