Uncategorized

Dili–Komando Polisia Nasional Timor-Leste (PNTL) entrega motorizada 257 ba Ofisial Polisia Suku (OPS) atu bele fasilita sira nia servisu iha komunidade nia le’et nune’e bele minimiza krime.

Iha serimonia aniversariu PNTL ba dala 16 Segunda 28 Marsu, Primeru Ministru simbolikamente entrega save motor nian ba reprejentante OPS Sargentu José Paulo da Costa.

Iha deskursu Komandante Jeral PNTL Komisariu Julio da Costa Hornay, husu ba OPS sira nia responsabilidade hodi asegura no kuida transporte ne’ebe maka fornese hodi utilija ba servisu hanesan ita nia rasik nune’e bele dura ba tempu naruk.

Nia informa tan katak Komando PNTL entrega motorizada 257 falta 60 ne’ebe sei entrega iha tempu badak, tanba sei iha prosesu kompras, alienede transporte Komando mos sei entrega radiu komunikasaun 155 ho leptop 170.

Entertantu Sargentu José Paulo da Costa, reprejentante OPS liu husi deklarasaun komprimisiu utilizasaun motorizada hateten, bazeia ba regulamentu ne’ebe maka iha membru OPS sei utiliza transporte ne’ebe Komando PNTL entrega ho responsabilidade no profesionalizmu tuir obrigasaun ne’ebe maka iha hodi nune’e bele fasilita servisu iha baze.

Aliende fornese transporte ba OPS, eis Komandante Centru Formasaun Polisia ne’e mos kompremete ba membrus PNTL tomak katak governu liu husi Ministru Interior iha komprimisiu bo’ot atu atu suporta no fasilita nafatin PNTL etapa pur etapa.

Media PNTL.    

Dili, iha tersa-feira semana ne’e (29/03/2016), segundu Komandante Jerál Polisia Nasional Timor Leste (PNTL) Komisariu Polisia Faustino da Costa, loke abertura ba formasaun kona-ba moras HIV/SIDA ne’ebe maka partisipa direta husi representante membrus PNTL husi munisipiu 12.

Komisariu Polisia Faustino da Costa iha ninia intervista hateten, formasaun ne’ebe suporta no fasilita husi parseiru UNFPA sai hanesan material ida ba membru PNTL husi munisipiu atu bele fahe fila fali materia kona-ba oinsa hatene maneira husi moras HIV/SIDA ninian.

“Formasaun ne’e hanesan formasaun ida kona-ba edukador kolega ba kolega katak maluk sira PNTL sira ne’ebe mai husi munisipiu para hetan formasaun ida oinsa kuando sira fila, sira bele sai hanesan edukador ida ba sira nia kolega servisu hamutuk. Kolega servisu hamutuk ne’e mak sese? Maka PNTL sira ne’ebe iha sira nia distritu, iha sira nia sub-distritu ou postu administrativu, ida ne’e maka sira sei koalia, katak afinal risku husi moras HIV/SIDA maka ne’e, tanba bele da’et liu husi maneira hanesan ne’e,” hateten Komisariu Polisia Faustino da Costa.

Segundu Komandante Jerál ne’e mós apela ba mebru PNTL husi munisipiu ne’ebe partisipa iha treinamentu ne’e, atu bele aproveita oportunidade ida ne’e hodi bele fahe matenek ne’ebe sira hetan durante formasaun ba membru seluk iha sira nia munisipiu.

“Tanba ne’e maka ohin hau nia presensa hodi halo abertura no mós aproveita oportunidade ne’e katak ba sira importante maka sira tenke aproveita formasaun ida ne’e no aplika resultadu formasaun ida ne’e iha terenu”, apela Komisariu Polisia Faustino da Costa ba membru PNTL ne’ebe partisipa iha formasaun ida ne’e.

