Komandu PNTL Rezista Asidente 20 No Insidente 4 Iha Períodu Eleisaun Presidensial Segundu Ronde

IMGL9204

Dili, Komandu Polísia Nasional Timor-Leste (PNTL) liu husi Xefe Gabinete Relasaun Públika iha kuarta-feira (20/04) ne’e Superintendente Xefe Armando Monteiro aktualiza situasaun seguransa jerál,  hahu’u parada deslokasaun,  eskoltu no seguransa distribuisaun Material Sensitivu no Non Sensitivo husi Orgaun Eleitoral iha 12 munisipiu no RAEO, deslokasaun ba iha  1.191 Sentru Votasaun no 1.491 Estasaun Voto, seguransa ba Eleisaun Presidensial, seguransa ba kontajen rezultadu eleisaun, eskoltu no lori Urnas mai apuramentu Munisipal, lao ho kalma no hakmatek to’o ohin loron, maske PNTL rezista insidente,  asidente no krime balun maibé la afeita ba estabilidade no seguransa em jerál.

“Komandu Jerál PNTL hato’o obrigado no agradese wa’in ba sidadaun Timor oan hotu, STAE, CNE, Brigada, Fiskais, Observadores, Media Nasional no Internasional ne’ebe kobertura direkta, ekipa susesu kandidatura Presidente Repúblika nia kontribuisaun no kolaborasaun diak tebes, durante prosesu kampaña to’o eleisaun lao ho diak, hodi ita hotu ezerse ita nia direitu, iha eleisaun Presidensial ida ne’e ho livre, justu, seguru, pásifika, transparante no demokratiku”, tenik Porta Voz Komandu PNTL ne’e.

Superintendente Xefe ne’e nafatin apela ba sidadaun hotu hodi alerta no informa ba autoridade lokal, autoridade seguransa ne’ebe besik hela ho ita, bainhira iha indikasaun krime ou movimentu individu ou grupu balun ne’ebe mak tenta kria instabilidade iha periodu Eleisaun Presidensial 2022 hodi nune’e PNTL ho instituisaun seguransa estadu hodi hola medida preventiva no represivu imediata. PNTL husu nafatin ba sidadaun Timor oan hotu hamutuk, kria paz, unidade, amizade, promove ita nia identidade, kultura, haburas demokrasia, hodi kontribui estabilidade, seguransa no desenvolvimentu nasional.

“Hahu’u husi loron 18 to’o loron 20 fulan Abril tinan ne’e PNTL rezista kazu balun ne’ebe maka agora dadaun sei iha prosesu investigasaun hanesan kazu iha Hera-Dili, kazu Makadiki-Uatulari Viqueque no mós Loehunu-Ossu Viqueque, kazu sira seluk ne’ebe maka laiha ligadu hanesan kazu inséndiu balun ne’ebe maka akontese no krime seira seluk ne’ebe akontese iha periodu eleisaun ida ne’e hanesan iha munisipiu Ermera-Hatulia tantu mós iha Nitibe-Oecusse”, esplika Superintendente Xefe ne’e.

Porta Voz Komandu PNTL ne’e afirma tan akontesimentu hafoin eleisaun ne’e lao, iha tentativa perturbansia aktu eleitoral wainhira kontajen ne’e lao no hafoin momentu balun ne’ebe maka tenta atu halo impedimentu ba prosesu kontajen ida ne’e, iha Sentru Votasaun ida iha Makadiki hafoin ita nia presidente da mesa husu autoridade seguransa atu halo intervensaun maibé husi intervensaun ida ne’e hetan reasaun no PNTL nian transporte ida maka hetan estragus no suspeitu na’in rua kapturadu agora submete hela prosesu iha Komandu PNTL munisipiu Viqueque. Ida seluk akontese iha area Viqueque nian, maibé problema Violensia Domestika iha ne’ebe oan no aman tenta atu halo omésidiu nune’e husu protesaun ba autoridade seguransa ne’ebe maka destaka hela iha Estasaun Votus, situasaun refere PNTL konsege atúa no kazu ida ne’e laiha ligasaun ho prosesu eleisaun ninian.

