Uncategorized

Dili, Komandu Polísia Nasional Timor-Leste (PNTL) liu husi gabinete Asesoria Jurídiku kontinua halo sosializasaun ba Lei Nu.5/2017 kona-ba Rejimentu Jurídiku ba prátika Arte Marsias, Rituais, Armas Brankas, Rama Ambon no Alterasaun ba Artigu 211 Kódigu Penal Timor-Leste ba membru PNTL husi Unidade Espesial Polísia (UEP) no Unidade Polísia Marítima (UPM).

Xefé gabinete Asesoria Jurídiku Inspectór Virgilio Correia ne’ebe maka lidera sosializasaun ne’e hateten Lei refere rigorozu tebes-tebes tanba ne’e molok implementa ba komunidade, polísia hanesan autór seguransa nian tenke hatene uluk lalaok Lei ne’e ho diak.

“Lei ne’e rigorozu tebes-tebes liu-liu ninia sujeitu Lei ida ne’ e ba iha funsionariu estadu, funsionariu administrasaun públika, PNTL, F-FDTL, Majestradu Justisa, sira ne’ebe maka atu promove Lei ida ne’e, prátikas Arte Marsias sira ne’e mai, lori Armas Brankas sira ne’e mai, Lei ida ne’e sei penaliza sira ho pena ne’ebe bo’ot liu do que sosiadade bain-bain”, tenik Xefé gabinete Asesoria Jurídiku.

Inspectór Virgilio Correia subliña liu tan katak Lei ida ne’e bandu atu prátika Arte Marsiais sira ne’ebe Lejitimidade Operasaun, katak Arte Marisias hotu-hotu ne’ebe existe iha Timor-Leste tenke halo rejistu kuandu la rejistu maka Polísia sei hapara.

“Nune’e mós Arte Rituais sira ne’ebe mak ohin loron existe iha Timor laran barak tebes-tebes maka seidauk rejistu, polísia sei hapara sira nia aktividade no wainhira polísia atu taka mak sira lakohi polísia obriga tenke taka, tanba ita hare’e katak konfrontu organizasaun Arte Marisias sira ne’ebe iha Timor ka organizasaun juventude sira ne’ebe maka sempre halo problema no hamosu ema barak maka mate entau ho presensa Lei ida ne’e hasai no regulariza ema hotu-hotu atu bele moris iha paz no estabilidade nia laran”, haktuir Inspectór ne’e.

Partisipantes iha sosializasaun ne’e membru husi UEP, BOP no UPM, Sosializasaun Lei Nu.5/2017 ne’e hala’o ona ba membru PNTL munisipiu hotu no tuir planu semana oin sei sosializa ba membru PNTL sira iha Komandu Jerál no Centro Formação Polícia.

Media PNTL.          

Dili- Seksaun Incident Management System (IMS) realiza sorumutu ezekutivu konaba utilijasaun Sistema Jestaun Insidente (SJI) hodi evalua problema ne’ebe maka munisipiu sira enfrenta.

Komandante Komandu Operasaun Superintendente Xefe Henrique da Costa hateten sorumutu loron ida hamutuk ho Komandante munisipiu no Xefe Seksaun Investigasaun hodi koalia konaba oinsa uza sistema informatika atu rezista no akompaña insidente ne’ebe maka rezista iha investigasaun, Nia hato’o asuntu ne’e ba jornalista sira iha Centru Formasaun Polisia Comoro Dili Segunda (18/09).

Nia haktuirtan katak inplementasaun Sistema Jestaun Insidente durante ne’e seidauk maximu tanba ne’e maka konvida Komandante sira halo evaluasaun hodi buka hatene difikuldade ne’ebe maka infrenta hodi hadia diak liutan iha futuru.

“ Durante ne’e Komandu identifika katak utilijasaun SJI seidauk maximu tanba ne’e maka halo fila-fali surumutu loron ida hodi hato’o ba Komandante sira no atu ronamos esplikasaun husi komandante no Xefe seksaun investigasaun sira konaba razaun saida maka sira la uza sistema ne’e hodi fo solusaun hamutuk no orienta sira atu inplementa ho diak, ” dehan Komandante Henrique.