Iha sorin seluk, representante United Nations Fund  Population  (UNFPA) Dr. Domingas Bernardo hateten, treinamentu ne’e hanesan kontinuasaun husi formasaun ne’ebe hanesan, ne’ebe hala’o tiha ona ba Komandante husi Munisipiu 13 iha loron 14 fulan Marsu, no iha loron 29-31 UNFPA no Ministeriu Saude kontinua hala’o formasaun ba Peer Edukadores sira husi munisipiu 12.

“Objetivu husi treinamentu ida ne’e maka atu informa ba komandante sira hotu kona-ba atividade ne’ebe maka sei hala’o husi membru Peer Edukadores sira iha futuru, nune’e mós informa oinsa komandantes sir abele fó suporta durante implementasaun programa ne’e iha nivel nasional no munisipiu sira”, hateten Dr. Domingas Bernardo iha abertura programa ne’e nian.

Parte UNFPA hanesan fasilitador iha programa ne’e, espera katak liu husi treinamentu ida ne’e, partisipante sira hotu bele hetan kuñesimentu diak liu hodi nune’e bele fasilita atividade sira nivel munisipiu hanesan halo kampaña HIV/SIDA iha munisipiu 13 no atividade vizita ba distritu, nune’e mós halo rekorda no relata ba atividade sira.

Dr. Domingas Bernardo mós agradese ba Instituisaun PNTL no diresaun hotu ne’ebe maka sempre fó apoio ba Implementasaun programa ida ne’e. “UNFPA iha kumprimisiu nafatin fornese suporta tekniku ba PNTL iha area saude seksual no reproduktivu, violensia bazea ba jéneru no exploitasaun seksual no hasa’e kapasidade ba PNTL sira”.

Programa HIV/SIDA ne’e alende suporta husi UNFPA, hetan mós suporta husi Fundus Global ba SIDA/AIDS, TB no Malaria hodi implementa intervensaun mudansa ba hahalok ba Polisia Nasional Timor Leste (PNTL).

Media PNTL.  

Dili-Polisia Nasional Timor-Leste (PNTL) Domingu 27 de Marsu 2016 selebra aniversariu ba dala XVI ho misa agradesimentu no selebrasaun Paskoa. Ho tinan XVI ne’e konsidera PNTL joven ona no bele hala’o servisu mesak hodi servi povu diak liu tan.

Iha Selebrasaun misa ne’e, amu Kapelaun Reverendu Padre Nelino Americo Soares ne’ebe dirige iha selebrasaun misa Domingo (27/3) iha Kapela St. Antonio Centru Formasaun Polisia Comoro Dili, iha nia homilia hateten ho tinan XVI konsidera PNTL joven ona, hatene halo servisu mesak no hatene saida maka diak no saida maka aat.

Nia haktuir tan katak ho idade ne’ebe maka joven, PNTL buka atu moris tuir lei no ordem instituisaun nian ne’ebe hatudu no hakerek hela, respeita ema seluk tuir hirarkia ne’ebe maka iha no responsabilidade atu haburas espiritu de korpu hodi apoiu malu iha parte hotu-hotu ho fuan no laran tomak.

Iha Fatin hanesan Ministru Interior Dr. Longinhos Monteiro hateten ho aniversariu PNTL ba dala-XVI, PNTL bele luta hodi hamoris fraternidade, seguransa no paz iha Timor-Leste liu-liu hahu’u husi familia uma kain, bairu no ita nia distritu.

“PNTL instituisaun ida ne’ebe moris ho nia esperensia oin-oin, moris iha aprendijajen nia laran no moris ho komprimisiu ida firme, atu servi ita nia seguransa, servi povu no nasaun atu moris iha seguransa nia laran,” dehan eis Komandante Jeral PNTL Longinhos Monteiro.

Iha oportunidade ne’e Ministeriu Interior hato’o mós Boas Festa Santo Paskoa ba sarani hotu no Parabens ba membrus PNTL tomak ne’ebe maka selebra tinan ba dala-XVI iha instituisaun nia laran.