“Kazu seluk maka akontese iha Dili parte Hera nian iha loron 18 kalan, iha tentativa ida ne’ebe maka halo ataka ba ita nia polin staf ida iha Sentru Votasaun, ho kazu ida ne’e mós iha intervensaun maibé vitima ninia transporte hetan estragus no kazu ne’e iha ona prosesu investigasaun Komandu PNTL munisipiu Dili; kazu seluk iha Oecusse parte Nitibe sei iha hela prosesu investigasaun tanba komunidade ida ninia uma maka ahi han maibé tanba dok husi asesu públiku seidauk bele hatene motivu husi akontesimentu ne’e”, hatutan Porta Voz Komandu PNTL ne’e.

Media PNTL.    

Komandante Jeral PNTL Husu Membru Sira Asegura Voletin De Votus

IMG_8493

Dili-Komandante Jeral Polisia Nasional Timor-Leste (PNTL) husu ba membru PNTL atu asegura voletin de votus husi nasional toó munisipiu ho seguru atu susuk labele besik no anin mos labele huu.

Komisariu Polisia Faustino da Costa hateten Misaun prinsipal neébe halibur ita hotu iha loron ida ohin maka halo distribusaun material sensitivu no não sensitivu ba munisipiu, autoridade munisipipal nomos ba rai liur nuneé hahu asegura kedas iha fatin ida neé toó aprejentasaun rezultadu ka iha dokumentus balu neébe maka ita hotu sei halibur hamutuk dala idatan iha Komisaun Nasional Eleisaun nasional (CNE-sigla portuges), Nia hatoó asuntu neé iha serimonia distribusaun voletin de votus iha edifisiu STAE Kaikoli Dili, kuarta (13/04).

Nia haktuirtan aproveta oportunidade ida neé katak fahe responsabilidade ba autoridade munisipal no Komandu munisipiu sira toó iha suku no sentru votasaun hotu.

“Ohin Hau hakarak atu dejafia liutan Komandante sira katak laos susuk deit maka labele besik maibe anin mos labele huu kona, katak material sensitivu hirak neé tenke kuida ho maximu,”dehan da Costa

IMG_8461

Ba Komandante PNTL munisipiu no Unidade atu hadia buat neébe sidauk diak iha ronde dahuluk hodi hametin liutan kordenasaun no koperasaun entre entidade no parte hotu hodi garante katak toó apuramentu distrital tenke ho seguru hanesan uluk Komandante Operasaun neébe tur iha ita boot sira nia sorin hatoó katak susuk mos labele besik buletin de votus maka

Autoridade masimu instituisaun seguransa neé husu ba Komandante munisipiu no membru hotu katak nudar eleisaun segunda volta maka karik iha erru no failansu neébe ita hotu enfrenta no hasoru iha tempu hirak liuba aproveta oportunidade ida neé ita bele hadia no halo diak liutan fali.

Serimonia distribusaun voletin de votus neé simbolikamente entrega ba responsavel ba Diaspora hanesan Korea du Sul, Reinu Unidu, Portugal, Melborne, Sidney no RAEOA hafoin kontinua ba munisipiu 13 seluk hodi entrega ba diretur STAE munisipal no akompaña husi Komandante munisipiu sira.

Serimonia neé prezidi husi Diretur Jeral STAE, partisipa husi Ministru Administrasaun Estatal, Prezidente CNE, Komisariu CNE, Prezidente Autoridade, Administrador munisipiu, observador internasional no nasional, Fiskais, Reprezentante husi kandidatu Prezidente Republika nain rua (2) Komandante PNTL munisipiu 14, Reprejentante UNDP no konvidade sira. Media PNTL

 

 

PNTL Rezistu Kazu Asidente Tráfiku Hamutuk 196

IMG_0019

Dili, Komandu Polísia Nasional Timor-Leste (PNTL) iha semana ikus fulan Marsu to’o loron 07 fulan Abril tinan 2022 rezistu kazu Asidente Tráfiku hamutuk 196, husi númeru ne’e ema na’in 10 maka mate iha asidente refere.