Vantajen utilizasaun SJI fasil no lais liu atu up date situasaun no Komandante sir abele kontrola no monitoriza servisu membru sira nian liu-liu prosesu investigasaun ba kazu ruma, servisu tranzitu nomos patrulamentu iha munisipiu; Alende ne’e mos bele fo orientasaun direitamente ba parte investigasaun, tranzitu no patroli no la presiza korespondensia manual (Uza surat tahan ).

Iha okajiaun ne’e Shane Baker nudar reprezentante TLPDP hateten liu husi sorumutuk ne’e hodi diskuti hamutuk problema ne’ebe maka enfrenta iha munisipiu tanba ne’e TLPDP sei suporta nafatin seksaun IMS tuir nesesidade ne’ebe maka iha.

Sorumutuk Ezekutivu Sistema Jestaun Insidente ne’e loke husi Segundu Komandante Jeral PNTL Komisariu Faustino da Costa akompaña husi Komandante Komandu Operasaun, Komandante CFP Superintendente Arquimino Ramos no reprezentante TLPDP no partisipa husi Komandante munisipiu no Xefe Seksaun Investigasaun sira. Media PNTL

Batugade- Unidade Polisia Fronteira (UPF) halo treinamentu tatika no teknika ba membru sira hodi fo seguransa maximu ba povu no nasaun iha fronteira terrestre.

Komandante UPF Superintendente Xefe João Belo Reis hateten treinamentu tatika no teknika ne’e halo atu eleva kapasidade membru sira nian hodi responde ba kualker ameasa ne’ebe maka mosu ba komunidade sira iha liña fronteira, Nia hato’o asuntu ne’e ba jornalista sira hafoin abertura treinamentu iha Kuartel UPF Batugade, Kinta (14/09).

Komandante ne’e haktuir tan katak treinamentu faze daruak ne’e partisipa husi membru nain 40 kompostu husi ajente, Komandante postu, Segundu Komandante postu, Komandante kompania Bravo no Xefe seksaun balun tuir nesesidade ne’ebe iha.

Tatika treinamentu ne’e kona-ba patrulla nune’e karik iha grupu deskonesidu ruma halo embuskada oinsa maka sira salva, halo kontra atake no mos karik grupu deskonesidu halo refém ou sandera ba populasaun iha fronteira sira bele salva.

Treinamentu ne’e hala’o tinan ida dala ida ho nia kurikulu no metodu ne’ebe maka diferente kada tinan, treinamentu ne’e ho fundu mai husi Fundu Desenvolvimentu Capital Humano-Ministeriu Planeamentu Investimentu Estratejiku (MPIE-FDCH).

Atu asegura seguransa iha liña fronteira UPF iha ekipamentu baziku ne’ebe maka sufsiente atu suporta servisu loron-loron nian hanesan forsa seguransa nasaun maske buat hotu sei limitadu hare’e ba radiu komunikasaun, fardamentu no infrastrutura liu-liu liga ba Postu UPF ne’ebe maka sei minimu maske iha planu atu hari’i postu iha liña fronteira ne’ebe maka movimentu ema illegal barak maibe depende ba forsa no kbi’it husi governu no estadu.

“ UPF sempre prontu kualker tempu maibe presiza nafatin governu nia apoiu no iha esperansa katak governu sei responde difikuldade UPF nian iha futuru bazeia ba prioridade ne’ebe maka iha nune’e bele asegura seguransa no moris hakmatek ba komunidade iha liña fronteira hodi hala’o sira nia atividade no soberania estadu Timor-Leste iha liña fronteira metin,” Komandante UPF haktuir.

UPF iha membru kuaze nain 400 ne’ebe maka destaka iha Kuartel UPF Batugade postu administrativu Balibo munisipiu Bobonaro, Kompania Alfa iha postu administrativu Maliana, Kompania Bravo iha Suai, Kompania Carlie iha Oe-cusse, postu ida iha Aeroportu Dili no lakleur tan sei estende tan postu iha Aeroportu Suai no Oe-Cusse.