Hafoin de misa, Ministru Interior, Komandante Jeral PNTL, Segundu Komandante Jeral PNTL, estrutura tomak PNTL no sarani balu ba kari’i aifunan iha Monumento dos Martires PNTL hodi fó homenajem ba martires PNTL nian.

Media PNTL

Dili-Primeru Ministru (PM) Dr. Rui Maria de Araujo enkoraja Komando Polisia Nasional Timor-Leste (PNTL) atu orienta no halo esforsu tomak hodi hametin liu tan polisiamentu komunitaria, kontrolu fronteira terrestre no maritima no seguransa rodoviaria, hodi garante seguransa ba povu no nasaun.
Iha komemorasaun Aniversariu PNTL ba dala XVI, segunda horseik (28/03/2016) Primeru Ministru (PM) RDTL Rui Maria de Araújo iha nia deskursu hateten, PNTL iha funsaun atu kontrola, hodi prevene no kombate krime, prezerva ordem publika, hodi halo ema bele kumpri lei no asegura kondisaun seguransa ne’ebe bele garante funsionamentu normal instituisaun demokratiku sira.
“Hau fo hanoin hikas fali katak iha tinan kotuk, iha aniversariu dala-XV hau apela ba konsentrasaun boot liu-tan polisiamentu komunitaria, kontrolu fronteira terrestre no maritima no seguransa rodoviaria. Tinan ida liu tiha buat balun konsege halo ona no buat lubun ida sei hein hela atu inplementa,” hateten PM Rui Maria de Araújo.
Nia reforsa tan katak alienede ne’e PNTL mós iha funsaun prinsipal atu proteje sosiedade, servi, fo asistensia no defende ema hirak ne’ebe maka presija no hodi defende direitus humanus sidadaun Timor-Leste.
Iha okajiaun ne’e Komandante Jeral PNTL Komisariu Julio da Costa Hornay hateten desde PNTL moris, mantein fiel ba prinsipiu ida hanesan forsa seguransa ne’ebe ho nia estratejia no filozofia polisiamentu, nune’e nia karakteristika polisia komunitaria, enkuantu nia organizasaun, disiplina, instrusaun no estatutu pessoal assume natureza ida identika militar maibe laos militar.
Komisariu ne’e haktuir tan katak liu tiha tinan XVI desde nia hari’i ho tempu ne’ebe liu daudaun PNTL hasoru nesesidade mudansa seguransa nian ho nune’e maka PNTL reformula diplomas estrutura ba organizasaun hanesan lei organika, regulamentu disiplinar no rejime ba promosaun.
Serimonia ne’e kompleta ho entrega kondekorasaun, promosaun divija, entrega motorizada ba OPS no anima husi grupu banda Colegio Paulo VI no koru husi eskola Sᾶo Pedro.
Selebrasaun aniversariu PNTL ba dala XVI (27/03/2000 & 27/03/2016) diriji husi Komandante Jeral PNTL no konta ho prezensa Ministru Interior Dr. Longuinos Monteiro, Primeru Ministru, Ministru Defeza Cerilo Cristovᾶo, Vice Prezidente Parlamentu Nasional Aderito Hugo, Komisariu KAK Aderito Tilman, Vice Chefe Estadu Maijor F-FDTL Brigadeiru General Filomeno Paixᾶo, reprezentante POLDA NTT Belu, korpus diplomatikus, ajensia Internasional familia boot PNTL no konvidadus sira.
Media PNTL

Dili: Iha fulan Marsu tinan ne’e, Polisia Nasional Timor-Leste sei halo tinan ba dala 16. Ba loron importante ne’e, Komandante Jeral PNTL Komisariu Julio da Costa Hornay hatete sei halo deit serimonia simples ida hodi selebra.

Komisariu Julio dehan, tanba loron aniversariu PNTL monu iha loron Domingu ne’ebe sai mos nu’udar loron Paskua, Komando desidi hodi realiza selebrasaun aniversariu iha loron segunda (28/03).
“Mezmu komplikadu mais ami kontinua hala’o serimonia ida ne’e maske simples (muda loron serimonia). Tanba loron importante tuir sarani Katolika nian monu mos iha loron aniversariu PNTL,”dehan Komisariu Julio iha Kuartel Jeral PNTL, kaikoli Dili, horisehik.