Xefe Gabinete Relasaun Públika Superintendente Xefe Armando Monteiro liu husi konferensia ba imprensa sexta-feira (08/04) ne’e iha Kuartél Jerál hateten durante períodu kampaña eleitoral ba segundu ronde ninian ne’ebe hahu’u ona iha loron 02 fulan Abril tinan ne’e, Komandu PNTL rezista kazu asidente no mós insidente ne’ebe maka akontese iha teritoriu nasional. Maibé asidente no insidente hirak ne’e laos sai hanesan impedimentu ba estabilidade seguransa em jerálmente ba ita nia prosesu demokratizasaun eleisaun presidensial nian.

“Husi asidente tráfiku ita rezistu kazu hamutuk 196 no husi kazu hirak ne’e, ita lakon ita nia sidadaun hamutuk na’in 10 durante semana ikus fulan Marsu to’o ohin loron (08/04) no rezulta mós ita nia sidadaun hamutuk hat-nulu resin maka hetan kanek todan no restu kanek kma’an, signifika katak PNTL sei Alerta nafatin ba sidadaun hotu oinsa atu seguru wainhira utiliza transporte iha estrada públik”, esplika Xefe Gabinete Relasaun Públika ne’e.

Superintendente Xefe akresenta tan, iha parte kriminalidade ninian iha kazu balun ne’ebe maka akontese iha Turiskai, semana hirak liu ba fó sai ona tantu mós kazu sira seluk iha terminal Baucau ne’ebe maka ita nia motorista sira halo asaltu ba malu no rezulta estragus Bis parte rua; kazu refere agora dadaun Komandu PNTL munisipiu Baucau halo identifikasaun ba envolvimentu kondutor no motorista iha asaltu ida ne’e hamutuk ema na’in 8.

“Iha parte seluk, kazu Omésidiu Agravadu ne’ebe maka akontese iha loron 07 fulan Abril iha oras tuku 09:30 akontese iha suku Fahilebo, postu administrativu Bazartete, munisipiu Liquiça husi akontesimentu ida ne’e, ita nia sidadaun na’in rua sai vitíma; hafoin akontesimentu ne’e intervensaun Komandu PNTL munisipiu Liquiça liu husi eskuadra Bazartete hola intervensaun imediata ba suspeitu no oras ne’e dadaun suspeitu refere submete hela ba prosesu investigasaun, tuir orariu orsida iha oras tuku 2 meudia aprezenta ona hodi submete ba primeiru interogatoriu iha Tribunal Distrital Dili”, haktuir Superintendente Xefe ne’e.

Eis Komandante Komandu PNTL munisipiu Baucau ne’e agradese ba ekipa susesu tantu mós ita nia militante no apoiante ba kandidatura Prezidente Repúblika ba segundu ronde hanesan Dr.José Ramos Horta no Dr.Francisco Guterres Lu-Olo aktual Prezidente Repúblika ne’ebe lao hahu’u husi loorn 02 fulan Abril to’o loron 07 no ohin lao ho âmbitu ida ne’ebe paz no hakmatek, maske iha lamentasaun, keixa balun mai husi komunidade tantu mós orgaun eleitoral maibé koordenasaun, komunikasaun intensiva PNTL no orgaun eleitoral, ita sei prevene violasaun iha regras eleisaun ninian ne’ebe maka konsagra iha Lei Nu.15/2021 ninian.

Media PNTL.                  

MJ Sei Fasilita Membru PNTL Tuir Formasaun Judisiariu Iha Lian Português

IMGL7632

Dili, Ministeriu Justisa (MJ) sei fasilita membru Polísia Nasional Timor-Leste (PNTL) hodi partisipa iha Formasaun Judisiariu nian iha lian Português durante tinan ida ho balun.

Kinta-feira (07/04) ne’e Vise Ministru Justisa José Edmundo Caetano hasoru malu ho Komandante Jerál Komisariu Polísia Faustino da Costa ne’ebe akompaña husi Segundu Komandante Jerál, Inspetúr Jerál no Komandante Komandu Operasaun hodi koalia kona-ba Formasaun Judisiariu ba membru PNTL iha Centro Formação Judisiário-Ministeriu Justisa.