Media PNTL

Singapore, Polísia Nasional Timor-Leste (PNTL) sai hanesan observador ba konferensia ASEANPOL ba dala 37 ne’ebe realiza iha nasaun Singapore durante loron tolu.

Komandante Jerál PNTL Komisariu Polísia Julio da Costa Hornay ne’ebe reprezenta Komandu PNTL iha konferensia Polísia entre nasaun ASEAN hateten PNTL sente apresia tebes bele sai observador iha konferensia ne’e.

’Ami lori nasaun Timor-Leste no PNTL nia naran hakarak agradese ba nasaun ASEAN ne’ebe mak konsidera hodi konvida Polisia Nasional Timor-Leste atu partisipa iha konferensia ASEANAPOL hanesan Observador’’, dehan Komandante Jeral PNTL Komisariu Polísia Julio da Costa Hornay iha nia mensangen ba abertura Konferensia iha Loron 13/09.

Komisariu Polísia Julio da Costa Hornay salienta liu tan katak Timor Leste apresia tebes ho unidade ne’ebe nasaun ASEAN kria hodi hamutuk fahe informasaun para atu kombate krime iha ASEAN hanesan nasaun ne’ebe foin moris iha tinan 2002, ita senti katak situasaun ida ne’e importante tebes atu Timor- Leste involve iha laran atu nune’e hamutuk hodi kombate krime ne’ebe mosu iha ASEAN.

Tamba ne’e apresiasaun mós ba nasaun sira iha ASEAN ne’ebe halo kontribuisaun maka’as hodi fó formasaun ba membru Polisia Nasional Timor-Leste durante ne’e hanesan Indonesia, Malaysia, Filipina, Australia, Nova Zelandia no sira seluk ne’ebe fó kontribui maka’as ba formasaun Polisia Nasional Timor- Leste.

“Durante kooperasaun ne’ebe Timor-Leste halo ho Indonesia, ha’u agradese ba KAPOLRI ne’ebe kontribui tebes kooperasaun bilateral Timor-Leste ho Indonesia apoiu Polisia Nasional Timor-Leste hodi kombate krime entre fronteira Timor-Leste ho Indonesia durante ne’e, kestaun krime iha mundo laiha nasaun ida mesak bele kombate só ita hamutuk unidade hodi fó informasaun ba malu hodi kombate krime”, subliña Komisariu Polísia ne’e.

Timor-Leste hanesan nasaun ida Geografikamente iha ASEAN nia klaran, maibé to’o ohin loron politikamente sei luta nu’udar parte husi nasaun ASEAN ninian. ‘’Tamba ida ne’e ami aproveita oportunidade ne’e, nasaun ASEAN nian bele apoiu tomak Timor-Leste sai parte husi membru ASEAN nian nune’e bele tama mós ba membru ASEANAPOL.

Nasaun sira ne’ebe maka partisipa iha konferensia ASEANAPOL mak hanesan Vietnam, Thailand, Singapore, Philipina, Myanmar, Malaysia, Laos, Indonesia, Cambodia, Bruney Darusalam, Australia, China, Japan, Korea, Novazelandia, Russia, Fiji, Timor Leste, United Kindom, IACP no ICRC. Tuir planu tinan 2018 Konferensia ASEANAPOL sei halo iha nasaun Bruney Darusalam.

Partisipa iha konferensia ne’e Komandante Jerál PNTL Komisariu Polísia Julio da Costa Hornay, Komandante Munisipiu Dili Superintendente Xefe Pedro Belo, Komandante Munisipiu Aileu Damião Correia, no Komandante Relasaun Internasional Inspetor Xefe Augosto Tilman.

Media PNTL.

Dili, Komandu Forsa Falintil Timor-Leste (F-FDTL) hamutuk ho Komandu Polísia Nasional Timor-Leste (PNTL) hasoru malu ho Presidente Repúblika (PR) hodi informa situasaun seguransa ba preparasaun serimonia tomada de posse VII Governu Konstitusional.