Kona-ba preparasaun Komisariu Julio dehan horisehik no ohin PNTL halo ona gladi ba parade militar. Iha serimonia aniversariu, Komisariu Julio dehan, PNTL sei konvida bainaka espesial husi Polisia Daerah (POLDA ) NTT no administrador Belu, inklui Tentara Nasional Indonesia iha Belu. Nia dehan PNTL konvida Polda NTT tanba iha relasaun servisu ne’ebe diak entre PNTL ho POLRI. “Liu husi konvida iha serimonia ida ne’e ita aproveita bele koalia ba malu hodi troka informasaun kona-ba movimentu fronteira ne’e lao oinsa no oinsa seguransa rai rua nian bele servisu hamutuk para bele asegura seguransa liu husi komunikasaun ne’ebe besik,” dehan nia. Kona-ba orsamentu Komisariu Julio la fo detaillu numeru orsamentu, maibe so dehan deit katak numeru osan ki’ik liu tanba ne’e maka sei halo festa ida ne’ebe simples.

Komisaun B apresia

Entretantu relasiona ho aniversariu PNTL ne’ebe besik daudaun, ona deputadu sira iha Parlamentu Nasional mos fo sira nia hanoin ba servisu ne’ebe membru PNTL hala’o ona durante ne’e.
Deputadu husi Komisaun B ne’ebe trata asuntu Defeza no Seguransa, apresia servisu Polisia Nasional Timor-Leste (PNTL) durante ne’e tanba PNTL hatudu progresu iha servisu seguransa nian. Vise Prezidente Komisaun B, Deputadu Duarte Nunes dehan durante ne’e sira fiskaliza no observa PNTL halo ona servisu ne’ebe diak. “Ita halo avaliasaun ba servisu PNTL nian, ita hare diak, tanba kuaze munisipiu 12 ne’e buat hotu diak,” dehan Duarte iha PN, Tersa (22/03). Maski iha mudansa, maibe Deputadu ne’e kritika mos servisu PNTL ba kazu balu ne’ebe mosu iha munisipiu sira, liu-liu iha kapital Dili. Maski konsidera kazu hirak ne’ebe maka mosu normal maibe, polisia sira tenke servisu maka’as atu nune’e seguransa iha munisipiu sira, liu-liu iha kapital Dili no munisipiu seluk ne’ebe akontese problema bele hakmatek.  “Ita presiza hare oinsa mak sira bele servisu diak liutan atu nune’e kapital Dili bele hakmatek liutan,” katak nia. Inportante liu ba polisia presiza apoiu fasilidade maibe PNTL mos tenke hatudu sira-nia disiplina.

Fonte: INDEPENDENTE

Dili, Kuartel Jerál Kaikoli tersa-feira ne’e, relasiona ho aktividade demonstrasaun ne’ebe hala’o husi organizasaun husi MKOTT (Movimentu Kontra Okupasaun Tasi Timor), ACBN (Assosiasaun Combantentes Brigada Negra), Universitariu, Sosiedade Sivil, Rede Mulheres iha embaixada Australia, Komandante Jerál PNTL husu atu bele asegura seguransa durante demostrasaun hala’o.

“Demonstrante sira hotu, Timor oan tomak ne’ebe maka partisipa iha demostrasaun ne’e hodi hato’o sira nia aspirasaun, husu atu bele asegura seguransa no kumpri regra hirak ne’ebe maka sira nia responsavel hato’o ona no hein katak demostrasaun ne’e bele lao ho diak to’o remata”, informa Komisariu Julio da Costa Hornay iha nia kna’ar fatin.