“Hasoru malu ohin ne’e, relasiona ho formasaun judisiariu ho lian português ba membru PNTL hamutuk na’in lima, ne’ebe maka sei tuir formasaun durante tinan ida ho balun”, hateten Vise Ministru Justisa ne’e.  Hasoru malu ohin

Membru Governu ne’e haktuir tan katak oras ne’e dadaun formasaun ba majestradu judisiariu, ministeriu públiku no defensor públiku nian hahu’u ona, komesa ona halo rekrutamentu ba formador sira husi Portugal ne’ebe maka hahu’u formasaun ho lian português.

“Hau hatu’un ona despaxu ba Diretór Jerál Centro Formação Judisiário ninian atu nune’e bele simu karta ne’ebe maka haruka husi Komandu PNTL hodi permite membru na’in lima hodi partisipa iha formasaun refere, atu nune’e membru hirak ne’e bele aprende lian português iha area jurídiku ninian”, tenik José Edmundo Caetano.

Media PNTL.

 

 

Komandu PNTL Louva Membru Sira Nia Servisu

IMGL7311

Dili, Komandu Polísia Nasional Timor-Leste (PNTL) liu husi Segundu Komandante Jerál Komisariu Polísia Mateus Fernandes hato’o apresiasaun ba membru PNTL hotu nia servisu hodi asegura festa demokrasia Eleisaun Presidensial primeira ronde ne’ebe hala’o ona iha loron 19 fulan Marsu tinan 2022.

Komisariu Polísia Mateus Fernandes hato’o apresiasaun hirak ne’e liu husi ninia intervensaun iha formatura segunda-feira (04/04) ne’e iha Kuartél Jerál no husu atu kontinua mantein servisu diak hirak ne’ebe hatudu ona ba iha eleisaun presidensial segundu ronde ne’ebe tuir planu sei hala’o iha loron 19 fulan Abril tinan ne’e.

IMG_9101

“Maluk sira, situasaun iha ita nia rai laran lao diak, kontroladu tanba ida ne’e ita nia esforsu, ita nia servisu maka’as ho servisu bo’ot ida ne’ebe ita hotu hatene katak foin lalais ita ultrapasa eleisaun presidensial primeira ronde, agora ita tama fila fali segundu ronde, tanba ita hotu nia servisu hamutuk ho ita nia maluk sira iha munisipiu 13 mezmu ita hotu hatene katak Sentru Votasaun hamutuk rihun rua resin iha teritoriu, maibé ita hatudu ona ita nia kapasidade, kontribuisaun iha eleisaun primeiru ronde buat hotu lao diak”, tenik Komisariu Polísia ne’e.

Segundu Komandante Jerál haktuir tan ba membru sira katak ita nia komunidade sira ezizi hela ita, hakarak ita hatudu tan iha eleisaun presidensial segundu ronde, tanba ne’e disiplina nafatin, fiar ann nafatin, tuir planu operasaun ida ne’ebe ita nia Komandu Operasaun fahe ba ita tomak.

Media PNTL.

Komandu PNTL Hasai Ona Diretiva Operasional Hodi Asegura Seguransa Kampaña No Eleisaun Presidensial Segundu Volta

IMGL6945

Dili, Komandu Polísia Nasional Timor-Leste (PNTL) hasai ona diretiva Operasional hodi asegura seguransa kampaña no elesiaun presidensial segundu volta nian ba Komandu munisipiu, unidade no mós departamentu sira Komandu Jerál nian.

Komandante Komandu Operasaun Superintendente Xefe Pedro Belo ba jornalista sira sexta-feira (01/04) ne’e hafoin serimonia entrega kareta aluger ba Komandu munisipiu, unidade no servisu sira, hateten Komandu PNTL planu hotu distribui ona ba Komandu munisipiu, unidade, departamentu no xefe servisu sira, oras ne’e dadaun sira tama deit ba halo implementasaun.