Maijor General F-FDTL Lere Anan Timur akompaña husi Segundu Komandante Jerál PNTL Komisariu Polísia Faustino da Costa hafoin enkontru ho PR hateten Komandu rua ne’e mai hasoru PR atu koalia kona-ba seguransa no defesa.

“Ami hateten ba PR, ami nu’udar elementu responsavel seguransa ami hakarak estabilidade nasional ida ne’e deit, polítiku sira halo sira nia politika maibé iha estabilidade nia laran, iha demokrasia nia laran, ida ne’e maka ami informa ba PR”, tenik Maijor General F-FDTL.

Ih biban hanesan, Komandu PNTL ne’ebe reprezenta Segundu Komandante Jerál iha nia entrevista hateten enkontru ne’e koalia liu kona-ba situasaun seguransa em jerál no liu-liu seguransa preparasaun ba serimonia tomada de posse VII Governu Konstitusional.

“Polísia Nasional no Forsa Defesa prontu atu asegura no mantein katak se laiha buat ruma maka atu akontese depois de formasaun governu”, hateten Segundu Komandante Jerál PNTL.

Enkontru refere laos ajenda mensal Komandu rua nian hasoru PR, maibé tanba kestaun seguransa ba serimonia tomada de posse ne’e maka PR bolu Komandu F-FDTL no PNTL atu nafatin mantein servisu forsa rua ne’e nian.

Media PNTL.

Ainaro-Polísia Nasional Timor-Leste (PNTL) liu husi Komandu munisipiu Ainaro iha loron 23 Fulan Agostu 2017 kontinua halo sosializasaun ba Lei Nu.5/2017 kona-ba Armas Brankas ba komunidade, estudante no populasaun iha munisipiu ne’e.

Komandante PNTL munisipiu Ainaro Superintendente Polisia Justino Menezes iha ninia intervensaun hateten agradese ba partisipante sira nia presensa iha dezeminasaun kona-ba Lei Nu.5/2017 liu-liu kona-ba arte marsias, rituais, arma branka, rama ambon no aumezmu tempu halo renovasaun ba Lei Kódigu Penal artigu 211 ne’ebe koalia kona-ba Arma Proibido ou arma sira ne’ebe bandu atu produz.

“Lei Nu.5/2017 ne’e aprovadu iha loron 19 fulan Abril 2017 ne’ebe iha ona koñesimentu ba komandante munisipiu no unidade sira iha nasional, maibé oinsa atu Lei sira ne’e para bele fó koñesimentu ba ita hotu liu-liu ba líder sira, ita hanesan autoridade ne’e aumezmu tempu joven sira ne’e bele komprende Lei ne’e diak liu tan atu nune’e ita bele ezekuta ho diak hodi halo prevensaun ba konfiltu sira ne’ebe maka mosu iha rai laran liu-liu iha munisipiu Ainaro”, tenik Komandante PNTL munisipiu Ainaro.

Superintendente Polisia Justino Menezes subliña liu tan katak workshop ne’e hanesan dezeminasaun ba ita hotu, laos ona atu halo sosializasaun katak ita sei hare’e Lei no Artigu ida ne’e los ou lalos ita sei hadia, maibé ida ne’e aprovadu ona no laiha ona deskusaun.

“Oinsa ita bele implementa Lei sira ne’e ho diak hodi bele garante seguransa no estabilidade iha ita nia nasaun no espesial iha munisipiu Ainaro tanba iha ita nia munisipiu maka sai hanesan fatin hun ba arte marsias antes Lei ne’e iha, tanba ne’e agradese ba ekipa PNTL ne’ebe servisu hamutuk ho parseiru UNDP bele realiza programa ida ne’e”, hatutan Superintendente Asistente ne’e.

Iha fatin hanesan Administrador Munisipiu Ainaro Albertino de Araújo hateten oportunidade diak ba komunidade no estudante sira iha munisipiu Ainaro atu bele partisipa iha dezeminisaun Lei Nu.5/2017 de 19 de Abril no alterasaun artigu 211 Kódigu Penal ne’ebe maka sei dezemina Lei Jurídiku koalia kona-ba arte marsial.