Komandante PNTL realsa tan katak, parte PNTL fó seguransa másimu atu bele asegura movimentu demostrasaun ida ne’e lao ho diak no kopera malu ho responsavel kada organizasaun husi MKOTT, ACBN, Universitariu, Sosiedade Sivil, Rede Mulheres no sira hotu ne’ebe maka sai komponente ba demonstrasaun ida ne’e.

“Hau fiar katak povu timor oan hotu ne’ebe maka marka prezensa iha fatin demostrasaun iha Embaixada Australia nian oin ho objetivu atu husu ba governu Australia, atu hare’e ba kestaun fronteira Tasi entre Timor Leste ho Australia”, hateten Komandante PNTL.

Polisia Nasional Timor-Leste (PNTL) mós husu ba demonstrante sira hotu ne’ebe maka partisipa iha demostrasaun kona-ba frontera Tasi Timor atu bele asegura seguransa no kumpri regra hirak ne’ebe maka iha. Demostrasaun refere sei halao durante loron rua (22 no 23 Marsu ) iha resinto embaixada Australia nia oin.

Media PNTL      

Dili, segunda-feira ne’e (21032016) Komandante Jerál PNTL Komisariu Julio da Costa Hornay hateten, PNTL koopera ho Polisia Militar (PM) hodi halo patrullamentu iha tempu kalan ba area ne’ebe sempre akontese konflitu arte marsiais iha kapital Dili.

“Kona-ba atuasaun ba grupo arte marsiais Polisia Nasional Timor Leste (PNTL) halo patrullamentu diariu, liu-liu ba tempu kalan hanesan ita hotu assiste katak kalan-kalan sempre iha problemas balun maka akontese, Polisia marka presensa atu halo atuasaun”, informa Komisariu PNTL Julio da Costa Honay wainhira hasoru malu ho jornalista iha nia kna’ar fatin.

Atu atende problema ne’ebe mak mosu, PNTL koopera ho Polisia Militar hodi halo patrullamentu ba area ne’ebe sempre akontese konflitu, nune’e bele garante estabilidade seguransa iha rai laran.

“Relasiona ho problema sira ne’e, ami hasa’e volume patrullamentu koopera ho Polisia Militar, para iha back-up patrulla iha tempu kalan, iha area-area sira ne’ebe maka normalmente akontese konflitu, para depois ita bele fó seguransa másimu ba ita nia komunidade sira iha tempu kalan”, hateten Komandante PNTL.

Kona-ba manifestasaun ne’ebe sei hala’o iha loron 22 no 23 fulan Marsu, iha embaixada Australia Komandante Jerál PNTL informa, Polisia Nasional Timor Leste sei fó seguransa másimu ba aktividade refere. Ba ida ne’e Komisariu PNTL esplika, “Ohin halo reuniaun ho Primeiru Ministru atu koalia kona-ba aktividade demostrasaun ida ne’e. Hau sente katak demostrante sira ne’e laos ema le’et mesak Timor oan ne’ebe maka espresa ninia direito tasi nian ba iha autoridade Australia nia, liu husi nia embaixador”.

Komisariu PNTL mós realsa katak, nia parte iha fiar ktak sei la mosu problema iha aktiivdade refere tanba demostrante sira ne’ebe halo demostrasaun ne’e konsentra liu ba objetivu ne’ebe ita atu alkansa. Nune’e, Komandante PNTL apela ba komunidade hotu atu bele koopera ho Polisia wainhira mosu problema iha rai laran.

Media PNTL.

Dili, sexta feira ne’e (18/03/2016) segundu Komandante Jerál PNTL Komisariu Faustino da Costa hamutuk ho Komandante Interinu Centru Formasaun Polisia, Superintendente Arquimino Ramos partisipa iha aktividade doasaun ran ne’ebe organiza husi Klinika PNTL servisu hamutuk ho Banco de sangue husi Ministeriu Saude.