“Frakeza hotu ne’ebe maka ami hasoru iha kampaña no eleisaun presidensial primeira ronde ninian ne’ebe hala’o ona, tanba ne’e maka iha avaliasaun ne’ebe ami halo iha loron hirak liu ba (28/03) ami identifika problema lubuk ida, problema ida maka rekursu ne’ebe ami hasoru tanba ne’e maka husi Komandu Jerál iha planeamentu ne’ebe hasai ona katak iha fatin balun ami sei reforsa tan membru sira ba iha munisipiu”, tenik Komandante Komandu Operasaun ne’e.

IMGL6937

Superintendente Xefe akresenta tan katak iha tempu kampaña iha munisipiu balun ne’ebe maka iha primeiru ronde akontese problema tuda no asalta malu, fatin sira ne’e ami identifika ona no fatin foun ne’ebe maka tuir relatoriu intelijen hato’o ba Komandu Operasaun no iha orientasaun lubuk ida ne’ebe maka ami fó ba munisipiu sira hodi koloka membru sira iha fatin risku sira ne’e hodi bele asegura aktividade kampaña bele lao diak, asegura iha tempu eleisaun no mós tempu hafoin eleisaun.

“Ita hotu nia hakarak katak eleisaun segundu ronde bele lao ho diak no hakmatek, tanba oras ne’e dadaun ita tama ona iha tempu kuarezma, hau hanoin katak ita hotu fiar na’in, fiar iha Maromak entaun mai ita lao ho didiak, labele halo problema ba malu maibé kuandu lao, lao tuir ho dalan, respeita regra hotu ne’ebe maka iha”, haktuir eis Komandante PNTL munisipiu Dili ne’e.

Iha orientasaun ne’ebe maka distribui ona ba Komandu munisipiu no unidade katak iha ne’eba maka kuandu ema ruma ne’ebe maka tenta atu halo problema maka iha orientasaun ne’e klaru ona, saida maka sira sei halo iha tempu ne’eba hasoru ema ne’e, sira hatene ona saida maka sei implementa.

Media PNTL.           

Komandu PNTL Halo Re-distribuisaun Kareta Aluger Ba Komandu Munisipiu no Unidade

IMGL6882

Dili, Atu asegura aktividade kampaña no eleisaun presidensial segundu ronde nian, Komandu Polísia Nasional Timor-Leste (PNTL) halo re-distruisaun karete aluger hamutuk 32 ba Komandu munisipiu, unidade no xefe servisu sira Komandu Jerál nian.

Komandante Komandu Administrasaun Superintendente Xefe José Soares hafoin serimonia entrega kareta aluger ne’ebe hala’o sexta-feira (01/04) ne’e ba jornalista sira esplika ita besik tama ona ba loron aktividade kampaña presidensial segundu ronde ninian, tuir orsamentu Komandu PNTL aloka ba iha eleisaun presidensial mai husi governu hamutuk milaun ida resin hodi kobre suplementu ba iha membru PNTL sira ne’ebe maka halo servisu durante kampaña to’o iha eleisaun presidensial ninian.

“Nune’e mós iha orsamentu ida ne’e, rihun ida ba iha kombustivel atu bele fó apoiu ba kareta ne’ebe maka ita aluga, nune’e mós ba iha kareta sira ne’ebe maka apoiu husi patrimoniu estadu (Ministeriu Finansas), hafoin kampaña no eleisaun primeira ronde iha loron rua ba kotuk ita rekolla fali viatura hirak ne’e atu bele halo manutensaun lalais no ohin loron ita halo re-distribuisaun ba iha munisipiu sira”, hateten Komandante Komandu Administrasaun ne’e.

IMGL6934

Superintendente Xefe haktuir tan katak total kareta ne’ebe maka halo re-distribuisaun hamutuk 32 ne’e kareta alugadu, uja orsamentu ne’ebe koloka mai PNTL ho montante rihun atus rua resin ne’e kobre ba kampaña no eleisaun primeira no segundu ronde ninian. No kareta hirak ne’ebe maka apoiu husi patrimoniu estadu (Ministeriu Finansas) hamutuk 36 oras ne’e dadaun iha hela munisipiu no unidade sira hodi halo servisu.