“Importante tebes ba ita hotu liu-liu lideransa komunitariu sira tanba ita bo’ot sira maka besik liu ba povu, ita bo’ot sira maka besik liu ba fatin ne’ebe arte marsial sira hela ba tanba iha munisipiu Ainaro iha arte marsias barak, balun tuir Lei hateten katak taka ona maibé deskonfia sei aktividade subar-subar”, dehan Administrador Munisipiu Ainaro.

Partisipantes iha dezeminasaun ne’e estudante, autoridade munisipal, Xefe Suku, Komandante Eskuadra inklui komunidade munisipiu Ainaro. Aktividade ne’e hala’o iha administrasaun municipal Ainaro ho hetan suporta husi parseiru dezenvolvimentu United Nation Development Program (UNDP).

Media PNTL.  

Dili, Relasiona ho ativasaun liña komunikasaun 112 ne’ebe dala barak komunidade sira hato’o informasaun falsu ba polísia maka Komandu Polísia Nasional Timor-Leste (PNTL) servisu hamutuk ho Autoridade Nasional Komunikasaun (ANC) iha ona tarjetu katak iha fulan Outubru to’o Dezembru 2017 liña 112 livre husi informasaun falsu.

Komandante Operasaun PNTL Superintendente Xefé Henrique da Costa hafoin halo abertura ba formasaun kona-ba polisiamentu komunitaria ba Komandante Eskuadra sira segunda (11/09) orseik iha hotel JL Villa hateten liña 112 ne’e laos servisu mesak parte polísia nian deit maibé iha ekipa ida ne’ebe maka servisu hamutuk ho ANC no ekipa ida ne’e iha ona tarjetu katak fulan tolu ikus iha tinan ne’e liña 112 sei livre husi ema ne’ebe maka hato’o informasaun falsu.

“Fulan Outubru to’o fulan Dezembru telefone sira ne’ebe maka dalaruma sempre uza ID falsu hodi hato’o informasaun falsu ba polísia, bolu polísia katak iha problema maibé realidade laiha problema ho ida ne’e ita espera husi parte ANC nian sira estabelese ou halo koordenasaun ho parte provide telefone sira hanesan Timor Telecom, Telkomsel no mós Telemor bele ona kontrola ho didiak”, tenik Komandante Operasaun PNTL.

Superintendente Xefé Henrique da Costa espera katak parte ANC ho provide sira iha fulan hirak tuir mai bele kontrola hotu ona atu nune’e telefone sira ne’ebe kontaktu mai liña 112 ne’e SIMCARD sira tenke rejistu hotu ona.

Media PNTL.  

Dili-Komandu Polísia Nasional Timor-Leste (PNTL) liu husi Departamentu Polisiamentu Komunitaria Nasional realiza formasaun kona-ba Polísia Komunitaria, NOP, KPK no Lei relevante sira seluk ba Komandante Eskuadra Munisipiu sira.

Komandante Operasaun PNTL Superintendente Xefé Henrique da Costa hafoin halo abertura ba formasaun ne’e hateten formasaun ne’e hanesan kontinuasaun husi primeira faze ne’ebe maka hala’o ona iha semana kotuk ba Komandante Eskuadra sira tanba total partisipantes hamutuk ema 65 nune’e maka fahe ba sesaun rua.

“Workshop ne’e importante tebes-tebes liu-liu ba Komandante Eskuadra sira tanba iha asuntus importante balun ne’ebe maka sei koalia iha workshop ne’e hanesan NOP ba polísiamentu komunitaria nian, segundu kona-ba KPK ninian no mós KSM ninian”, tenik Komandante Operasaun PNTL.

Superintendente Xefé Henrique da Costa akresenta liu tan katak liu husi formasaun ne’ebe maka sei hala’o durante loron lima ne’e, komandante eskuadra sira presija atu hatene nune’e wainhira sira ba hala’o sira nia servisu iha terenu, bele sai hanesan modalidade ida ba sira atu hala’o servisu ho diak.