“Aktividade ida ohin ita halo, aktividade ida ne’ebe nu’udár sub-ajenda ba komemorasaun aniversariu Polisia Nasional Timor Leste (PNTL) nian, sei selebra iha semana tuir mai ba dala 16. Hanesan komisaun apresenta ona, ajenda ida ne’e no Komando aprova katak ohin bele duni realiza aktividade ou eventu doasaun ran”, esplika segundu Komandante Jerál Komisariu Faustino da Costa iha abertura aktividade doasaun ran nian.

Tuir Komisariu PNTL ne’e, liafuan doasaun ran sai hanesan liafuan ne’ebe bele salva ema seluk nia vida, ho valor ne’ebe bo’ot tebes-tebes, ita bele partilla ita nia tulun ba ema ne’ebe maka presija.

“Atu dehan deit doasaun ran, ita rona liafuan ida ne’e, ne’e liafuan ida que ne’ebe simples, liafuan ida ne’ebe dala ruma halo ema balun bele sente tauk, maibe liafuan ida ne’ebe halo ema barak kontente, ema hotu espera katak bele salva ema seluk nia vida tanba importante, bele apoio ema seluk tanba sira sente katak ran ne’e la’os buat ne’ebe faan iha merkadu ou iha loja”, hateten segundu Komandante PNTL.

Komisariu Faustino da Costa mós esplika kona-ba aktividade doasaun ran hanesan aktividade ne’ebe iha ho valor ne’ebe bo’ot tanba ita bele ona suporta ema seluk ne’ebe presija. Ba ida ne’e segundu Komandante hateten, “Aktividade doasaun ran, aktividade ida ne’ebe bele dehan ho nia valor ne’ebe que bo’ot tebes-tebes, tanba alem de ita partilla, ita sente katak ema seluk presija ita nia tulun, ita nia apoio liu husi ran ne’ebe ita fó, maibe hatudu mós katak ita halo ida ne’e ho duni laran (iklas)”.

Doasaun ran ne’ebe halo, ho nia valor ne’ebe bo’ot tanba kuandu ita halo doasaun ran ita la hatene ba se los mak ita nia ran atu fó, maibe somente ba ema ne’ebe presija.

Aktividade refere hala’o iha Centru Formasaun Polisia (CFP) Comoro, no membru husi Unidade Espesial Polisia (UEP), Unidade Polisia Maritima (UPM) no membru husi CFP rasik maka sei fó ran ou halo doasaun ran ba ema ne’ebe presija. Media PNTL.

Dili, Komandante Jerál PNTL Komisariu Julio da Costa Hornay iha Centru Formasaun Polisia (CFP) quinta feira ne’e (17032016) partisipa iha aktividade retiru ba komemorasaun loron mundial feto, ne’ebe orginiza husi Gabinete Generu PNTL.

Komisariu Julio da Costa Hornay iha ninia diskursu ba abertura aktividade retiru hateten, loron mundial internasional ba feto sai hanesan sasukat hodi hare’e generu ekivalensia sosial entre sexu mane no feto.

“Retiru ida ne’e hakarak hato’o mai ita katak ho selebrasaun ida laos atu hanoin ba loron ida deit, maibe oinsa ita trata ita nia feton sira, hamutuk ita servi ita nia rai Timor Leste ho digno tuir valores ne’ebe feto sira merese”, hateten Komisariu Julio da Costa Hornay iha ninia diskursu.

Loron mundial feto iha dia 8 fulan Marsu ba tinan ida ne’e, governu liu husi Sekretaria do Estadu asuntu Mulher hala’o iha posto administrativu Natarbora Munisipiu Manatuto. Maibe tuir Komandante Jerál PNTL ho aktividade retiru ne’e, atu oinsa bele halo fali reflesaun. “Igualidade generu ne’e konseitu ida ne’ebe que atu define generu entre mane ho feto hanesan ekivalensia sosial entre sexu rua ne’e no iha igualidade ba oportunidade”, realsa Komisariu PNTL.