Serimonia entrega kareta aluger hirak ne’e dirije husi Komandante Komandu Operasaun Superintendente Xefe Pedro Belo ne’ebe reprezenta Komandu PNTL akompaña husi Komandante Komandu Administrasaun  ba iha Komandu munisipiu, unidade, departamentu no servisu sira Komandu Jeráll nian.

Media PNTL.  

𝐏𝐫𝐢𝐦𝐞𝐢𝐫𝐮-𝐌𝐢𝐧𝐢𝐬𝐭𝐫𝐮 𝐓𝐚𝐮𝐫 𝐌𝐚𝐭𝐚𝐧 𝐑𝐮𝐚𝐤 𝐛𝐨𝐥𝐮 𝐕𝐢𝐬𝐞-𝐌𝐢𝐧𝐢𝐬𝐭𝐫𝐮 𝐈𝐧𝐭𝐞𝐫𝐢𝐨𝐫 𝐢𝐡𝐚 𝐄𝐳𝐞𝐫𝐬í𝐬𝐢𝐮 𝐧𝐨 𝐊𝐨𝐦𝐚𝐧𝐝𝐮 𝐏𝐍𝐓𝐋-𝐚𝐯𝐚𝐥𝐢𝐚 𝐤𝐞𝐬𝐭𝐚𝐮𝐧 𝐬𝐞𝐠𝐮𝐫𝐚𝐧𝐬𝐚 𝐢𝐡𝐚 𝐄𝐥𝐞𝐢𝐬𝐚𝐮𝐧 𝐏𝐫𝐞𝐳𝐢𝐝𝐞𝐧𝐬𝐢𝐚𝐥 𝐫𝐨𝐧𝐝𝐞 𝐝𝐚𝐡𝐮𝐥𝐮𝐤 𝐧𝐨 𝐩𝐫𝐞𝐩𝐚𝐫𝐚𝐭𝐢𝐯𝐮 𝐛𝐚 𝐫𝐨𝐧𝐝𝐞 𝐝𝐚𝐫𝐮𝐚𝐤

277565434_525546155594263_4237885948602123503_n
𝐃í𝐥𝐢, 𝐥𝐨𝐫𝐨𝐧 𝟐𝟗 𝐟𝐮𝐥𝐚𝐧-𝐦𝐚𝐫𝐬𝐮, 𝐭𝐢𝐧𝐚𝐧 𝟐𝟎𝟐𝟐 — Sua Eselénsia Primeiru-Ministru Taur Matan Ruak, kualidade hanesan mós Ministru Interior, tersa loraik iha Palásiu Governu, konvoka reuniaun ho Vise-Ministru Interior iha Ezersísiu atual Sekretáriu Estadu Protesaun Sivíl (SEPS), Joaquim Gusmão dos Reis Martins, Komandante-Jerál PNTL, Komisáriu Polísia Faustino da Costa no, 2° Komandante-Jerál PNTL, Komisáriu Polísia Mateus Fernandes, hodi halo avaliasaun ba kestaun seguransa iha Eleisaun Prezidensial ronde dahuluk ne’ebé hala’o iha loron 19 fulan-marsu ne’e, no diskute kona-ba preparativu seguransa ba Eleisaun Prezidensial volta daruak iha loron 19 fulan-abril ne’e, hahú hosi kampaña eleitoral to’o prosesu votasaun no kontajen nian.
276286872_525546028927609_190793236882336888_n
“Ohin Sua Eselénsia Primeiru-Ministru konvida mai iha ne’e, ha’u reprezenta Vise-Ministru Interior ne’ebé mak fó hela nia kompeténsia mai ha’u hamutuk Komandante Jeral no Segundu Komandante Jeral PNTL mai atualiza ba Sua Eselénsia Primeiru-Ministru kona situasaun em jerál nomós simu orientasaun husi Sua Eselénsia ba ita-nia eleisaun segunda volta, husi PNTL relata reuniaun ne’ebé mak ita hala’o tiha ona ho ita nia avaliasaun serbisu ba iha ronde primeiru nian nomós preparasaun ba segundu ronde ninian”, dehan Sekretáriu Estadu ba Jornalista sira hafoin enkontru remata.
Governante ne’e rekoñese, iha eleisaun Prezidensial ronde dahuluk, hasoru difikuldade lubuk ida iha termu membru, ekipamentu polisial no viatura sira, maibé ida ne’e la sai obstakulu ba PNTL hodi empeña sira nia funsaun ba garante seguransa no estabilidade iha durante períodu eleitoral, no garante katak eleisaun volta daruak ne’e PNTL sei asegura ho di’ak.
𝐇𝐎𝐓𝐔
#𝐌𝐞𝐝𝐢𝐚𝐆𝐏𝐌