“Iha formasaun ne’e sei koalia mós kona-ba asuntu seluk hanesan sensibilizasaun Lei Nu.5/2017 kona-ba Lei Arma Branka tanba ita hatene katak iha munisipiu no eskuadra balun hala’o ona operasaun maibé balun mós seidauk halo operasaun ne’e ho sériu no másimu tanba ita mós presija hasa’e sira nia koñesimentu kapasidade, tanba ita hatene Lei refere rigorozu tebes-tebes entaun presija koñesimentu klean molok halo implementasaun”, subliña Superintendente Xefé ne’e.

Iha fatin hanesan Komandante Departamentu Polisiamentu Komunitaria Nasional (DPCN)  Superintendente Asistente António da Luz iha ninia intervensaun ba serimonia ne’e hateten formasaun ba Komandante Eskuadra sira iha workshop ne’e sei koalia kona-ba koñesimentu servisu polisia komuntaria nian no sosializasaun ba NOP tolu ne’ebe maka estabelese iha instituisaun PNTL liu-liu iha polisia komunitaria kona-ba OPS, KPK no KSM.

“Formasaun ida ne’e importante tebes-tebes ba koñesimentu komandante eskuadra sira nian, tanba ita bo’ot sira maka hanesan lideransa másimu iha postu administrativu, eskuadra ne’ebe loron ba loron ita bo’ot sira tau matan ba ita bo’ot sira nia membru liu-liu ba OPS sira ne’ebe koloka iha ita bo’ot sira nia suku”, hateten Komandante DPCN.

Superintendente Asistente António da Luz hateten liu tan katak ho hanoin hirak ne’e maka Komandante Eskuadra sira tenke iha formasaun, tenke iha koñesimentu klean kona-ba normas prosedimentu sira ne’ebe maka estabelese iha PNTL liu-liu kona-ba papel OPS nian.

Formasaun ba faze daruak ne’e hetan suporta husi parseiru desenvolvimentu The Asia Foundation (TAF) no husi total Komandante Eskuadra hamutuk ema 65, partisipantes ba iha sesaun daruak formasaun ninian hamutuk ema 33 ne’ebe maka kompostu husi komandante eskuadra munisipiu hotu no sei hala’o durante loron lima nia laran.

Media PNTL.

Manatuto- Komandu Polisia Nasional Timor-Leste (PNTL) munisipiu Manatuto sosializa programa hari uma ba Ofisial Polisia Suku (OPS) iha munisipiu Manatuto ne’ebe maka sei realiza husi Programa Nasional Dezenvolvimentu Suku (PNDS).

Komandante PNTL munisipiu Manatuto Superintendente Inacio dos Santos Saldanha hateten sosializasaun programa hari uma ba OPS iha suku Uma Kaduak  ne’e ho objetivu atu informa ba komunidade sira konaba planu hodi lori Polisia hakbesik ba komunidade nia leet, Nia hato’o asuntu ne’e foin lalais iha Suku uma Kaduak Manatuto.

Komandante ne’e haktuirtan katak razaun eskolya suku nee hodi hari uma ba OPS iha primeiru pilotu tanba suku ne’e iha mini fabrika, fatin turismu, no fatin movimentu publiku ba munisipiu Baucau, Viqueque no Lautem tanba ne’e maka durante ne’e komunidade sira ejiji prezensa Polisia nian iha sira nia suku hodi fo seguransa.

Em prinsipiu OPS nia prezensa atu hakbesik aan ba komunidade sira nia leet hodi responde prekupasaun komunidade nian; nune’e atu fasilita prosesu hari uma ne’e Komunidade suku uma kaduak oferese rai privadu ba PNTL hodi bele hari uma ba OPS.

Iha okajiaun ne’e Diretora PNDS Dulce G. Junior hateten  inplementasun projetu konstrusaun ne’e presija komunidadesira nia partisipasun maximu tanba iha programa PNDS movilizasaun traballador komunidade sira maka tenke servisu ba projetu ne’e.

Nia haktuirtan katak maske uma ne’e hari ba OPS maibe komunidade sira tenke sente hanesan nain nune’e bele kuida hamutuk nune’e la husik animal tama hodi estragus, komunidade nia konsiensia no responsabilidade inportante hodi tau matan no kuidadu uma ne’ebe maka hari iha sira nia leet.