Total feto ne’ebe maka oras ne’e dadaun servisu iha Instituisaun PNTL ho total 623 pessoas ne’ebe maka koloka ba iha unidade sira iha PNTL nia laran. Komisariu Julio da Costa Hornay iha nia intervista hateten, “ita nia feton sira iha Polisia Nasional Timor Leste (PNTL) total 623 pessoas ne’ebe maka ita koloka ba iha unidade sira hotu, hanesan Unidade espesial, Unidade Fronteira, Unidade Maritíma no distrito tomak, parte hotu-hotu ita envolve feto sira”.

Retiru ne’ebe hala’o iha kapela Akademia Comoro ne’e, alem de Komandante Jerál PNTL, parseiru desenvolvimentu ne’ebe durante ne’e fo apoio ba PNTL hanesan TLPDP, mós partisipa iha selebrasaun loron mundial feto.

Media PNTL.

Dili, Hotel J.Villa segunda-feira (14/03/2016) Komandante Jerál PNTL komisariu Julio da Costa Hornay partisipa iha aktividade ne’ebe hala’o husi Ministeriu Saude hamutuk ho UNFPA kona-ba programa HIV/SIDA no MHRS.

Iha abertura ba aktividade Treinamentu ne’e Komisariu PNTL apela ba komandante distritu 13 ne’ebe maka partisipa iha treinamentu ne’e atu bele aproveita oportunidade hodi hetan esperiensia, hodi bele fahe fali informasaun ne’ebe hetan iha treinamentu ne’e hodi fahe ba membru, familia no sosiedade.

“Lori Komando Jerál PNTL nia naran, hakarak hato’o agradese bo’ot ba UNFPA ne’ebe mak ho Ministeriu Saude bele organiza worshop ida ne’e hodi fahe informasaun kona-ba moras HIV/SIDA ne’ebe maka sai hanesan moras ida ne’ebe ema hotu tauk, tanba moras ida ne’e da’et liu husi aktividade ne’ebe ema hotu gosta”, hateten Komisariu Julio da Costa Hornay.

Tuir Xefe Departamentu Interinu ba Moras Kontajiosa, Dr.Frederico iha ninia diskursu molok treinamentu ne’e hateten objektivu husi aktividade ne’e maka hanesan advokasia ida ne’ebe Ministeriu Saude halo ho parseiru UNFPA atu nune’e bele hato’o informasaun ne’ebe maka importante ba iha komandante sira.

“Aktualizasaun dadus ne’ebe ita iha, hato’o informasaun kona-ba situasaun jerál moras HIV/SIDA iha Timor Leste oras ne’e dadaun. Importansia husi monitorizasaun no avaliasaun ne’e, oinsa ita atu halo relatoriu hodi nune’e it abele atinji indikador ida ne’ebe Ministeriu Saude iha liu husi Unidade HIV/SIDA”, esplika doutor Frederico iha salaun Hotel J.Villa Fatuhada.

Objetivu seluk husi treinamentu ne’e, Xefe Departamentu esplika, “Sei halo mós sosializasaun atu rekolla dadus, relata, analisa no mós interpreta dadus hodi nune’e bele planea intervensaun ne’ebe maka konkretu hodi bele responde ba iha moras HIV/SIDA ninian, liu-liu iha ambiente PNTL ninian.

Tanba tuir Ministeriu Saude, liu husi Unidade HIV/SIDA iha mós indikador espesifiku liu ba iha pesoal F-FDTL no PNTL. Hodi nune’e liu husi aktividade ne’e, parte Ministeriu Saude no UNFPA hakarak halo aproximasaun forte ba iha dirigente másimu PNTL ninian, hodi fo suporta másimu, liu-liu entermu de implementasaun programa ninia.

Worshop ne’ebe halo ho tema “Treinamentu Monitorizasaun no Avaliasaun ba Programa HIV/SIDA no MHRS ba Komandante PNTL husi 13 Munisipiu” ne’e hetan partisipasaun másimu husi Komandante munisipiu 13, representante husi UNFPA no Ministeriu Saude rasik.

Media PNTL