Susesu No Dezafiu Sira Ne’ebe Durante Tinan 22 PNTL Hasoru

Dili, Durante tinan 22 Instituisaun Polísia Nasional Timor-Leste (PNTL) hasoru Dezafiu, Obstakulu no susesu hirak ne’ebe maka atinzi ona. PNTL hari’I iha tinan 2000 no ohin (27 Marsu 2022) halo tinan 22, iha buat barak ne’ebe maka akontese. Susesu hirak ne’ebe bele dehan iha maka aumenta númeru Rekursu Umanu kompara ho pasadu ne’ebe membru limitadu.

Lia hirak ne’e hato’o husi Komandante Jerál PNTL Komisariu Polísia Faustino da Costa iha âmbitu selebrasaun aniversariu PNTL nian ba dala XXII ne’ebe hala’o iha Centro Formação da Polícia (CFP), liga ba saida maka durante ne’e PNTL hasoru.

“Koalia kona-ba Dezafiu saida maka durante ne’e hasoru, dezafiu primeiru maka servisu ne’e rasik tanba servisu polísia nian ne’e, bele dehan polísia ne’ebe mantein paz, lei no ordem, dala ida tan tanba tipu ou modelu krime ne’ebe iha era modernizasaun ne’e laos buat ida ne’ebe fasil, entaun ne’e dezafiu bo’ot ida ne’ebe maka iha tinan 2015 ami sempre koalia ona polísia tenke kontinua antisipa atu oinsa bele atúa liu husi ita nia kooperasaun de kapasitasaun no mós ekipamentus”, tenik Komandante Jerál PNTL ne’e.

Komisariu Polísia ne’e haktuir tan katak dezafiu seluk maka iha era globalizasaun ita hotu hatene, liu-liu iha Timor ne’e problema ita nian maka dala-ruma interpretasaun demokrasia liberdade ne’e, hanesan buat ida ne’ebe bele kontribui mós ba iha situasaun balun ba area seguransa, katak instabilidade bele mosu tanba ne’e iha hau nia intervensaun, liu-liu ita koalia area balun, ne’e laos Polísia nia kna’ar mesak.

“Polisia bele iha hodi kontinua halo sensibilizasaun maibé parte hotu-hotu tenke iha, exemplu ita koalia kona-ba asuntu Violensia Doméstika; Violensia Doméstika ne’e sira dehan katak polísia deit bele kaer ne’e, hau hanoin susar oituan, tanba ne’e kontribui husi buat barak; buat ida seluk maka krime organizadu”, hatutan Komisariu Polísia ne’e.

Autoridade másimu instituisaun seguransa ne’e afirma tan dezafiu seluk ne’ebe maka durante ne’e hasoru maka menus de ekipamentus, infrastrutura, logistika, asuntu pesoal liu-liu hare’e ba membru sira ne’ebe maka ho idade avansadu.

Media PNTL.

PNTL Halo Avaliasaun Servisu Operasional Periodu Eleisaun Prezidensial

IMGL5240

Dili- Komandu Polisia Nasional Timor-Leste (PNTL) halo avaliasaun servisu operasional durante periodu kampaña no Eleisaun Prezidensial tinan 2022 hodi identifika problema no dejafiu ne’ebe maka iha hodi hadia diak liutan.