Ministeriu Interior no ministeriu Estatal halo ona akordu hamutuk atu hari uma OPS hamutuk 13 no tuir planu projetu ne’e sei halao durante fulan tolu nia laran ne’ebe maka inplementa iha tinan ne’e.

Entertantu administrador munisipiu Manatuto Fernando Almeida de Sousa hateten prezensa OPS iha komunidade nia leet hodi hakbesik aan ba komunidade, lori paz no estabilidade iha suku no hametin konfiansa komunidade ba Polisia.

Lori populasaun munisipiu Manatuto no espesialmente komunidade suku uma Kaduak nia naran la haluha  hato’o agradesementu ba parseru sira ne’ebe maka suporta hodi realize programa ne’e.

Partisipa iha Sosilizasaun ne’e reprezentante Embaixador  Nova Zelandia, Xefe Departamentu Polisia Komunitaria, Responsavel PNTL munisipiu Manatuto, Xefe Suku, Komunidade,  OPS no konvidadu sira.  Media PNTL.

Dili- Polisia Nasional Timor-Leste (PNTL) liu husi Komandu Operasaun halo enkontru preparasaun seguransa ba eventu  Tour de Timor (TDT)  Internasional ne’ebe maka sei realiza iha loron 19-23 de Setembru 2017.

Komandante Komandu Operasaun Superintendente Xefe Henrique da Costa hateten enkontru hamutuk ho Komandante munisipiu 5 ho Xefe servisu no Komandante Unidade hodi esplika no fo tarefa ba sira atu halo preparasaun seguransa ba eventu ne’e, Nia hato’o asuntu ne’e ba journalista sira hafoin enkontru iha Kuartel Jeral PNTL Kaikoli Dili, Kinta (07/09).

Komandante Henrique haktuirtan katak Komandu Operasaun husu ba Komando munisipiu ida-idak atu halo kordenasaun no komunikasaun iha nivel munisipiu atu bele pasa informasaun ba komunidade sira liu husi media lokal konaba orariu taka dalan nian.

PNTL sei koloka membru efetivu hamutuk nain 600 hodi fo seguransa maximu ba eventu ne’e.

Rute Tour de Timor tinan 2017 maka munisipiu Dili, Liquica, Ermera,  Bobonaro, Aileu, Ainaro no sei taka dalan depende ba orariu tuir rute ida-idak no parte seguransa halo ona rekoñesementu ba terrenu iha semana kotuk hamutuk ho komisaun organizadora.

Kestiona konaba jeografia Timor-Leste ne’ebe maka tun sae foho, hakur mota nomos dalan barak ne’ebe maka iha risku makaas Komandante Henrique esplika PNTL iha ekipa avansadu ida maka sei ba uluk hodi koloka sinais iha fatin hirak ne’ebe maka identifika hanesan perigu nune’e wainhira siklista sira liu sira hatene katak fatin ne’e perigu.

Iha Okajiaun ne’e Komandante PNTL munisipiu Aileu Superintendente Damião da Silva Coreia hateten Komandu PNTL munisipiu Aileu prontu atu asegura seguransa ba eventu TDT Internasional tanba iha membru sufsiente maibe inportante liu kordensaun tekniku ho Komisaun organizadora nune’e parte siguransa fo atensaun  hodi asegura seguransa maximu.

Tuir informasaun husi Komisaun Organizadora oras ne’e daudaun Siklista nain 200 resin husi nasaun 20 maka rejista ona no rezistrasaun sei kontinua hela ita espera katak hafoin rejistrasaun hotu Komisaun organizadora bele fo informasaun klaru ba autoridade seguransa atu bele fo seguransa ne’ebe maka diak ba eventu TDT tinan ne’e.

Eventu Tour de Timor Internasional hahu  iha tinan 2009 to’o ohin loron no fundador prinsipal maka Eis Prezidente da Republika Jose Ramos Horta ho objetivu atu promove paz, Turismu no seluktan. Media PNTL