Komandante Jeral PNTL Komisariu Polisia Faustino da Costa hateten ohin enkontru avaliasaun Komandu hein aprejentasaun Komandante munisipiu ida-idak ninian para ita bele halo sumarija problema prinsipal no dejafiu saida maka sira hasoru, atu dehan deit katak kuaje buat hotu lao diak ho suporta no apoiu ema hotu nian, Nia hato’o asuntu ne’e ba jornalista sira iha Timor-Plaza Dili, segunda (28/03).

Nia haktuirtan dejafiu balu ne’ebe maka ita hasoru nafatin maka dejastre naturais ne’ebe maka sei sai nafatin hanesan dejafiu ida tanba ita hotu akompaña no dala idatan ida ne’e ami repete bebeik ona asesu ba sentru votasaun sira nomos movimentu transporte iha tempu kampaña balu sai difikuldade boot tanba kondisaun estrada liga munisipiu ida ba munisipiu seluk.

Saida maka Komandante sira halo liu-liu saida maka akontese iha Maliana, Covalima (Suai), tantu mos iha parte Manatuto ne’e maka situasaun ida ne’ebe presija hare alende problema komunikasaun ne’ebe maka publiku hotu sente no akompaña kuaze semana balu nia laran dalaruma kompania operador sira mos difikulta teb-tebes oinsa atu fasilita tanba komunikasaun maka meius ida ne’ebe instituisaun PNTL mos bele hetan lalais informasaun no atualija lalais ba entidades hotu.

IMGL5233

“Komandu nafatin esforsu hodi hadia difikuldade hirak ne’ebe maka iha tuir kbiit parte Komandu nian no buka dalan seluk oinsa atu hare radiu komunikasaun balu ne’ebe iha para bele halo distribuisaun nafatin liu-liu ba sentru votasaun sira no kondisaun seluk maka ekipamentus nesesariu liu-liu ba seguransa pessoal membru sira nian ida ne’e maka ita hare hela no oinsa ba oin ita responde kuandu ita sei hakatan pasu ida ba Eleisaun Prezidensial segunda ronda,”Nia promete.

Entremus Rekursu Humanus ita nia membru nafatin Komandu jere saida maka oras ne’e daudaun PNTL iha ita sei foti nafatin husi Komandu Jeral no Unidade sira ne’ebe iha hodi reforsa munisipiu sira ne’ebe nesesita ka presijatan apoiu ba sira liu-liu iha tempu eleisaun nian.

IMG_1195

“Komandu hakarak fo parabens ba Komandante no membru PNTL hotu ba selebrasaun aniversariu ba dala XXII nomos parabens ba sira nia esforsu tomak ne’ebe membru hotu halo hahu husi kampaña to’o iha eleisaun ne’ebe ita hotu ultrapasa iha loron 19 liuba, Parabens mos ba media, publiku, ekipa susesu no kandidatu Prezidente Republika periodu 2022-2027 nain 16 no hein katak rezultadu ne’ebe mai sei lori buat ne’ebe diak bai ta hotu ba timor oan tomak. ”Komandante Jeral kongratula.

Iha avaliasaun ne’e Komandante Jeral mos fo referensia ba komandante munisipiu no Komandante Unidade sira konaba oinsa asegura seguransa iha periodu semana santa nomos kampaña Eleitoral segunda volta tanba ita hotu hatene katak  (loron 15 fulan Abril ne’e Sexta Fera Santa) babain molok sexta fera santa iha kinta fera santa to’o Sabadu Aleluia iha momentu ida ne’ebe PNTL mos tenke asegura igreja, kapela, parokia iha fatin hotu-hotu signifika katak Komandante sira tenke hatene oinsa uza ka jere rekursu humanus ne’ebe sira iha munisipoiu no unidade sira.

Workshop Avaliasaun Servisu Operasional Festa Demokrasia Eleisaun prezidensial tinan 2022 ne’e organija husi Komandante Komandu Operasaun no partisipa husi Inspetur Jeral, Komandante Komandu Administrasaun, Komandante CFP, Komandante munisipiu, Komandante Unidade UEP, UPM no UPF, Xefe Gabinete, Xefe Departamentu no Segundu Komandante TLPDP. Media PNTL